LESON 34
Akory Han̈aboahantsika fa Tiantsika Jehovah?
Izikoa ampitovisin̈y taminy anao vo nianatra Baiboly, asa anao izioty mahatsapa fa nahainitombo fitiavanao Zan̈ahary? Asa mba tianao hankatsara fikamaradiananao aminany? Aza adin̈a fa hitombo koa fitiavany Jehovah anao ndreky fikarakarany anao, koa fa hitany mahaimitombo fitiavanao izy. Akory han̈aboahanao aminany fa anao tia izy?
1. Akory han̈aboahantsika fa atsika tia Jehovah?
Fan̈arahan̈a volan̈a Jehovah ahitan̈a fa atsika tia izy. (Vakia 1 Jaona 5:3.) Izy tsy miforise olo han̈araka volan̈anany foeky. Ambelany atsika mifidy han̈araka volan̈anany sa tsy han̈araka. Nan̈ino? Fotony tiany izikoa ‘baka an̈aty fontsika fan̈arahantsika volan̈anany.’ (Romanina 6:17) Dikanizen̈y, tiany izikoa tsy nohony adidy han̈arahanao volan̈anany, fa nohony fitiavanao izy. Fizaran̈a 3 ndreky 4 amy boky ty natao han̈ampian̈a anao han̈aboaka fitiavanao Jehovah, ke han̈anovanao raha tiany ndreky ialanao amy raha tsy mamparavoravo izy.
2. Ino mety mampasarotro fan̈aboahan̈a fitiavan̈a Jehovah io?
“Maro raha mampijaly olo marin̈y.” (Salamo 34:19) Atsika jiaby io samy miady amy tsy fahalavorarian̈antsika tompiny. Atsika koa mety sahiran̈a vo mahita vola, mety avoa raha tsy rariny, ndreky mety tojy problemo maro koa. Atsika koa tojy raha sarotro, mety tsy ho mora man̈ano raha irahiny Jehovah ataontsika. Mety hanjary halaky ho voantsory han̈ano raha tsy tiany Jehovah atsika amy zen̈y. Fa anao koa mifen̈y fo man̈ano raha an̈irahany Jehovah anao, aboakanao amy zen̈y fa tsisy raha atakalonao fitiavanao izy. Zen̈y koa han̈aboahanao fa anao tsy mivadiky aminany. Anao koa man̈ano zen̈y, izy koa tsy hivadiky aminao. Anao tsy hariany foeky.—Vakia Salamo 4:3.
ALEVA ONON̈O
Diniha nan̈ino mamparavoravo Jehovah anao koa man̈araka volan̈anany, avio ino raha han̈ampy anao, baka anao tsy hivadiky aminany foeky.
3. Adihevitry mahatafiditry anao
Amy bokiny Joba amy Baiboly ao, Satana mankaratsy Joba ndreky olo jiaby tihanompo Jehovah. Vakia Joba 1:1, 6–2:10, avio iaraha dinihin̈y fan̈ontanian̈a aby ty:
-
Ino ho Satana nahavy Joba nan̈araka volan̈a Jehovah?—Zahava Joba 1:9-11.
-
Ino raha nivolan̈iny Satana momba olo jiaby, an̈atinizen̈y anao?—Zahava Joba 2:4.
Vakia Joba 27:5b, avio iaraha dinihin̈y fan̈ontanian̈a ty:
-
Akory nan̈aboahany Joba fa izy ten̈a tia Jehovah?
Naboakany Joba fa tia Jehovah izy, ke tsy nivadiky tamy Jehovah foeky izy
Aboakantsika fa tia Jehovah atsika ke atsika tsy mivadiky aminany foeky
4. Ataova raha mamparavoravo fony Jehovah
Vakia Ohabolana 27:11, avio iaraha dinihin̈y fan̈ontanian̈a aby ty:
-
Man̈ano karakory fony Jehovah, izikoa anao misy jery ndreky man̈araka volan̈anany? Nan̈ino?
5. Hahavita tsy hivadiky amy Jehovah anao
Fitiavantsika Jehovah io mandrisiky atsika hikoran̈a aminolo raha momba izy. Handrisiky atsika han̈ano zen̈y koa tsy fivadihantsika aminany, ndray amy raha sarotro. Alifasa VIDEO io, avio iaraha dinihin̈y fan̈ontanian̈a aby ambany io.
-
Asa anao mba efa nahatsapa fa sarotro taminao nikoran̈a taminolo raha momba Jehovah?
-
Tamy video in̈y, ino raha nan̈ampy Grayson nandresy tahotronany?
Tsy ho sarotro amintsika tsy hivadiky amy Jehovah, izikoa atsika tia raha tiany avio tsy tia raha tsy tiany. Vakia Salamo 97:10, avio iaraha dinihin̈y fan̈ontanian̈a aby ty:
-
Miorin̈y amy raha efa nianaranao, ino aby raha tiany Jehovah? Ino aby raha halany?
-
Akory hianaranao ho tia raha tsara ndreky tsy ho tia raha ratsy?
6. Hahazo hatsaran̈a atsika koa man̈araka volan̈any Jehovah
Man̈araka volan̈a Jehovah io raha farany tsara. Vakia Isaia 48:17, 18, avio iaraha dinihin̈y fan̈ontanian̈a aby ty:
-
Anao ma matoky fa Jehovah mahay raha ten̈a mahatsara atsika? Nan̈ino?
-
Ino hatsaran̈a efa nazonao rango nianaranao Baiboly ndreky nianaranao Jehovah Zan̈ahary marin̈y?
MISY OLO MIVOLAN̈A: “Zan̈ahary tsy mijery zay raha ataoko.”
-
Ino toko sy andininy mety han̈azavanao aminolo fa jireny Zan̈ahary zay raha ataontsika?
INO RAHA NIANARANAO TATO?
Tia Jehovah anao izikoa man̈araka volan̈anany ndreky tsy mivadiky aminany, ndray tsy mora man̈ano zen̈y.
Fan̈ontanian̈a Fameren̈ana
-
Ino raha ianaranao amy Joba?
-
Akory han̈aboahanao fa anao tia Jehovah?
-
Ino raha han̈ampy anao tsy hivadiky amy Jehovah?
ZAHAVA
Zahava akory hataonao tsy hivadiky amy Jehovah ndreky amy fiangonan̈a.
Diniha ino aby fankaratsian̈a nataony Satana aminolo.
“Joba Tsy Nivadiky Foeky” (Ino ma Raha Voakoran̈a amy Baiboly Io? fizaran̈a 6)
Zahava fa nata tsaiky madiniky mbala afaka man̈aboaka fa iro tia Jehovah.
Akory mety hataony tanora araiky, baka izy tsy haditry karaha tanora hafa aby io?
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
