FARKARKOR 35
Kokinfir fa Koso Nyan Ḇepyum
Ro kenem ine, kokame fandun fa kokinfir nyan ḇepyum fa koso na. Imbe kosmai roi ḇepyum ḇaido kobe kofanam faro Yahwe I, nane ndramuma ro nyan minsai kokinfir fa koso na. Rupa ra, na kokinfir fa imbe koḇarek ro diso, fararur minsai na kofrur insama kosmai pipi, oroḇa ido kokinfir imbe kofarḇuk ke roḇa. Komam kaku roi ine ḇepon kada, nari kosmai payamyum ro kenem koḇena ma nari Yahwe imarisen.
1. Rariso buk Wos Refo fa nfarkin Au insama kwinfir fa waso nyan ḇepyum ya?
Imbe waso nyan ḇepyum ya ido, ipyum ya benadi ḇepon bo wor fa Yahwe isaramper Au ma wafarkor Refo ya insama wafawi rosai imarisen na. (Kowasya Amsal 2:3-6.) Fafisu wawasya Refo ya, nari mam Yahwe isya byuk parenta ḇesnai kaku. Rarirya ido, kwinfir fa wasouser pyum na.
Imbape, parenta ro Refo ya nasnai manggun ḇa ido moḇsa na berai? Manseren Yahwe na fyarkin Au fa wambran pdef ’ro nyan fandun fa wambran ro na’. (Yesaya 48:17) Moḇsa na fyarkin Au rai? Swewar wos farkankin ro Refo fa nfara Au. Wos farkankin ro Refo ine iso fawawi ḇeknam kaku ḇekofenḇair Manseren Allah kakara Ḇyena ma moḇ ḇyaḇir raya. Kowasya fawar ro Wos Refo ya kada, nari kofawi Yahwe mamam Ḇyena. Kofawi na kwar ido, insape na koso nyan ḇepyum raris moḇ Yahwe imarisen raya. Rarirya, nari Yahwe imarisen faro rosai kofrur na.
2. Rosai na kwara kaku ḇepon resari insape kwinfir nyan risai na waso ya?
Refo ya doḇe, ”Snonggaku ḇefawinanem kyara pyum kaku moḇ imbran raya.” (Amsal 14:15) Inja fafisu imbe kofrur roi oso ḇaime, kobuk swaf fa kokara kaku roi imbe kokinfir na resari. Rupa ra kwara roi ine: ’Wos farkankin ro Refo minsai nari yaso ya? Roi ḇepyum rosaiso bisa yafrur na? Roi imbe yafrur ine nari dun roi ḇepyum ke roi ḇeḇye ḇa faro ḇesesya? Ḇefandun syadi, roi imbe yafrur nane na nafrur fa Yahwe imarisen ke?’—Ulangan 32:29.
Yahwe manggundi iso ḇeyapḇair roi ḇepyum fa koso na, ma roi ḇesasar risai koso awer na. Kofawi pyum parenta ma wos swarapepen Ḇyena ma kosewar fa kosouser na kada, koisya kofarkor sneuser koḇena. Sneuser iso roi koḇaḇir ro kosnesna fa kobukifawi roi ḇekaku ma ḇesasar na. (Roma 2:14, 15) Kobuk Wos Refo ya fa kokifarkor sneuser koḇena ido, na nafnoḇek ko fa koso nyan ḇepyum na.
SWEWAR KAKU WER
Nari kawos rariso wos farkankin ro Refo ma sne koḇena nafnoḇek ko fa koso nyan ḇepyum na.
3. Be Wos Refo ya fa fyarkin Au
Rariso wos Refo fyarkin ko fafisu kokinfir rosai imbe kofrur na? Komam VIDIO, raimnai kawos fakfuken na.
-
Roi ḇepyum rosai Yahwe byuk ḇe ko na?
-
Rosai ḇefnai fa Yahwe byuk fawawi ḇe ko fa kokinfir ro manggunko?
-
Rosai Yahwe fyasos kwar ḇe ko fa kokinfir nyan ḇepyum ya?
Komam wos farkankin oso ro Refo ma farkarkor rosai kun ya. Kowasya Efesus 5:15, 16. Rariso fasos pyum oras Bena fa . . .
-
wawasya Refo ro ras ḇe ras.
-
wakenem ḇe snonswa, binswa, sinan, roma, ḇaido inai ḇepyum syadi.
-
waso fananjur ari ya.
4. Farkor pyum sne Bedi insama kwinfir fa waso nyan ḇepyum
Komam parenta ḇesnai kaku naisya ro Refo ido, rya napyan fa kokinfir nyan ḇepyum fa koso na. Fama, parenta ḇesnaibos naisya ḇa ido moḇsa na koḇerai? Komam VIDIO, raimnai kawos fakfuken na.
-
Ro vidio insanja, rosai monda imbesrar ani ifrur fa fyarkor sneri insa dun nyan ḇepyum ḇefrur fa Yahwe imarisen?
Rosai ḇefnai fa kor snonggaku ḇese fa skinfir pyan nyan ḇe ko awer? Kowasya Ibrani 5:14, raimnai kawos fakfuken suine:
-
Rya napyan fa kor snonggaku ḇese insa skinfir pyan nyan fa koso na, imboi rosai ḇefnai fa kokinfir ro manggunko ima ipyum syadi?
-
Rosai monda na ḇefnoḇek Au fa farkor sne Bedi insama kwinfir nyan ḇepyum ya?
Raris snonggaku oso na myam peta fa ifawi moḇ ḇekaku imbe rya yoḇ ya, sne koḇena nafnoḇek ko fa kofawi rosai imbe kofrur ro kenem koḇena
5. Besyowi snonggaku ḇese roi skara na
Snonggaku oser-oser moḇ kyinfir raya naḇesisye. Inja moḇsa koḇesyowi snonggaku ḇese roi skinfir na rai? Kokarapan roi ri suru suine:
Roi ḇe 1: Imbesrar oso imarisen fyamanggor i ra isnai ḇese, mura rya iryur ro sidang ḇebabo. Imbesrar ḇebor ḇero sidang anya smam bin ḇeradinema bin ḇesansun mnis ḇa sirya.
Kowasya Roma 15:1 ma 1 Korintus 10:23, 24, raimnai kawos fakfuken nane:
-
Raris mnuk nane, ipyum ya rosai imbesrar ani na kyinfir fa ifrur ya? Kwara ima roi ḇesasar ḇa imboi snonggaku ḇemam Au nari kyara ḇese ido, rosai na wafrur ya?
Roi ḇe 2: Mambesrar oso ifawi Refo doḇe aninem swan ima roi ḇesasar ḇa, ḇape manggundi kyinfir fa dakkinem ḇa. Mura, sor i fa iso ro anan kayamyam, fama myam mambesrar sia sinem swan.
Kowasya Pengkhotbah 7:16 ma Roma 14:1, 10, raimnai kawos fakfuken nane:
-
Raris mnuk nane, ipyum ya rosai mambesrar ani na kyinfir fa ifrur ya? Mam roi snonggaku ḇese sifrur na nakyaren Au ido, rosai na wafrur ya?
Rosai na ḇesaramper Au fa wafrur roi ḇepyum ya?
1. Benadi wor fa Yahwe isaramper Au insama wafawi rosai na wafrur ya.—Yakobus 1:5.
2. Farkor kaku Refo ya wer, syap, ma vidio ḇeknam ro Refo fa wafawi wos farkankin ro Refo na. Oso wer ido, wawos kuker naek srar ḇefarmyan fyoro kwar sya.
3. Kwara payamyum rosai na manggundaw ma snonggaku ḇesesya sismai na snar kwinfir fa wafrur roi ḇepyum.
SIA SOḆE: ”Manggundaw kwinfir sai imbe wafrur na. Rwower awer snonggaku ḇese!”
-
Rosai ḇefnai fa kokara mura ro Manseren Allah roi kyara na ma snonggaku ḇesesya kakara sena?
FARKARKOR ḆYENA
Imbe kokinfir fa koso nyan ḇepyum ido, kosewar ḇepon fa kofawi roi Yahwe kyara na. Kokara ḇepon rosai imbe kofrur na nari nbuk payamyum faro snonggaku ḇese ke nafnai roi ḇeḇye ḇa faro si.
Waswarepen Kaḇer
-
Rosai na mam kaku insama rosai wafrur na nafrur fa Yahwe imarisen?
-
Rosai na wafrur kaku fa bukifarkor sne Bedi?
-
Moḇsa na kwara pyum snonggaku ḇese sisnesna rai?
SWEWAR NABOR WER
Mam fa wafawi kaku nyan Manseren Yahwe byuk wos anun ḇe ko raya.
Rosai ḇefnoḇek snon oso fafisu samswen fa kyinfir nyan ḇepyum ya?
Mam nyan fa kwinfir roi na ḇefrur fa Yahwe imarisen fafisu parenta ḇesnaibos naisya ḇa.
”Wafandun Ker Parenta Ḇesnaibos ro Refo ya Ke?” (Syap Baryas 1 Desember 2003)
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
