UKPEPN̄KPỌ 34
Didie ke Ikeme Ndiwụt ke Imama Jehovah?
Tọn̄ọ ọkọtọn̄ọ ndikpep Bible, ndi esitie fi nte ke emekpere Abasi akan akpa? Ndi akpama ndika iso ndi ufan esie? Ekpedi amama ndika iso ndi ufan esie, ti ete ke nte afo amade enye aka, ke ntre ke enye edinyụn̄ ima fi onyụn̄ ese aban̄a fi. Nso idiwụt Jehovah ke afo amama enye?
1. Nso ke ikpanam man iwụt Jehovah ke imama enye?
Iwụt ke imama Jehovah edieke isikopde uyo esie. (Kot 1 John 5:3.) Enye idọhọke nnyịn ikop uyo imọ m̀mê imama ye mîmaha. Utu ke oro, enye ayak nnyịn ibiere ke idem nnyịn ikpọn̄ m̀mê iyokop uyo imọ m̀mê idikopke. Ntak-a? Jehovah oyom kpukpru owo “ẹkop item ke ofụri esịt.” (Rome 6:17) Ọwọrọ enye oyom nnyịn ikop uyo imọ ke ntak emi imade imọ, idịghe sia ẹnyụn̄ ẹdọhọde ikop. Ọyọhọ ikpehe 3 ye 4 n̄wed emi ayan̄wam fi okụt nte akpanamde se Jehovah amade onyụn̄ asuade se enye asuade man owụt ke amama enye.
2. Nso ikeme ndinam ọsọn̄ nnyịn ndiwụt ke imama Jehovah?
“Edinen owo okụt ediwak afanikọn̄.” (Psalm 34:19) Esisọn̄ nnyịn mme owo ndinam se inende ndusụk ini, sia nnyịn ifọnke ima. Ndusụk ini nsọn̄ọn̄kpọ, ufịk, ye mme mfịna eken ẹsitiene ẹdian ubọk ẹnam ọsọn̄ nnyịn. Ekeme ndisọn̄ nnyịn ndinam se Jehovah ọdọhọde mfịna ama esịm nnyịn. Se isinamde etie ntre edi sia idiọkn̄kpọ esisọp emem owo utom ndinam ke utọ mme ini oro. Edi akpaka iso anam se Jehovah Abasi ọdọhọde, oro oyowụt ke amama enye akan kpukpru n̄kpọ, onyụn̄ owụt ke ọmọsọn̄ọ ada ye enye. Enye ayaka iso odu ye afo. Enye idikpọn̄ke fi tutu amama.—Kot Psalm 4:3.
SỊN IDEM KPEP
Se ntak emi esịt esinemde Jehovah afo ama okop uyo esie. Oyokụt n̄ko se ikemede ndin̄wam fi aka iso anam n̄kpọ esie.
3. Satan ama odori fi ikọ
Okpokot n̄wed Job ke Bible, oyokụt ke Satan ama odori Job ye kpukpru mbon emi ẹnamde n̄kpọ Jehovah ikọ. Kot Job 1:1, 6–2:10, ekem ẹbọrọ mbụme emi ẹnyụn̄ ẹneme ẹban̄a mmọ:
-
Satan ọkọdọhọ ke nso ikanam Job okop uyo Jehovah?—Se Job 1:9-11.
-
Nso ke Satan etịn̄ aban̄a kpukpru owo, esịnede fi?—Se Job 2:4.
Kot Job 27:5b, ekem ẹbọrọ mbụme emi ẹnyụn̄ ẹneme ẹban̄a enye:
-
Didie ke Job okowụt ke imenen̄ede ima Jehovah?
Job ama ọsọn̄ọ ada ye Jehovah, ndien oro ama owụt ke enye ama Jehovah
Nnyịn ikpọsọn̄ọ ida ye Jehovah, oro oyowụt ke imama Jehovah
4. Nam esịt enen̄ede enem Jehovah
Kot Mme N̄ke 27:11, ekem ẹbọrọ mbụme emi ẹnyụn̄ ẹneme ẹban̄a mmọ:
-
Esitie Jehovah didie ke ini afo owụtde ke emenyene ọniọn̄ onyụn̄ okopde uyo esie? Nso inam ọdọhọ ntre?
5. Emekeme ndisọn̄ọ nda ye Jehovah
Ima emi imade Jehovah esinam nnyịn inam mme owo ẹdiọn̄ọ enye. Imesika iso inam mme owo ẹdiọn̄ọ enye idem ke ini mîmemke inọ nnyịn. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
-
Ndi ọsọn̄ fi akpa nditịn̄ nnọ mbon en̄wen mban̄a Jehovah?
-
Ke vidio oro, nso ikan̄wam Grayson enyene uko anam mbon en̄wen ẹdiọn̄ọ ẹban̄a Jehovah?
Nnyịn idikpọn̄ke Jehovah edieke imade se enye amade inyụn̄ isuade se enye asuade. Kot Psalm 97:10, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso ye nso ke ọdiọn̄ọ ke Jehovah ama, tọn̄ọ ọkọtọn̄ọ ndikpep Bible? Nso ye nso ke enye asua?
-
Nso idin̄wam fi ekeme ndima se ifọnde nnyụn̄ nsua se idiọkde?
6. Imesidia ufọn ima ikop uyo Jehovah
Idụhe se ifọnde nte ndikop uyo Jehovah. Kot Isaiah 48:17, 18, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ndi emekere ke Jehovah esidiọn̄ọ se ifọnde ye nnyịn ikan? Nso inam ọdọhọ ntre?
-
Nso ufọn ke adia tọn̄ọ ọkọtọn̄ọ ndikpep Bible onyụn̄ ọtọn̄ọ ndikpep mban̄a Ata Abasi, Jehovah?
NDUSỤK OWO ẸSIDỌHỌ ẸTE: “Owo ikemeke ndinam esịt enem Abasi.”
-
Ewe itie Bible ke akpada anam utọ owo oro ọdiọn̄ọ ke se inamde ekeme ndinem Jehovah mîdịghe abiak enye?
SE IKPEPDE
Iwụt ke imama Jehovah edieke ikopde uyo esie inyụn̄ ikade iso inam n̄kpọ esie kpa ye se iwọrọde nnyịn.
Se M̀mê Emeti
-
Nso ke mbụk Job ekpep fi?
-
Nso idiwụt ke afo amama Jehovah?
-
Nso idin̄wam fi aka iso ọsọn̄ọ ada ye Jehovah?
KPEP N̄KPỌ EN̄WEN
Se nte afo ekemede ndisọn̄ọ nda ye Jehovah ye esop esie.
Kpep n̄kpọ en̄wen ban̄a ikọ emi Satan okodoride kpukpru owo.
Se nte nditọwọn̄ n̄ko ẹkemede ndiwụt ke imama Jehovah.
Nso ikeme ndin̄wam mme uyen ẹsọn̄ọ ẹda ye Jehovah idem ke ini mme ubọkn̄ka mmọ ẹyomde mmọ ẹnam se Jehovah mîmaha?
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
