SIN DING THU 35

Thu Khensatna Hoih I Bawl Theih Dan

Hong

I vekpi-in thu khensatna i bawl tek hi. Thu khensatna a tamzaw in i nuntakna le Jehovah tawh i kilawmtatna-ah hamphatna, ahih kei leh siatna piangsak thei hi. Gentehna-in, koi-ah om ding, ei le ei koi bangin kivak ding, ahih kei leh zileta nei ding maw, cih pen i khensat ding kisam thei hi. Thu khensatna hoih i bawl ciangin nuntak nuam ngahin, Jehovah’ maipha zong kingah thei hi.

1. Thu khensatna hoih na bawl theih nadingin Lai Siangtho in koi bangin hong huh thei a hiam?

Thu na khensat ma-in, Jehovah’ huhna na ngah nadingin thu ngen in. Pasian’ muh dan na theih nadingin Lai Siangtho kan in. (Paunak 2:3-6 sim in.) Thu pawlkhatte-ah, Jehovah in kician takin thu hong pia hi. Tua thupiakte zuih pen a hoihpen hi.

Kician taka thupiakna om kei leh bang cih ding? “Na zuih ding a kilawm lampi-ah,” Jehovah in lam hong lak lai veve hi. (Isaiah 48:17) Koi bangin hong lamlak a hiam? Lai Siangtho thubulte tawh hong lamlak hi. Lai Siangtho thubulte pen Pasian’ lungsim le ngaihsutnate a hong lak thuman bulpite ahi hi. Lai Siangtho sunga a kiciamteh thu khat i sim ciangin thu khat peuhpeuh pen Pasian in bangci ngaihsut hiam, cih i theithei hi. Pasian’ ngaihsutnate thei leng, amah a lungkimsak thu khensatnate i bawl thei ding hi.

2. Thu na khensat ma-in bangteng na ngaihsut ding kisam a hiam?

“Mipilte in a gamtatna ding ngaihsun cian hi,” ci-in Lai Siangtho in gen hi. (Paunak 14:15) Thu i khensat ma-in, hun pia-a ngaihsut ding kisam cihna hi. Thu na khensat ma-in, ‘Bang Lai Siangtho thubulte zui ding ka hiam? Koi bangin khensat leng hoihpen ding a hiam? Ka thu khensatna hangin midangte a sukha ding hiam? Jehovah a lungdam ding hiam?’ ci-in nang le nang kidong in.—Thu Hilhkikna 32:29.

Bang hoih a, bang hoih lo cih pen Jehovah in genkhuan nei hi. Pasian’ thukhamte le thubulte kician taka thei-a zuihna in sia le pha theihna lungsim a kiseek ihi hi. Sia le pha theihna lungsim in i gamtatna khial maw, khial lo cih pen hong theisak hi. (Rom 2:14, 15) A kiseeksa sia le pha theihna lungsim in thu khensatna hoih i bawl theih nadingin hong huh ding hi.

ZON BEH INLA, MUH BEH IN

Thu i khensat ciangin Lai Siangtho thubulte le sia le pha theihna lungsim in hong huh dan kan in.

3. Lai Siangtho lamlahna sang in

Thu i khensat ciangin Lai Siangtho thubulte in koi bangin hong lamlak thei a hiam? VIDEO hong in. Tua khit teh a nuai-a dotnate kikum un.

VIDEO: Lai Siangtho Thubulte Zui In (5:54)

Deih teeltheihna in bang a hiam?
Jehovah in deih teeltheihna bang hangin hong pia a hiam?
Thu khensatna hoih i bawl theih nadingin Pasian in bang hong pia a hiam?

Lai Siangtho thubul khat na muh nadingin, Efesa 5:15, 16 sim in. Tua khit teh a nuai-a thute adinga “na hun neih khempeuh uh a hoih lamin” na zat theih dan kikum un.

Lai Siangtho manmana sim nading.
Zi hoih, pasal hoih, nu le pa hoih, le ta hoih na hih nading.
Pawlpi kikhopnate-ah na kihel nading.

4. Thu khensatna hoih na bawl theih nadingin sia le pha theihna lungsim seek in

Kician taka Lai Siangtho thupiakna a om hun ciangin, thu khensat ding baih thei hi. Ahih hangin Lai Siangtho thupiakna om kei leh bang cih ding? VIDEO hong in. Tua khit teh a nuai-a dotna kikum un.

VIDEO: “Sia le Pha Theihna Lungsim Siangtho Kemcing In” (5:13)

Hih video-ah, unaunu in ama sia le pha theihna lungsim seek dingin le Jehovah a lungkimsak khensatna a bawl theih nadingin bang hih a hiam?

Ei adingin midangte thu i khensatsak ding bang hang hi lo a hiam? Hebru 5:14 sim in. Tua khit teh hih dotnate kikum un:

Thu hong khensatsak dinga midangte huhna nget pen a baih zawk hang, ei mahmah in bang pen i khentel theih ding kisam a hiam?
Na sia le pha theihna lungsim pen na seek nading le khensatna hoih na bawl theih nadingin bang huhna om a hiam?

Lam hong lak gamlim bangin, sia le pha theihna lungsim in i nuntakna-ah lam hong lak

5. Midangte’ sia le pha theihna lungsim zahtak in

Khatlekhat’ khensatna kibang lo tek ding hi. Midangte’ sia le pha theihna lungsim i zahtaklam koi bangin lak thei i hiam? Dinmun nih ngaihsun in:

Dinmun 1: Kimuhkhopna pawite le biakna tawh a kisai lo nasepnate-ah pheituam a teng thei zel unaunu khat in pheituam sau ten a deih lo unaunute’ omna pawlpi-ah hong kisuan hi.

Rom 15:1 le 1 Korin 10:23, 24 sim in. Tua khit teh hih dotnate kikum un:

Hih Lai Siangtho munte in a gen bangin, tua unaunu in bang khensat thei a hiam? Nang le midang khat ii sia le pha theihna lungsim a kibat loh hun ciangin bang cih ding na hiam?

Dinmun 2: Zu a kilawm a kituaka dawn pen Lai Siangtho in a kham lohlam unaupa khat in a theih hangin ama’n zu dawn vet lo hi. Kimuhkhopna pawi khat a pai ciangin unaupate’ zu dawn pen mu hi.

Thu Hilhkikna 7:16 le Rom 14:1, 10 sim in. Tua khit teh hih dotnate kikum un:

Hih Lai Siangtho munte in a gen bangin, tua unaupa in bang khensat thei a hiam? Na sia le pha theihna lungsim in a phal loh khat pen midang khat in a hih na muh ciangin bang cih ding na hiam?

Thu khensatna hoih i bawl theih nading thute

1. Thu na khensat theih nadingin Jehovah kiangah thu ngen in.—James 1:5.

2. A kisai thubulte na theih nadingin Lai Siangtho le Lai Siangtho bulphuh laibute zong inla, kan in. A picing Khristiante tawh zong kikum in.

3. Nang le midangte ii sia le pha theihna lungsim a sukkhak dan ding ngaihsun in.

MI PAWLKHATTE’ GEN: “Ka hihnop peuhpeuh hih thei ing. Midangte’n koi bang koi bangin a ngaihsun zongin awlmawh ke’ng.”

Pasian’ muhna le midangte’ muhna pen bang hang i ngaihsut tel ding kisam a hiam?

TOMLAKNA

Thu na khensat ma-in Jehovah muh dan sittel in. I gamtatna in midangte tungah phattuamna, ahih kei leh siatna a tunsak dan ngaihsun in.

Kikupkikna

Jehovah a lungkimsak thu khensatnate koi bangin bawl thei ding na hiam?
Na sia le pha theihna lungsim pen koi bangin seek thei na hiam?
Midangte’ sia le pha theihna lungsim pen na zahtaklam koici lak thei na hiam?

Kikup zawh ni:

Ngimna

Mailam a a hong tung ding thukhensat ding khat ngaihsun ding. “ Thu Khensatna Hoih I Bawl Theih Nading Thute” cih kiu li bawm sunga thu thumte bangin sem ding.

Adang:

Ngimna dang