LECCION 35
Si Paquemodo Kita Puede Hace Maga Buen Decision
Todo kita necesita hace maga decision. Manada de este puede tene grande efecto kanaton y na diaton relacion con Jehova. Por ejemplo, posible necesita kita decidi si onde kita queda, si cosa trabajo kita iscuji o si casa ba kita. Si ta hace kita maga buen decision, puede kita tene alegria y hace alegre con Jehova.
1. Paquemodo tu puede usa con el Biblia para hace maga buen decision?
Antes hace un decision, pidi ayuda con Jehova na rezo y examina con el Biblia para sabe si cosa el de suyu mirada con ese. (Le con el Proverbio 2:3-6.) Na cuanto situacion, tiene si Jehova claro mandamiento. El de con todo bueno que puede tu hace amo obedece con ese.
Pero, quetal si nuay claro mandamiento na Biblia acerca si cosa tu debe hace? Hay guia siempre contigo si Jehova “na camino que onde tu debe pasa.” (Isaias 48:17) Paquemodo? Tiene maga principio na Biblia que puede guia contigo. Este amo maga importante verdad que ta dale mira el pensamiento y sentido del Dios. Mas mucho, ta sabe kita si cosa ta sinti el Dios acerca na un cosa si ta le kita un istoria na Biblia. Si ta considera kita si cosa ta sinti si Jehova, puede kita hace maga decision que ta hace alegre con ele.
2. Cosa tu debe considera antes hace un decision?
El Biblia ta habla: “El sabio ta pensa antes hace paso.” (Proverbio 14:15) Este quierre decir que antes kita hace un decision, debe anay kita dale tiempo para pensa. Pregunta na de tuyu mismo cuerpo: ‘Cosa maga principio na Biblia el aplicable na de mio situacion? Cosa decision el puede conmigo dale paz na pensamiento? Paquemodo este afecta con otro? Y mas importante, hay hace ba este alegre con Jehova?’—Deuteronomio 32:29.
Tiene si Jehova el derecho para habla si cosa el bueno y malo. Si sabe kita el de suyu maga ley y principio, y determinao que sigui con ese, ta tene kita buen conciencia. Amo este ta habla kanaton si justo o malo el un cosa. (Roma 2:14, 15) El un buen conciencia puede ayuda kanaton para hace maga buen decision.
APRENDE PA MAS
Mira si paquemodo el maga principio na Biblia y el conciencia puede ayuda kanaton para hace maga decision.
3. Sigui na guia del Biblia
Paquemodo el maga principio na Biblia puede guia kanaton si ta hace maga decision? Man play con el VIDEO y despues, discuti con el maga pregunta.
-
Cosa regalo ya dale kanaton si Jehova?
-
Porque le se ya dale kanaton?
-
Cosa le ya dale para ayuda kanaton usa con el diaton libertad na buen manera?
Para mira un ejemplo del un principio na Biblia, le con el Efeso 5:15, 16. Despues, discuti si paquemodo tu puede ‘usa el de tuyu tiempo enbuenamente’ para . . .
-
regular le con el Biblia.
-
queda mas buen marido, mujer, mayores o anak.
-
atende maga miting del congregacion.
4. Man train con el de tuyu conciencia para hace maga buen decision
Posible facil hace justo decision si tiene claro mandamiento na Biblia acerca con ese. Pero, paquemodo si nuay? Man play con el VIDEO y despues, discuti con el pregunta.
-
Na video, cosa ya hace el hermana para man train con el de suyu conciencia y para hace un decision que puede hace alegre con Jehova?
Porque kita gendeh debe pidi con otro que hace decision para kanaton? Le con el Maga Hebreo 5:14, NWT y despues, discuti con este maga pregunta:
-
Posible mas facil si pidi kita con otro que decidi para kanaton. Pero, cosa kita debe hace?
-
Cosa puede ayuda contigo para man train con el de tuyu conciencia y hace maga buen decision?
Igual na un mapa, el diaton conciencia ta ayuda kanaton para hace maga decision na diaton vida
5. Respeta con el conciencia del otro
Diferente el decision del cada gente. Paquemodo kita puede dale mira respeto na conciencia del otro? Considera con este dos situacion:
Situacion 1: El un hermana quien quierre-quierre usa makeup ya cambia na un congregacion donde manada del maga hermana gendeh comfortable mira con otro que ta usa makeup.
Le con el Roma 15:1 y 1 Corinto 10:23, 24, y despues, discuti con este maga pregunta:
-
Base na este maga texto, cosa gaha decidi ese hermana? Cosa tu hay hace si junto tu con el un persona de quien conciencia gendeh ta permiti con ele que hace con el un cosa que aceptable lang na de tuyu conciencia?
Situacion 2: El un hermano sabe que gendeh ta prohibi el Biblia que toma maga alcoholico tomada. Pero ya iscuji le que evita con ese. Ya invita con ele na un ocasion donde ya mira le con el maga hermano que ta toma alcoholico tomada.
Le con el Eclesiastes 7:16 y Roma 14:1, 10, y despues, discuti con este maga pregunta:
-
Base na este maga texto, cosa gaha decidi ese hermano? Cosa tu hay hace si el otro ta hace un cosa que gendeh aceptable na de tuyu conciencia?
Cosa tu necesita hace para puede hace buen decision?
1. Pidi con Jehova que ayuda contigo para sabe si cosa hace.—Santiago 1:5.
2. Man research na Biblia y na maga publicacion que base na Biblia para incuntra maga principio que aplicable na situacion. Puede tambien tu man cuento na maga experienciao Cristiano.
3. Considera si cosa el efecto del decision na de tuyu conciencia y na conciencia del otro.
EL CUANTO TA HABLA: “Puede tu hace maskin cosa tu quierre. Gendeh importante si cosa el otro ta pensa.”
-
Porque kita debe considera con el cosa ta sinti el Dios y el otro?
SUMARIO
Si considera kita con el cosa ta sinti si Jehova acerca na un cosa y si paquemodo el diaton maga accion puede afecta con otro, puede kita hace maga buen decision.
Repaso
-
Paquemodo tu puede hace maga decision que ta hace alegre con Jehova?
-
Paquemodo tu puede man train con el de tuyu conciencia?
-
Paquemodo tu puede dale mira respeto para na conciencia del otro?
SABE PA MAS
Paquemodo tu hace maga decision que puede hace fuerte con el de tuyu relacion con Dios?
“Hace Maga Decision que Ta Honra con Dios” (The Watchtower, Abril 15, 2011)
Aprende pa mas acerca si paquemodo si Jehova ta dale kanaton consejo.
Mira si cosa ya puede ayuda con el un persona para hace un dificil decision.
Aprende pa mas si paquemodo hace alegre con Jehova na maga situacion donde nuay le especifico mandamiento.
“Necesita Ba Tu Pirmi un Mandamiento na Biblia?” (The Watchtower, Deciembre 1, 2003)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
