THUTO 34

Re ka Bontšha Bjang Gore re Rata Jehofa?

BAPALA

Na o ikwa o rata Modimo go feta ge o be o thoma go ithuta Beibele? Na o ka rata go tšwela pele o tiiša segwera sa gago le yena? Ge e ba go le bjalo, Jehofa o tlo bona gore o mo rata kudu, e bile le yena o tlo go rata kudu a ba a go hlokomela. Bjale o ka bontšha bjang gore o a mo rata?

1. Re ka bontšha bjang gore re rata Jehofa?

Re ka bontšha gore re rata Jehofa ka go kwa melao ya gagwe. (Bala 1 Johane 5:3.) Jehofa ga a re gapeletše gore re kwe melao ya gagwe. O nyaka gore re ikgethele ge e ba re nyaka go mo kwa goba re sa nyake go mo kwa. Go re’ng a nyaka gore re ikgethele? Lebaka ke gore o nyaka gore re mo kwe “go tšwa pelong.” (Baroma 6:17) Se se ra gore Jehofa o nyaka gore o mo kwe ka gobane o mo rata, e sego ka gobane o gapeletšega. Go Karolo 3 le 4, o tlo kwa gore o ka bontšha bjang gore o rata Jehofa ka go dira dilo tšeo a di ratago, le go bapalela kgole le dilo tšeo a di hloilego.

2. Ke ka baka la eng ka dinako tše dingwe go le thata go bontšha Jehofa gore re a mo rata?

Psalme 34:19 e re: “Mathata a moloki ke a mantši.” Ka ge ka moka ga rena re na le sebe, re fela re dira diphošo. Le gona ka dinako tše dingwe re ka ba le mathata a tša ditšhelete, batho ba re swara gampe, goba ra ba le mathata a mangwe. Ge re kopana le mathata a, go ka ba thata go dira dilo tšeo Jehofa a di nyakago. Lebaka ke gore ka ge re belegwe re na le sebe, go ba bonolo kudu gore re dire dilo tše mpe. Eupša ge o ekwa melao ya Jehofa le ge go le thata, o tla be o bontšha gore o mo rata go feta dilo ka moka. Le gona o tla be o bontšha gore o a mo tshepagalela. Le yena o tla go tshepagalela e bile a ka se tsoge a go lahlile.—Bala Psalme 4:3.

ITHUTE KA MO GO TSENELETŠEGO

Ekwa gore ke ka baka la eng go le bohlokwa gore o kwe Jehofa le gore o ka thušwa ke eng gore o dule o mo kwa.

3. Taba yeo Sathane a e boletšego ka Jobo le wena e a go ama

Ge re bala puku ya Jobo, re kwa gore Sathane o ile a re Jobo le batho ka moka bao ba nyakago go hlankela Jehofa, ba hlankela Jehofa ka gobane a ba direla dilo tše itšego, e sego ka gobane ba mo rata. Balang Jobo 1:1, 6–2:10, gomme le boledišaneng ka dipotšišo tše di latelago:

Go ya ka Sathane, ke ka baka la’ng Jobo a be a ekwa Jehofa?—Bona Jobo 1:9-11.
Ke taba efe yeo Sathane a e boletšego ka batho, yeo le wena e go amago?—Bona Jobo 2:4.

Balang Jobo 27:5b, gomme le boledišaneng ka potšišo e latelago:

Jobo o ile a bontšha bjang gore o rata Jehofa ka pelo ya gagwe ka moka?

Jobo o ile a bontšha gore o rata Jehofa ka pelo ya gagwe ka moka ka go dula a mo kwa

Re bontšha gore re rata Jehofa ka go dula re mo kwa

4. Thabiša Jehofa

Balang Diema 27:11, gomme le boledišaneng ka dipotšišo tše di latelago:

Jehofa o ikwa bjang ge o mo kwa? Go re’ng o re’alo?

5. Le wena o ka kgona go dula o ekwa Jehofa

Go rata Jehofa go tlo re dira gore re nyake go botša batho ka yena, e bile re tlo dira bjalo le ge go se bonolo. Bapalang BIDIO ye, gomme le boledišaneng ka dipotšišo tše di latelago:

BIDIO: Emela Tumelo ya Gago le ge o Ganetšwa (5:09)

Na ka dinako tše dingwe o tšhaba go botša batho ba bangwe ka Jehofa?
Bidiong ye, Moshohli o ile a thušwa ke’ng gore a se sa tšhaba go botša batho ka Jehofa?

Go ba bonolo gore re dule re ekwa Jehofa ge re rata dilo tšeo a di ratago, e bile re hloya dilo tšeo a di hloilego. Balang Psalme 97:10, gomme le boledišaneng ka dipotšišo tše di latelago:

Go ya le kamoo o šetšego o ithutilego Beibele, ke dilo dife tšeo Jehofa a di ratago le tšeo a di hloilego?
O ka thušwa ke’ng gore o rate dilo tšeo Jehofa a di ratago, gomme o hloye tšeo a di hloilego?