LESION 35

Kʉ̃risiaba biʼia aseyua

Chaanuɓus

Jomaurãba kʉ̃risiabaraaɗai kãare aseɗayu. Mauba biʼia ɓua dachirã baita mauɗe dachi Jeowa ome jʉ̃kaa duanaɗai baita biɗa. Maubapeɗa, dachirãba kauwa kʉ̃risiabaraaɗai sama duanaɗayu, kãareba duanaɗai ɓuu mauɗe dachi kimabaraaɗai baita. Naarã dachia biʼia ãrĩã aseɗai baita kʉ̃risiaɗarã, kĩrajʉʉ duanaɗayua mauɗe Jeowa kĩrajʉʉbiɗai ɓua.

1. ¿Saka aiɗai ɓua Bibliaba naa kʉ̃risiaɗapeɗa chi biʼia ɓuu asei baita?

Jeowamaa aiɗayu wiɗíbaɗa asei naeɗe. Maabea jʉrʉɗaika Bibliaɗe kãare kʉ̃risia ɓuu ichia jãuɗebena (Proverbios 2:3-6 leas). Ɓesesɗe Jeowaba jara ɓuu kãare asei baita. Mauɗeeba, chi bichia aude biʼia aseibʉrã ichi beɗeadu ũribaraai.

Mauɗe chi Bibliaɗe kãare aseyu ariɗe jarawẽa ɓuubʉrã, ¿kãare aseɗaiba? Jeowaba bichi biʼia odoepeɗa “chi oɗe” biʼia wãyua (Isaías 48:17). ¿Sakaba mau? Jeowa kʉ̃risiaɗebenaba dachirã aiɗa ɓuu. Bibliaɗeeba dachia kawaɗai ɓua Jeowaba kãare kʉ̃risiapeɗa kãare sentibarii. Nauɗebena kawaɗai ɓua dachia chi Bibliaba nebʉrʉ ɓua leabudauɗe. Dachia kawabudauɗe kãare kʉ̃risiabarii Jeowaba, dachimaa biʼia asebi ɓua chi ichia bustabarii.

2. ¿Dachia kãareɗe kʉ̃risiabaraaɗai aseɗai naeɗe?

Bibliaba jarabarii “chi biʼia kʉ̃risiabarii niiba kauwa ochiabaria ichi saka ãda nibayu” (Proverbios 14:15). Nauba jara kʉ̃ria ɓuu dachia joma asei baita naeɗe aka noɓeepeɗa kʉ̃risiabaraaɗai chi kãare asei barauɗebena. Naa bichi du aɓauba kʉ̃risiaba: “Chi Jeowaba kʉ̃risiabariiɗebena Bibliaɗe kuɓuu, ¿mauba saka mʉ aiɗai ɓua? ¿Mʉa naka aseeruubʉrã mʉ saka ɓeeima? ¿Chi mʉa aseburuuba saka waabenarã sentibiai ɓua? Mauɗe, chi aude biʼia ɓuu, ¿nauba Jeowa kĩrajʉʉbi ɓue?” (Deuteronomio 32:29).

Dachi Akõreba jaraiɗe kuɓua kãare biʼia ɓuu mauɗe kãare miadaa ãrĩã ɓuu. Dachirãba biʼia kawaɗarã ichi leyrã mauɗe ichia kʉ̃risia ɓuu, ichi beɗea ũriɗarã, nauba dachirãmaa kʉ̃risiabiyua kãare biʼia ɓuu mauɗe kãare biʼiwẽe ɓuuɗebena. Aɓaaɓaarã dachi boroɗe chi kʉ̃risia eɗa duanuu, mauba jara ɓua kãare biʼia ɓuu maebʉrã kãare miadaa ɓuu ʉ̃rʉbena (Romanos 2:14, 15). Naa biʼia kʉ̃risiaɗarã biʼiaburu aseɗai.

AUDE KAWABA

Kawaɗayua maucha sakayua chi Jeowaba kʉ̃risia ɓuu Bibliaɗe eɗa ɓʉ kuɓuuba, mauɗe dachirã biʼia kʉ̃risiabudauba aiɗai ɓua ariɗe aseɗai baita.

3. Chi Bibliaba jara ɓuu aseba

¿Saka aiɗai ɓua chi Jeowaba kʉ̃risia ɓuu Bibliaɗe kuɓuuba dachirãba naa kʉ̃risiaɗapeɗa biʼia aseɗai baita? BIDEO ochiaɗapeɗa, mambea nau ʉ̃rʉbena beɗeasturu:

BIDEO: Jeowa kʉ̃risia ɓuu Bibliaɗe kuɓuuba dachirã aiɗayua samare wãuriɗayu (5:54)

¿Sakayua dachi du aɓauba kʉ̃risiaɗai ɓua kãare aseɗayu?
¿Sakayua Jeowaba dachi du aɓauba ida kʉ̃risiabi ɓua kãare aseɗai baita?
¿Kãare deɗeka ɓua Dachi Akõreba dachirã aiɗai baita biʼia aseɗayu?

Jeowaba saka kʉ̃risia niiɗebena kawaɗai baita, Efesios 5:15, 16 leábaɗa. Mambea beɗeasturu saka “biʼia ãrĩãdu aseɗai ɓuu chi tiempo bara panuuɗe”...

... chi Biblia noremaacha leaɗai baita.
... kima, akõre maebʉrã warr bia nibai baita.
... reunionɗaa wãuriɗai baita.

4. Waaburu biʼia kʉ̃risiaba ne bia asei baita

Bibliaba jipa jara ɓuubʉrã kãare aseyu, dachia chi biʼia aseɗayua chaareawẽa. Maamina ¿chi Bibliaba jarawẽebʉrã? BIDEO ochiaɗapeɗa, mambea nau ʉ̃rʉbena beɗeasturu:

BIDEO: “Kapichia dachi kʉ̃risia ne kachiruaswãe koɓéebaɗa” (5:13)

Nau bideoɗeebara, ¿kãare asesaa chi nawekauba ichi kʉ̃risiaɗe biʼia asei baita mauɗe Jeowa kĩrajʉʉbii baita?

¿Sakayua dachia aɓabena ẽbẽramaa wiɗiɗaabayua kãare aseɗai baita dachirãba? Hebreos 5:14 leaɗapeɗa, mambea nau ʉ̃rʉbena beɗeasturu:

Bariara fácil ɓumina dachia aɓabenamaa wiɗiɗayu kãare aseɗayua, ¿sakayua aɓaaɓaarã baita ara ɓua kuitaaɗayua chi bia ɓuu aseyu ʉ̃rʉbena?
¿Kãare aiɗai ɓua waaburu biʼia kʉ̃risiaɗayua mauɗe chi biʼia ɓuu aseɗai baita?

Chi kʉ̃risia dachirãɗe eɗa ɓuu mapa kĩra ɓuu, mauba kuitaabi duanuu saka biʼia nureaɗai ɓua.

5. Chi waabenarãba kʉ̃risia duanuuɗebena, dachia respetabaraaɗai

Dachi jomaurã diwara kiruree bẽrã, dachirã biɗa diwara kʉ̃risia duanuu. ¿Saka dachirãba respeto unubi duanaa chi waabenarãba aseɗai kʉ̃risia duanuu kakua? Ochiaɗaika ome panuuɗebena.

Nau pasaburuuɗe 1: Nawekau niiba pantalón jʉ̃barii nii, maabea wãsii junebena puuruɗaa aria pantalón jʉ̃ɗakau.

Romanos 15:1 mauɗe 1 Corintios 10:23, 24 leaɗapeɗa, mambea nau ʉ̃rʉbena beɗeasturu:

Naarã versiculorã leapeɗaaɗakare, ¿kãare saka kʉ̃risiai ɓua chi nawekauba? Bichia ase kʉ̃ria ɓuu maamina chi ẽbẽrarã bichi jʉ̃kaa duanuurãba jãu aseɗai bustaɗakauɗe, ¿kãare asei ɓua?

Nau pasaburuuɗe 2: Ãba niiba kuitaa ɓua Bibliaɗeeba dachirã itua doɗai ɓuu maamina ɓiɗĩikaburu; makarã chi ãbaba kʉ̃risia koɓeesii jãabera itua akawara dowẽe bayu. Earaɓa, ãbua beɗeakuaɗayua jarasiɗaa, mauɗe ichia aria unu ɓuu ãbarã itua do kãrii panuu.

Eclesiastés 7:16 mauɗe Romanos 14:1, 10 leaɗapeɗa, mambea nau ʉ̃rʉbena beɗeasturu:

Naarã versiculorãba jara ɓuuɗeebara, ¿kãare saka kʉ̃risiai ɓua chi ãbaba? Chi ẽbẽra niiba bichia bustakau aseeruu unuburuuɗe, ¿bichia kãare asei ɓua?

¿Kãare saka asebaraaɗai dachia kʉ̃risiaɗapeɗa biʼia aseɗai baita?

1. Jeowamaa wiɗis aiɗai baita kãare aseyu kuitaa (Santiago 1:5).

2. Jʉrʉs Bibliaɗe mauɗe kartarã Bibliaɗebenaɗe kãare kʉ̃risia ɓua Dachi Akõreba dachi biʼia aseɗai baita. Mauɗe dawaraurã kuitaa ɓuurãmaa wiɗiɗai ɓua.

3. Kʉ̃risias bichia saka kʉ̃risia ɓeeruu mauɗe waabenarã biɗa saka kʉ̃risia kopaneebudau.

CHI NUREE ẼBẼRARÃBA NAKA JARABADAA: “Bichi barikia asei ɓuu. ¡Importawẽa waarãba kʉ̃risiabudau!”.

¿Sakayua dachia kauwa kʉ̃risiaɗaiba saka senti ɓuu Dachi Akõre mauɗe waabenarã biɗa?

NAU KAWASIƊAA

Dachia biʼia kʉ̃risiaɗayua kãare aseɗayu kawaaruuɗe Jeowaba saka kʉ̃risiabarii chi dachia aseɗa kʉ̃ria kopanuu ʉ̃rʉbena, mauɗe kʉ̃risiaɗarã chi dachia asebudauba waarã aiɗayua maebʉrã nomaa sentibiɗai.