LIKE SUANLƐ 35
?Ngue yɛ ɔ kwla uka e naan y’a fa ajalɛ kpa-ɔ?
E kwlaa e fa ajalɛ. Ajalɛ nga e fa’n ɔ kwla yo maan e di aklunjɔɛ annzɛ kusu e wun e ɲrun. Asa’n, ɔ kwla yo maan e nin Zoova e afiɛn mantan annzɛ e afiɛn saci. I wie yɛle lika nga é trán’n, ɔ nin like nga é yó naan y’a ɲan sika y’a nian e awlofuɛ’m be lika’n, annzɛ kusu sɛ é já bla annzɛ bian annzɛ sɛ e su yoman sɔ-o. Kɛ e fa ajalɛ nga be ti kpa’n e di aklunjɔɛ, kpɛkun Zoova i klun jɔ e wun.
1. ?Wafa sɛ yɛ Biblu’n kwla uka wɔ naan w’a fa ajalɛ kpa-ɔ?
Kwlaa naan w’a fa ajalɛ kun’n, srɛ Zoova kɛ ɔ uka wɔ. Kpɛkun nian Biblu’n nun naan w’a wun wafa ng’ɔ bu ajalɛ sɔ’n. (Kanngan Ɲanndra Mun 2:3-6 nun.) Ɔ ju wie’n, Zoova kle e like trele ng’ɔ fata kɛ e yo i sa wie’m be nun’n. Kɛ ɔ ko yo sɔ’n ɔ flunman kɛ e nanti i ndɛ’n su.
?Yɛ sɛ Biblu’n kanman like trele ng’ɔ fata kɛ a yo’n i ndɛ’n nin? I lɛ nun’n, Zoova wá klé wɔ ‘atin ng’ɔ fata kɛ a fa su’n.’ (Ezai 48:17) ?Wafa sɛ yɛ ɔ́ yó i sɔ liɛ’n niɔn? Biblu’n nun ndɛ wie’m be kwla uka wɔ. Afin Biblu’n nun ndɛ’m be kwla uka e naan y’a si akunndan nga Zoova bu’n, ɔ nin wafa nga i wun yo i’n. Blɛ wie nun’n, kɛ e kanngan sran wie’m be su ndɛ’n Biblu’n nun’n, i sɔ’n uka e naan y’a wun akunndan nga Zoova bu i sa wie’m be su’n. Kɛ e wun akunndan nga Zoova bu’n, i sɔ’n uka e naan y’a fa ajalɛ nga bé jɔ́ i klun’n.
2. ?Ngue yɛ ɔ fata kɛ a dun mmua bu i akunndan-ɔn?
Biblu’n se kɛ: “Ngwlɛlɛfuɛ’n i liɛ’n, ɔ niɛn i ja kwlaa ng’ɔ tu’n su.” (Ɲanndra Mun 14:15) I sɔ’n kle kɛ kwlaa naan y’a fa ajalɛ kun’n, ɔ fata kɛ e bu i sin kpa. Kɛ á bú ajalɛ nga a kwla fa’n i akunndan’n usa ɔ wun kɛ: ‘?Biblu’n nun ndɛ benin yɛ ɔ kwla uka min-ɔn? ?Ajalɛ benin yɛ sɛ n fa’n min akunndan’n su buman min fɔ-ɔ? ?Wafa sɛ yɛ min wiengu mun bé wá bú ajalɛ nga ń fá’n niɔn? ?Ajalɛ nga ń fá’n ɔ́ jɔ́ Zoova klun?’—Mmla’n 32:29.
Zoova le atin se e kɛ like kun ti kpa annzɛ ɔ ti tɛ. Kɛ e si i mmla’m be kpa mɔ e si akunndan ng’ɔ bu’n, e kwla fa ajalɛ kpa. Sɛ e yo sɔ’n e klun akunndan’n úka e naan y’a wun like ng’ɔ ti kpa’n annzɛ like ng’ɔ ti tɛ’n. (Rɔmunfuɛ Mun 2:14, 15) Ɔ maan é kwlá fá ajalɛ ng’ɔ ti kpa’n.
SI NDƐ’N NUN KPA EKUN
Maan e nian wafa nga Biblu’n nun ndɛ’n ɔ nin e klun akunndan’n, be kwla uka e naan y’a fa ajalɛ ng’ɔ ti kpa’n.
3. Maan ajalɛ nga á fá’n ɔ taka Biblu’n su
?Wafa sɛ yɛ Biblu’n kwla uka wɔ naan w’a fa ajalɛ kpa-ɔ? An bo VIDEO’N, i sin’n an koko kosan yɛ’m be su yalɛ.
-
?Ngue yɛ Ɲanmiɛn man e atin kɛ e yo-ɔ?
-
?Ngue ti yɛ Zoova man e atin kɛ e yo sɔ-ɔ?
-
?Ngue yɛ Zoova mannin e naan y’a kwla fa ajalɛ kpa-ɔ?
Biblu’n nun ndɛ nga be kwla uka e’n be nun kun yɛle Efɛzifuɛ Mun 5:15, 16. An kanngan nun. I sin’n, an koko sa nga ti yɛ ɔ ti cinnjin kɛ e fa blɛ e yo ninnge nga mun’n i su yalɛ:
-
Biblu’n nun kannganlɛ’n.
-
E yi annzɛ e wun annzɛ e mma’m be lika nianlɛ’n.
-
Aɲia’m be bo tranlɛ’n.
4. Ɔ klun akunndan’n kwla uka wɔ naan y’a fa ajalɛ kpa
Ɔ ju wie’n, kɛ Biblu’n man like trele kun su mmla’n e wun ajalɛ ng’ɔ fata kɛ e fa’n i wlɛ weiin. ?Yɛ sɛ Biblu’n w’a manman like kun i su mmla trele nin? An bo VIDEO’N, i sin’n an koko kosan yɛ’n i su yalɛ.
-
?Video’n nun’n, ninnge benin wie mun yɛ aniaan bla’n yoli naan w’a fa ajalɛ ng’ɔ́ jɔ́ Zoova klun’n niɔn?
?Sɛ e bɔbɔ yɛ ɔ fata kɛ e fa ajalɛ wie’n, ngue ti yɛ ɔ fataman kɛ e se sran uflɛ kɛ ɔ kle e like ng’ɔ fata kɛ e yo’n niɔn? An kanngan Ebre Mun 5:14 nun, i sin’n an koko kosan yɛ’m be su yalɛ:
-
?Ngue yɛ ɔ fata kɛ e bɔbɔ e mian e ɲin e wun i wlɛ-ɔ?
-
?Ninnge benin wie mun yɛ be kwla uka ɔ naan w’a fa ajalɛ kpa-ɔ?
E klun akunndan’n kwla uka e naan y’a wun atin ng’ɔ fata kɛ e fa su’n.
5. Bu wafa nga i sɔ’n yó ɔ wiengu mun’n i akunndan
Sa wie nun’n nán ajalɛ kunngba’n yɛ e kwlaa e fa-ɔ. ?É yó sɛ naan ajalɛ nga e fa’n w’a sannganman e wiengu mun be akunndan? Maan e fa e ɲin e sie i sa nɲɔn su:
Sa klikli’n: Aniaan bla kun klo makiazi yolɛ. Siɛn’n w’a ɔ asɔnun bo uflɛ nun. Kpɛkun i sɔ’n sanngan aniaan bla nga be o lɔ’n be akunndan.
An kanngan Rɔmunfuɛ Mun 15:1 nin 1 Korɛntifuɛ Mun 10:23, 24 nun, i sin’n an koko kosan yɛ’m be su yalɛ:
-
?Kɛ nga ndɛ mma sɔ’m be fa kan’n sa’n, ngue yɛ aniaan bla’n kwla se kɛ ɔ́ yó-ɔ? ?Sɛ like kun sannganman ɔ akunndan sanngɛ ɔ sanngan ɔ wiengu’m be akunndan’n ngue yɛ á yó-ɔ?
Sa nɲɔn su’n: Kannzɛ aniaan bian kun si kɛ nzan nɔnlɛ’n timan like tɛ’n, ɔ fali ajalɛ kɛ ɔ su nɔnman nzan mlɔnmlɔn. Cɛn kun’n i janvuɛ’m be yiɛli i kɛ be ko yiyi be ɲin su kan. Kɛ ɔ́ jú lɔ’n aniaan wie’m be su nɔn nzan.
An kanngan Akunndanfuɛ’n 7:16 nin Rɔmunfuɛ Mun 14:1, 10 nun, i sin’n an koko kosan yɛ’m be su yalɛ:
-
?Kɛ nga ndɛ mma sɔ’m be fa kan’n sa’n, ngue yɛ aniaan bian’n kwla se kɛ ɔ́ yó-ɔ? ?Sɛ like wie sanngan ɔ akunndan naan a wun kɛ sran uflɛ su yo’n, ngue yɛ á yó-ɔ?
?Ninnge benin wie mun yɛ a kwla yo naan y’a fa ajalɛ kpa-ɔ?
1. Srɛ Zoova kɛ ɔ uka wɔ naan w’a wun like ng’ɔ fata kɛ a yo’n. —Zaki 1:5.
2. Kunndɛ like sɔ’n i su ndɛ nga Biblu’n nin e fluwa mun be kan’n. Asa’n, a kwla usa aniaan nga be ɲin w’a ti Ɲanmiɛn sulɛ’n nun’n be ngwlɛlɛ afɛ.
3. Bu wafa nga ajalɛ sɔ’n i bo’n gúa mán ɔ bɔbɔ ɔ nin sran uflɛ’n i akunndan.
SRAN WIE’M BE WAAN: “N le atin n yo like kwlaa nga n klo’n. Nga sran’m be waan bé kán’n maan be kan, min ndɛ nunman nun.”
-
?Wafa nga Ɲanmiɛn nin e wiengu’m bé bú ajalɛ nga e fa’n, ngue ti yɛ ɔ fata kɛ ɔ yo e cinnjin-ɔn?
NDƐ’N I KPƆLƐ BOLƐ
Sɛ e kunndɛ kɛ é fá ajalɛ kpa’n, ɔ fata kɛ e wun wafa nga Zoova bú ajalɛ sɔ’n i wlɛ. Asa’n, ɔ fata kɛ e bu wafa nga ajalɛ sɔ mɔ é fá’n i bo’n gúa mán e wiengu mun’n i akunndan.
Ndɛ’n i nun flanlɛ
-
?Ngue yɛ ɔ kwla uka e naan y’a fa ajalɛ ng’ɔ́ jɔ́ Zoova klun’n niɔn?
-
?Ngue yɛ é yó naan e klun akunndan’n w’a uka e naan y’a fa ajalɛ kpa-ɔ?
-
?Wafa sɛ yɛ e kwla kle kɛ akunndan nga e wiengu’m be bu’n, ɔ ti e cinnjin-ɔn?
NDƐ WIE MUN EKUN
?Ngue yɛ ɔ kwla uka wɔ naan w’a fa ajalɛ kpa naan a nin Ɲanmiɛn amun afiɛn w’a mantan-ɔn?
“Maan ajalɛ nga é fá’n be yo naan Ɲanmiɛn ɲan ɲrun” (Sasafuɛ Tranwlɛ’n, afuɛ 2011, Avrili 1)
Wafa nga Zoova man e afɔtuɛ’n.
Like ng’ɔ ukali bian kun naan w’a fa ajalɛ cinnjin kpa kun’n.
Sɛ Zoova w’a kleman e like trele ng’ɔ fata kɛ e yo’n, wafa nga e kwla fa ajalɛ ng’ɔ jɔ i klun’n.
“?Ɔ fata kɛ Ɲanmiɛn kpɛ like kwlaa yolɛ su mmla?” (Sasafuɛ Tranwlɛ’n nun ndɛ)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
