35 YATICHÄWI
¿Kunjamsa suma amtanakar pursna?
Taqeniruw mä amtar puriñajj waktʼistu. Kuntï amtktan ukajja vidasan yanaptʼistaspawa jan ukajj jan waltʼayistaspawa. Ukatjja Jehová Diosampi sum apasiñatakiw yanaptʼistaspa, jan ukajj jupat jitheqtayarakistaspawa. Amuytʼañataki, kawkinsa jakañäni, kunjamsa qollqe jikjjatañäni, casarasiñäniti janicha ukanak amtañaw wakisispa. Jiwasatï suma amtanakar puriñäni ukhajja kusisitaw jakasiñäni, Jehová Diosarus kusisiyarakiñäniwa.
1. ¿Kunjamsa Bibliajj suma amtanakar puriñatakejj yanaptʼistaspa?
Janïr mä amtar purkasajja, Jehová Diosaruw yanaptʼa mayisiñasa. Kunsa Jehová Diosajj uka toqet amuyi uk yatiñatakejj Biblianwa yatjjatañasa (Proverbios 2:3-6 liytʼäta). Awisajja Jehová Diosajj qhana amuykañ mandatonakwa churistu, ukhamächi ukhajja istʼañasawa.
Ukampis Bibliantï qhana amuykañ mä mandatojj jan utjkchi ukhajja, ¿kunsa lurañasa? Jehová Diosaw sarañasäki “uka thaknam” irpaskistani (Isaías 48:17). Biblian wiñay yatichäwinakapampiw (principios bíblicos) jupajj yanaptʼistani. Biblian wiñay yatichäwinakapajja Jehová Diosajj kunsa amuyi, jaqenakan kawkïr luräwinakapas kusisiyi llakisiyaraki uk amuytʼañatakiw yanaptʼistu. Jilapartejja Biblia liyisaw kunsa Jehová Diosajj mä toqet amuyi uk yatsna. Jehová Diosajj kunsa amuyi uk yatiñajja, jupar kusisiykir amtanakar puriñatakiw yanaptʼistani.
2. ¿Janïr mä amtar purkasajj kuna toqenakatsa amuytʼasiñasa?
“Amuytʼasir jaqejja kunsa lurani uk sum amuytʼasi” sasaw Bibliajj qhanañchi (Proverbios 14:15). Uka arunakarjamajja janïr mä amtar purkasajj kunanaksa lursna uka toqenakatwa amuytʼasiñasa. Uka toqenakat amuytʼasajja akhamwa jisktʼasiñasa: “¿Biblian kawkïr wiñay yatichäwinakapas aka toqen yanaptʼitaspa? ¿Kun amtañas sum jikjjatasiñatak yanaptʼitaspa? ¿Kuntï amtkä ukajj mayninakarojj yanaptʼaniti, jan ukajj jan waltʼayanicha? Jukʼampisa ¿amtajajj Jehová Diosar kusisiyaniti?” sasa (Deuteronomio 32:29).
Kun lurañas walikïski kun lurañas jan walïkaraki uk sañatakejj Diosakiw derechonejja. Diosan leyinakapsa Biblian wiñay yatichäwinakapsa sum uñtʼañäni, ukarjam sarnaqañ amtarakiñäni ukhajja jukʼamp suma conciencianïñäniwa. Concienciasajja kun lurañas walikïski kun lurañas jan walïkaraki uk amuyañatakiw yanaptʼistu (Romanos 2:14, 15). Bibliarjam yatichata mä suma concienciajja, suma amtanakar puriñatakiw yanaptʼistani.
JUKʼAMP YATJJATAÑÄNI
Biblian wiñay yatichäwinakapasa concienciasasa, kunjamsa suma amtanakar puriñatakejj yanaptʼistu uka toqetwa jichhajj yatjjatañäni.
3. Bibliampiw yanaptʼayasiñasa
Mä amtar puriñasäki ukhajja, ¿kunjamsa Biblian wiñay yatichäwinakapajj yanaptʼistu? VIDEO uñtasajja aka toqetwa parltʼapjjäta:
-
¿Kuna suma regalsa Jehová Diosajj churawayistu?
-
¿Kunatsa Jehová Diosajj jiwas pachpa kuns amtiri lurawayistu?
-
Suma amtanakar puriñatakejja, ¿kunsa Jehová Diosajj churawayistu?
Biblian mä wiñay yatichäwip yatiñatakejja Efesios 5:15, 16 liytʼapjjäta. ‘Tiempo jan ina chʼusar aptʼasiñajja’, ¿kunanakatakis yanaptʼistaspa?
-
Biblia sapür liyiñataki.
-
Suma esposöñataki, suma esposäñataki, suma awk taykäñataki jan ukajj suma wawäñataki.
-
Congregacionankir tantachäwinakat jan faltasiñataki.
4. Suma amtanakar puriñatakejj concienciasaruw yatichañasa
Bibliajj mä toqet wali qhan parlki ukhajja, suma amtar puriñajj facilakïspawa. Ukampis ¿jan qhanäki ukhajj kunsa lurañasa? VIDEO uñtasajja aka toqetwa parltʼapjjäta:
-
Videorjamajja concienciapar sum yatichañatakisa, Jehová Diosar kusisiykir mä amtar puriñatakis ¿kunsa kullakajj luräna?
Mayninakan jiwas lanti amtapjjañapat sipansa, ¿kunatsa jiwas pachpajj mä amtar puriñasa? Hebreos 5:14 liytʼasajja aka toqetwa parltʼapjjäta:
-
Jiwas lanti mä amtar puriñapataki maynir mayiñajj facilakïspawa, ukampis ¿kunatsa kunatï walïki jan walïkaraki uk sapa mayni amuyañapajj wakisi?
-
¿Concienciasar yatichañatakisa suma amtanakar puriñatakis kuna yanaptʼanakas utji?
Concienciasajj mä mapar uñtasitawa, kawkjnamsa sarañasa ukwa uñachtʼayistu.
5. Mayninakan concienciap respetañasawa
Janiw taqenejj igualäktanti ukatwa amtanakasajj mayj mayjaraki. ¿Kunjamsa mayninakan concienciap respetatas uñachtʼaysna? Ukatakejj aka pä toqet parltʼañäni.
Maya: Mä kullakarojj pintasiñajj (maquillasiñajj) wal gusti, jupajj yaqha congregacionaruw sarjje, ukankir kullakanakarojj janiw pintasiñajj gustkiti.
Romanos 15:1; 1 Corintios 10:23, 24 liytʼasajja aka toqetwa parltʼapjjäta:
-
Uka textonakarjamajja, ¿kunsa kullakajj lurañapäspa? Kunatï concienciamatakejj walikïski ukajj maynin concienciapatakejj jan walïkani ukhajja, ¿kunsa jumajj lurasma?
Paya: Bibliarjamajja mä jilatatakejj alcoholani umañanak mä jukʼa uñtʼañajj walikïskiwa, ukampis jupajj jan mä jukʼsa umtʼañwa amti. Mä urojja mä kʼuchirtʼäwiruw jupar invittʼapjje, ukanjja jilat kullakanakarojj alcoholani umañanak wali amuyumpi umtʼaskirwa jupajj uñji.
Eclesiastés 7:16; Romanos 14:1, 10 liytʼasajja aka toqetwa parltʼapjjäta:
-
Uka textonakarjamajja, ¿kunsa jilatajj lurañapäspa? Concienciamatakejj jan walïki uk mayninakar lurir uñjasajja, ¿kunsa jumajj lurasma?
¿Kunas suma amtanakar puriñamatakejj yanaptʼiristam?
1. Jehová Diosar yanaptʼa mayisim, ukhamat kunsa luräta uk amtañamataki (Santiago 1:5).
2. Bibliana ukhamarak qellqatanakan yatichäwinak thaqtam, ukhamat Biblian wiñay yatichäwinakap jikjjatañamataki. Jan ukajja experienciani mä jilataru jan ukajj mä kullakaruw uka toqet jisktʼasisma.
3. Mä amtar purisajja, jumasa mayninakas kunjamsa jikjjatasipjjäta uk amuytʼam.
YAQHEPANAKAJJ AKHAM SAPJJEWA: “Jaqejj kunsay parlaskpan, jumaw kun amtañatakis derechonïtajja” sasa.
-
Janïr kun lurkasajj Jehová Diosasa mayninakas kunsa amuyapjje ukanakwa pienstʼañasa, ¿kunatsa ukham lurañajj importantejja?
¿KUNSA YATEQAWAYTAN?
Mä kunjjat kunsa Jehová Diosajj amuyi uka toqet yatjjatktan ukhajja, suma amtanakaruw purtanjja. Luratanakasajj mayninakarojj yanaptʼaniti jan ukajj jan waltʼayanicha uka toqet amuytʼktan ukhasa suma amtanakaruw puriraktanjja.
Amtañataki
-
¿Kunjamatsa Jehová Diosar kusisiykir amtanakar purisma?
-
¿Kunsa concienciamar yatichañatakejj lurasma?
-
¿Kunjamsa mayninakan concienciap respetatam uñachtʼayasma?
JUKʼAMP YATJJATAÑAMATAKI
Jehová Diosampi suma amigöñatakejj suma amtanakaruw puriñasa, kunatsa ukham sistan uka toqet yatjjatam.
“Taqe kunsa Jehová Diosar jachʼañchañatak lurañäni” (Yatiyañataki abril 15, 2011)
Jehová Diosajj kunjamsa ewjjtʼistu uka toqet jukʼamp yatjjatam.
Mä amtar puriñajj chʼamakïkäna ukhajja, kunas mä chacharojj yanaptʼäna uk videon uñtam.
Jehová Diosar kusisiykir amtanakar kunjamsa pursna uka toqet yatjjatam.
“¿Hace falta siempre un mandato bíblico?” (La Atalaya, 1 de diciembre de 2003)
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
