NLÔ AJÔ 35

Aval avé ô ne nyoñe mbamba mintyi’an?

Vô’ôlô nkobô

Bia bese bi bili na bia nyoñ mintyi’an. Abui mintyi’an bia nyoñ e ne soo bia mvo’é nge ke minjuk, mi ne fe nambe élate jangan a Yéhôva. Éve’an é ne na, bi ne nyoñ ntyi’an a lat a vôme bii ke tabe, avale bi ne jalé miñyiane miangan, a nge dé sili na bi luk nge momo. Éyoñe bia nyoñe mbamba mintyi’an, bii nyiñe meva’ été a ve Yéhôva nlem avak.

1. Aval avé Kalate Zambe a ne volô wo na ô nyoñe mbamba mintyi’an?

Ôsusua na wo nyoñ ntyi’an éziñ, ye’ela’ane Yéhôva na a volô wo, a lañe’e Kalate Zambe asu na ô yemelan ôsimesane Wé. (Lañe’e Minkana 2:3-6.) Biyoñe biziñ, Yéhôva a ne kôme kate wo jame wo yiane bo. Éyoñe nalé a kui, mbamba ntyi’an ô ne nyoñ a ne na ô bo nye mewôk.

Jé ki ô ne bo nge Kalate Zambe a kôme ki wo kate jame wo yiane bo? Yéhôva é liti wo “zen wo yiane ke.” (Ésaïe 48:17) Aval avé? Miñye’elane ya Kalate Zambe miziñe mi ne volô wo. Mi ne benya mejôô be ne Kalate Zambe été, ba liti avale Yéhôva a simesan, a aval a wô’ôtan. Biyoñ biziñ bi wô’ô yem avale Yéhôva a wô’ôtan éyoñe bia lañe nkañete éziñe ya Bible. Éyoñe bi yemeya avale Yéhôva a wô’ôtan, bi ne kui na bi nyoñe mintyi’ane mia ve nye nlem avak.

2. Mam mevé wo yiane taté fas ôsusua na wo nyoñe ntyi’an éziñ?

Kalate Zambe a jô na: “Môt a ne ntye a tu’a fombô nkean a ke.” (Minkana 14:15) Nalé a tinane na, ôsusua na wo nyoñ ntyi’an éziñ, wo yiane kôme taté nyoñ éyoñe ya fas. Nté wo fas, sili’i womiene na: ‘Miñye’elane mivé ya Kalate Zambe me ne tôñ? Ntyi’an ôvé wé bôône ma nleme si ne mieññ? Aval avé ntyi’ane wom wé nambe bôte bevok? Nsili wo dañe mfi ô ne na, ye ntyi’an ôte wé ve Yéhôva nlem avak?’—Deutéronome 32:29.

Yéhôva nnye a yiane bia kate jam e ne mvo’é a di e ne abé. Nge bia yé’é metiñe mé a miñye’elane mié, a nge bia nyoñe ntyi’ane ya tôñe mie, bii kui na bi yañele mone môte ya nleme wongan mvo’é. Mone môte ya nlem a ne jôm Zambe a nga futi bia minlem été asu na a kate bia jam é ne abé a di é ne mvo’é. (Beromain 2:14, 15) Mbamba mone môte ya nlem é volô bia na bi nyoñe mbamba mintyi’an.

TUKA’A FAK

Yene’ aval avé miñye’elane ya Kalate Zambe a mbamba mone môte ya nlem be ne volô bia na bi nyoñe mbamba mintyi’an.

3. Kañese’e na Kalate Zambe nnye a liti wo zen

Aval avé miñye’elane ya Kalate Zambe mi ne volô wo éyoñe wo yiane nyoñe mintyi’an? Futi’i VIDÉO, mvuse ya valé, yala’ane minsili mia tôé.

VIDÉO: Kañese’e na miñye’elane ya Kalate Zambe mi wulu ényiñe jôé (5:54)

Beta dase mbé Yéhôva a nga ve môt ase ya be bia?
Amu jé Yéhôva a nga ve bia fili ya nyoñe mintyi’ane miangan?
Jé Yéhôva a nga ve bia asu na bi belane fili éte avale da yian?

Asu na ô yen ñye’elane wua ya Kalate Zambe, lañe’e Beéphésien 5:15, 16. Mvuse ya valé, yene’ aval ô ne “yeme belan éyoñ” jôé asu na . . .

ô lañe Kalate Zambe mban.
ô bo mbamba nnôm, mbamba ngal, mbamba mbiaé, nge mbamba mon.
ô tabe bisulane ya akônda.

4. Yañele’e mone môte ya nleme wôé asu na ô nyoñe mbamba mintyi’an

Éyoñe Kalate Zambe a kôme bia liti jam bia yiane bo ne fômelé, e ne bo tyi’ibi na bi nyoñ mintyi’an. Ve jé bi ne bo éyoñe Kalate Zambe a kôme ki bia kate jame bia yiane bo? Futi’i VIDÉO, mvuse ya valé, yala’ane minsili mia tôé.

VIDÉO: ’Mi ba’ale’ mbamba mone môte ya nlem’ (5:13)

Aval avé sita ate a nga yañele mone môte ya nleme wé asu na a nyoñe ntyi’ane wo ve Yéhôva nlem avak?

Amu jé bi nji yiane jô bôte bevo’o na be nyoñe mintyi’an señe jangan? Lañe’e Behébreu 5:14, mvuse ya valé, yala’ane minsili mi:

Akusa bo bi ne yene tyi’ibi ya jô bôte befe na be nyoñ mintyi’an señe jangan, jé biabebiene bia yiane yemelan?
Bikpwelé bivé bi ne volô bia na bi yañele mone môte ya nlem wongan a nyoñe mbamba mintyi’an?

Aval ane nkpwase si wo volô bia na bi yem zene bia yiane ke, mone môte ya nlem wongan a ne volô bia na bi tobe zene bia yiane tôñ ényiñe jangan

5. Semé’é mintyi’ane bôte bevo’o ba nyoñ

Bôte bese ba nyoñe ki avale mintyi’ane da. Aval avé bi ne liti na bia semé mintyi’ane bôte bevo’o ba nyoñ? Bi tame yen bive’ane bibaé bi:

Éve’an 1: Sita éziñ a nye’e nyanga abui, éyoñe te a ke akônda afe. Ve akônda ete, abui besita da nye’e ki nyanga.

Lañe’e Beromain 15:1 a 1 Becorinthien 10:23, 24, mvuse ya valé, yala’ane minsili mi:

Bifuse bite bi ne volô sita ate na a nyoñ ntyi’an ôvé? Jé ô ne bo nge wo wulu a môt a bili mone môte ya nlem a kamane nye na a bo mam méziñ mone môte ya nleme wôé a kañese na ô bo?

Éve’an 2: Mojañ éziñ a yeme na Kalate Zambe a tyili ki nyuane meyok, ve nye a tyi’i na a tyi meyok. Môs éziñ, ba bañete nye abôk, éyoñe te a yen ane bobejañe bevo’o ba nyu meyok.

Lañe’e Ecclésiaste 7:16 a Beromain 14:1, 10, mvuse ya valé, yala’ane minsili mi:

Bifuse bite bi ne volô mojañ ate na a nyoñ ntyi’an ôvé? Jé wé bo nge wo yen môte mfe a bo’o jam éziñe mone môte ya nleme wôé ki a kañese ke na ô bo?

Jé é ne volô wo na ô nyoñe mbamba mintyi’an?

1. Ye’ela’ane Yéhôva na a liti wo jame wo yiane bo.—Jacques 1:5.

2. Jeñe’e miñye’elane ya Kalate Zambe a bekalate bangan ô ne tôñ. Ô ne fe ke sili bitôtôlô Bekristene melep.

3. Fase’ aval avé ntyi’an wé nyoñ wo ye nambe mone môte ya nlem wôé a nyi bôte bevok.

BÔTE BÉZIÑ BA JÔ NA: “Me ne fili ya bo aval ese ma yi. Ma bisi ki jame bôte bevo’o bé simesan?”

Amu jé bia yiane nyoñ éyoñe ya fas avale Zambe a bôte bevo’o bé wô’ôtan éyoñe bia kômbô nyoñ ntyi’an éziñ?

ÔBALEBAS

Bi ne nyoñe mbamba mintyi’an nge bia jeñe na bi yem avale Yéhôva a wô’ôtan a lat a ntyi’an ôte, a fase nge mintyi’ane bia nyoñ mii volô bôte bevok nge ke ndeñele be.