OZUMALƐDƖYƐ 35

Kezimɔ Yekezizi Abɔkɔ Baaba

BƆ́

Ye munwala yesizi abɔkɔ. Abɔkɔ eyimmɔ ɩkɔhʋla ɩkɛhã yɛ wɔ ɔhʋanɩba anzɛnyɩɩ ɔhʋanɩ tanɩ zʋ na ɩkɔhʋla ɩkɛhã yɛ nɩɩ Gyehova avinli abusunwawɔlɛ sʋ̃. Kɛ ndianwʋ nɩ, ebiye a ɩsɛ kɛɛ yesizi abɔkɔ yɛfalɩ dɩka mɔɔ yɛkɔwʋwa, kezimɔ yekenyia ozukua mɔɔ yehyinyia nɩɩ agyiahʋnlɩ nwʋ. Sɛ yesizi abɔkɔ baaba a, yɛ anyɩ ikele wɔ yɛ ɛbɩlawɔlɛ nu na yɛkɔzɔ Gyehova yɩ anyɩ sʋ̃.

1. Kɛ ɩkɛyɛ na wʋagyina Bayɩbʋlʋ yɩ zʋ wʋazizi abɔkɔ baaba a?

Ansaana ekezi pɔkɔ be nɩ, bɔ Gyehova mpayɩ kɛ ɩwʋwá wʋ na pɩbɛ́ yɩ adwɩnɩ wɔ odwokɔ yɩ nwʋ wɔ Bayɩbʋlʋ yi nu. (Kɩnga Ɛɣɛlɛwulɛ 2:3-6.) Nninyeni be wɔ ɛkɛnɩ a, Gyehova ɩva nwʋmɔ mmɛla ɩma yɛ senyii. Meti, yesii pɔkɔ be na nwʋmɔ mmɛla pɔkyɩɩ wɔ ɛkɛnɩ a, ɩkɛyɛ baaba kɛɛ yekelili ɔzʋlɔ.

Na sɛ nwʋmɔ mmɛla pɔkyɩɩ bela íni Bayɩbʋlʋ yi nu sʋ̃ ɛ? Mɛyɩ po nu nɩ, Gyehova ɩkɔhɔlɩ ɔzʋlɔ ikehile wʋ “ɔhʋanɩ mɔɔ ɩsɛ kɛɛ oduwa ɔzʋlɔ.” (Ayɩzaya 48:17) Mɩnla ɔhʋanɩ zʋ a? Egyinalɛzʋ-ndwokɔ wɔ ɛkɛnɩ mɔɔ ɩkɔhʋla ɩkɔwʋwa wʋ. Mɩnla yɛ lɛ egyinalɛzʋ-ndwokɔ a? Ɩdɩ Bayɩbʋlʋ nu ndwokɔ azʋlɔtʋ mɔɔ ɩma yɛnwʋ Gyehova yɩ adwɩnɩ nɩɩ kezimɔ ɩtɩ nɣanlɩ. Mbɔmɩ sʋ̃maa nɩ, sɛ yɛkɩnga odwokɔ be wɔ Bayɩbʋlʋ yi nu a, ɩma yɛnwʋ kezimɔ Nyamɩnlɩ ɩtɩ nɣanlɩ wɔ nninyeni be nwʋ. Sɛ yɛkʋla yɛnwʋ kezimɔ Gyehova ɩtɩ nɣanlɩ wɔ nninyeni nwʋ a, ɩkɛma yekezizi abɔkɔ mɔɔ ɩkɔzɔ yɩ anyɩ.

2. Mɩnla nninyeni yɛ ɩsɛ kɛɛ osunzu nwʋmɔ ansaana wʋazi pɔkɔ a?

Bayɩbʋlʋ ɩkã kɛɛ: “Nɣɛlɛbɛvʋlɔ isunzu agyiakɛ bela mɔɔ ikodu yɩ nwʋ bʋwɔ.” (Ɛɣɛlɛwulɛ 14:15) Eyi kile kɛɛ ansaana yekezi pɔkɔ be nɩ, ɩsɛ kɛɛ yede mmɩlɩ yesunzu nninyeni nwʋ bʋwɔ. Mmɩlɩ mɔ osunzuu nninyeni nwʋ nɩ, bizia wʋ nwʋ kɛɛ: ‘Mɩnla Bayɩbʋlʋ nu egyinalɛzʋ-ndwokɔ yɛ mʋkɔhʋla mɩkɛva mɩkɛyɛ egyima wɔ ɛkɩ a? Pɔkɔ ɛhɩnla dɩyɛ yɛ misi a, ɩkɛma mikenyia azʋ̃nudwolɩyɛ a? Pɔkɔ mɔɔ mikezi nɩ, kɛ ɩkɛhã mmenii mvʋlɔ ikeze a? Mɔɔ ihyinyia paa nɩ, ɩkɛma Gyehova yɩ anyɩ ikele a?’—Ditilonɔmi 32:29.

Gyehova wɔ nwʋmɔ ɔhʋanɩ kɛɛ ikehile mɔɔ ɩdɩ baaba nɩɩ tanɩ yɛ. Sɛ yɛnwʋ yɩ mmɛla nɩɩ yɩ egyinalɛzʋ-ndwokɔ bʋwɔ na yesi yɛ adwɩnɩ pi kɛɛ yekelili ɔzʋlɔ a, nɩ yɛtɩdɩɩ ye ti ɔwʋwaba bʋwɔ. Ye ti ɔwʋwaba yɛ ɩma yɛnwʋ kɛɛ dɩyɛ be ɩdɩ tanɩ anzɛnyɩɩ ɩdɩ baaba a. (Wulomimaa 2:14, 15) Sɛ yɛtɩdɩ ye ti ɔwʋwaba bʋwɔ a, ɩkɔwʋwa yɛ ma yekezizi abɔkɔ baaba.

SUMÁ SƲ̃MAA

Sumá kezimɔ Bayɩbʋlʋ nu egyinalɛzʋ-ndwokɔ nɩɩ ye ti ɔwʋwaba bʋwa yɛ ma yesizi abɔkɔ.

3. Má Bayɩbʋlʋ yɩ ihile ɔhʋanɩ wʋ

Mɩnla ɔhʋanɩ zʋ yɛ Bayɩbʋlʋ nu egyinalɛzʋ-ndwokɔ ɩkɔhʋla ikehile ɔhʋanɩ yɛ mmɩlɩ mɔ yesizii abɔkɔ a? Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.

VIDIYO: Má Bayɩbʋlʋ Nu Egyinalɛzʋ-Ndwokɔ Ihile Ɔhʋanɩ Wʋ (5:54)

Akyɛdɩ mɔɔ ɩtʋ bʋlɔ ɛhɩnla dɩyɛ yɛ Gyehova ɩva ɩma ye nu bela a?
Mɩnla ti mɔɔ Gyehova ɩva ye nu bela yɩ pɛ ɩma yɩ a?
Mɩnla yɛ ɩva ɩma yɛ mɔɔ ɩbʋwa ma yɛkʋla yesizi abɔkɔ baaba a?

Kilá Bayɩbʋlʋ nu egyinalɛzʋ-ndwokɔ nwʋ ndianwʋ ɔkʋ̃, kɩnga Ɛfɩsɛsɩmaa 5:15, 16, NWT. Na akʋ̃ bozunzú kezimɔ ‘ɛkɛva wʋ mmɩlɩ’ ekeli egyima bʋwɔ na wʋahʋla . . .

wʋaɣɩnga Bayɩbʋlʋ eɣile bela.
wʋayɛ ohunɛ anzɛnyɩɩ ɛyɩlɛba, ɔwʋvʋlɔba nɩɩ kuakula baaba.
wʋahɔ asafʋ ayiyialɩyɛ.

4. Tɩdɩ wu ti ɔwʋwaba na wʋahʋla wʋazizi abɔkɔ baaba

Sɛ odwokɔ be nwʋ mmɛla pɔkyɩɩ wɔ Bayɩbʋlʋ nu a, ɩáyɛ sɩ kɛɛ ekezi nwʋmɔ pɔkɔ. Naasʋ̃ sɛ nwʋmɔ mmɛla pɔkyɩɩ bela íni ɛkɛnɩ sʋ̃ ɛ? Yɩ́ VIDIYO nɩ, na akʋ̃ bozunzú odwokɔɣizialɛ eyi nwʋ.

VIDIYO: Kɔ Ɔzʋlɔ Nyia Tile Ɔwʋwaba Baaba (5:13)

Wɔ vidiyo yi nu nɩ, mɩnla yɛ eliyema baalɛ yɩ ɩyɛlɩ ɩva ɩdɩdɩlɩ yi ti ɔwʋwaba na ama iazi pɔkɔ mɔɔ ɩkɔzɔ Gyehova yɩ anyɩ a?

Mɩnla ti mɔɔ íni kɛɛ yɛma mmenii mvʋlɔ besi pɔkɔ bɛma yɛ a? Kɩnga Hibulumaa 5:14, na akʋ̃ bozunzú ndwokɔɣizialɛ eyimmɔ nwʋ

Ɩwɔ numɔ kɛɛ ɩáyɛ sɩ kɛɛ yɛkɛma mmenii mvʋlɔ kezi pɔkɔ kɛma yɛ dɩyɛ, naasʋ̃ mɩnla yɛ ɩsɛ kɛɛ yɛzayɛ yɛnwʋ yɩ a?
Mɩnla nninyeni yɛ ɩwɔ ɛkɛnɩ mɔɔ ɩkɔhʋla ɩkɔwʋwa wʋ ma ɛkɛdɩdɩ wʋ ti ɔwʋwaba na wʋazizi abɔkɔ baaba a?

Ye ti ɔwʋwaba ɩdɩ kɛɛ maapɩ, ikile ɔhʋanɩ yɛ wɔ ɛbɩlawɔlɛ nu

5. Dwɩnɩ́ mmenii mvʋlɔ be ti ɔwʋwaba nwʋ

Ɩsʋnɩ abiyela nɩ pɔkɔ mɔɔ isi wɔ odwokɔ be nwʋ. Naasʋ̃ kɛ ɩkɛyɛ na yɛahile kɛɛ yɛdwɩnɩ mmenii mvʋlɔ be ti ɔwʋwaba nwʋ a? Sunzú bʋwabɩlɛ anwɩ̃ eyimmɔ nwʋ kila:

Bʋwabɩlɛ 1: Eliyema baalɛ be mɔɔ sɛ ɩkɔɔ paati anzɛnyɩɩ dɩka fʋlɔ bela a, ɩta iwula tʋlawʋzɛsɩ idu ɩhɔ asafʋ fʋlɔ be nu mɔɔ mmeliyema mmaalɛ sʋ̃maa mɔɔ bɔwɔ ɛkɛnɩ nɩ, sɛ bɔnwʋ kɛɛ eliyema baalɛ wula tʋlawʋzɛsɩ a, idide bɛ paa.

Kɩnga Wulomimaa 15:1 nɩɩ 1 Kɔlɛntɩmaa 10:23, 24, na akʋ̃ bozunzú ndwokɔɣizialɛ eyimmɔ nwʋ:

Kɛmɔ nkyɩkyɛmi eyimmɔ kile nɩ, mɩnla pɔkɔ yɛ ebiye a eliyema baalɛ yɩ ɩkɔhʋla ikezi a? Sɛ wu ti ɔwʋwaba iálile wʋ wɔ dɩyɛ be nwʋ na enii mɔɔ ɛ nɩɩ da yɩ mɛyɩ, yi ti ɔwʋwaba idide yi a, mɩnla yɛ ɛkɛyɛ a?

Bʋwabɩlɛ 2: Eliyema benyia be izi kɛɛ ɩ́dɩ tanɩ kɛɛ yɛkɔnlʋ nzã, naasʋ̃ izi pɔkɔ kɛɛ ɩlɔ́nʋ nzã. Bɔdʋ salɛ bɔvʋlɔ yɩ wɔ paati be tʋ, na ɩnwʋ kɛɛ mmeliyema mmenyia mvʋlɔ bɔnʋʋ nzã.

Kɩnga Odwokɔhanlɛvʋlɔ 7:16 nɩɩ Wulomimaa 14:1, 10, na akʋ̃ bozunzú ndwokɔɣizialɛ eyimmɔ nwʋ:

Kɛmɔ nkyɩkyɛmi eyimmɔ kile nɩ, mɩnla pɔkɔ yɛ ebiye a eliyema benyia yɩ ɩkɔhʋla ikezi a? Sɛ ɔnwʋ kɛɛ abiye ɩyɛɛ dɩyɛ be mɔɔ wu ti ɔwʋwaba idide wʋ wɔ nwʋmɔ a, mɩnla yɛ ɛkɛyɛ a?

Mɩnla nninyeni yɛ abiye ɩyɛ a ɩkɛma ikezizi abɔkɔ baaba a?

1. Bɔ́ Gyehova mpayɩ ma ɩwʋwá wʋ ma ɔnwʋ mɔɔ ɛkɛyɛ.—Gyemisi 1:5.

2. Yɛ́ ɛbɩbɛlɛnu wɔ Bayɩbʋlʋ nɩɩ Bayɩbʋlʋ nwʋ awuuku nu fa pɩbɛ́ egyinalɛzʋ-ndwokɔ mɔɔ ɔkɔhʋla ɛkɛva ɛkɛyɛ egyima. Sa ɔkʋla ɛ nɩɩ mmeliyema mɔɔ bɔ nwʋ ɩwʋkwa sʋ̃ bɔ nwʋmɔ nkɔmmɔ.

3. Sunzú kezimɔ pɔkɔ mɔɔ ekezi nɩ ɩkɛhã wʋzawʋ nɩɩ mmenii mvʋlɔ be ti ɔwʋwaba nwʋ.

ABIYEMMƆ BƐKÃ KƐƐ: “Yɛ́ mɔɔ wʋ nwʋ ɩkɔdɔ wʋ. Áma etiye abiyela.”

Mɩnla ti mɔɔ ɩsɛ kɛɛ yesunzu Nyamɩnlɩ nɩɩ mmenii mvʋlɔ bɛ nɣanlɩdɩlɛ nwʋ a?

YƖ DƆKƆWƆLƐ

Sɛ yɛnwʋ kezimɔ Gyehova ɩtɩ nɣanlɩ wɔ odwokɔ be nwʋ na yesunzu kezimɔ mmenii mvʋlɔ bekenyia yɛ nyɛlɩyɛ zʋ mfasʋ anzɛnyɩɩ ikelile bɛ nɩ nwʋ a, ɩkɔwʋwa yɛ ma yekezizi abɔkɔ baaba.

Kɛ Okowuwa Ekeze a?

Kɛ ɩkɛyɛ na wʋazizi abɔkɔ mɔɔ ɩsɔ Gyehova yɩ anyɩ a?
Kɛ ɩkɛyɛ na wʋadɩdɩ wu ti ɔwʋwaba a?
Kɛ ɩkɛyɛ na wʋahile kɛɛ ɔdwɩnɩ mmenii mvʋlɔ be ti ɔwʋwaba nwʋ a?

Eɣile mɔɔ yewieli dɩyɛzumanlɛ nɩ:

Bʋtayɩ

Dwɩnɩ pɔkɔ be mɔɔ ɩlɛ́kyɛ ɛbazi nɩ nwʋ. Akʋ̃ fa nninyeni asã mɔɔ ɩwɔ alɩka mɔɔ ise “ Mɩnla Nninyeni Yɛ Abiye Ɩyɛ a Ɩkɛma Ikezizi Abɔkɔ Baaba a?” yi nu di egyima

Bʋtayɩ mvʋlɔ:

Your other goal