ˈCƖƐCƖƐKÏBHË 35
Sɛɛ ˗a ˈkä ɔ ˈsaa nɛnɩɛ ˗lɛ ˗sɛ ˈnɩ?
˗Mä ˗aˈa zɩkpa ˈmö, ˗a ˈwuë ˗a kä ˗a ˈkä ˗lu ˗lɛ ˗sɛ. ˈN ˈsaa ˗a sɛɛ ˗lɛ, yɩ glaˈmö a ˗nɩ ˗mimii bhɛnɩ yɩ ˈkä nɛnɩ ˗aa dɔˈwʋ, yɩ bhɛnɩˈɛ yɩ ˗kaɲɩ ˗lizoku ˈwʋ ˗lɛnɩ. Yɩ bhɛnɩ yɩ ˈkä gbä ˗a ˗ɲɛ Zoova ˈsɔ a bheyi ˈkä ˈmö ˈtumanɩ, yɩ bhɛnɩˈɛ yɩ ˗kaɲɩ ɲimanɩ. A yɩɛ, ˗a bhɛnɩ ˗a ˈkä dɛɛ ˗a ˈkää ˗bhölɩnɩ ˗lɛ ˗sɛ, ˈn sɛɛ ˗a ˈkää ˈzʋ ˗a ˈkä moni ghlɩ nzɩ ˗a ˈkä ˗aɲɩ ˗su. ˗A ˗käˈɛ kwäkwänɩɛ yii, ˗a bhɛnɩˈɛ ˗a ˈkä ˈsaa ˗a yɩbhää ˗lɛ ˗sɛ. Zaa, ˗a ˗kä ˈsaa nɛnɩɛ ˗lɛ ˗sɛ, ˗a bhɛnɩ ˗a ˈkä ˈmäna ˈmö ˗bhölɩnɩ ˗mä ˗aˈa zɩkpa ˈmö.
1. Sɛɛ Biblë bhɛnɩ bhä ɛ ˗kaɲɩ kwänɩ ˗a ˈkä ˈsaa nɛnɩɛ ˗lɛ ˗sɛ ˈnɩ?
˗A ˗kä ˗lu ˗lɛ ˗sɛɛ yii, ˗a nɩ bhibhe Zoova ɔ ˗kaɲɩ kwänɩ, ˈn ˗a nɩ yɩlɩˈɛ ˗mä Biblë ˈmö ˗a ˈkä sɛ ɔ pää yɩ dɔˈwʋ dlɩ ˈylɩmö. (Zɛlɩ Proverbes 2:3-6 ˈmö.) Dɛ ˗mämaa a dɔˈwʋ, ˈpäpägba a ˗ma ˗glɛ ˈsaa ˗a yɩbhää ˗a ˈkä nʋ ˈwʋ, ˗a bhɛnɩ ˗a ˈkä ˗sɩbhä a ˈpäpägba ghlɩ. ˈN ˈpäpägba ˈla mö ˗a kää ˗a ˈkä ˗gänɩ.
˗N ˈnɩ ˗sɩbhä a ˈpäpägba ˗mä Biblë ˈmö ghlɩɩ, sɛ ˗n ˈkä ɔ ˈzʋ ˈnɩ? “ˈYioo ˗n ˈkää bhlii,” Zoova bhɛnɩ ɔ ˗kamu ˈpänɩ. (Isaïe 48:17) Sɛ ɔ ˗kamu ɔ ˈpänɩ ˈnɩ? ˈLɩlɩlɩ a dɔˈwʋ Biblë kä ˈpäpägbö ˈmö, ˗yɩ bhɛnɩɛ yɩ ˗kamö kwänɩ. Wa ˗kä Biblë ˈmö a ˈpäpägböö nʋʋ, wɛlɩɩ a ˗mi kää gbëaa ˈmö, ˗yɩ tulaa Lagɔ ˈa dlɩpäsaa ˈn sɛ ɔ yɩlɩɛ ˗lii ˈwʋ ˈmö wa gaa. ˗A ˗kä Biblë ˈmö a wɛlɩɩ ˗mimii ˈmö zɛlɩɩ, yɩ ˈcɩaɲɩ sɛɛ Zoova pää dlɩ. Zaa, ˗a ˗kä Zoova ˈa dlɩpäsaa ˈmö ˈnʋʋ, ˗a bhɛnɩ ˗a ˈkä ˈsaa nɛnɔɔ dlɩ yɔwʋ ˗lɛ ˗sɛ.
2. ˗A ˗kä ˗lu ˗lɛ ˗sɛɛ yii, ˈsaa ˗a ˈkä ɔ ˈwʋ dlɩ ˈpä ˈnɩ?
Biblë lɛ nɩɩ: “Nɩkpɛɛ ˗ɔ ˈnɛɛnɩɛ ɔɲɩ ˈwʋ ɔ ˗kä kple ˗gba ˈwʋ ˗sɛɛ yii, bhëga ɔ bhëgaa ˈwë.” (Proverbes 14:15) Mii sɛɛ zɛmö nɩɩ, ˗a ˗kä ˗lu ˗lɛ ˗sɛɛ yii, ˗a kä ˗a ˈkä ˈtɛɲɩ ˈwʋ ˈlibhï nzɩ ˗a ˈkä ˈsaa ˗a ˈkää ˗lɛ ˗sɛ dlɩ kɛ ˈpänɩ. ˗A bhɛnɩ ˗a ˈkä bhʋlʋbhlʋ ˗aɲɩ kïbhï ˈlɛ ˈwʋ ˈyɩbhänɩ: ‘Biblë a ˈpäpägböö ˗mi n ˈkä ɔ ˗gänɩ ˈnɩ? ˈSaa n ˈkää ˗lɛ ˗sɛ ˗yii ɔ ˈtɩɩglɩnɔ dlɩ zɛmö ˈzʋ ˗a? ˈSaa n ˈkää ˗lɛ ˗sɛɛ, ˈsaa yɩ ˈkä ɔ ˗mumuë ˈwlu nʋ ˈnɩ? Kïbhëa ˗a käˈɛ teɲii dɛsɛ aˈbhë, ˗a ˈkää ˗aɲɩ ˈwʋ ˈyɩbhänɩ ma˗a nɩɩ, ˈsaa n ˈkää ˗lɛ ˗sɛ yi ɔ Zoova dlɩ yɔwʋ nɛnɩ ˗a?’—Deutéronome 32:29.
Zoova mɔɔ kää ɔ ˗kaɲɩ ˈsaa nɛnɩɛ ˗ɲɛ ˈsaa ˈnɩɛ nɛnɩ ˈsɔ a wɛlɩɩ ˈɲɛ. ˗A ˗kä Zoova ˈa gböö ˗ɲɛ ˈɔ ˈpäpägböö ˈsɔ ˈcɩɛɛ, ˗a ˗kä ˈyli yɔwʋ ˈtɛmanɩ ˈn ˗a ˗kɩɩ ˈklʋkpamö ˈzʋʋ, ˗aˈa ˈmlɩwʋnuëyii mö ˗a ˗wʋä daˈa ˈmö zlɔmanɩ dɔˈwʋ. Wa ˗kä ˈmlɩwʋnuëyii nʋʋ, ˗lu a ˗mu ˗wʋä ˗mä nɩkpɛ a dlɩ zɛmö, ˗wʋ bhɛnɩɛ wʋ ˈkɔ gbʋ ˗sɛ ɔ ˗kä ˗li a lii nʋʋ, ˈn ˗wʋ bhɛnɩˈɛ wʋ ˈkɔ gbʋ köbha ɔ ˗kä ˗lizoku nʋʋ, ˈmö wa laa ˗sɩbhä. (Ghlɔɔmö a ˗nʋa 2:14, 15) ˗Aˈa ˈmlɩwʋnuëyii ˗kä ˈmö zlɔnɩɩ, ɔ bhɛnɩ ɔ ˗kaɲɩ kwänɩ ˗a ˈkä ˈsaa nɛnɩɛ ˗lɛ ˗sɛ.
ˈCƖƐ ˗LII ˗MIMII
Biblë a ˈpäpägböö ˗ɲɛ ˗aˈa ˈmlɩwʋnuëyii ˈsɔ, sɛ yɩ bhɛnɩɛ yɩ ˗kaɲɩ kwänɩ ˗a ˈkä ˈsaa nɛnɩɛ ˗lɛ ˗sɛɛ, ˈyi ˈylɩmö.
3. ˗A nɩ ˈtatinɩ Biblë ˈyi ɛ ˗kaɲɩ ˗su
˗A ˗kä ˗lu ˗lɛ ˗sɛ yii, sɛɛ Biblë a ˈpäpägböö bhɛnɩ ɔ yɩ ˗kaɲɩ kwänɩ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
-
˗Lu a ˗mu kä ɔ teɲii dɛsɛ Zoova ɲɩaɲɩ ɔ ˈnɩ?
-
˗Yɩ kä ɔ ˈŋlɩ ˈn ɔ ˗yiɲɩ ɔ dɛsɛkälu ˈla ˈɲɛ ˈnɩ?
-
˗Lu a ˗mu Zoova ɲɩaɲɩ ɔ ˗wʋ ˗kaɲɩɛ kwänɩ ˗a ˈkä ˈsaa nɛnɩɛ ˗lɛ ˗sɛ ˈnɩ?
Zɛlɩ Ɛfɛɛzɩ a ˗nʋa 5:15, 16 ˈmö, ˗n ˈkä ˈpäpägbaa ˗a ˗wʋä ˗mä gbɛlɩ ˈlɛ ˈmö ˈylɩmö. ˈPäpägbaa ˗a nʋä nɩɩ “ˈtɛɲɩɩ ˈwuë Lagɔ ˈɲaɲɩɛ, a nɩ tɛ ˈyi ˈtatinɩ ɛ nɩ tɩ ˈfʋ ˈplɩ,” sɛɛ ˗n ˈka ɔ ˗gänɩ nzɩ ˗n ˈkä...
-
ˈkwädlɩ Biblë ˈmö zɛlɩ.
-
ˈluwli ɛ ˗käˈɛ ˈŋlɔ a ˗nɔ a ˗nɔ glɩnɩ, ˗n ˈkäˈɛ ˈyuëlowli a ˗nɔ a ˗nɔ glɩnɩ, ɛ ˗käˈɛ ˈyu a ˗nɔ a ˗nɔ.
-
ˈwluyɩbhäyɩbhʋ ˈwʋ mö.
4. ˗A nɩ zlɔmanɩ ˗aˈa ˈmlɩwʋnuëyii ˈmö ˗a ˈkä ˈsaa nɛnɩɛ ˗lɛ ˗sɛ
ˈLɩlɩlɩ a dɔˈwʋ, ˈsaa ˗a yɩbhä ˗a ˈkä nʋʋ, ˗a ˗kä ˗sɩbhä a ˈpäpägba ˗mä Biblë ˈmö ghlɩɩ, ˗a ˈkä ˈsaa nɛnɩɛ ˗lɛ ˗sɛ ˈnɩɛ ˈmö ˈtɛɛ. Maa, ˈn ˗a ˈnɩ ˗sɩbhä a ˈpäpägba ghlɩ ˈnaa? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
-
˗Mä video ˈlɛ ˈmö, sɛɛ ŋlʋdaayu ˗bhlʋ ˈzʋ bhä ɔ ˈkä ˈɔ ˈmlɩwʋnuëyii ˈmö zlɔmanɩ, ˈn ɔ ˈkä ˈsaa nɛnɩɛ Zoova dlɩ yɔwʋ ˗lɛ ˗sɛ ˈnɩ?
˗A ˗kä ˗lu nʋä yii, ˗yɩ kä ɔ ˈŋlɩ ˈn ˗a ˈnɩ ɔ ˗kä ˗a ˈkä ˗mumuë ˈyi ˈtatinɩ wa ˈkä ˗aa ˈbhle ˈmö ˈsaa ˗a ˈkää nʋ ˗lɛ ˗sɛ ˈnɩ? Zɛlɩ Ebleewaa 5:14 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
˗A ˈkä ˗mumuë nimï ˈyɩbhä, wa ˈkä ˗aa ˈbhle ˈmö ˈsaa wa yɩbhää ˗lɛ ˗sɛ, yɩˈɩɛ ˈmö ˈtɛɛ abhlɩ. Maa ˈlɩlɩlɩ a dɔˈwʋ, ˈsaa ˗a kä ɔ ˗a ˈkä ˗aɲɩgäsɛ nʋ ˈnɩ?
-
ˈSaa ˗kaɲɩ ɔ kwänɩ ˗a ˈkä ˗aˈa ˈmlɩwʋnuëyii ˈmö zlɔmanɩ ˈn ˗a ˈkä ˈsaa nɛnɩɛ ˗lɛ ˗sɛ ˈnɩ?
5. ˗A nɩ ˈzʋ ˗mumuë ˈa dlɩpäsaa ˈklʋkpamö
Nɩkpa ˈwuë ˈnɩɛ bhɛnɩ wa ˈkä ˗lii ˗bhlʋ ˗kpɔ ˗lɛ ˗sɛ ˗mä ˈwa zɩkpa ˈmö. Maa, sɛɛ ˗a ˈkä ɔ tula nɩɩ, ˗a zʋ ˗mumuë a dlɩpäsaa ˈklʋkpamö ˈnɩ? ˗A nɩ yɩlɩɛ ˗ka ˈwʋpälɩwɛlɩ ˈlɛ yɔwʋ:
ˈWʋpälɩwɛlɩ 1: Ŋlʋdaayu ˗bhlʋ ˗ɔ yiɛ ˈlili ˈwʋ ˗mä lagɔzɩkpa ˗blʋ ˈmö, ɲɩbhɛlʋsɛ ɔ kpälɩɛ ˈkwädlɩ ˈwlu. Yɩ kla teɲii ŋlʋdaayuë a ˗bɛ dlɩ ˈyli.
Zɛlɩ Ghlɔɔmö a ˗nʋa 15:1 ˈn 1 Kolɛɛtɩ a ˗nʋa 10:23, 24 ˈmö. ˈN a nɩ yɩlɩ nimïyɩbhäkïbhï ˈlɛ yɔwʋ:
-
Sɛɛ gbɛlɩ ˈlɛ gbää a dɔˈwʋ, ˈsaa ŋlʋdaayu ˈlɛ ˈkä ɔ nʋ ˈnɩ? Nɩkpɛ ˗kä ˗lu nʋ dɔˈwʋ ˗wʋʋ, ɔ bhɛnɩ ɔ ˈkä dlɩ ˈpä nɩɩ ˗li a ˗liɛ. Maa ˗mɔmɔɔ yi ɔbhlɩ dlɩ ˈpä nɩɩ, ˈsaa ɔ nʋä ˈnɩɛ nɛnɩ. Zaa, ˗sɩbhä a dɔˈwʋ sɛɛ ˗a ˈkä ɔ ˈzʋ ˈnɩ?
ˈWʋpälɩwɛlɩ 2: Ɲɩbhɛlʋdaayu ˗bhlʋ, ɔ ˗yi sɛ nɩɩ Biblë ˈnɩɛ gbä nɩɩ nɩkpɛ nɩ tɩ nʋ ˈnɩmä ˈlɩlɩlɩ. ˗Maa, ɔˈɔɔ yɩbhä ɔ ˈkä ɔbhlɩ tɛkäsɛ aˈbhë nʋ ˈnɩmä. ˈYlɩ ˗bhlʋ ˈmö ˈn lagɔdaayuëa yoo wäzɩ wa ˈkä ˈgämö linɩ. Ɔ ghlɛɛ ˗mä ˈn ɔ yiɛ lagɔdaayuëa ˈylɩmö, wa ˗wʋ nʋʋ ˈnɩmä dɔˈwʋ.
Zɛlɩ Ecclésiaste 7:16 ˈn Ghlɔɔmö a ˗nʋa 14:1, 10 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
Sɛɛ gbɛlɩ ˈlɛ gbää a dɔˈwʋ, sɛɛ ŋlʋdaayu ˈlɛ ˈkä ɔ ˈzʋ ˈnɩ? ˗N ˗kä ˗lu nʋ dɔˈwʋ ˗wʋʋ, ˈn ˗mɔmɔɔ ˗kä ɔbhlɩ dlɩ ˈpä nɩɩ ˗lizoku yɩ glɩnɩɛ, sɛɛ ˗n ˈkä ɔ ˈzʋ ˈnɩ?
˗N ˗kä ˗lu nʋä yi sɛɛ ˗n ˈkä ɔ ˈzʋ ˈnɩ?
1. Bhibhe Zoova ɔ ˗kamö kwänɩ.—Zaakö 1:5.
2. Tɛlɩ sɛ ˗mä Biblë ˈmö, ˈn ˗mä ˗aˈa lagɔbɔgwɩ ˈmö, ˗n ˈkä ˈpäpägböö ˗n ˈkää ˗gänɩ ghlɩ. ˈYɩbhäˈɛ lagɔdaayu a ˗mɔ yɛɛ ˗mä lagɔwɛlɩɩ ˈmö ˗jɩbhɛnɩ nimï ɔ ˗kamö kwänɩ.
3. ˈPänɩ ˈsaa yɩ ˈkää ˈyli ˈwälanɩ dlɩ kɛ, ˈsaa yɩ ˗kamöä ˗naɲɩgäsɛ ˈwlu nʋ ˈn ˈsaa yɩ ˈkäˈɛ ˗mumuë ˈwlu nʋ.
NƖKPA ˗MUMUË LƐ NƖƖ: “˗A bhɛnɩ ˗a ˈkä ˈsaa ˗a yɩbhää nʋ. Ɛˈɛ ˗bhö nɩkpɛ a gbʋ.”
-
˗Yɩ kä ɔ ˈŋlɩ ˈn ˗a kä ɔ ˗a ˈkä Lagɔ ˈa dlɩpäsaa ˗ɲɛ ˗mumuë ˈa dlɩpäsaa ˈsɔ ˈklʋkpamö ˈzʋ ˈnɩ?
DƐSƐKÄKÏBHÏ
˗A ˗kä ˗lu nʋä yii, sɛɛ Zoova pää yɩ dɔˈwʋ dlɩ, ˗a kä ˗a ˈkɩ ˗yi. ˈN yɩ ˗kä bhɛnɩ yɩ ˈkä ˗mumuë kwänɩ, yɩ ˗käˈɛ bhɛnɩ yɩ ˈkä˗mumuë swɩ yɔwʋ ˈkuanɩ, mö ˗a nɩ ˈpänɩ dlɩ kɛ. ˗A ˗kä ˗sɩbhä ˈzʋʋ, ˗a yi ˈsaa nɛnɩɛ ˗lɛ ˗sɛ.
ˈWʋligbanɩkïbhï
-
Sɛɛ ˗a ˈkä ɔ ˗lii ˗a ˗mi nɛnɩɛ Zoova dlɩ yɔwʋ ˗lɛ ˗sɛ ˈnɩ?
-
Sɛɛ ˗a ˈkä ɔ ˗aˈa ˈmlɩwʋnuëyii ˈmö zlɔmanɩ ˈnɩ?
-
Sɛɛ ˗a ˈkä ɔ ˗mumuë ˈa dlɩpäsaa ˈklʋkpamö ˈzʋ ˈnɩ?
YILII YƆWƲ
Sɛɛ ˗a ˈkä ɔ ˈsaa nɛnɩɛ ˗lɛ ˗sɛ nzɩ ˗a ˗ɲɛ Zoova ˈsɔ ˈkä teɲii ˈwʋ ˗wʋnɩ ˈnɩ?
« Prenons des décisions qui honorent Dieu » (La Tour de Garde, 15 avril 2011)
Sɛɛ Zoova zʋʋɲɩɛ ˈdɩ ˈmö ˈki a ˗bɛ ˈmö, ˈyi ˈylɩmö.
ˈSaa kwänɩɛ nɩkpɛ ˗bhlʋ ˈn ɔ yiɛ ˗lu ˗bhlʋ ˗wʋ ˈtɛɛnɔ a˗a kɛˈmö nʋʋ, ˈyi ˈylɩmö.
Biblë ˗nɩɲɩ sasɛ dlɩ ˗gömö ˗sɛsɛnɩ aˈbhë ˗kë, sɛɛ ˗a ˈkä ɔ ˈsaa nɛnɩɛ Zoova dlɩ yɔwʋ ˗lɛ ˗sɛ ˈnɩ?
« Vous faut˗il un commandement pour tout ? » (La Tour de Garde, 1er décembre 2003)