FUNDO 34

Tingapangidza Kudini Kuti Tinoda Djehovha?

PLAY

Maakuzwa muri dhuze na Mwari kubva pemakatanga kufunda Bhaibheri here? Munoda kurumbwa mecibambisa ushamwari wenyu naye here? Kana zviri izvona, edzurirai kuti pamunotunhudzira kuda Djehovha, iyena anozviona uye acamudawo. Hino mungapangidza kudini kuti munoda Djehovha?

1. Tingapangidza kudini kuti tinoda Djehovha?

Tinopangidza kuti tinoda Djehovha patinomuzwira. (Erengai 1 Juau 5:3.) Iyena aabambidziri munhu kumuzwira. Iyena anopasa munhu umwe na umwe mukana wekusanangura kuti acamuzwira kana kuti haiwa. Ngei? Ngekuti Djehovha anoda kuti timuzwire ‘no mwoyo wese.’ (Aroma 6:17) Iyena anoda kuti mumuzwire no mwoyo wese haiwa kuita zvekubambidzirhwa. Dii 3 no 4 re bhuku rino, ricamubetsera kuti mupangidze rudo kuna Djehovha nge kuita zviro zvinomupfadza uye nge kusama kuita zviro zvaanozonda.

2. Ngei zvecishupha nguwa dzimweni kupangidza kuti tinoda Djehovha?

“Matambudziko e munhu munatsi akawanda.” (Pisarema 34:19) Tese tinorhwisana nokusama kukwana kedu. Pamweni tingabatana no zvinetso zvekusama kugara no mare, kusama kupangidzirhwa unatsi uye zvinetso zvimweni. Patinobatana no matambudziko, zvingatishupira kuita zvatinokumbirhwa na Djehovha. Izvona zvinoitika ngekuti kuita zviro zvakashata zvinoita hingana zviri nyore. Asi, pamunorumbwa makagondeka uye mecizwira Djehovha, munopangidza kuti munomuda maningi kupinda ciro cipi haco. Munopangidza kuti makagondeka. Ndiyo ndaa, Djehovha acagarawo munhu akagondeka kamuri. Iyena aazomusii narini.—Erengai Pisarema 4:3.

FUNDAI ZVAKAWANDA

Ongororai kuti ngei zvecikosha kuna Djehovha kuti mumuzwire uye cinyi cingamubetsera kuti mugare munhu wakagondeka kaari.

3. Nyaya inobatanidzawo imwimwi

Mu Bhaibheri, mu bhuku ra Djobo, tinoerenga kuti Sathani wakapumha Djobo no anhu ese anoda kuseenzera Djehovha. Erengai Djobo 1:1, 6–2:10, pedzepo cedzai nge zve mibvunzo dzinoteera:

Sathani wakati Djobo waiseenzera Djehovha ne cikonzero cei?—Onai Djobo 1:9-11.
Sathani unobhuyei nge zve anhu ese kubatanidzawo imwimwi?—Onai Djobo 2:4.

Erengai Djobo 27:5b, pedzepo cedzai nge zve mubvunzo unoteera:

Djobo wakapangidza kudini kuti wainyasa kuda Djehovha?

Djobo wakapangidza kuti waida Djehovha paakarumbwa akagondeka kaari

Isusu tinopangidza kuti tinoda Djehovha kana tikarumbwa takagondeka kaari

4. Pfadzai mwoyo wa Djehovha

Erengai Zvierengo 27:11, pedzepo cedzai nge zve mibvunzo dzinoteera:

Djehovha anozwa kudini pamunomuzwira? Ngei?

5. Zvinobvira kurumbwa makagondeka kuna Djehovha

Isusu tinoda Djehovha, uye ndizvo zvinotibambisa kuti tibhuye no amweni nge zvake. Nge kugondeka kuna Djehovha, tinoda kumuzwira, kunyazi patinonga tiri pa nguwa inoshupha. Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Tsigirai Kutenda Kenyu Kunyazi Pamunoshorhwa (5:09)

Munoona kuti zvinoshupha kubvunzawo amweni nge zva Djehovha here?
Mu vhidhiyo yataona, cinyi cakabetsera Grayson kuti akunde kuthya?

Azvishuphi kugondeka kuna Djehovha kana tikada zvaanoda uye tozonda zvaasikadi. Erengai Pisarema 97:10, pedzepo cedzai nge zve mibvunzo dzinoteera:

Mecirangarira zvemakafunda, ngazvipi zvinodiwa na Djehovha? Uye ngazvipi zvaanozonda?
Mungafundira kudini kuda zviro zvakanaka uye kuzonda zviro zvakashata?

6. Tinobetsereka patinozwira Djehovha

Kuzwira Djehovha nguwa dzese i ciro cakanaka catingaita. Erengai Isaya 48:17, 18, pedzepo cedzai nge zve mibvunzo dzinoteera:

Munogonda kuti Djehovha anoziya zvakatinakira nguwa dzese here? Ngei?
Zviro zvamakafunda mu Bhaibheri uye nge zva Mwari we cokwadi Djehovha, zviri kumubetsera kudini dakara zvino?

ANHU AMWENI ANOTI: “Mwari aarhwadziwi ne zvandinoita uye aazvioni kana ndikaita zvakanaka.”