CɅNTESɅNTEL 35
¿Bajcheʼ miʼ mejlel lac yajcan ti wen chuqui mi caj lac mel?
Ti lac pejtelel miʼ cʼotel i yorajlel chaʼan yom mi lac yajcan chuqui mi caj lac mel. Mi wen jiñi muʼ bʌ lac yajcan lac mel tijicña mi la cajñel yicʼot utsʼat mi la cajñel la quicʼot Jehová, pero mi mach weñic miʼ mejlel lac taj wocol. Jumpʼejl ejemplo, yom mi lac ñaʼtan baqui mi caj lac chumtʌl, chuqui ti eʼtel (troñel) mi caj lac mel i mi mucʼʌch caj lac ñujpuñel o maʼañic. Mi wen jiñi muʼ bʌ lac yajcan lac mel mi caj lac taj lac tijicñʌyel i mi caj la cʌqʼuen i tijicñʌyel Jehová.
1. ¿Bajcheʼ miʼ mejlel i coltañet jiñi Biblia chaʼan wen chuqui maʼ ñaʼtan a mel?
Cheʼ bʌ an chuqui woli (choncol) a ñaʼtan a mel, ñaxan cʼajtiben i coltaya Jehová. Ñopo a qʼuel yaʼ ti Biblia bajcheʼ yilal miʼ qʼuel Jehová jiñi woli (yʌquel) bʌ a ñaʼtan (pejcan Proverbios 2:3-6). An qʼuiñil mi caj a qʼuel chaʼan Jehová jamʌ tsiquil miʼ yʌl chuqui yom mi lac mel. Mi cheʼ bajcheʼ jiñi, ñumen wen cheʼ mucʼʌch a jacʼ.
Pero ¿ixcu cheʼ bʌ jiñi Biblia maʼañic miʼ jamʌ al chuqui yom mi lac mel? Jehová mi caj i pʌsbeñet jiñi bij baqui yom maʼ chaʼlen xʌmbal (Isaías 48:17). ¿Bajcheʼ? Mi caj i yʌqʼueñet principio tac muʼ bʌ caj i coltañet a ñaʼtan chuqui yom maʼ mel. Jiñi principio tac jiñʌch ñuc tac bʌ cʌntesa am bʌ ti Biblia muʼ bʌ i coltañonla lac chʼʌmben i sujm chuqui miʼ ñaʼtan Jehová yicʼot bajcheʼ yubil miʼ yubin i bʌ. Cheʼ mi lac pejcan jumpʼejl relato am bʌ ti Biblia an qʼuiñil yaʼ miʼ cʼotel laj qʼuel chuqui miʼ ñaʼtan Jehová. I cheʼ miʼ cʼotel lac chʼʌmben i sujm chuqui miʼ ñaʼtan Jehová miʼ coltañonla chaʼan ñumen wen chuqui mi lac ñaʼtan lac mel.
2. ¿Chuqui yom maʼ ñaxan ñaʼtan cheʼ an chuqui a wom a mel?
Jiñi Biblia miʼ yʌl chaʼan «jini cʌntesʌbil bʌ miʼ wen tsajin i bijlel» (Proverbios 14:15). Ili yom i yʌl chaʼan cheʼ an chuqui la com lac mel yom mi lac ñaxan wen ñaʼtan i mi laj qʼuel chuqui tac muʼ bʌ i mejlel lac mel. Cheʼ bʌ woli a ñaʼtan jujunchajp muʼ bʌ mejlel a mel, cʼajtiben a bʌ: «¿Baqui bʌ principio tac miʼ taj ti tʼan ili woli bʌ c ñaʼtan c mel? ¿Baqui bʌ mi caj i yʌqʼueñon c tijicñʌyel mi tsaʼ c mele? ¿Bajcheʼ mi caj i ticʼlan yambʌlob jiñi muʼ bʌ c yajcan c mel? Pero jiñi ñumen ñuc bʌ i cʼʌjñibal, ¿muʼ ba caj i yʌqʼuen i tijicñʌyel Jehová?» (Deuteronomio 32:29).
Dios an tiʼ wenta chaʼan miʼ subeñonla chuquiyes jiñi wem bʌ yicʼot jiñi mach bʌ weñic. Cheʼ mi laj cʌn ti wen jiñi i mandar yicʼot jiñi i principio tac i ti jumpʼejl lac pusicʼal mi lac jacʼ, miʼ coltañonla chaʼan mi lac taj wem bʌ laj conciencia. Jiñi laj conciencia jiñʌch muʼ bʌ i subeñonla chuquiyes jiñi wem bʌ yicʼot jiñi mach bʌ weñic (Romanos 2:14, 15). Mi wen cʌntesʌbilʌch laj conciencia mi caj i coltañonla chaʼan wen chuqui mi lac yajcan lac mel.
LAʼ LAC ÑUMEN ÑAʼTAN
Laʼ lac ñumen qʼuel bajcheʼ miʼ coltañonla jiñi principio tac am bʌ ti Biblia yicʼot jiñi laj conciencia cheʼ an chuqui woli lac ñaʼtan lac mel.
3. Acʼʌ chaʼan jiñi Biblia miʼ coltañet
¿Bajcheʼ miʼ coltañonla jiñi principio tac am bʌ ti Biblia cheʼ bʌ an chuqui la com lac mel? Qʼuelela jiñi VIDEO i tem alʌla iliyi:
-
¿Chuquiyes jiñi utsʼatax bʌ lac majtan tsiʼ yʌqʼueyonla Jehová?
-
¿Chucoch libre tsiʼ yʌcʼʌyonla Jehová chaʼan mi lac ñaʼtan chuqui la com lac mel?
-
¿Chuqui tsiʼ yʌqʼueyonla Dios chaʼan miʼ coltañonla lac ñaʼtan ti wen muʼ bʌ caj lac mel?
Chaʼan mi laj qʼuel jumpʼejl principio, pejcanla Efesios 5:15, 16. Cheʼ jiñi, tem alʌla bajcheʼ miʼ mejlel laj cʼʌn ti wen jiñi i yorajlel am bʌ lac chaʼan chaʼan...
-
mi lac pejcan lac Biblia ti jujumpʼejl qʼuin.
-
mi lac sujtel ti ñumen wem bʌ ñoxiʼal, tatʌl ñaʼʌl o ti wem bʌ xcolel.
-
mi lac majlel ti tempa bʌ.
4. Cʌntesan a conciencia chaʼan wen chuqui maʼ yajcan a mel
Cheʼ bʌ an jumpʼejl mandar jamʌ tsiquil bʌ miʼ yʌl chuqui yom mi lac mel, mach wocolic mi la cubin chaʼan wen chuqui mi lac yajcan lac mel. Pero ¿ixcu mi maʼañic? Qʼuelela jiñi VIDEO i tem alʌla iliyi:
-
Cheʼ bajcheʼ tsaʼ qʼuele yaʼ ti video, ¿chuqui tac tsiʼ mele jiñi hermana chaʼan miʼ cʌntesan i conciencia yicʼot chaʼan jiñi muʼ bʌ i yajcan i mel utsʼat miʼ qʼuel Jehová?
¿Chucoch mach yomic mi laj cʼajtiben yambʌ chaʼan miʼ subeñonla chuqui yom mi lac mel? Pejcanla Hebreos 5:14 i tem alʌla iliyi:
-
Anquese tajol ñumen ora cheʼ an majqui mi laj cʼajtiben chaʼan miʼ subeñonla chuqui yom mi lac mel, ¿chucoch yom mi lac chaʼlen wersa chaʼan jujuntiquil miʼ cʼotel laj cʌn chuquiyes jiñi wem bʌ?
-
¿Chuqui ti eʼtijib tac miʼ mejlel i coltañonla laj cʌntesan laj conciencia yicʼot chaʼan wen muʼ bʌ lac yajcan lac mel?
Jiñi laj conciencia lajal bajcheʼ jumpʼejl mapa, miʼ tojʼesañonla majlel ti laj cuxtʌlel.
5. Qʼuele ti ñuc i conciencia yambʌlob
Come mach junlajaloñicla, mach junlajalic chuqui mi lac yajcan lac mel. ¿Bajcheʼ miʼ mejlel lac pʌs chaʼan mi laj qʼuel ti ñuc i conciencia jiñi yambʌlob? Laʼ laj qʼuel chaʼpʼejl ejemplo.
Ñaxam bʌ: Juntiquil hermana muʼ bʌ i mulan i bon i bʌ miʼ majlel ti jumpʼejl congregación baqui cabʌl hermanajob lecoj miʼ qʼuelob cheʼ bʌ an majqui miʼ bon i bʌ.
Pejcanla Romanos 15:1 yicʼot 1 Corintios 10:23, 24, i tem alʌla iliyi:
-
Cheʼ bajcheʼ miʼ yʌl ili versículo tac, ¿chuqui miʼ mejlel i mel jiñi hermana? Ixcu jatet, ¿chuqui mi caj a mel mi jiñi i conciencia yambʌ maʼañic miʼ yʌqʼuen i mel jiñi mucʼʌch bʌ i yʌqʼueñet a mel a conciencia?
I chaʼpʼejlel: Juntiquil hermano yujil chaʼan jiñi Biblia maʼañic miʼ yʌl chaʼan mach yomic mi lac jap lembal, pero jiñi hermano miʼ yʌl chaʼan maʼañic mi caj i jap mi tsʼitaʼic. Ti jumpʼejl bʌ qʼuin, miʼ pʌjyel ti cʼux waj yicʼot yambʌ hermanojob i miʼ qʼuel chaʼan jiñi yambʌlob miʼ japob lembal.
Pejcanla Eclesiastés 7:16 yicʼot Romanos 14:1, 10, i tem alʌla iliyi:
-
Cheʼ bajcheʼ miʼ yʌl ili versículo tac, ¿chuqui miʼ mejlel i mel jiñi hermano? Ixcu jatet, ¿chuqui mi caj a mel mi an majqui woliʼ mel muʼ bʌ i subeñet jiñi a conciencia chaʼan maʼañic maʼ mel?
¿Chuqui yom maʼ mel chaʼan wen muʼ bʌ a yajcan a mel?
1. Cʼajtiben Jehová chaʼan miʼ coltañet a ñaʼtan chuqui yom maʼ mel (Santiago 1:5).
2. Sʌclan ti Biblia yicʼot yaʼ ti lac jun tac principio tac muʼ bʌ i taj ti tʼan jiñi woli bʌ a ñaʼtan. Cheʼ jaʼel, miʼ mejlel a cʼajtiben i coltaya hermanojob añobix bʌ i ñaʼtʌbal.
3. Ñaʼtan mi maʼañic mi caj i ticʼlan a conciencia yicʼot i conciencia yambʌlob jiñi muʼ bʌ caj a mel.
AN MUʼ BɅ I YɅLOB: «Jatet miʼ mejlel a mel chuqui a wom. ¡Mach a wentajic chuqui miʼ yʌl yambʌlob!».
-
¿Chucoch yomʌch mi lac chʼʌm ti ñuc bajcheʼ yubil mi caj i yubin i bʌ Dios yicʼot jiñi yambʌlob?
TSAʼ BɅ LAJ CɅÑɅ
Weñʌch chuqui mi lac yajcan lac mel cheʼ mi laj qʼuel chuqui miʼ ñaʼtan Jehová chaʼan jiñi woli bʌ lac ñaʼtan i cheʼ mi lac chʼʌm ti ñuc mi jiñi muʼ bʌ caj lac mel mi caj i coltan yambʌlob o mi caj i ticʼlañob.
¿Chuqui tsaʼ cʌñʌ?
-
¿Chuqui miʼ mejlel a mel chaʼan utsʼat miʼ qʼuel Jehová jiñi muʼ bʌ a yajcan a mel?
-
¿Chuqui miʼ mejlel a mel chaʼan maʼ cʌntesan a conciencia?
-
¿Bajcheʼ miʼ mejlel a pʌs chaʼan maʼ qʼuel ti ñuc i conciencia yambʌlob?
CɅÑɅ YAN TAC BɅ
¿Chuqui miʼ mejlel a mel chaʼan jiñi muʼ bʌ a yajcan a mel miʼ ñumen lʌcʼtesañet ti Dios?
«Laʼ lac yajcan lac mel muʼ bʌ i yʌqʼuen i ñuclel Dios» (Lac Tsictesʌbentel, 15 i chaʼan abril, 2011)
Ñumen chʼʌmben i sujm bajcheʼ miʼ ticʼonla Jehová.
Qʼuele chuqui tsiʼ colta juntiquil wiñic chaʼan wen chuqui miʼ yajcan i mel.
Ñumen cʌñʌ bajcheʼ miʼ mejlel la cʌqʼuen i tijicñʌyel Jehová cheʼ bʌ mach jamʌ tsiquilic miʼ yʌl chuqui yom bʌ mi lac mel.
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
