LIÇÃO 34

Ẽg hã ren kỹ ẽg Jeová to há mũ ti ven ke mũ?

TI VEN NĨ

Ã tỹ Topẽ Vĩ Rá to kanhrãn kỹ, ã mỹ Topẽ mré há kãfór nĩ? Ã mỹ Topẽ mré há kãfór hã ki tĩg sór tĩ? Kỹ, mĩ ãkrén nĩ, ã tỹ Jeová to há kãfór kỹ, Jeová vỹ ã to há kar ki rĩr há kãfór ke mũ. Hã ra, ã hã ren kỹ Jeová to há mũ ti ven ke mũ?

1. Ẽg hã ren kỹ ẽg Jeová to há mũ ti ven ke mũ?

Ẽg tỹ Jeová to há mũ ti ven tĩ, ẽg tỹ ti vĩ ki króm kỹ. (1 João 5:3 le kem nĩ.) Ti tỹ vẽnh kar mỹ kuprẽg ti nĩm tĩ, ag tỹ ti vĩ ki króm ke mũ, ke tũ nĩn kỹ vaꞌ. Mỹ ne tugnĩn? Jeová tỹ ẽg “fe tỹ ti ki ge” ve sór tĩ. (Roma 6:17) Kỹ, Topẽ tóg ve sór tĩ, ẽg tỹ ti vĩ ki króm, ẽg fe kãtá. Livro tag tỹ vẽnh kãpãm tỹ 3 kar 4 vỹ ã ajũna kenh, ã tỹ Jeová to há mũ ti ven jé, ã tỹ vẽjykre há han tĩ jé kar vẽjykre kórég han tũ nĩ jé.

2. Jeová to há mũ ti ven tĩ, ẽg mỹ jagy nĩ. Mỹ ne tugnĩn?

“Ũn tỹ vẽnh jykre há han mũ ag tóg kejẽn nén ũ jagy vég tĩ.” (Salmo 34:19) Vẽnh kar tỹ Topẽ vĩ mranh nỹtĩ, kar hãn ri ke mũn, ẽg tỹ jãnkamy tũ nỹtĩ, ẽg tỹ nén ũ kórég kato tẽgtẽ tĩ kar nén ũ jagy ũꞌũ ag nỹtĩ. Ẽg tỹ nén ũ jagy kato tẽgtẽ kỹ, ẽg tỹ vãsãnsãn ke nỹtĩ, ẽg tỹ Jeová mẽ há jé. Hã ra, ã tỹ ũn jykre pir nĩn kỹ kar ã tỹ Jeová vĩ mẽ há kỹ, ã tỹ Jeová to há mũ ti ven ke mũ. Vẽnh kar tỹ vej ke mũ, ã tỹ ũn jykre pir nĩ. Hã kỹ, Jeová tỹ ã to há tãvĩ nĩ gé, ti pi hã re kã ã tovãnh ke mũ. — Salmo 4:3 le kem nĩ.

VẼNH KANHRÃN KÃFÓR NĨ

Ha vé Jeová tỹ ã to há tãvĩ nĩ, ã tỹ ti vĩ jãmã kỹ, kar ne nỹ ã ajũna ke mũ ti, ã tỹ Jeová vĩ jãmã jé.

3. Satanás vỹ ã to vĩ kónãn tĩ

Topẽ Vĩ Rá kã ki, vẽnh rá tỹ Jó ki, ẽg tỹ ki kanhrãn nỹtĩ, Satanás tóg Jó mỹ vĩ kónãn mũ kar ti tỹ ũn ag tỹ Jeová mỹ rãnhrãj tĩ ag to vĩ kónãn tĩ gé. Jó 1:1, 6–2:10 le kem nĩ. Kar jagnẽ mré vẽmén nĩ, nén ũ tag ag to:

Satanás jykre ki, ne tugnĩn Jó vỹ Jeová vĩ ki króm tĩ vã? — Ha vé Jó 1:9-11.
Satanás ne tó tĩ ẽprã ke ag to, ag kãmĩ ã? — Ha vé Jó 2:4.

Jó 23:11, 12 le kem nĩ. Kar jagnẽ mré vẽmén nĩ, tag to:

Jó hã ren kỹ ti Jeová to há mũ ti ven ke?

Jó vỹ Jeová to jykre pir nĩ vã, tag vỹ ven tĩ, ti tỹ Jeová to há pẽ nĩ vã

Ẽg tỹ Jeová to jykre pir nỹtĩn kỹ, ẽg tỹ Jeová to há pẽ vinven tĩ

4. Jeová mỹ sér han nĩ

Provérbios 27:11 le kem nĩ. Kar jagnẽ mré vẽmén nĩ, tag to:

Ã tỹ Jeová mẽ há kỹ kar ti vĩ ki króm kỹ, ti ne tag to ãkrén tĩ? Mỹ ne tugnĩn?

5. Ã tỹ Jeová mỹ jykre pir nĩnh ke mũ

Ẽg tỹ Jeová to há nỹtĩ, tag tugnĩn ẽg tỹ ũn ag mỹ ti to kãmén tĩ. Ẽg tỹ Jeová to jykre pir nỹtĩn kỹ, ẽg tỹ Jeová jẽmẽ há sór tĩ, ge ra ẽg mỹ jagy nĩ, ẽg tỹ ge han jé. Ha vé VÍDEO ti. Kar jagnẽ mré vẽmén nĩ, nén ũ tag ag to:

VÍDEO: Ã nén kri fi tĩ ag vĩ jagfy jẽ mĩ, ge ra ũn ag ã kato vãsãnsãn tĩ (5:09)

Ã hã mỹ, ã tỹ ũn ag mỹ Jeová to kãmén tĩ, tag mỹ jagy nĩ?
Vídeo ki, ne nỹ Cláudio ajũna ké?

Ẽg tỹ nén ũ kórég ag to kry nỹtĩn kỹ, kar ẽg tỹ nén ũ há ag to há nỹtĩn kỹ, ẽg tỹ Jeová to jykre pir nỹtĩnh ke mũ. Salmo 97:10 le kem nĩ. Kar jagnẽ mré vẽmén nĩ, nén ũ tag ag to:

Ã tỹ nén ki kanhrãn ja ẽn ag mĩ ãkrén kỹ, nén ũ ag tỹ ne Jeová vỹ to há nĩ? Nén ũ ag tỹ ne ti tỹ to kry tĩ?
Ã hã ren kỹ ki kanhrãn ke mũ, vẽjykre ag to há nĩ kar vẽjykre kórég ag to kry tĩ?