ISHOMO RYA 35

Oku ori kubasa kukora ensharamu ndungi

ZAANA

Twena twine ebintu ebiri kutushaba kukora ensharamu. Kandi enyingi ezi turi kukora nizibasa kutugiraho engaruka n’aha bunywani obu twine na Yehova. Ecokureberaho: Nitubasa kusharamu kufuruka, oku turi kubasa kutunga akasente ninga shi ensharamu y’okutaha omu bushwere. Twakora ensharamu ndungi nitutunga okushemererwa omu kubaho kwitu kandi nikishemeza na Yehova.

1. Ni bata oku Bibuli eri kubasa kukukwasa kukora ensharamu ndungi?

Waza kukora ensharamu, banza oshabe Yehova kandi oshwijume omuri Bibuli oku ari kubireba. (Shoma omu Nfumu 2:3-6.) Hariho ebintu bimwe na bimwe ebi Yehova ari kutuhamu ebiragiro ebitarabire aha rubaju. Caba kiri kisyoya okusharamu korobera ekiragiro ca Ruhanga, ni yo nsharamu ndungi eyi oshemerire kukora.

Mbwenu shi okakora ki washanga Bibuli etari kutuha ekiragiro ekitarabire aha rubaju? Yehova nakuraganisa ku arigumizamu kukwebembera ‘omu muhanda ogu oshemerire kutora.’ (Isaaya 48:17) Bata shi? Hariho emisinge eri kubasa kukukwasa kukora ensharamu ndungi. Emisinge eri omuri Bibuli neyereka oku Yehova ari kureba ebintu n’oku ari kwehurira. Emisinge y’omuri Bibuli ni amazima agari kwereka emitekatecere ya Yehova n’oku ari kwehurira. Ku turi kushoma enkuru y’omuri Bibuli, nikituma twamanya oku Yehova ari kureba ebintu.

2. Ebi oshemerire kutekatekaho otakakozire ensharamu?

Bibuli negamba ngu: ‘Omwerinzi ayetegereza ahu ari kuraba.’ (Enfumu 14:15) Eco nikimanyisa ku twaza kukora ensharamu tushemerire kukwata obwire tukabanza twatekateka aha ku Yehova ari kubireba. Waza kukora ensharamu, guma obanze oyebuze ngu: ‘Bibuli nebigambaho enki? Ku ndakore eyi nsharamu nibinkwataho bita? Ni bata oku ensharamu eyi ndakore eri kukwata aha bandi? Ekiri kukira byona, mbehi neyija kushemeza Yehova?’—Eky’Ebiragiro 32:29.

Yehova ayine obugabe bw’okutugambira ekirungi n’ekibi. Ku turi kukizaho kumanya ebiragiro byeye n’emisinge yeye, kandi tukamaririra kubigenderaho nitugira omuntuwomunda murungi. Omuntuwomunda ni iraka ry’omunda eriri kutukwasa kumanya ekirungi n’ekibi. (Abarooma 2:14, 15) Omuntuwomunda omanyizibwe natukwasa kukora ensharamu ndungi.

YEGA BYINGI

Reba oku emisinge y’omuri Bibuli n’omuntuwomunda biri kutukwasa kukora ensharamu ndungi.

3. Guma oreke Bibuli ekuhabure

Ni bata oku emisinge y’omuri Bibuli eri kubasa kutuhabura twaza kukora ensharamu? Zana VIDIYO, rero muganire ahari ebi bibuzo.

VIDIYO: Guma oreke emisinge ya Bibuli ekuhabure (5:54)

Ni kiha kiconco eki Yehova yatuhire?
Ahabw’enki Yehova yatuhire eco kiconco?
Ni enki eki Yehova yatuhire ngu kitukwase kukoresa ge eco kiconco c’okweshariramu?

Kugira ngu omanye omusinge gumwe g’omuri Bibuli, shoma omu Baefeso 5:15, 16. Bwanyima muganire oku ori kubasa kukoresa ge obwire omu . . .

kushoma Bibuli buri zoba.
ku ori kubasa kuba omushija ninga omukazi murungi, omuzire n’omwana murungi.
kuza omu nterane.

4. Manyiza omuntuwomunda wawe kugira ngu akukwase kukora ensharamu ndungi

Haba hariho ecahandikirwe ekiri kugamba aha kintu, kukora ensharamu nikiba corobi. Konka shi eco cahandikirwe ku cakuba kitariho? Zana VIDIYO, rero muganire ahari ebi bibuzo.

VIDIYO: “Gumizamu kugira omuntuwomunda murungi” (5:13)

Nk’oku wakireba omuri vidiyo, ni ziha ntambwe ezi munyanyazi yatera kugira ngu amanyize omuntuwomunda weye n’okukora ensharamu eziri kushemeza Yehova?

Ahabw’enki tutashemerire kushaba abandi kutukorera ensharamu? Shoma omu Baheburaayo 5:14, rero muganire ahari ebi bibuzo:

N’obu kushaba abandi ngu batukorere ensharamu kiri kubasa kurebeka nk’ecorobi, ni enki eki turi kubasa kwekorera?
Ni ebiki ebiri kubasa kukukwasa kumanyiza omuntuwomunda wawe n’okukora ensharamu ndungi?

Nk’oku mapu eri kuhabura omuntu, omuntuwomunda witu natukwasa kukora ensharamu

5. Ha ekitinisa omuntuwomunda w’abandi

Abantu nibakora ensharamu ezitari kushushana. Ni bata oku turi kubasa kwereka ku nituha ekitinisa omuntuwomunda w’abandi? Reba ebyokureberaho bibiri:

Ecokureberaho ca 1: Omunyanyazi ori kukunda kujwara empare ari omu bantu bingi n’omu yindi mirimo, yafurukira omu kibina ahu abanyanyazi bari kugubwa kubi bareba omuntu ojwire empare.

Shoma omu Barooma 15:1 n’omu 1 Bakorinso 10:23, 24, rero muganire ahari ebi bibuzo:

Okuratize ebi byahandikirwe, ogu munyanyazi ni enki eki ashemerire kukora? Ni enki eki ori kubasa kukora waba ori hamwe n’omuntu owu omuntuwomunda weye ari kumuzibira kukora ekintu konka owawe ari kukwikiririza kukikora?

Ecokureberaho ca 2: Mwenetata namanya ku Bibuli etari kuzibira kunywa amarwa, konka we akasharamu kugareka. Bamutumira omu mbaga yareba abandi benetata bari kuganywa.

Shoma omu Mubuurizi 7:16 n’omu Barooma 14:1, 10, rero muganire ahari ebi bibizo:

Okuratize ebi byahandikirwe, ni enki eki ogu mwenetata ari kubasa kukora? Ni enki eki ori kubasa kukora wareba ondijo muntu ari kukora eki omuntuwomunda wawe ari kukuzibira kukora?

Ni biha bintu ebi ori kubasa kukora bikatuma wakora ensharamu ndungi?

1. Shaba Yehova kugira ngu omanye eki oshemerire kukora.—Yakobo 1:5.

2. Condoza omuri Bibuli n’omu bitabo ebiri kwegesa Bibuli kugira ngu oyihemu emisinge eyi ori kubasa kugenderaho. Nambwenu, nobasa kubuza Abakristo abakuzire omu by’omwika.

3. Guma otekateke aha ku ensharamu yawe eri kukwata aha muntuwomunda wawe n’ow’abandi.

ABANTU ABAMWE NIBAGAMBA NGU: “Buri omwe ayine obugabe bw’okwekorera ebi ari kwenda. Tashemerire kufa aha ku abandi bari kumureba.”

Ahabw’enki tushemerire kufa aha ku Yehova n’abandi bari kutureba?

EMPINYE

Ku turi kumanya oku Yehova ari kureba ebintu nanka, kandi tukashwijuma oku biri kubasa kukwasa abandi ninga kubakora kubi, nitukora ensharamu ndungi.

Wayega ki?

Ni bata oku ori kubasa kukora ensharamu eziri kubasa kushemeza Yehova?
Ni bata oku ori kubasa kumanyiza omuntuwomunda wawe?
Ni bata oku ori kubasa kuha ekitinisa omuntuwomunda w’abandi?

Ishomo ryahendera

Entego

Tekateka oyetonzire aha nsharamu eyi ori kwenda kukora juba aha. Kuratiza entambwe ishatu eziri omu kashanduku akari kugira ngu: “ Ni biha bintu ebi ori kubasa kukora bikatuma wakora ensharamu ndungi?”

Ebindi:

Your other goal