YE TI MANDA 34
Tongana nyen la e peut ti fa so e ye Jéhovah?
Mo bâ so mo ga nduru mingi na Nzapa ngbene ye so mo komanse ti manda Bible? Eskê mo ye ti ngbâ ti kpengba songo ti mo na lo? Tongana a yeke tongaso, girisa ape so tongana Jéhovah abâ so mo ye lo mingi, lo nga kue lo yeke ye mo mingi nga lo yeke bâ lege ti mo. Tongana nyen la mo peut ti fa na lo so mo ye lo?
1. Tongana nyen la e yeke fa na Jéhovah so e ye lo?
E yeke fa na Jéhovah so e ye lo tongana e mä yanga ti lo. (Diko 1 Jean 5:3.) Lo gbu zo oko na ngangu ti mä yanga ti lo ape. Me, lo zia lege na e oko oko kue ti soro ti mä yanga ti lo wala pëpe. Ngbanga ti nyen? Jéhovah aye ti tene e mä yanga ti lo ‘na bê ti e kue’. (aRomain 6:17). Ye so aye ti tene so lo ye ti tene mo mä yanga ti lo, pëpe ngbanga ti so mo doit ti sara ni, me ngbanga ti so mo ye lo. A leke mbage 3 nga na 4 ti buku so ti mû maboko na mo ti fa na Jéhovah so mo ye lo na lege so mo sara aye so azia ngia na bê ti lo nga mo ke aye so azia vundu na bê ti lo.
2. Ngbanga ti nyen la a peut ti duti ngangu ti tene e fa na Jéhovah so e ye lo?
“Aye ti ngangu so asi na zo ti mbilimbili ayeke mingi”. (Psaume 34:19). E kue e yeke tiri na awokongo ti e. E lingbi nga ti wara kpale ti nginza, a peut ti sara ye na e na lege ni ape nga e peut ti wara ambeni kpale nde. Tongana e wara akpale, a peut ti duti ngangu na e ti sara aye so Jéhovah ahunda na e ti sara. A yeke ndali ti so a yeke ngangu ape ti ke yanga ti Jéhovah. Me tongana mo sara aye so Jéhovah ahunda na mo ti sara, mo yeke fa na lo so mo ye lo mingi ahon aye kue. Mo yeke fa nga so mo yeke be-ta-zo na lo. Lo yeke fa nga so lo yeke be-ta-zo na mo. Lo yeke zia mo lâ oko ape.—Diko Psaume 4:3.
GI TI HINGA AYE MINGI
Gi ti hinga ndani so a yeke kota ye na Jéhovah ti tene mo mä yanga ti lo, nga gi ti hinga aye so apeut ti aidé mo ti ngbâ be-ta-zo na lo.
3. Mbeni tënë so abâ mo
Mbeti ti Job atene so Satan abi tënë na li ti Job nga na azo kue so aye ti sara na Jéhovah. Diko Job 1:1, 6–2:10, na pekoni kiri tënë na ahunda so:
-
Ti Satan, Job amä yanga ti Jéhovah ngbanga ti nyen?—Bâ Job 1:9-11.
-
Satan atene nyen na ndö ti azo kue, so mo kue mo yeke na popo ni?—Bâ Job 2:4.
Diko Job 27:5b, na pekoni kiri tënë na hunda so:
-
Tongana nyen la Job afa so lo ye biani Jéhovah?
Job afa so lo ye Jéhovah na lege so lo ngbâ be-ta-zo na lo
E yeke fa so e ye Jéhovah tongana e ngbâ be-ta-zo na lo
4. Zia ngia na bê ti Jéhovah
Diko aProverbe 27:11, na pekoni kiri tënë na ahunda so:
-
Tongana mo sara ye na ndara nga mo mä yanga ti Jéhovah, a yeke sara lo tongana nyen? Ngbanga ti nyen?
5. Mo peut ti duti be-ta-zo na Jéhovah
Yengo so e ye na Jéhovah apusu e ti sara tënë ti lo na azo. Dutingo be-ta-zo na lo apusu e ti sara ni atâa so a yeke kete ye ape. Zia VIDÉO ni, na pekoni kiri tënë na ahunda so:
-
Eskê a yeke ngangu na mo ti sara tënë ti Jéhovah na azo?
-
Na yâ ti vidéo ni, nyen la a-aidé Grayson ti hon ndö ti mbeto ti lo?
A yeke ngangu ape ti duti be-ta-zo na Jéhovah tongana e ye aye so lo ye nga e ke aye so lo ke. Diko Psaume 97:10, na pekoni kiri tënë na ahunda so:
-
Ti gue oko na aye so mo manda, ambeni ye wa la Jéhovah aye ni? Ambeni ye wa la lo ke ni?
-
Tongana nyen la mo peut ti manda ti ye aye so ayeke nzoni nga ti ke aye so ayeke sioni?
6. Tongana e mä yanga ti Jéhovah e yeke bâ nzoni dä
Ti mä yanga ti Jéhovah ayeke lakue nzoni mingi. Diko Ésaïe 48:17, 18, na pekoni kiri tënë na ahunda so:
-
Mo pensé so e peut ti duti na confiance so Jéhovah ahinga lakue aye so ayeke nzoni mingi ndali ti e? Ngbanga ti nyen?
-
Tongana nyen la aye so mo manda na yâ ti Bible nga na ndö ti tâ Nzapa Jéhovah aga na mo aye ti nzoni?
AMBENI ZO ATENE: “Aye so mbi sara ayeke kota ye na lê ti Nzapa ape.”
-
Versê wa la mo yeke sara kua na ni ti fa so aye so e sara apeut ti zia ngia wala vundu na bê ti Jéhovah?
NA NDURU TËNË
Mo peut ti fa so mo ye Jéhovah tongana mo mä yanga ti lo nga mo ngbâ be-ta-zo na lo atâa akpale so mo wara.
Dango bê
-
Nyen la mo manda na lege ti tapande ti Job?
-
Tongana nyen la mo yeke fa so mo ye Jéhovah?
-
Nyen la ayeke aidé mo ti ngbâ be-ta-zo na Jéhovah?
GI NDA TI YE
Gi ti bâ tongana nyen la mo peut ti duti be-ta-zo na Jéhovah nga na congrégation.
Gi ti hinga ye mingi na ndö ti atënë so Satan abi na li ti azo.
“Job angbâ na ndö ti sarango ye ti lo ti mbilimbili” (Tënë ti nyen la ayeke na yâ ti Bible? mbage 6)
Bâ tongana nyen la même amolenge apeut ti fa so ala ye Jéhovah.
Tongana nyen la mbeni maseka so amba ti lo apusu lo ti sara ye ti sioni apeut ti ngbâ be-ta-zo na Nzapa?
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
