PWONY ME 35

Kit me Moko Tam Mabeco

TUKI

Wan ducu watye ki tam me amoka. Pol pa tam magi twero bedo ber nyo rac piwa kacel ki watwa ki Jehovah. Me labolle, twero mitte ni wamok ka ma wabibedo iye, kit me nongo cente ma wamito pi kwo, nyo ka omyero wanyomme. Ka wamoko tam mabeco, watwero bedo ki kwo me yomcwiny dok wayomo bene cwiny Jehovah.

1. Itwero tic ki Baibul nining me konyi moko tam mabeco?

Ma peya imoko tam mo keken, leg pi kony pa Jehovah dok ikwed lok i Baibul me neno kit ma en neno kwede tam meno. (Kwan Carolok 2:3-6.) I kine mukene, Jehovah miniwa cik atyer ka maleng. Ka tye kit meno, ci tam maber loyo ma itwero mokone aye me lubo cik meno.

Ento, ka pe tye cik mo atir i Baibul ma titi gin ma omyero itim kono? Jehovah pud bitirri ‘i yo ma myero iwot iye.’ (Icaya 48:17) Nining? Yeny cik ma igi lac ma twero konyi. Cik ma igi lac me Baibul gubedo lok ada ma tittiwa tam pa Lubanga ki kit ma en winyo kwede. Pol kare, watwero niang kit ma Lubanga winyo kwede i kom gin moni ka wakwano lok mo ki i Baibul. Ka waniang kit ma Jehovah winyo kwede, watwero moko tam ma yomo cwinye.

2. Jami ango ma omyero itam iye ma peya imoko tam mo?

Baibul waco ni: “Ngat maryek kong ngiyo ka kwene ma en ecito iye.” (Carolok 14:15) Man te lokke ni, ma peya wamoko tam mo keken, omyero wakwany kare me tam i kom jami ma wabiyero. Ka iwoto ki tamo i kom jami magi ki acel acel, pennye kekeni ni: ‘Cik ma iye lac mene me Baibul ma atwero tic kwede kany? Ka ayero gin man, biweko awinyo nining? Tam ma abimoko-ni mono bigudo jo mukene i yo maber nyo marac? Ma dong pire tek loyo, tika biyomo cwiny Jehovah?’—Nwoyo Cik 32:29.

Jehovah tye ki twero me tittiwa gin maber ki gin marac. Ka wangeyo cikke ki cik ma igi lac maber dok wamoko tamwa me lubogi, nongo watye ka pwonyo cwiny ma ngoliwa kop. Cwiny ma ngoliwa kop obedo gin ma tye i iwa ma nyutiwa gin maber ki marac. (Jo Roma 2:14, 15) Cwiny ma ngoliwa kop ma kipwonyo maber bikonyowa me moko tam mabeco.

NONG NGEC MATUT

Pwony kit ma cik ma igi lac me Baibul kacel ki cwiny ma ngoliwa kop konyowa me moko tam.

3. Wek Baibul otir yoni

Cik ma igi lac me Baibul twero tirowa nining ka watye ka moko tam? Tuk VIDIO, ci wunyam lapeny ma lubo.

VIDIO: Wek Cik ma Igi Lac me Baibul Otiri (5:54)

Mot ma pire tek ango ma Jehovah omiyowa?
Pingo Jehovah ominiwa mot meno?
Gin ango ma en ominiwa me konyowa me moko tam mabeco loyo i kwowa?

Me neno labol me cik ma iye lac me Baibul, kwan Jo Epeco 5:15, 16. I nge meno, wunyam kit ma itwero ‘tic ki kare ma tye i yo maber’ me . . .

kwano Baibul nino ducu.
doko won ot, min ot, lanyodo, awobi, nyo anyaka maber.
bedo tye i cokke kare ducu.

4. Pwony cwiny ma ngoli kop me moko tam mabeco

Ka watye ki cik me Baibul ma loko i kom gin moni atir, moko tam ma atir twero bedo yot. Ento ka cik ma kit man pe kono? Tuk VIDIO, ci wunyam lapeny ma lubo-ni.

VIDIO: “Bed ma Cwinyi Pe Pidi” (5:13)

I vidio man, gin ango ma laminwa-ni otimo me pwonyo cwiny ma ngole kop ki dok me moko tam ma yomo cwiny Jehovah?

Pingo omyero pe wapeny jo mukene me moko tam ma myero wamok wan kikomwa? Kwan Jo Ibru 5:14, ci wunyam lapeny magi:

Kadi bed ni twero bedo yot me penyo jo mukene me moko tam piwa, gin ango ma omyero wabed ki kero me poko piwa kenwa?
Gin ango ma twero konyi me pwonyo cwiny ma ngoli kop ki me moko tam mabeco?

Calo mep, cwiny ma ngoliwa kop tirowa i kwowa

5. Wor cwiny ma ngolo kop pa jo mukene

Dano mapatpat gibimoko tam mapatpat. Watwero nyuto woro pi cwiny ma ngolo kop pa jo mukene nining? Nen kong labol aryo magi:

Labol me 1: Laminwa mo ma maro ruko long ka en tye ka namo i kin lwak nyo timo jamine mukene okobo i kacokke mukene ka ma lumege mapol cwiny ma ngoligi kop yelogi ka guneno lumege ma guruko long.

Kwan Jo Roma 15:1 ki 1 Jo Korint 10:23, 24, ci wunyam lapeny magi:

Ma lubbe ki tyeng magi, laminwa-ni twero moko tam ango? In ibitimo gin ango ka itye ki ngat mo ma cwiny ma ngole kop genge ki timo gin ma cwiny ma ngoli kop ye ni itim?

Labol me 2: Omego mo ngeyo ni Baibul pe kwero mato kongo i yo mupore, ento en oyero pe me mato kongo kulu. Kilwonge i namo mo, ci en oneno omege mogo gitye ka mato kongo.

Kwan Latitlok 7:16 ki Jo Roma 14:1, 10, ci wunyam lapeny magi:

Ma lubbe ki tyeng magi, omego-ni twero moko tam ango? In ibitimo gin ango ka ineno ngat mo tye ka timo gin ma cwiny ma ngoli kop gengi ki timone?

Ngo ma twero konyowa me moko tam mabeco?

1. Peny Jehovah wek okonyi me moko gin ma myero itim. —Yakobo 1:5.

2. Tim kwed i Baibul ki bukkewa ma jenge i Baibul me nongo cik ma igi lac ma twero konyi. Itwero bene lok ki Lukricitayo ma guteggi i yo me cwiny.

3. Tam i kom adwogi ma tam ma ibimoko bikelo i kom cwinyi ma ngoli kop ki cwiny ma ngolo kop pa jo mukene.

JO MOGO GIWACO NI: “Itye ki twero me timo gin mo keken ma imito. Gin ma jo mukene gitamo pire pe tek.”

Pingo omyero wapar pi kit ma Lubanga kacel ki jo mukene giwinyo kwede?

WOT WIYE WIYE

Watwero moko tam mabeco ka waniang kit ma Jehovah winyo kwede i kom gin moni dok waneno ka tam ma wabimoko bikonyo jo mukene nyo bikeligi adwogi marac.