JIʼTE 35

Lagne tchi paʼ o fing ne le mkhète pepoung a

YOU’ NE

Goung yôkpe awè pe de mkhète. Medou ne mkhète bô fing ne ghe ywe pepoung ke ywe tchwepoung le ne pe, ba ne yôkpe ne pe mso pou a Jéova. A fing ne tcheng ge pe le khète ne tsuʼ ye pe gô tchwe ne a, faʼ ye pe gô ghe a, ke ba m ne lômdye le. Tchwe ye pe de mkhète pepoung a, pe fing ne ghe ŋwègne tchum vôk tsôkpe, neng gre ba ge Jéova ŋwègne.

1. Bible fing ne kwite o ne le mkhète pepoung m tchi ge ke ?

O pe gô le taʼ khète, o lendze gre priya bi Jéova ge é kwite o; neng khé Bible ne ne djô ywe ye é sè ne a. (Ké Mghôm jyenwe 2:3-6.) She mtam, Jéova ha taʼ mtchoʼ. A pe poʼo, be ne ying ne be khète pepoung ye o fing ne le a.

Te bya a pe ge, taʼ mtchoʼ Bible te si bo sing o ywe ye o gô ghe a pe ? Ba m tchwe o bô, be Jéova gô laʼte o “mejye ye o gô ying ne a.” (Izaya 48:17) M tchi ge ke ? She mkhète Bible fing ne laʼte jye bou. Taʼ khète Bible be taʼ nyenyô m tuôdeng; be daʼte ywe ye Si sè a, ba tchi paʼ é ne djouʼ ne é a. She mtam, pe dagne ywe ye Si sè ne taʼ ywe a, tchwe ye pe khé taʼ tôné Bible a. Tchwe ye pe djô ywe ye Jéova sè ne taʼ ywe a, pe fing ne le mkhète mye a boung é a.

2. O gô lendze sè nwe ne ke te le taʼ khète ?

Bible gôm ge : “Mo ye é ghe jyenwe a dinte tsuʼ ye é tchu mkwe mye ne a.” (Mghôm jyenwe 14:15) A thoute ge pe gô ne le taʼ khète, lendze le tam ne tchente sè nwe. Tchwe ye o bo sè nwe ne baya tchi ne ghe a; hente ge : ‘Ma mkhète Bible bo ging ne ? Ya tchi ne ghe gô kwite a ne ghe hwite tchum mkwègne me ? Khète ye ge gô le a gô ghe la ne pyeshe pô ? Ye m tuôdeng neng be ge, te a gô ghe ge Jéova ŋwègne le ?ʼ—Bate mtchoʼ 32:29.

Jéova be mo ye é gô sing wôkpe ywe ye a poung ke bôk a le. Tchwe ye pe tchente dagne ne jye mtchoʼ mye ba mkhète mye, neng de khète ne pe ging ne a, pe ne dagne bi saʼtum yôkpe ne pe ging paʼ a tcheng a. Saʼtum be ywe ye a sing wôkpe be ye ywe be pepoung ke gè a le. (Roma 2:14, 15) Ne jiʼte saʼtum yôkpe, gô kwite wôkpe ne le mkhète pepoung.

PING TCHENG NE GÔ DZE

Lagne tchi paʼ mkhète Bible ba saʼtum yôkpe, kwite wôkpe ne le mkhète a.

3. Tak ge Bible laʼte jye bou

Mkhète Bible daʼte jye bi pe tchwe ye pe bo de mkhète a m tchi ge ke ? Yô VIDÉO, neng gômte ne mhente menge.

VIDÉO: Laissez-vous guider par les principes de la Bible (5:54)

Jéova be é ha ya poutchi tuôdeng bi pe ?
Nweke be Jéova le ha sô bi pe ne pe de mkhète pe kwaʼ do pe ?
É be é ha ke bi pe, ne ne kwite wôkpe ne le mkhète mye pepoung mye a be we a ?

Ké Éféso 5:15, 16, ne ne djô taʼ foʼte khète Bible. Ghômte ne tchi paʼ o fing ne tchyete “pôpte mou mtchwe dzu” a, tchye m ne ne . . .

pe khé Bible goung mtyèʼ awè.
ping ji taʼ dze ke taʼ mdjwi pepoung le, taʼ mema ke taʼ pepa pepoung le, ke ba taʼ mou pepoung le.
pe gô mtchouʼte bemte.

4. Tchente jiʼte saʼtum o, poʼ ge a kwite o ne pe de mkhète pepoung

Tchwe ye taʼ mtchoʼ Bible be si ne taʼ ywe a, a fing ne hwi ne le taʼ khète pepoung. Daʼge tchwe ye tchi mtchoʼ bô te be si a pe, a gô pe m ge ke ? Yô VIDÉO, neng gômte ne hente yenge.

VIDÉO: “Lwôʼ taʼ saʼtum pepoung” (5:13)

Tchum vidéo, sita le ghe la ne ne jiʼte saʼtum é, ba ne ne de khète ye a gô poung Jéova a ?

Nweke a te tcheng ge pe hente bi pyeshe pô ge wap le mkhète ne yôkpe tsuʼ a ? Ké Ébraika 5:14, neng gômte ne mhente menge :

Ba m paʼ a fing ne tchwe paʼ tchwe ye, a hwi ne hente bi pyeshe pô ge wap le mkhète ne yôkpe tsuʼ a, a tcheng ge kwaʼ wôkpe kouʼgne ne jye ke ?
Ke fing ne kwite o ne ghe taʼ saʼtum pepoung ba ne le mkhète pepoung a ?

Dendeng paʼ taʼ mo dé taʼ kakte te ne djô jye ye é gô le a, saʼtum yôkpe kwite wôkpe ne tchi jye ye pe gô le tchum vôk tsôkpe a

5. Laʼte ge o djouʼ saʼtum pyeshe pô

Tchitchi pô gô le tchitchi mkhète. Pe fing ne laʼte ge pe djouʼ saʼtum pyeshe pô m tchi ge ke ? Sè nwe ne potse mebue menge :

Dendze ywe : Taʼ sita ye é koung ne mak se é a, ghô tchum taʼ bemte, a pe bakgne medou msita pye wap tsuʼou a ne yô taʼ mdjwi be é mak se é.

Ké Roma 15:1 ba 1 Korinto 10:23, 24, neng gômte ne mhente menge :

Sita bô fing ne tchye m ne mkhè Bible menge de ya khète ? O pe pou a taʼ mo, ye saʼtum é khô paʼ é gô ghe taʼ ywe ye saʼtum o bing ge o ghe a, be o gô ghe la ?

Bate ywe : Taʼ fe jye ge Bible te khô ge pou nwe mlouʼ bampaam pe, daʼge é le khète ne tchyete nwe. Pou ké é ne taʼ dina, é ŋwak tsuʼou djô mfe wap po nwe mlouʼ bampaam.

Ké Ékléziaste 7:16 ba Roma 14:1, 10, neng gômte ne mhente menge :

Fe bô fing ne tchye m ne mkhè Bible menge de ya khète ? O gô ghe la be ye o yô mouʼ mo é po gre taʼ ywe ye, saʼtum o gre ge o sè ge a be a pôk a ?

O gô ghe la te le mkhète pepoung ?

1. Lo bi Jéova ge é kwite o ne le khète pepoung.—Yakop 1:5.

2. Tcheng potse ne tchum Bible, ba tchum mŋwaʼgne ne jiʼte Bible, ne ne djô mkhète Bible mye a bo gôm nwe ne a. O fing ba ne hente mthôk bi mfe pye wap fing ne kwite o ne le mkhète pepoung a.

3. Sè nwe ne ywe ye khète ye o gô le a gô ghe ne saʼtum o, ba ne saʼtum pyeshe pô a.

SHE PÔ GÔM GE : “O fing ne le khète ne ghe bakele ye o koung a. Ywe ye pyeshe pô sè a te be m tuôdeng pe”.

Nweke a tcheng ge pe sè nwe ne ywe ye Si ba pyeshe pô sè a ?

YE NE KHAMTE

Pe de mkhète pepoung tchwe ye pe sè nwe ne tchi paʼ Jéova ne djô taʼ ywe a, ba tchwe ye pe dé be ye, ywe ye pe gô ghe a gô kwite pyeshe pô, ke ghe ywe tchwepoung ne pou a le.