PELAJAREN 35

Cara Erban Keputusen si Mehuli

MAINKEN

Kita kerina rusur erban keputusen. Mbue arah keputusenta e mpengaruhi kegeluhenta bage pe hubungenta ras Dibata Jahwe. Contohna, arus siputusken i ja kita tading, erjabu nge kita ntah lang, bage pe kai pendahin si cocok man banta. Adi siban keputusen si mehuli, meriah ukurta janah Jahwe pe senang.

1. Uga Pustaka si Badia banci nampati kita erban keputusen si mehuli?

Sope erban keputusen, ertotolah kam lebe mindo penampat Jahwe janah pereksalah bas Pustaka si Badia guna meteh uga cara rukur Jahwe kerna si e. (Baca Kuan-kuanen 2:3-6.) Mon-mon, bereken Jahwe perentah si jelas. Adi patuh kam man perentah e, pasti melala datndu gunana.

Tapi, uga adi la lit perentah si jelas kerna si e bas Pustaka si Badia? Pasti tetap kam isampati Jahwe gelah banci erdalan “bas dalan si arus dalanindu.” (Jesaya 48:17) Uga carana? Bas Pustaka si Badia, lit prinsip-prinsip si banci nampati kam. Prinsip Pustaka si Badia eme kebenaren dasar si ncidahken uga perukuren ras perasan Jahwe. Contohna sanga sibaca sada kejadin bas Pustaka si Badia, banci siteh uga perasan Jahwe kerna sada hal. Adi enggo siteh uga perasan Jahwe, banci siban keputusen si erban meriah ukurNa.

2. Kai saja si perlu siukuri sope erban keputusen?

Bas Pustaka si Badia ikataken, “Kalak si cerdik, ukurina tiap langkahna.” (Kuan-kuanen 14:15) E ertina, sope siban keputusen, perlu sipertimbangken pilihen kai saja nge si lit. Sanga pertimbangkenndu tiap pilihen, ukurilah: ‘Prinsip Pustaka si Badia si apai nge si lit hubungenna ras si e? Enggo nge cocok si kupilih enda? Kai nge pengaruhna keputusenku e man kalak si deban? Janah si pentingna, meriah nge kuban ukur Jahwe ngidah keputusenku e?’—Ulangen 32:29.

Lit hak Jahwe nentuken si apai si mehuli ras si apai si la mehuli. Perlu siangkai hukum ras prinsip si ibereken Jahwe, janah siusahaken gelah terus matuhisa. Alu bage, pusuh peratenta banci reh ulina. Pusuh peraten eme perasan si lit bas pusuhta si ngingetken kita kerna kai si benar ras kai si salah. (Roma 2:14, 15) Adi pusuh peratenta erdahin alu mehuli, banci siban keputusen si mehuli.

PELAJARI TERBAGESEN

Sibahas kari uga prinsip-prinsip Pustaka si Badia bage pe pusuh peratenta, banci nampati kita erban keputusen si mehuli.

3. Ikutkenlah petunjuk si lit bas Pustaka si Badia

Uga prinsip bas Pustaka si Badia banci nampati kita sanga erban keputusen? Putar VIDEO, kenca si e bahas penungkunen enda:

VIDEO: Gunakenlah Prinsip Pustaka si Badia Negu-Negu Kam (5:54)

Kai nge maksudna kebebasen erban pilihen?
Engkai maka ibereken Jahwe man banta kebebasen erban pilihen?
Kai si bereken Jahwe man banta gelah banci sigunaken kebebasenta erban pilihen alu cara si mehuli?

Guna meteh salah sada contoh prinsip Pustaka si Badia, bacalah Epesus 5:15, 16. Bahaslah uga carana ‘nggunaken waktu alu mehuli’ gelah banci kam . . .

mbaca Pustaka si Badia alu teratur.
jadi teman geluh, orang tua, ntah pe anak si reh ulina.
reh ku perpulungen.

4. Silatihlah pusuh peratenta gelah banci siban keputusen si mehuli

Adi lit petunjuk si jelas arah Pustaka si Badia, banci saja reh nukahna siakap erban keputusen si benar. Tapi uga adi la lit? Putar VIDEO, kenca si e bahas penungkunen enda:

VIDEO: “Jagalah Pusuh Peraten Kena Tetap Bersih” (5:13)

I bas video e, kai nge si ilakoken turang seninata guna ngelatih pusuh peratenna, gelah banci ibanna keputusen si erban meriah ukur Jahwe?

Engkai maka la banci sipindo kalak si deban si erban keputusen man banta? Bacalah Heber 5:14, kenca si e bahas penungkunen enda:

Amin pe banci saja nukahen adi sipindo kalak erban keputusen man banta, tapi kita masing-masing arus banci ngelakoken kai?
Kai saja nge si banci nampati kita ngelatih pusuh peratenta ras erban keputusen si mehuli?

Bali bagi sada peta, pusuh peratenta banci nampati kita milih dalan si apai nge si arus sidalani bas geluh enda

5. Siergailah pusuh peraten kalak si deban

Labo seri keputusen tiap kalak. Uga cara ncidahken maka siergai pusuh peraten kalak si deban? Perdiateken dua contoh enda:

Contoh 1: Lit sekalak turang seninata si diberu si meriah akapna ersolek. Pindah ia ku runggun si deban. Turang senina si diberu si lit bas runggun e, la kapna cocok adi lit turang seninata si diberu si ersolek.

Bacalah Roma 15:1 ras 1 Korinti 10:23, 24, kenca si e bahas penungkunen enda:

Menurut ayat e, keputusen kai si banci iban turang seninata si diberu si meriah kapna ersolek ndai? Adi pusuh peratenndu la ngelarang kam ngelakoken sada hal, tapi pusuh peraten turang seninandu la seri bagi kam, kai nge si lakokenndu?

Contoh 2: Lit sekalak turang seninata si dilaki, itehna maka bas Pustaka si Badia labo lit ilarang minem inemen si lit alkoholna, tapi sitik pe la ia nggit nginemsa. Sanga iundang ia ku acara ramah-tamah, idahna turang senina minem inemen si lit alkoholna.

Bacalah Pengerana 7:16 ras Roma 14:1, 10, kenca si e bahas penungkunen enda:

Menurut ayat e, keputusen kai si banci iban turang seninata si dilaki si la nggit minem ndai? Adi pusuh peratenndu ngelarang kam ngelakoken sada hal, tapi pusuh peraten turang seninandu la seri bagi kam, kai nge si lakokenndu?

Uga carana erban keputusen si mehuli?

1. Pindolah man Jahwe gelah sampatiNa kam erban keputusen.—Jakup 1:5.

2. Daramilah prinsip-prinsip si lit bas Pustaka si Badia bage pe publikasita. Banci ka pindondu nasehat man turang seninata si enggo erpengalamen.

3. Ukurilah kai pengaruh keputusenndu e nandangi pusuh peratenndu bage pe pusuh peraten kalak si deban.

LIT SI NGATAKEN: “Uga siakap meriah bage siban. Kalak lo man ukuren.”

Engkai maka perlu siukuri uga perasan Dibata bage pe perasan kalak si deban?

KESIMPULEN PELAJAREN ENDA

Gelah banci siban keputusen si mehuli, perlu siteh uga perasan Jahwe kerna si e. Janah perlu siukuri, mehuli ntah lang pengaruh keputusenta e man kalak si deban.