TIMEƔRI TIS 34

Amek i nezmer a d-nbeggen belli nḥemmel Yahwa?

SEL S

Teţḥussuḍ belli tqerbeḍ akteṛ ɣer Ṛebbi seg wasmi i tebdiḍ teqqareḍ Adlis Iqedsen? Tebɣiḍ aţ-ţesseǧhdeḍ akteṛ tadukli-inek yid-es? Ur teţţu ara belli mkul m’ara iwali Yahwa belli tḥemmleḍ-t akteṛ, neţţa daɣen a k-iḥemmel w’a d-yelhi yid-ek akteṛ. Amek i tzemreḍ a s-d-tbeggneḍ belli tḥemmleḍ-t?

1. Amek ara s-d-nbeggen i Yahwa belli nḥemmel-it?

Neţbeggin-as-d i Yahwa belli nḥemmel-it m’ara s-neţţaɣ awal (ɣer-ed 1 Yuḥenna 5:3). Yahwa ur yeţḥettim ḥedd a s-yaɣ awal. Yeţţak tagniţ i mkul yiwen ad yextiṛ ma a s-yaɣ awal neɣ ala. Ihi, akken a s-neɛǧeb i Yahwa, ilaq ‘a s-neţţaɣ awal seg wul’ (Iṛumaniyen 6:17). Lmeɛna-s, Yahwa yebɣa a s-teţţaɣeḍ awal s leḥmala, mačči bessif. Iḥricen 3 akk-d 4 n tektabt-agi a k-ɛiwnen akken a d-teţbeggineḍ i Yahwa belli tḥemmleḍ-t m’ara txeddmeḍ ayen i s-yeţţeɛǧaben akk-d m’ara tessebɛadeḍ iman-ik ɣef wayen ur s-neţţeɛǧab ara.

2. Acuɣer i gezmer ad yiwɛiṛ a s-d-nbeggen i Yahwa belli nḥemmel-it?

Adlis Iqedsen yenna-d: “Ţɛeddint aṭas n tlufa ɣef uḥeqqi” (Ahellil 34:20). Akken ma nella neţnaɣ d yiman-nneɣ axaṭer ur nekmil ara. Neţmagar-ed daɣen iɣeblan deg wayen yeɛnan idrimen, yeţɛeddi fell-aneɣ lbaṭel neɣ neţmagar-ed cceddat nniḍen. Ahat ur yeshil ara a nexdem ayen i ɣ-d-yeṭṭalab Yahwa ɛlaǧal n wuguren-agi meṛṛa. Tikwal, yezmer maḍi a ɣ-d-iban belli yeshel akteṛ m’ur s-nuɣ ara awal. Meɛna, ma tezgiḍ teţţaɣeḍ-as awal i Yahwa, a s-d-tbeggneḍ belli tḥemmleḍ-t akteṛ n wayen akk nniḍen. Uyerna, a s-d-tbeggneḍ belli d unṣiḥ i telliḍ. Yahwa daɣen ad yili yid-ek, d lmuḥal a k-yeǧǧ (ɣer-ed Ahellil 4:4).

A NNADI A NEFHEM AKTEṚ

A nwali acuɣer i glaq a s-neţţaɣ awal i Yahwa, a d-nehdeṛ daɣen ɣef wayen ara ɣ-iɛiwnen akken a neqqim d unṣiḥen.

3. Yiwet n temsalt i k-yeɛnan

Taktabt n Yub tessefham-ed belli Cciṭan ur d-igir ara lbaṭel ɣef Yub kan, meɛna ɣef wid akk yebɣan ad qedcen ɣef Yahwa. Ɣret-ed Yub 1:1, 6–2:10, mbeɛd hedṛet ɣef yesteqsiyen-agi:

Ɛlaḥsab n Cciṭan, acuɣer i s-yeţţaɣ awal Yub i Yahwa? (walit Yub 1:9-11).
D acu-t lbaṭel i d-iger Cciṭan ama ɣef yemdanen irkelli, ama fell-ak ula d kečč? (walit Yub 2:4).

Ɣret-ed Yub 27:5b, mbeɛd hedṛet ɣef westeqsi-yagi:

Amek i d-ibeggen Yub belli iḥemmel s ṣṣeḥ Yahwa?

Yub yeqqim d unṣiḥ, swakka ibeggen-ed belli iḥemmel Yahwa.

M’ara neqqim d unṣiḥen i Yahwa, neţbeggin-ed belli nḥemmel-it.

4. Ssefṛeḥ ul n Yahwa

Ɣret-ed Lemtul 27:11, mbeɛd hedṛet ɣef yesteqsiyen-agi:

Acu i geţḥussu Yahwa m’ara txeddmeḍ leḥwayeǧ s lekyasa yerna teţţaɣeḍ-as awal? Ayɣer?

5. Tzemreḍ aţ-ţiliḍ d unṣiḥ i Yahwa

Nḥemmel mliḥ Yahwa, daymi i nheddeṛ fell-as i wiyaḍ. Nnṣaḥa-nneɣ teţţawi-yaɣ a nehdeṛ fell-as ula di teswiɛin ur neshil ara. Walit BIDYU-YAGI, mbeɛd hedṛet ɣef yesteqsiyen i d-iţeddun.

BIDYU: Ţdafaɛ ɣef liman-ik ɣas ma llan wid i k-yeţxaṣamen (5:09)

Teţḥussuḍ tikwal belli yewɛeṛ fell-ak aţ-ţhedṛeḍ i wiyaḍ ɣef Yahwa?
D acu i gɛawnen Qasi akken a s-tekkes tugdi?

Ad yishil akteṛ a nili d unṣiḥen i Yahwa ma nḥemmel ayen i gḥemmel yerna nekṛeh ayen i gekṛeh. Ɣret-ed Ahellil 97:10, mbeɛd hedṛet ɣef yesteqsiyen-agi:

D acu-tent kra si leḥwayeǧ i gḥemmel Yahwa? D acu-tent kra si leḥwayeǧ i gekṛeh?
D acu ara k-iɛiwnen akken aţ-ţḥemmleḍ lxiṛ w’aţ-ţkeṛheḍ cceṛ?

6. Tiɣin n wawal i Yahwa teţţawi-d lfayda

Ulac d acu i gifen tiɣin n wawal i Yahwa. Ɣret-ed Icɛaya 48:17, 18, mbeɛd hedṛet ɣef yesteqsiyen-agi:

Nezmer a netḥeqqeq belli Yahwa yeẓra d acu ara ɣ-inefɛen? Acuɣer?
D acu i d-tesfaydiḍ seg wasmi i tebdiḍ teqqareḍ Adlis Iqedsen yerna teţţissineḍ Yahwa, Ṛebbi n ṣṣeḥ?

KRA QQAREN: “Dɣa d ṣṣeḥ zemreɣ ad ssefṛḥeɣ Ṛebbi s lefɛayel-iw?”