UKỌCHẸ 34

Abu A Neke D’ufẹdọ K’a Nẹ Ñwu Jihofa Ña?

PLAY

Akw’ẹgba k’ẹ chanẹ ech’ukọchẹ Baibul, ẹ neju kaki ẹ mẹr’Ọjọ t’akwobi le? Ẹ tene jẹñwu onukwu wẹ kp’owñ ki chẹ lonyanẹ? Ichẹñwu ki dabalẹ, rewa kaki alu ki Jihofa ali k’ufẹdọ k’ẹ nẹ ñwu owñ agba nyọgba, abalẹ owñ onugo afẹdọ wẹ, i la añọ kwula ñwẹ. Abu ẹ neke du ña kaki ẹ fẹdọ Jihofa?

1. Abu a neke du ña kaki a fẹdọ Jihofa?

A d’ufẹdọ k’a nẹ ñwu Jihofa ña lefu eleb’ọda-wñ. (Gba 1 Jọn 5:3.) Jihofa du ch’atiti ñwu ẹnẹ du ki leb’ọda-wñ n. Ama, i ad’uña ñwu ẹnẹnẹnẹnẹ wa k’a tu ichẹñwu k’a leb’ọda-wñ abẹki a lebọ n. Ẹñwu chi ki d’abalẹ? Jihofa atene k’a gb’ọla-wñ gbọ ‘kpai ẹdọ-wa.’ (Abo Rom 6:17) E-lẹ du ña kaki Jihofa atene k’a leb’ọda-wñ todu k’a fẹdọ-wñ, i che todu ki ch’otila n. Ma ch’ukpẹ 3 kpai 4 efu ọtakada-i ki ch’atẹko wẹ k’ẹ neke d’ufẹdọ k’ẹ nẹ ñwu Jihofa ña lefu ech’amẹñwu ki ajẹñwu ẹdọ-wñ bọ k’a la we chẹñwu ki akp’ẹdọ ñwu biẹ.

2. Ẹñwu chi ki neke gbiti ñwu wa k’a d’ufẹdọ k’a nẹ ñwu Jihofa tejugede?

“Ẹñwu ẹbiẹnẹ ki akẹrẹb’ẹnọkpakpa che wewe.” (Eli Ekọ D’Ọjọ 34:19) A ach’amẹñwu ki ma ch’eju-wñ n todu k’a ma jọkpa n. I n’iko ẹbọ k’ẹñwu agbiti ñwu wa, k’amonẹ ache wa uji, k’a la añọ dejudo am’ihianyi ojoji ojoji. Ichẹñwu k’ẹñwu gbiti ñwu wa abalẹ, i neke jẹñwu ki kọ lọla ñwu wa echẹñwu ki Jihofa atene. Ẹñwu ki chi che kakini ech’ẹñwu ẹbiẹnẹ neke lọla ñwu wa t’echẹñwu ẹnyọ le. Ama, icheñwu k’ẹ chẹñwu ki Jihofa atene kp’ẹdọ wẹ chaka, ẹ du ña kakini ẹ fẹdọ Jihofa t’ẹñwu duu le. Ẹ du ña kaki ẹ kpẹdọr’u, ẹ la gwọnyu kpaka. Owñ onugo la agwọnyu uwẹ kpaka. I d’uwẹ tinyọ ogbegbelẹ n.—Gba Eli Ekọ D’Ọjọ 4:3.

N’UMA NYỌGBA

K’a g’ẹñwu ki chi ki chẹñwu ogbogaga k’ẹ na netiru ọla Jihofa kpai ẹñwu ki neke ch’atẹkọ wẹ k’ẹ na leb’ọda-wñ.

3. Setan agw’ajọ ny’ẹ

Dabalu ki Baibul ka ef’ọtakada Job, i che Job kate Setan gw’ajọ nyu n. I ñọ gw’ajọ nyu ọgbọdu amonẹ ki atene rẹ Jihofa. Gba Job 1:1, 6–2:10, ubilẹ mẹ ch’oluka oji am’ene-i:

Dabalu ki Setan ka, ẹñwu chi ki Job anetiru Jihofa?—G’ọtakada Job 1:9-11.
Ẹñwu Setan ka lugbo ọgbọ amonẹ manyu onugo wẹ?—G’ọtakada Job 2:4.

Gba Job 27:5b, ubilẹ mẹ ch’oluka oji ene-i:

Abu Job du ña kaki i afẹdọ Jihofa nyọnyọ?

Job d’ufẹdọ ki nẹ ñwu Jihofa tejugede lefu egwọnyu Jihofa kpaka

A d’ufẹdọ k’a nẹ ñwu Jihofa tejugede ichẹñwu k’a gwọnyu Jihofa kpaka

4. Jẹñwu ẹdọ Jihofa ki bọ

Gba Ita Ita 27:11, ubilẹ mẹ ch’oluka oji ene-i:

Abu ẹdọ Jihofa adẹ ichẹñwu k’ẹ n’ibe, k’ẹ la aleb’amukọ-wñ? Ẹñwu chi k’ẹ kabalẹ?

5. Ẹ neke gwọnyu Jihofa kpaka

Ufẹdọ k’a nẹ ñwu Jihofa ajẹñwu wa kọla lugbo-wñ ñw’amonẹ. Ufẹdọ lẹ ajẹñwu wa k’a neke kọla lugbo-wñ dagba ki ma lọla n. G’IFIDIO-i, ubilẹ mẹ ch’oluka oji am’ene-i.

IFIDIO: D’ẹdọ Ẹgbo Kọla Lugbo Ẹñwu K’ẹ Kẹdọno Dagba Ku Ma Akob’ẹ (5:09)

I agbiti ñwẹ ekọla ñwu abomunẹ lugbo Jihofa?
Efu ifidio-i, ẹñwu ch’atẹko Grayson ki neke le gw’efu okpo echi du?

I alọla ñwu wa k’a fẹdọ Jihofa ichẹñwu k’a fẹdọ ẹñwu ki afẹdọ, k’a la ach’ulaka ẹñwu ki ach’ulaka. Gba Eli Ekọ D’Ọjọ 97:10, ubilẹ mẹ ch’oluka oji am’ene-i:

Kwefu amẹñwu k’ẹ kọchẹ, ẹñwu ch’amẹñwu ki Jihofa afẹdọ?
Ẹñwu neke ch’abunẹ wẹ k’ẹ na ñeju ẹñwu ẹnyọ k’ẹ la na ch’ulaka ẹñwu ẹbiẹnẹ?

6. A jile ichẹñwu k’a netiru Ọjọ

Enetiru Jihofa chẹñwu ki nyọ tule. Gba Aizaya 48:17, 18, ubilẹ mẹ ch’oluka oji am’ene-i:

Ẹ neju kaki a neke kẹdọno Jihofa kaki i m’ẹñwu ki nyọ ñwu wa tule? Ẹñwu chi k’ẹ kabalẹ?
Ile ẹñwu ẹ nẹ kw’iko k’ẹ chanẹ ech’ukọchẹ lugbo Jihofa kpai Baibul?

ABO KA KAKINI: “Dagba ku ch’ẹnyọ abẹki ku ch’ẹbiẹnẹ, Ọjọ tene ma n.”