ANG ỌJẸ́JẸ 34

Ányị Ahị Tị́ ka Bwu Mẹjẹ IJihova Nyori Ọ Háahị?

À me irya nyori à ju Ohe chwẹẹ lẹẹlẹẹ gụ ụka ọlẹ ká dọmwụ nya ịBayịbụụ ọjẹ́jẹ? Ọ háng á ka juwa tụ́ jwoo chwẹẹ gụ ọwọwa? Ọ́ lịnyị aalẹ à kpịtịya nyori iJihova ka la ọháha ẹ-ẹga nyang bala ọ-kpahị jung gụ ọwọwa, jaabwọ kọ wẹẹ yẹ ọháha ọlẹ ká la ẹ-ẹga nyamwụ. Ányị a tị́ ka bwu mẹjọ́ọ nyori ọ háng?

1. Ányị ahị tị́ ka bwu mẹjẹ iJihova nyori ọ háahị?

Ahị ka mẹjẹ nyori iJihova háahị bwula o-jwoo ihi. (Wa 1 ịJọn 5:3.) Ọ́ kaa gbile ọngọngọhẹ ka jwoo ihi la agbụrụ ka. Ọkọkọ nya ọọwa, ọ ya iwe ha ọngọngọọng nyahị nyọka chụ kori kahị ka jwoo ihi lee kori kahị ka jwoo ihi ka. Ịyẹ tị́ du? IJihova tịtọ kahị ka ‘ju ihi nyamwụ bwu ọkịlẹtụ.’ (Ala iRom 6:17) Ọọwa ri, ọ tịtọ kahị ka ju ihi nyamwụ chajị nya ọháha ịnyị, ọọlajị nya ogbilee-gbile ka. Ị họ ụpa 3 bala 4 nya ụpwụ ọlẹ nyọka dang ụbwọ mẹ ọháha nyang jẹ ẹ-ẹga nya iJihova bwula ọ-họ ang ịlẹ kị họ́ọ bala o-cheji ba hi ang ịlẹ kị wọ́ọ ẹjẹ.

2. Ịyẹ tị́ du kọ ka lujwo myị́ nyọka mẹ ọháha nyahị jẹ ẹ-ẹga nya iJihova?

“Ọlabwẹla ọnyịịla ka la iru nya akama myị.” (Eje Ọnyịịla 34:19) Ọ-la kpẹẹkpẹẹ-ka nyahị kaa dahị ahị wuu uya. Ahị tị ka la akama ịkịla myị́, lala okpoko o-ji nwà ka bala ẹla ọkịrọrọ. Ụka kahị la akama, ọ́ ka chịhị kpẹẹ nyọka họ ẹla ọlẹ ká iJihova byihi ka myị́, chajị ụgbẹyị ọtịpyọ ka chịkpẹẹ gụ la o-bwubwu. Ma ụka ká họ ang ọlẹ ká iJihova bying kpọkpọkpọ, à wẹẹ mẹjọ́ọ nyori ọ háng gụ ịngịngịhyẹ ọkịla. À myịmyị mẹjẹ nyori à godayị kpẹẹkpẹẹ o-oye nyamwụ. Ọwa ịnyịnyị ka họ ẹla kpẹẹkpẹẹ ẹ-ẹga nyang. Ọ́ ka tụụbwọ hing ẹnẹnẹhẹ ka.—Wa Eje Ọnyịịla 4:3.

JẸ́ GỤ ỌỌWA

Jẹ́ ang odudu ká iJihova kaa chị ọkẹkẹnị ụka ká jwoo ihi bala ang ọlẹ kọ ka dang ụbwọ nyọka họ ịnyị.

3. Olegu Onyobyi chị ẹla bang

Ahị wa ụ-ụpwụ nya iJobu nyori Olegu Onyobyi nyị chị ẹla ba iJobu bala angịnyị ehe ịkịla wuu ịlẹ kị tịtọ nyọka gbịgba ha iJihova. Wa iJobu 1:1, 6–2:10, kanụ ya ẹla u-uhye nya ịtọ ẹla ịlẹ:

Ịyẹ Olegu Onyobyi à tị́ ya nyị du ká iJobu kaa ju ihi nya iJihova?—Yẹ iJobu 1:9-11.
Ẹlịyẹ Olegu Onyobyi à tị́ ya rụ́ angịnyị ehe wuu, tụng ahụ?—Yẹ iJobu 2:4.

Wa iJobu 27:5b, kanụ ya ẹla u-uhye nya ịtọ ẹla ọlẹ:

Ányị iJobu à tị́ mẹjẹ nyori iJihova họ́ọ ịnyịlẹhị?

IJobu mẹjẹ nyori iJihova họ́ọ bwula ọ-họ ẹla kpọọ ịpyọ

Ahị kaa mẹjẹ nyori iJihova háahị bwula ọ-họ ẹla kpọọ ịpyọ

4. Họ ká iJihova a chị ọkẹkẹnị

Wa Etu 27:11, kanụ ya ẹla u-uhye nya ịtọ ẹla ịlẹ:

Ányị ọ tị́ kaa la iJihova ụka ká jẹ́ ẹla bala o-ju ihi nyamwụ? Ịyẹ tị́ du?

5. À ka jẹ́-ẹ godayị giri-giri ha iJihova

Ọháha ọlẹ kahị la ẹ-ẹga nya iJihova kaa guhi gbịla nyọka ya ẹla nyamwụ je angịkịla. Ahị kaa họ ịnyị kori kọ dọmwụ lahị ujwo, chajị ahị tịtọ nyọka họ ẹla kpọọ ịpyọ ụka myị́ ụka. Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

IFIM: Ya Ọmyịmyị Nyang Dodehe ẹ-Ẹpwụ nya Ọtụpyịpyị (5:09)

Ọ lang ujwo ụka ọhẹ nyọka ya ẹla nya iJihova je angịkịla lẹ?
Ẹ-ẹpwụ nya ifim ọwẹ, ịyẹ à tị́ da Grayson ụbwọ nyọka kụrụ uhihi nyamwụ?

Ọ kaa chịkpẹẹ nyọka họ ẹla kpụ iJihova ịpyọ kori ká ang ịlẹ kị họ́ọ á háahị, ká ang ịlẹ kị wọ́ọ ẹjẹ á wụ́ụhị ẹjẹ ịnyịnyị. Wa Emọsị 5:15, kanụ ya ẹla u-uhye nya ịtọ ẹla ịlẹ:

Jaabwọ ká jẹ́ wẹ, ịyẹ à tị́ ri ang ịhyẹ ịlẹ kị há iJihova? Ịyẹ à tị́ ri ang ịhyẹ ịlẹ kị wọ́ọ ẹjẹ?
Ányị a tị́ ka họ ká ang ọnyịịla ka háng bala ang ọtịpyọ ọ-ka wụ́ng ẹjẹ?