PES 35
Lelaa di nla yoñ makidik malam?
Bésbobasôna di nlama yoñ makidik ngim mangéda. Ndi mu makidik ma, ngandak i ntihba maada més ni Yéhôva. Kiki ’héga, di nla yoñ makidik ma ma mbéñge ndap, bôlô, tole libii. Ibale di nyoñ makidik malam, di nla bana loñge niñ, di kônha ki Yéhôva maséé.
1. Lelaa Bibel i nla hôla we i yoñ makidik malam?
Ilole u nyoñ makidik, soohe Yéhôva, u wan ki Bibel inyu yi mahoñol mé mu jam li. (Añ Bingéngén 2:3-6.) Ngim mangéda, Yéhôva a yé a ti mambén ma tôbôtôbô inyu ngim jam. Jon, ibale u nôgôl i mbén i, wee u nyoñ makidik malam.
Ndi kii u nla boñ ibale Bibel i nti bé mbén inyu ngim jam? Yéhôva a ga ‘éga we i njel u nlama kil.’ (Yésaya 48:17) Lelaa? Bibel i gwé ngandak matiñ ma ma nla hôla we. Matiñ ma yé ngim maliga ma ma nhéñha bé, ma ñéba bés kii Yéhôva a nhoñol inyu ngim jam tole ngim maboñok. Di nla yi mahoñol ma Djob i ngéda di ñañ miñañ mi yé ikété Bibel. I ngéda di mpam i yi mahoñol ma Djob, hala a ntinde bés i yoñ makidik ma ma nlémél nye.
2. Mambe mam di nlama wan ilole di nyoñ makidik?
Bibel i nkal le: “Mut yihe a ntibil béñge i homa a mbiine kôô.” (Bingéngén 14:15) Hala a nkobla le ilole di nyoñ makidik, di nlama tibil ôt pék. Kiki u mba u nwan inyu yi mambe makidik u yoñ, u nla badba le: ‘Mambe matiñ ma Bibel ma nla hôla me munu jam lini? Baa makidik me ga yoñ ma ga tééñga bé kiññem yem? Baa makidik me ga yoñ, ma nla tééñga bôt bape? Ndi téntén, baa ma ga lémél Yéhôva?’—Ndiimba Mbén 32:29.
Yéhôva nyen a kôli kal bés kii i yé loñge ni kii i yé béba. Ibale di ntibil yi matiñ mé, di nôgôl ki mo, di ga niiga kiññem yés i yimbe kii i yé loñge ni kii i yé béba. Kiññem i yé mahoñol ma kétékété ma ma nkal bés kii i yé loñge ni kii i yé béba. (Rôma 2:14, 15) Ibale di ntibil niiga kiññem yés, i ga hôla bés i yoñ makidik malam.
KÔNDE TÉM
Di tehe lelaa matiñ ma Bibel ni kiññem yés bi nla hôla bés i ngéda di gwé makidik i yoñ.
3. Nwas le Bibel i éga we
Lelaa matiñ ma Bibel ma nla hôla bés i yoñ makidik malam? Tuk VIDÉÔ, i mbus ni kwélél mambadga mana:
-
Kii ba nsébél le kunde i pohol?
-
Inyuki Yéhôva a bi ti bôt ba binam kunde i pohol?
-
Kii ipe Yéhôva a bi ti bés inyu tibil gwélél kunde yés i pohol?
Di nléba litiñ li Bibel jada munu pes kaat ini, añ Éfésô 5:15, 16. Litiñ li, li ñéba le di ‘nlama tibil gwélél ngéda yés.’ Lelaa di nla gwélél litiñ li inyu . . .
-
añ Bibel hiki kel?
-
ba loñge sobiina, loñge ngwal, loñge mañge?
-
ke makoda?
4. Niiga kiññem yoñ i yoñ makidik malam
I ngéda Bibel i nti ngim mbén i i mbéñge ngim jam, hala a ntomb i yoñ makidik. Ndi i ngéda ngim mbén i ta bé, kii di nlama boñ? Tuk VIDÉÔ, i mbus ni kwélél mbadga ini:
-
Munu vidéô ini, mambe mam i sita ini i mboñ inyu niiga kiññem yé i yoñ makidik ma ma ga lémél Yéhôva?
Inyuki di nlama bé bat bôt bape kii di nlama boñ i ngéda jam li mbéñge kiññem yés? Añ Lôk Héber 5:14, i mbus ni kwélél mambadga mana:
-
Tolakii i yé jam li ntomb i bat mahôla, inyuki i yé loñge le bésbomede di wan inyu yi kii i yé loñge, ni kii i yé béba?
-
Bimbe bisélél bi nla hôla bés i niiga kiññem yés inyu yoñ makidik malam?
Nlélém kiki titii i nkoñ i nhôla mut nu a nluk matôa, hala yak nyen kiññem yés i nla hôla bés i yoñ makidik malam
5. Diihe kiññem i bôt bape
Bôt ba nla yoñ makidik ma ma yé maselna inyu nlélém jam. Lelaa di nla éba le di ndiihe kiññem i bôt bape? Di béñge dihéga diba:
Hihéga 1: Sita yada i ngwés i nhaba trosis i ngéda a nke i bôm, i ngéda a yé ni mawanda mé ni i ngéda a mboñ bibôlô gwé bi ndap. Ndi hala a ntééñga kiññem i bilôk bikéé bi likoda jé li mondo.
Añ Rôma 15:1 ni 1 Korintô 10:23, 24, i mbus ni kwélél mambadga mana:
-
Inoñnaga ni minlôñ mi Bibel mini, mambe makidik i sita ini i nlama yoñ? Kii u ga boñ ibale u yé ni ngim mut i kiññem i nsôña nye i boñ ngim jam ki le we kiññem yoñ i nsôña bé we i boñ i jam li?
Hihéga 2: To hala kiki Bibel i nsôña bé moog, mankéé a nla kit le a nyo bé moog. Ba naña nye i ngand, a ntehe lôk kéé i nyo moog.
Añ Ñañal 7:16 ni Rôma 14:1, 10, i mbus ni kwélél mambadga mana:
-
Inoñnaga ni minlôñ mi Bibel mini, mambe makidik mankéé a nlama yoñ? Kii u ga boñ ibale u ntehe mut a mboñ ngim jam i kiññem yoñ i nsôña we i boñ?
Kii i nla hôla we i yoñ makidik malam?
1. Bat Yéhôva mahôla.—Yakôbô 1:5.
2. Boñ nyiña i Bibel ni bikaat bi ntôñ bi bi ga hôla we i léba matiñ ma ma mbéñge ndutu yoñ. U nla ki kwel ni bikristen bipe bi bi bi boma nlélém ndutu.
3. Hégda mandutu makidik moñ ma nla lona we ni lelaa ma nla tééñga kiññem i bôt bape.
BÔT BAPE BA NKAL LE: “U gwé kunde i boñ kii yosôna i nlémél we, u gwé bé le u béñge i jam bôt bape ba nhoñol.”
-
Inyuki di nlama yéñ yi kii Yéhôva a nhoñol, di diihe ki kiññem i bôt bape?
I SEM KWEP
Inyu yoñ makidik malam, di nlama yéñ mahoñol ma Yéhôva mu jam di nsômbôl boñ, i mbus di béñge ibale makidik més ma nla tééñga bôt bape.
Mambadga ma mbigda
-
Lelaa di nla yoñ makidik ma ma nlémél Yéhôva?
-
Lelaa u nla niiga kiññem yoñ?
-
Lelaa u nla unda le u ndiihe kiññem i bôt bape?
KÔNDE YÉÑ
Lelaa u nla yoñ makidik ma ma ga lémél Yéhôva?
Prenons des décisions qui honorent Dieu” (La Tour de Garde, 15 avril 2011)
Mambe manjel Yéhôva a ngwélél inyu niiga bés?
Béñge kii i bi hôla i njohok mañge ini i yoñ makidik malam.
Béñge lelaa u nla yoñ makidik malam to ibale Bibel i nti bé ngim mbén inyu jam li.
“Vous faut-il un commandement pour tout ?” (La Tour de Garde, 1er décembre 2003)
Yak ini i nla lémél we
MAMBADGA BÔT BA MBÉNA BAT
Lelaa Mbôgi Yéhôva i ntégbaha bôt yigil i Bibel?
Mbôgi Yéhôva i nla hôla we i nigil Bibel ibabé i saa; yigil i ntagbe kiki nkwel ipôla bôt iba, u nla ki gwélél to imbe ngobol i Bibel. U kon bañ woñi i naña lihaa joñ jolisôna tole mawanda moñ.
