KHAOLO EA 34

Re ka Bontša Jehova Joang Hore Rea mo Rata?

BAPALA

Na u ikutloa u le haufi le Molimo ho feta ha u ne u qala ho ithuta Bibele? Na u ka rata hore setsoalle sa hao le eena se ’ne se tiee le ho feta? Haeba ho joalo, hopola hore ha Jehova a bona u ntse u mo rata le ho feta, o tla u rata a be a u hlokomele le ho feta. U ka mo bontša joang hore oa mo rata?

1. Re ka bontša Jehova joang hore rea mo rata?

Re ka bontša hore re rata Jehova ka ho mo mamela. (Bala 1 Johanne 5:3.) Ha a qobelle mang kapa mang hore a mo mamele. Ho fapana le hoo, o fa e mong le e mong oa rona monyetla oa hore a ikhethele hore na o tla mo mamela kapa che. Hobane’ng? Hobane Jehova o batla hore re mo mamele “ho tloha pelong.” (Baroma 6:17) Sena se bolela hore o batla hore u mo mamele hobane u mo rata, eseng hobane u tlamehile. Karolo ea 3 le ea 4 tsa buka ena li etselitsoe ho u thusa ho bona hore u ka bontša hore u rata Jehova ka ho etsa lintho tse mo thabisang le ho qoba ho etsa lintho tse ka mo koatisang.

2. Ke hobane’ng ha ho ka ’na ha e-ba thata ho bontša hore re rata Jehova?

“Litlokotsi tsa ea lokileng li ngata.” (Pesaleme ea 34:19) Kaofela ha rona ha rea phethahala hape re ka ’na ra ba le mathata a lichelete, ra tšoaroa hampe kapa ra ba le mathata a mang. Ha re e-na le mathata, re ka ’na ra utloa ho le thata ho etsa seo Jehova a se batlang. Lebaka ke hore ho ka ’na ha e-ba bonolo ho etsa se fosahetseng ho e-na le ho khahlisa Jehova. Haeba u tšepahalla Jehova ka ho etsa lintho tseo a reng u li etse, u tla be u bontša hore u mo rata ho feta ntho leha e le efe hape u tla be u bontša hore oa mo tšepahalla. Kahoo, le eena o tla u tšepahalla. A ke ke a u lahla le ka mohla.—Bala Pesaleme ea 4:3.

ITHUTE LINTLHA TSE LING

Ithute hore na ke hobane’ng ha Jehova a tsotella hore na oa mo mamela kapa che le hore na u ka thusoa ke’ng hore u lule u mo tšepahalla.

3. Qoso e u amang

Ho ea ka buka ea Jobo, Satane o qositse Jobo hammoho le bohle ba batlang ho sebeletsa Jehova. Bala Jobo 1:1, 6–2:10 ebe le buisana ka lipotso tsena:

Ho ea ka Satane, ke hobane’ng ha Jobo a ne a mamela Jehova? (Sheba Jobo 1:9-11.)
Satane o qositse batho bohle ka eng? (Sheba Jobo 2:4.)

Bala Jobo 27:5b ebe le buisana ka potso ena:

Jobo o ile a bontša joang hore o rata Jehova e le kannete?

Jobo o ile a bontša hore o rata Jehova ka ho lula a mo tšepahalla

Re ka bontša hore re rata Jehova ka ho lula re mo tšepahalla

4. Thabisa pelo ea Jehova

Bala Liproverbia 27:11 ebe le buisana ka lipotso tsena:

Jehova o ikutloa joang ha u le bohlale ebile u mo mamela? Ke hobane’ng ha a ikutloa joalo?

5. U ka khona ho tšepahalla Jehova

Tsela eo re ratang Jehova ka eona e re susumeletsa hore re bolelle batho ba bang ka eena. Kaha rea mo tšepahalla, re etsa joalo leha ho le thata. Bapala VIDEO ebe le buisana ka lipotso tse latelang:

VIDEO: Emela Seo U se Lumelang Leha U Hanyetsoa (5:09)

Na u ee u utloe ho le thata ho bolella batho ba bang ka Jehova?
Videong ee, ke eng e thusitseng ntate Grayson hore a be sebete?

Ho bonolo ho tšepahalla Jehova ha re rata lintho tseo a li ratang re bile re hloile tseo a li hloileng. Bala Pesaleme ea 97:10 ebe le buisana ka lipotso tsena:

Ho latela seo u ithutileng sona, Jehova o rata’ng? Tse ling tsa lintho tseo a li hloileng ke life?
U ka etsa’ng hore u rate se setle, u hloee se sebe?

6. Ho mamela Jehova ho re tsoela molemo

Ho mamela Jehova ho molemo kamehla. Bala Esaia 48:17, 18 ebe le buisana ka lipotso tsena:

Na u nahana hore Jehova o lula a tseba lintho tse ka re tsoelang molemo? Ke hobane’ng ha u cho joalo?
U fumane melemo efe ka ho ithuta ka Molimo oa ’nete Jehova le ka ho ithuta Bibele?

BATHO BA BANG BA RE: “Molimo ha a tsotelle hore na ke etsa’ng.”