LISON 35

Ki Mannyè Nou Sa Fè Bon Disizyon?

JWÉ

Nou tout ni pou fè disizyon. Plizyè disizyon nou ni pou fè sa vwéman afèkté nou, èk osi wilasyon nou épi Jéhova. Pou ègzanp, nou pé ni pou désidé ki koté nou kay wèsté, ki mannyè nou kay sipòté kò nou, ében si nou kay mayé opa. Lè nou fè bon disizyon, nou kay ni lakontantman èk nou kay plè Jéhova.

1. Ki mannyè Bib-la sa édéʼw fè bon disizyon?

Avan ou fè an disizyon, i enpòtan pou mandé Jéhova pou édéʼw. Osi, i enpòtan pou li Bib-la pou wè kisa Jéhova ka di konsèné disizyon-an ou vlé fè-a. (Li Pwovèb 2:3-6.) Délè, Jéhova ka bay an koumand ki klè. Konsa, pli mèyè bagay-la ou sa fè sé pou obéyi Jéhova.

Menm si la pa ni an koumand ki ka diʼw sa pou fè, Jéhova kay toujou djidéʼw ‘an mannyè-a ou sipozé maché-a.ʼ (Izaya 48:17) Ki mannyè Jéhova ka fè sa? I kay sèvi pwensip ki an Bib-la pou édéʼw. Pwensip Bib sé lavéwité ki an Bib-la ki ka édé nou wè mannyè Bondyé ka katjilé, èk mannyè i ka santi konsèné sèten bagay. Souvan, lè nou li an listwa an Bib-la, nou ka vini konnèt mannyè Jéhova ka santi konsèné an bagay. Lè nou konpwann mannyè Jéhova ka santi, nou kay fè disizyon ki kay plèʼy.

2. Ki bagay ou sipozé katjilé asou avan ou fè an disizyon?

Bib-la di: ‘Moun-lan ki ni lèspwi ka byen gadé koté i ka mété pyéʼy.ʼ (Pwovèb 14:15) Sa vlé di, avan nou fè yon disizyon, nou ni pou pwan tan pou katjilé asou sa nou vlé fè. Konsa mandé kòʼw sé kwèsyon sala: ‘Ki pwensip Bib mwen kay sèvi? Ès disizyon mwen kay anbété konsyans mwen? Ki mannyè disizyon mwen kay afèkté lézòt moun? Épi pli enpòtan toujou, ès disizyon mwen kay fè Jéhova kontan?ʼ—Ditonronnonmi 32:29.

Jéhova ni dwa-a pou di nou kisa ki bon èk kisa ki mové. Lè nou vini konnèt lwa Bondyé èk pwensip li èk nou fè éfò pou swiv yo, nou kay ni an bon konsyans. Kisa konsyans nou ka fè? Konsyans nou ka di nou si bagay-la nou kay fè, ében si bagay-la nou té fè, bon ében pa bon. (Ronm 2:14, 15) Alò, lè nou étwennen konsyans nou byen, i kay édé nou fè bon disizyon.

ANNOU APWANN PLI

Apwézan, annou apwann mannyè pwensip Bib èk konsyans nou sa édé nou fè bon disizyon.

3. Kité Pawòl Bondyé djidéʼw

Ki mannyè pwensip Bib sa djidé nou lè nou ka fè disizyon? Annou gadé VIDIYO-A, Kité Pwensip Ki An Bib-la Djidéʼw èk apwé nou kay kozé asou sé kwèsyon sala:

VIDIYO: Kité Pwensip Ki An Bib-la Djidéʼw (5:54)

Ki bèl kado Bondyé ban nou?
Pouki Jéhova ban nou abilité-a pou fè disizyon pou kò nou?
Kisa Jéhova ja ban nou pou édé nou fè bon disizyon?

Pou wè yonn an sé pwensip-la ki an Bib-la, annou li Èfésòs 5:15, 16. Èk apwé nou kay diskité mannyè nou sa sèvi “tout chans [nou] jwenn” pou . . .

li Bib-la touléjou.
vini an pli mèyè mawi, madanm, pawan, gason, ében fi.
atandé sé mitin-lan.

4. Étwennen konsyans ou pou édéʼw fè bon disizyon

Délè i ézé pou fè an bon disizyon lè Bib-la ni an konmand ki ka di nou sa pou fè. Mé kisa nou kay fè si la pa ni an konmand? Annou gadé VIDIYO-A, “Tjenn Konsyans Ou Klè” èk apwé nou kay kozé asou kwèsyon sala:

VIDIYO: “Tjenn Konsyans Ou Klè” (5:13)

An vidiyo-a, kisa sè-a té fè pou étwennen konsyans li pouʼy fè an disizyon ki té kay plè Jéhova?

Pouki nou pa sipozé mandé lòt moun pou fè disizyon ban nou? Annou li Hibrou 5:14, èk apwé nou kay kozé asou sé kwèsyon sala:

I ézé pou mandé lézòt moun pou fè disizyon ban nou, mé, kisa nou sipozé apwann pou nou sa fè bon disizyon?
Kisa ki sa édé nou pou étwennen konsyans nou pou fè bon disizyon?

Menm kon an map ka djidé nou, konsyans nou sa djidé nou pou fè bon disizyon

5. Wèspèkté konsyans lézòt moun

Diféwan moun kay fè diféwan disizyon. Ki mannyè nou sa moutwé wèspé pou konsyans lézòt moun? Annou gadé dé (2) ègzanp:

Pwèmyé ègzanp-lan: An sésé ki enmen mété ‘makeupʼ koumansé atandé mitin adan an kongwigasyon nèf. Mé sé sésé-a an kongwigasyon nèf sala, ka santi i pa bon pou mété ‘makeupʼ.

Annou li Ronm 15:1 èk 1 Kòrint 10:23, 24, èk apwé nou kay kozé asou sé kwèsyon sala:

Silon sé lévanjil sala, kisa ou kwè sésé-a pé fè? Siʼw épi an moun èk konsyans moun-lan ka anpéchéʼy fè an bagay, mé konsyans ou ka pèwmitéʼw pou fèʼy, kisa ou kay fè?

Dézyenm ègzanp-lan: An fwè désidé i pa kay bwè alkòhòl, mé i sav Bib-la pa ka kondanné alkòhòl. I twapé an envitasyon pou atandé an ti fèt. Mé lèʼy wivé an fèt-la, i ka wè adan fwè èk sè ka bwè alkòhòl.

Annou li Ékléziyastis 7:16 èk Ronm 14:1, 10, èk apwé nou kay kozé asou sé kwèsyon sala:

Silon sé lévanjil sala, kisa ou kwè fwè sala pé désidé pou fè? Kisa ou kay fè si ou wè an moun ka fè an bagay konsyans ou pa ka pèwmitéʼw pou fè?

Kisa Nou Ni Pou Fè Pou Nou Sa Fè Bon Disizyon?

1. Mandé Jéhova pou édéʼw désidé kisa pou fè.—Jémz 1:5.

2. Fè wichach an Bib-la èk piblikasyon ki bazé asou Bib-la pou twapé pwensip ki sa édéʼw an sitiwasyonʼw. Osi, ou sa mandé Kwityen ki ni èspéyans pou èd.

3. Konsidiwé mannyè disizyonʼw kay afèkté konsyans ou èk osi, konsyans lézòt moun.

ADAN MOUN KA DI: “Pyèsonn pa sa diʼw sa pou fè. Kité moun bat bouch yo!”

Pouki nou sipozé mélé épi mannyè disizyon nou kay afèkté Bondyé èk lézòt moun?

CHONJÉ SÉ PWEN SALA

Nou ka fè bon disizyon lè nou apwann mannyè Jéhova ka santi konsèné an bagay. Osi, nou ni pou konsidiwé si aksyon nou kay édé lòt moun ében ofwansé yo ében fè yo ditò.