34. LEKCIJA
Sar šaj te mothova so mangaja e Jehova?
Akana ked sikljoveja andi Biblija, da li mislineja so uljan pana popaše e Jehovaja? Da li mangeja hem ponodri te zorjaćere to amalipe oleja? Ako tano ađahar, ma bistri so ked o Jehova dikhela kobor to mangipe premalo leste barjola hem ov tut pana pobuter ka mangel hem ka brinini pe tutar. Sar šaj te mothove so mangeja le?
1. Sar mothovaja e Jehovase so mangaja le?
Ked šunaja e Jehova, amen mothovaja lese so mangaja le. (Čitinen 1. Jovanova 5:3.) Ov na ćhivela amen zorjeja te šuna le. Umesto odova, svako amendar šaj te odlučini da li ka šunel le ja na. Sose tano odova ađahar? O Jehova mangela vilestar te šuna le (Rimljanima 6:17). Odova značini so ov mangela te šuna le sose mangaja le. Ko 3. hem ko 4. deo andi akija knjiga ka sikljova sar amaro mangipe premalo Jehova šaj te mothova ked ćeraja odova so ov mangela hem ked cidaja amen kotar odova so ov mrzini.
2. Sose šaj te ovel pharo te mothova so mangaja e Jehova?
„But pharipa isi le o pravedno manuš“ (Psalam 34:19). Sare isi amen amare mane hem borinaja amen olencar. Isto ađahar, sare đanaja soj tano pharo ked nane amen dovoljno pare, ked nakhaja disavi nepravda ja ked isi amen avera problemija. Ked hijam ko problemija, šaj te ovel amenđe pharo te ćera odova so o Jehova rodela amendar. Tegani šaj te dićhol soj tano polokho te na šuna e Jehova. Ama, ked ćereja odova so o Jehova mangela, tu mothoveja so mangeja le pobuter kotar bilo so aver. Isto ađahar, tu mothoveja so hijan verno olese. Sebepi odova, hem ov ka ovel verno tuće hem niked na ka mukhel tut. (Čitinen Psalam 4:3.)
SIKLJOV POBUTER
Dikh sose tano o Jehova bahtalo ked šuneja le hem so šaj te pomožini tut te aćhove lese verno.
3. O Beng optužini tut
Premali biblijaki knjiga Jov, o Beng na samo so optužinđa e Jove, već optužinđa sa e manušen kola mangena te služinen e Jehovase. Čitinen Jov 1:1, 6–2:10, hem palo odova vaćeren ando akala pućiba:
-
Premalo Bengese lafija, sose o Jov šunđa e Jehova? (Dikhen Jov 1:9-11.)
-
So o Beng phenđa kotar sa o manuša pa čak hem tutar? (Dikhen Jov 2:4.)
Čitinen Jov 27:5b, hem palo odova vaćeren ando akava pućibe:
-
Sar o Jov mothovđa so ćaće mangela e Jehova?
O Jov mothovđa so mangela e Jehova ađahar so aćhilo lese verno
Amen mothovaja so mangaja e Jehova ađahar so hijam verna olese
4. Ćer e Jehova bahtalo
Čitinen Poslovice 27:11, hem palo odova vaćeren ando akala pućiba:
-
Sar o Jehova osetini pe ked hijan mudro hem ked šuneja le? Sose osetini pe ađahar?
5. Tu šaj te ove verno e Jehovase
Amaro mangipe premalo Jehova podstaknini amen te vaćera averenđe olestar. Amari vernost olese pomožini amen te ćera odova čak ked nane lokho. Dikhen o VIDEO, hem palo odova vaćeren ando akala pućiba:
-
Da li tano tuće podijekh puti pharo te vaćere averenđe ando Jehova?
-
So pomožinđa e Grejsonese te ovel hrabro?
Ked mangaja odova so o Jehova mangela hem ked mrzinaja odova so ov mrzini, amenđe ka ovel polokho te ova lese verna. Čitinen Psalam 97:10, hem palo odova vaćeren ando akala pućiba:
-
Premalo odova so sikljiljan đi akana, kola buća o Jehova mangela, a kola buća ov mrzini?
-
Sar šaj te sikljove te mange odova soj tano šukar hem te mrzine odova soj tano lošno?
6. Amare šukaripase tano te šuna e Jehova
Uvek tano šukar te šuna e Jehova. Čitinen Isaija 48:17, 18, hem palo odova vaćeren ando akala pućiba:
-
So mislineja, da li o Jehova uvek đanela soj tano najšukar amenđe? Sose mislineja ađahar?
-
Sar odova so đi akana sikljiljan andi Biblija pomožinđa tuće?
AKO NEKO PHENELA: „E Devlese nane važno so me ćerava.“
-
Kova stih šaj te koristine te mothove so o Jehova šaj te ovel bahtalo ja tužno sebepi odova so ćeraja?
SO SIKLJILJAM
Tu šaj te mothove so mangeja e Jehova ađahar so ka šune le hem so ka aćhove lese verno čak ked tano tuće pharo.
Te ponovina
-
So sikljiljan ando Jov?
-
Sar šaj te mothove so mangeja e Jehova?
-
So šaj te pomožini tut te aćhove verno e Jehovase?
RODE POBUTER
Sikljov sar šaj te ove verno e Jehovase hem e phralenđe hem e phenjenđe.
Sikljov pobuter sar o Beng optužini sa e manušen.
Dikh sar šaj o ćhave te mothoven so mangena e Jehova.
Sar šaj o terne te aćhon verna e Devlese čak ked avera ćhivena len te ćeren diso lošno?
Dikhen hem akava
NAJČEŠĆA PUČIBA
Sar izgledini jekh biblijako kurs ando Jehovase svedokija?
O proučibe tano besplatno, šaj te koristinen o prevod andi Biblija kova tumen mangena hem ko kurs šaj te vićinen celo tumare porodica ja nekas ando tumare amala.
