PONJI MI 35

Lembe m’iromo timo kara imak yub ma cuu

NG'II DHOK M'IMARU

Wan ceke wabed wamaku yub (watimo ng’iyong’ic) ma tung’ tung’. Re yubne ma dupa copo bedo ku matoke ma lee iwi kwo mwa man iwi winjiri mwa ku Yehova. Ku lapor, waromo maku yub iwi kaka ma wabikwo i iye, iwi tic ma wabitimo pi nipong’o yeny mwa, man waromo ng’iyo ka nyo wabigamu dhaku, wabigiero kunoke ngo. Tekene wamaku yub ma cuu, wacopo kwo kud anyong’a man ninyayu mutoro i i Yehova.

1. Icopo tiyo ku Biblia nenedi pi nimaku yub ma cuu?

I wang’ nimaku yub moko, kelar ikway Yehova ukonyi man say paru pare iwi lembene i Biblia. (Som Lembrieko 2:3-6.) Ibinwang’u nia i lembene moko, cik pa Yehova uyero lembe thwolo thwolo. Saa maeno, yub ma cuu m’ukwayu imaki utie niworo gin ma Biblia uyero kubang’e kubang’e.

Ka dong’ ibenweng’iri i wang’ lembe moko ma Biblia umiyo ngo cik ma thwolo thwolo i wiye ke? De asu Yehova bitelo wii ‘i yo m’umaku iwoth i iye.’ (Isaya 48:17) Nenedi? Copere nia lundo cik mir ukungu unuti ma romo telo wii. Cik mir ukungu tie ang’o? Tie lemandha ma pigi tek m’ubenyutho paru pa Mungu iwi lembe moko. Wang’ ma pol wabed wang’eyo paru pa Mungu iwi lembe moko nwang’u wabesomo Biblia. Ka wanyang’ nia Yehova neno lembene nenedi, wabimaku yub ma bifoyo iye.

2. Lembang’o m’ukwayu ipar iye cuu i wang’ nimaku yub moko?

Biblia uyero nia, “won pidoic (niwacu ng’atu ma riek) neno i woth pare cu.” (Lembrieko 14:15) Eno nyutho nia i wang’ nimaku yub kunoke nitimo ng’iyong’ic moko, wacikara ninwang’u saa mi kenyamu i lembene cuu. Kinde m’ibeluro i lembene, woth penjiri kumae: ‘Cik mir ukungu ma kani mi Biblia m’aromo tiyo ko i lembe maeni? Yubne ma kani ma biroyo ngo ang’eyang’o i iya ento bimiyo ira akwiyacwinyi? Dhanu mange ke bineno yub m’abecimakune nenedi? Re m’usagu zoo, nyo yub parane binyayu mutoro i i Yehova?’—Poi mi Cik 32:29.

Yehova tie ku twero mi nyutho iwa gin ma ber ku gin ma rac. Ka wabeii ning’eyo cik pare man bende cik mir ukungu, man ka wabeii nilubo cikne kubang’gi kubang’gi, nwang’u wabeponjo pidocwiny mwa i ayi m’atira. Pidocwiny tie gin ma beyero iwa yor i adundewa nia lembe ma wabemito timo tie ber kunoke rac. (Jurumi 2:14, 15) Ka waponje ma ber, ebikonyowa kara wamak yub ma cuu.

MED NYANG’ PERI

Wakenen kawoni kite ma cik mir ukungu mi Biblia man bende pidocwiny mwa konyo kowa nimaku yub ma tung’ tung’.

3. Wek Biblia utel wii

Cik mir ukungu mi Biblia copo telo wiwa nenedi ka wabemaku yub moko? Nen VIDEO, man i ng’eye wuwec iwi penji m’ulubo e:

VIDEO: Wek cik mir ukungu mi Biblia utel wii (5:54)

Yehova umiyo iwa giramiya moko ma kani ma ber akeca?
Pirang’o emiyo iwa bedagonya mi ng’iyo lembe wan giwa?
Emiyo iwa bende ang’o pi nikonyowa kara watii ku bedagonya mwa i ayi ma cuu?

Pi nineno lapor acel mi cik mir ukungu mi Biblia, som Juefeso 5:15, 16. I ng’eye, wuwec iwi penji ma e: Iromo timo ang’o kara itii “ma ber mandha ku saa” peri . . .

pi nisomo Biblia kubang’ ceng’?
pi nidoko nico, dhaku, janyodo, kunoke nyathin ma ber m’usagu?
pi nicidho i coko mwa?

4. Ponj pidocwiny peri kara ebed ekonyi nimaku yub m’atira

Ka cik mi Biblia unuti m’umiyo telowic ma thwolo thwolo iwi lembe moko, wiwa copo lal ungo nia wabitimo ang’o. Ento ka cik ma kumenone mbe ke? Nen VIDEO, man i ng’eye wuwec iwi penji m’ulubo e:

VIDEO: “Mediri nibedo ku pidocwiny ma ber” (5:13)

Lembang’o ma tung’ tung’ ma nyamego mi video maeni utimo pi niponjo pidocwiny pare kara etuc nimaku yub ma bifoyo i Yehova?

Pirang’o wacikara ngo nikwayu jumange re m’umak yub kakawa? Som Juebrania 5:14, man i ng’eye wuwec iwi penji m’ulubo e:

Wacopo neno nia etie yot magwei nikwayu jumange re m’umak iwa yub. Re i andha wacikara ning’eyo koyo wan giwa kind ang’o kud ang’o?
Watie kud ang’o ma copo konyowa niponjo pidocwiny mwa kara wamak yub ma beri?

Pidocwiny konyowa ning’eyo gin ma waromo timo i kwo mwa, tap cal ma kart konyowa ning’eyo kaka ma wabecidho i iye

5. Wor pidocwiny mi jumange

Dhanu ceke romo maku yub ma rom ungo. Dong’ wacopo nyutho nenedi nia wabeworo pidocwiny mi jumange? Wakewec iwi lembe ario ma e:

Lembe mi 1: Nyamego moko umaru niwirere kunoke nirukere akeca, kunoke nyo emaru kit kendi moko lee, ento edok i cokiri moko ma nyimego ma pol mi iye gimaru ngo nirukiri kumeca kunoke gimaru ngo kit kendi maeca.

Som Jurumi 15:1 man 1 Jukorintho 10:23, 24, man i ng’eye wuwec iwi penji m’ulubo e:

Nimakere ku verse maeni, nyamego maeno romo ng’iyo nitimo ang’o? In ke icopo timo ang’o kan itie ku ng’atu moko ma pidocwiny pare ukwero ire gin ma pidocwiny peri ulund uyiyo iri?

Lembe mir 2: Umego moko ng’eyo nia Biblia ukwerowa ngo ku madhu kong’o i mukero ma ber, re eng’iyo nia en ebibemadhu ngo kong’o nyanok de. E julwong’e i nambu moko man kuca ewok enwang’u umego mange gibemadhu kong’o.

Som Eklizia 7:16 man Jurumi 14:1, 10, man i ng’eye wuwec iwi penji m’ulubo e:

Nimakere ku verse maeni, umego maeno copo ng’iyo nitimo ang’o? Icopo timo ang’o kan ineno ng’atu moko ubetimo lembe ma pidocwiny peri ubekwero iri?

Lembe m’ukwayu itim kara imak yub ma cuu:

1. Kway Yehova ukonyi kara imak yub m’atira.—Yakobo 1:5.

2. Tim sayusac i Biblia man i girasoma m’ujengere iwi Biblia kara inwang’ cik mir ukungu ma romo konyo. Iromo weco bende kud umego ku nyimego ma giteng’ini i tipo.

3. Lar inen matoke ma yub m’ibecimaku bibedo ko iwi pidocwiny peri giri ku mi dhanu mange.

DHANU MOKO BEYERO KUMAE: “Itie agonya nitimo lembe moko ci m’imaru. Jakumira ukay lebe.”

Pirang’o wacikara bende nidieng’ iwi paru pa Mungu man mi dhanu mange iwi lembe ma wabecitimo?

I ADUNDO

Kara wamak yub ma cuu, kwayu walar wasay ning’eyo paru pa Yehova iwi lembene man wapenjara nia nyo timo mwane bikonyo jumange akonya kunoke nyo ebitimogi rac.

Penji mi poyowic

Icopo timo ang’o kara imak yub ma foyo i Yehova?
Icopo ponjo pidocwiny peri nenedi?
Icopo nyutho nenedi nia ibeworo pidocwiny mi dhanu mange?

Nindo ma ponji maeni uthum i iye:

Lembe m’ukwayu itim

Kepar pi yub moko m’idhingo maku i ng’ei nindo ma nok eni. I ng’eye, tii ku juk adek ma nwang’ere i sanduku ma thiwie tie, “ Lembe m’ukwayu itim kara imak yub ma cuu.”

Lembe mange:

Your other goal