KALANSEN 35

An bɛ se ka latigɛli ɲumanw kɛ cogo min na

A BILA A LA

Latigɛliw bɛ an bɛɛ bolo ka kɛ. O latigɛliw caman bɛ se ka nɔ ɲuman walima nɔ jugu bila an yɛrɛw la ani an ni Jehova ka teriya la. Misali la, a bɛ se ka kɛ ko an yɛrɛw de b’a latigɛ an bɛ ɲɛnamaya kɛ yɔrɔ min na, an bɛ an magoɲɛ wari sɔrɔ cogo min na, walima yɛrɛ ni an ka kan ka furu kɛ. Ni an ye latigɛli ɲumanw kɛ, an bɛ se ka nisɔndiya sɔrɔ an ka ɲɛnamaya kɔnɔ ani an ko bɛ diya Jehova ye.

1. I bɛ se ka baara kɛ ni Bibulu ye cogo di walasa ka i yɛrɛ dɛmɛ ka latigɛli ɲumanw kɛ?

Sani i ka latigɛli kɛ, delili kɛ walasa ka Jehova ka dɛmɛ sɔrɔ ani ka Bibulu sɛgɛsɛgɛ walasa k’a dɔn Jehova bɛ o ko ye cogo min na. (Ntalenw 2:3-6 kalan.) Tuma dɔw la, Jehova bɛ sariya jɛlen di. Ni o kɛra, o la k’a latigɛ ka o sariya kan minɛ, o de ye sugandiliw bɛɛ la ɲuman ye i bɛ se ka min kɛ.

Nka n’a y’a sɔrɔ Bibulu ma sariya jɛlen si di min b’a jira i ka kan ka min kɛ dun? Jehova bɛna i ɲɛminɛ ka “i taa sira” jira i la. (Esayi 48:17) A bɛna o kɛ cogo di? Sariyakolow bɛ se ka kɛ yen minnu bɛ se ka i ɲɛminɛ. Bibulu sariyakolow ye tiɲɛ jujɔw ye minnu bɛ Ala hakilinaw ani a dusukunnataw jira. Tuma caman na, an bɛ Ala miirina dɔn ko dɔ kan ni an ye Bibulu maana dɔ kalan. Ni an ye Ala miirina dɔn, an bɛ se ka latigɛliw kɛ minnu bɛ diya a ye.

2. I ka kan ka mun ni mun de jateminɛ fɔlɔ sani i ka latigɛli kɛ?

Bibulu b’a fɔ ko: “Mɔgɔ hakiliman bɛ a taama cogo kɔlɔsi.” (Ntalenw 14:15) O b’a jira ko sani an ka latigɛli kɛ, an ka kan ka waati taa ka an hakili jagabɔ sugandiliw kan minnu bɛ an ɲɛ kɔrɔ. I kɛtɔ ka o sugandili ninnu kelen-kelen bɛɛ sɛgɛsɛgɛ, i yɛrɛ ɲininka: ‘Sariyakolo jumɛnw de ɲɛsinnen bɛ u kelen-kelen bɛɛ ma? Sugandili jumɛn bɛna ne hakili lafiya? Ne ka latigɛli bɛna nɔ bila tɔw la cogo di? Min nafa ka bon n’a bɛɛ ye, o ye ko, yala o bɛna Jehova nisɔndiya wa?’—Dutɛrɔnɔmɛ 32:29.

Jehova de ka kan k’a jira an na fɛn min ka ɲi ani fɛn min man ɲi. Ni an ye a ka sariyaw ni a ka sariyakolow dɔn ka ɲɛ ani ni an banbannen don ka tugu u kɔ, o sen fɛ an bɛ ka an dusukun kolo. Dusukun, o ye an kɔnɔnamiirili de ye min bɛ ko ɲuman ani ko jugu jira an na. (Romɛkaw 2:14, 15) Dusukun kololen bɛ an dɛmɛ ka latigɛli ɲumanw kɛ.

DƆ FARA I KA DƆNNIYA KAN

An k’a lajɛ Bibulu sariyakolow ani an dusukun bɛ an dɛmɛ cogo min na ka latigɛliw kɛ.

3. A to Bibulu ka i ɲɛminɛ

Bibulu sariyakolow bɛ se ka an ɲɛminɛ cogo di ni an bɛna latigɛliw kɛ? A’ye WIDEYO lajɛ, o kɔ aw ka baro kɛ nin ɲininkaliw kan:

WIDEYO: A to Bibulu sariyakolow ka i ɲɛminɛ (5:54)

Jehova ye nilifɛn ɲumanba jumɛn di an ma?
Mun na Jehova ye se di an ma an ka latigɛliw kɛ an yɛrɛ ye?
A ye mun de di an ma walasa ka an dɛmɛ an ka latigɛliw bɛɛ la ɲumanw kɛ?

Walasa ka Bibulu sariyakolo misali dɔ ye, Efesekaw 5:15, 16 kalan. O kɔ, i bɛ se “ka waati kunmabɔ” cogo min na walasa ka nin fɛn ninnu kɛ, aw ka baro kɛ o kan.

Bibulu kalanjɛ kɛli tuma bɛɛ.
Ka kɛ furuɲɔgɔn ɲuman, bangebaga ɲuman, denkɛ walima denmuso ɲuman ye.
Lajɛw taali matarafali.

4. I dusukun kolo walasa ka latigɛli ɲumanw kɛ

Ni sariya jɛlen dɔ bɛ yen Sɛbɛnniw kɔnɔ ko dɔ kan, latigɛli ɲuman kɛli bɛ se ka kɛ ko nɔgɔn ye an bolo. Nka ni o sariya sugu tɛ yen dun? A’ye WIDEYO lajɛ, o kɔ aw ka baro kɛ nin ɲininkali kan:

WIDEYO: “Dusukun ɲuman ka to aw fɛ” (5:13)

Wideyo kɔnɔ, balimamuso ye fɛn jumɛnw de kɛ walasa ka a dusukun kolo ani ka latigɛli ɲuman kɛ min ka di Jehova ye?

Mun na an man kan k’a ɲini mɔgɔ wɛrɛw fɛ u ka latigɛliw kɛ an ye an yɛrɛw ka kan ka minnu kɛ? Heburuw 5:14 kalan, o kɔ aw ka baro kɛ nin ɲininkaliw kan:

Hali n’a bɛ se ka nɔgɔya an ma k’a ɲini mɔgɔ wɛrɛw fɛ u ka latigɛliw kɛ an ye, an yɛrɛw ka kan ka se ka mun de faranfasi?
Mun bɛ se ka i dɛmɛ i ka i dusukun kolo ani ka latigɛli ɲumanw kɛ?

Iko karti cogo, an dusukun bɛ an dɛmɛ an k’a latigɛ an bɛ taa yɔrɔ min na an ka ɲɛnamaya kɔnɔ

5. Mɔgɔ tɔw bɛ latigɛli minnu kɛ ni u dusukunw ye, bonya da o kan

Mɔgɔ minnu tɛ kelen ye, olu bɛ latigɛliw kɛ minnu tɛ kelen ye. An bɛ se k’a jira cogo di ko an bɛ bonya da mɔgɔ tɔw dusukunnakow kan? An ka ko fila lajɛ:

Ko 1: Balimamuso dɔ, a ka di min ye ka to ka a kunsigi tigɛ ka kɛ surunmanin ye iko cɛw b’a kɛ cogo min na, o balimamuso yɛlɛmana ka taa jɛkulu dɔ la, min kɔnɔ balimamuso caman bɛ yen minnu bɛ degun ni u ye balimamuso ye ka o ko sugu kɛ.

Romɛkaw 15:1 ani 1 Kɔrɛntekaw 10:23, 24 kalan, o kɔ aw ka baro kɛ nin ɲininkaliw kan:

Ka kɛɲɛ ni nin tɛmɛsiraw ye, o balimamuso bɛ se k’a latigɛ ka mun de kɛ? Ni i ni mɔgɔ dɔ bɛ ɲɔgɔn kɛrɛ fɛ, ni o tigi dusukun b’a bali fɛn dɔ kɛli la k’a sɔrɔ e dusukun bɛ sɔn o kɛli ma, i bɛna mun de kɛ?

Ko 2nan: Balimakɛ dɔ, min b’a dɔn ko ka dɔlɔ min k’a bɛrɛbɛn, Bibulu tɛ ban o ma, nka a y’a sugandi ko a tɛ dɔlɔ si min. Mɔgɔ dɔ y’a wele ka taa ɲɛnajɛ dɔ la, o ɲɛnajɛ la, a bɛ balimaw ye dɔlɔmin na.

Waajulikɛla 7:16 ani Romɛkaw 14:1, 10 kalan, o kɔ aw ka baro kɛ nin ɲininkaliw kan:

Ka kɛɲɛ ni nin tɛmɛsiraw ye, o balimakɛ bɛ se k’a latigɛ ka mun de kɛ? Ni i ye mɔgɔ wɛrɛ ye fɛn dɔ kɛli la, e dusukun bɛ i bali ka min kɛ, i bɛna mun de kɛ?

Fɛn jumɛnw bɛ se k’a to i ka latigɛli ɲumanw kɛ?

1. Jehova deli walasa min ka kan ka kɛ, a ka i dɛmɛ i ka o latigɛ.—Yakuba 1:5.

2. Ɲininiw kɛ Bibulu kɔnɔ ani gafew kɔnɔ minnu sinsinnen bɛ Bibulu kan walasa ka sariyakolow sɔrɔ minnu ɲɛsinnen bɛ i ka ko ma. I bɛ se ka kuma fana krecɛnw fɛ kodɔn bɛ minnu na.

3. I ka latigɛli bɛna nɔ min bila i yɛrɛ dusukun ani mɔgɔ wɛrɛw dusukunw na, i hakili jagabɔ o kan.

MƆGƆ DƆW B’A FƆ KO: “I b’a fɛ ka fɛn o fɛn kɛ, o kɛli yamaruya bɛ i bolo. Mɔgɔ tɔw bɛ min miiri, jɔn ka sira b’o la?”

Mun na an ka kan ka an mago don Ala miirinataw ani mɔgɔ wɛrɛw miirinataw fana la?

BAKURUBAFƆLI

An bɛ latigɛli ɲumanw kɛ ni an ye Jehova miirinataw dɔn o ko kan ani ni an bɛ an hakili jagabɔ k’a filɛ ni an ka kɛwalew bɛna tɔw dɛmɛ walima ka ko jugu kɛ u la.

Seginnkanni

Cogo jumɛn na i bɛ se ka latigɛliw kɛ minnu ka di Jehova ye?
I bɛ se ka i dusukun kolo cogo di?
Mɔgɔ tɔw bɛ latigɛli minnu kɛ ni u dusukunw ye, i bɛ se ka bonya da o kan cogo di?

Kalansen banna don min na:

A ɲini ka nin kɛ

Miiri latigɛli dɔ la i bɛna min kɛ sɔɔni. Hakilina saba ninnu waleya, minnu bɛ nin yɔrɔ koorilen kɔnɔ: “ Fɛn jumɛnw bɛ se k’a to i ka latigɛli ɲumanw kɛ?”

Fɛn wɛrɛ:

Your other goal