ZANNOO 35
Lɛ Hoŋ Na Toɔ̃ De Gbɛɛ Naŋ Soma
Yɛlɛ yaga bebeŋ aŋ seŋ ka te de gbɛɛ a kyaaraa. A yɛlɛ mine la, zie teŋ na kpeɛrɛ, toma teŋ na tonɔ a kaara te menne, ane teŋ na de gbɛre ka te na kpɛ la kultaa poɔ, bee ka te koŋ kpɛ kultaa poɔ. Gbɛɛ na mine teŋ maŋ de na na baŋ deɛ toɔrɔ waneŋ te zuŋ, bee ka a vɛŋ ka te taa popeɛloŋ. Gbɛɛ na teŋ maŋ de na meŋ na toɔ̃ sãã la te neŋ Jehoova niiloŋ, bee a vɛŋ ka te neŋ Jehoova niiloŋ na maaleŋ e kpeɛŋaa. Ka teneeŋ de gbɛ-sonne, a maŋ vɛmeŋ teŋ taa popeɛloŋ, a kyɛ lɛ vɛŋ ka Jehoova meŋ poɔ pɛle.
1. Sobuo ka a Baabole na toɔ̃ soŋ bo ka ho de gbɛ-sonne?
Sɛre hoŋ na de gbɛre na, puore sɔre Jehoova ka o soŋ bo. Mãã ho meŋɛ a kaa a Baabole poɔŋ a nyɛ teɛroŋ na Jehoova naŋ taa kyaare gbɛre na hoŋ boɔrɔ ka ho de na. (Kanne Yeng Yelibie 2:3-6.) A yi a yɛlɛ mine poɔŋ, Jehoova maŋ ko teŋ bege a kyaare yɛlɛ naŋ seŋ ka te e ane yɛlɛ naŋ ba seŋ ka te e. Ka a naŋ wa waa lɛ, mɔɔ kyɛ de Jehoova bege na toŋ neŋ toma, bonso, lɛ na soŋ boŋ yaga zaa.
Kyɛ, te de ka ho kannɛɛ a Baabole kyɛ ho ba nyɛ bege zaa naŋ wuli bo yɛlɛ naŋ seŋ ka ho e? Lɛ zaa naŋ la, kyɛ Jehoova naŋ na wuli boŋ “sori naŋ seŋ ka ho tu.” (Aizeeya 48:17) Sobuoŋ? Baabole sowuli mine bebeŋ a na toɔ̃ soŋ bo. Boŋ la Baabole sowuli? Baabole sowuli eɛ yelmenne naŋ be a Baabole poɔŋ a maŋ wuli te Naaŋmen teɛroŋ ane o poteɛrɛ. Ka teneeŋ wa kanne yɛlɛ mine naŋ daaŋ e saŋa kaŋa naŋ pare baŋ sɛgaa eŋ a Baabole poɔŋ, a maŋ soŋ teŋ teŋ baŋ Naaŋmen teɛroŋ. Ka teneeŋ wa baŋ teɛroŋ na Jehoova naŋ taa kyaare yelkaŋa, a maŋ soŋ teŋ teŋ de gbɛɛ naŋ na vɛŋ ka o poɔ pɛle.
2. Ka hooŋ wa boɔrɔ ka ho de gbɛre, bo yɛlɛ aŋ seŋ ka ho daŋ de weɛ a teɛre a yɛlɛ soŋ?
A Baabole yeleeŋ ka: “Neɛ naŋ baŋ o meŋɛ taabo maŋ kaarɛɛ o gbɛ kyenee.” (Yeng Yelibie 14:15) Lɛ wuleeŋ ka, sɛre hoŋ na de gbɛre na, aseŋ ka ho mãã ho meŋɛ a teɛre a yɛlɛ gaa tɔɔre. Saŋa na hoŋ teɛrɛ a yɛlɛ na, ho na baŋ soorɛɛ ho meŋɛ ka: ‘Bo Baabole sowuli la na baŋ soŋ ma ka N de gbɛre naŋ soma? Bo gbɛre maŋ na toɔ̃ de ka lɛ vɛŋ ka toɔrɔ ta wa N zuŋ? Gbɛre ŋa maŋ boɔrɔ ka N de ŋa, a na deɛ toɔrɔ waneŋ noba mine zuŋ bee? Kyɛ, a soorebiri naŋ e nimizeɛ la ŋa, N gbɛre ŋa maŋ boɔrɔ ka N de ŋa na vɛmeŋ ka Jehoova poɔ pɛle bee?’—Duturoonomi 32:29.
Jehoova la seŋ ka o wulo te yɛlɛ naŋ soma ane yɛlɛ naŋ ba soma. Ka teneeŋ baŋ o bege ane o sowuli na soŋ, a moɔ̃ nimiri a tuuraa meŋ, a na soŋ teŋ ka te taa zoma naŋ soma. Boŋ la zoma? Zoma waa ŋa bonkaŋa naŋ be te eŋɛŋ a maŋ vɛŋ teŋ baŋ ka yɛlɛ na teŋ erɛ na somaŋ, bee yɛlɛ na teŋ erɛ na ba soma. (Urom 2:14, 15) Ka teneeŋ wulo te zoma na soŋ, o na soŋ teŋ ka te de gbɛɛ naŋ soma.
ZANNE YƐLƐ YAGA POƆ
Ho na zanne nyɛɛ lɛ Baabole sowuli ane ho zoma naŋ na toɔ̃ soŋ bo ka ho de gbɛɛ naŋ soma.
3. Vɛŋ ka a Baabole wulo bo sori
Sobuo ka Baabole sowuli na toɔ̃ soŋ te, saŋa na teŋ wa derɛ gbɛɛ na? Ŋmɛ a VIDIO, a kyɛ gyieli a soorebie naŋ tu na yɛlɛ.
-
Bo kyɔɔtaa naŋ soma yaga zaa la ka Jehoova de ko te?
-
Bonso ka Jehoova ko te sori ka te maŋ de gbɛre ko te menne?
-
Bo boma ka Jehoova ko te ka a soŋ te ka te de gbɛɛ naŋ soma?
Ka hooŋ boɔrɔ ka ho nyɛ a Baabole sowuli kaŋa, kanne Efesu 5:15, 16. Ka yɛ naŋ wa kanne baare, yɛ di dama a kyaare lɛ hoŋ na toɔ̃ “de ho wagre toŋ ne toma soŋ” a . . .
-
maŋ kanna a Baabole wagre zaa.
-
toɔ̃ e sere soŋ, pɔge soŋ, bidɔgrɔ naŋ soma, bee bi-soŋ.
-
maŋ gɛrɛ a lantaapuoruu lammore.
4. A Baabole na toɔ̃ soŋ boŋ ka ho zoma na kyili, ka lɛ vɛŋ ka ho toɔ̃ derɛ gbɛɛ naŋ soma
Ka a Baaboleŋ biŋ bege a kyaare yelkaŋa, a maŋ soŋ teŋ teŋ baŋ yɛlɛ naŋ seŋ ka te e. Kyɛ, ka a Baaboleŋ ba biŋ bege a kyaare yelkaŋa meŋ? Ŋmɛ a VIDIO, a kyɛ gyieli a soorebiri naŋ tu na yɛlɛ.
-
A yi a vidio poɔŋ, bo yɛlɛ mine la ka te yɔɔpɔge na e ka lɛ vɛŋ ka o zoma na kyili, a toɔ̃ lɛ somoo oŋ de gbɛre naŋ pɛle Jehoova poɔ?
Bonso aŋ ba seŋ ka te vɛŋ ka noba mine de gbɛɛ ko te? Kanne Hiburu 5:14, a kyɛ gyieli a soorebie naŋ tu na yɛlɛ:
-
Saŋa kaŋa a maŋ eɛ mɔlɔ ka te yelko noba ka ba de gbɛɛ ko te, kyɛ a sɛgre na teŋ kanne na yeleeŋ ka aseŋ ka te baŋ yɛlɛ ayi mine tɛɛtɛɛ, ana yɛlɛ na la bo?
-
Bo yɛlɛŋ na baŋ soŋ bo ka ho wuli ho zoma na soŋ ka o kyili, a kyɛ lɛ de gbɛɛ meŋ naŋ soma?
Te zoma na waa ŋa map, o na toɔ̃ wuli teŋ sori te zemmo poɔŋ
5. Wulo gyeremɛ a korɔ ho taaba zoma
Neɛzaa taaɛ o zoma, azuŋ gbɛɛ na teŋ maŋ derɛ na koŋ yitaa. Wala teŋ na toɔ̃ e a wuli gyeremɛ a ko zoma na te taaba naŋ taa na? Hooŋ teɛre a yɛlɛ ayi ŋa yɛlɛ soŋ a nyɛ:
A dɛndɛŋ yɛlɛ: Sɛre ka te yɔɔpɔge kaŋa na gaa a lantaapuoruu lammozie na, o maŋ de la eŋgbeesi ane boma mine maale o nimisogɔ oŋ soma soŋ zaa. Beŋ la oŋ gaa lantaapuoruu zaala kaŋa, kyɛ ka o yɔɔpɔgeba naŋ be ana lantaapuoruu naŋ wa nyɛ neɛ kaŋa naŋ maale o nimisogɔ lɛ, a maŋ dɔɔnɔ baŋ yaga zaa.
Kanne Urom 15:1 ane 1 Korinti 10:23, 24, a kyɛ pãã iri a soorebie ŋa nɔɛ:
-
Aŋa lɛ a Baabole sɛgre ayi ŋa naŋ wuli na, bo gbɛre ka te yɔɔpɔge na na toɔ̃ de? Ka ho zomaŋ ko bo sori ka ho e yelkaŋa naŋ na dɔŋ neɛ kaŋa zoma naŋ ba koo sori ka o e ana yɛlɛ na, wala aŋ seŋ ka ho e?
A yiiloŋ yɛlɛ: Te yɔɔdɔɔ kaŋa de la gbɛre ka o koŋ nyu dããkpeɛne togitogi, aneazaa ka o baŋɛɛŋ ka a Baabole yeleeŋ ka ka neɛŋ nyu dããkpeɛne fẽẽ, a ba e faa. Beŋ la baŋ toŋboɔle te yɔɔdɔɔ ŋa oŋ gaa paati kaŋa zie a te nyɛ o yɔɔmine naŋ nyuuro dããkpeɛne.
Kanne Ikilisiasitiz 7:16 ane Urom 14:1, 10, a kyɛ gyieli a soorebie ŋa yɛlɛ:
-
Aŋa lɛ a Baabole sɛgre ayi ŋa naŋ wuli na, bo gbɛre ka te yɔɔdɔɔ na na toɔ̃ de? Ka hooŋ nyɛ neɛ kaŋa naŋ erɛ yelkaŋa ho zoma naŋ ba ko bo sori ka ho e, wala aŋ seŋ ka ho e?
Bo yɛlɛ mine la na toɔ̃ soŋ bo ka ho de gbɛɛ naŋ soma?
1. Puore sɔre Jehoova ka o soŋ bo ka ho baŋ yɛlɛ naŋ seŋ ka ho e.—Gyimisi 1:5.
2. Zanne yɛlɛ yaga a yi a Baabole poɔŋ ane a gama na baŋ maŋ kaa a Baabole poɔŋ kyɛ maale na a nyɛ sowuli hoŋ na baŋ de toŋ neŋ toma. Ho neŋ Kristabiiri naŋ kyili na baŋ di la dama a kyaare a yɛlɛ.
3. Ho na baŋ soorɛɛ ho meŋɛ ka, ‘Gbɛre ŋa maŋ boɔrɔ ka N de ŋa na toɔ̃ sãã la maaŋ ne N taaba zoma bee?’
NOBA MINE MAŊ YELEŊ KA: “Ho na baŋ eɛ yelzaa hoŋ boɔrɔ. Ta vɛŋ ka teɛroŋ na noba mine naŋ taa kyaare yel na hoŋ boɔrɔ ka ho e na yɛlɛ ferɛbo.”
-
Sɛre teŋ na de gbɛre na, bonso aŋ seŋ ka te nyɛ teɛroŋ na Naaŋmen ane noba mine naŋ taa kyaare gbɛre na teŋ boɔrɔ ka te de na?
A ZANNOO YELNIMIZEERE
Ka teneeŋ maŋ bɔ teɛroŋ na Jehoova naŋ taa kyaare gbɛre na teŋ yɛŋ de na, a kyɛ lɛ teɛre nyɛ lɛ na te gbɛ de naŋ na toɔ̃ soŋ noba mine bee a pere ba na, a na soŋ teŋ ka te de gbɛɛ naŋ soma.
Bo Hoŋ Zanne
-
Boŋ na toɔ̃ soŋ bo ka ho de gbɛɛ naŋ na vɛŋ ka Jehoova poɔ pɛle?
-
Wala hoŋ na toɔ̃ e a wuli ho zoma na ka o kyili?
-
Wala hoŋ na toɔ̃ e a wulo gyeremɛ korɔ ho taaba zoma?
YƐLƐ MINE NAŊ LƐ BEBE
Kanne a yɛlɛ ŋa a nyɛ lɛ hoŋ na toɔ̃ de gbɛɛ naŋ na vɛŋ ka ho neŋ Naaŋmen niiloŋ na maaleŋ e kpeɛŋaa.
“De Gbɛɛ Naŋ Na Vɛŋ Ka Ho De Emmo Korɔ Naaŋmen” (A Watchtower, April 15, 2011)
Kaa a vidio ŋa, a nyɛ sori na Jehoova naŋ maŋ tu kyɛ wulo te sori.
Dɔɔ kaŋa da boɔrɔŋ ka o de gbɛre kaŋa, kyɛ a da ba e mɔlɔ koo fẽẽ zaa. Kaa a vidio ŋa, a nyɛ yɛlɛ naŋ da somoo oŋ de a gbɛre.
Ka hooŋ boɔrɔ ka ho de gbɛre kaŋa, kyɛ ka a Baabole ba biŋ bege zaa a kyaare ana yɛlɛ na, kanne nyɛ yɛlɛ naŋ na toɔ̃ soŋ bo ka ho de gbɛre naŋ na vɛŋ ka Jehoova poɔ pɛle.
“Wagre Zaa Ka Baabole Bege Yɛlɛ Maŋ Fɛre Bee?” (A Watchtower, December 1, 2003)
