AYÈGÈ 35

Akia afé bi ne nòng abeng mintsigen?

VOGOLO A

Bia bese bia nòng mintsigen. Dzam bò na bia dzeng alug, ésié ngeki étòbega. Da ya mam meté a ne tséndé énying dzaan, ve mintsigen miaan mi ne fe bò na bi subu Yéhova babi ngeki a tebe oyab ai nyè. Nge bia tòb é mam me ne mbeng bia yi bi mintak, Yéhova fe dzam deda a yi taag ai bia.

1. Akia afé Bibel a vòli bia na bi nòng abeng mintsigen?

Osusua yi na wò nòng ntsigen zing, dzaage Yéhova na a lere wò zen, belen ai Bibel asu yi na o yen akia ya émen a yen mam (Langʼa Minkana 2:3-6). Éyòng zing na o ne dzam yen é mvéndé é ne a Bibel a ya kòbò dzam zing a sang sang. Nge a ne nala, mbembe ntsigen a ne na o tong mvéndé té.

Ve, nge Bibel a ngoné ki mvéndé zing a sang sang wò yi bò ya? Yéhova a yi wò lere “é zen wò yeane wulu” (Yésaya 48:17). Akia afé? Bibel a bele tin memvéndé a me ne wò vòli. Tin memvéndé ya Bibel é ne meting ma lere é dzam Zamba a tsog ai é di a woren. Minlang ya Bibel mizing mia lere bia akia ya a yen dzam si dzam ka. Ai éyòng bi yemeya ntsogen woé, bi ne nòng é mintsigen mia toben ai nyien woé, ai é mi mia fû nyè nnem.

2. Dzé ndzò bia yeane tare fas osusua yi na bia nòng ntsigen zing?

Bibel a dzo na: “É mot a ne feg a bò okala ai é vom a ke” (Minkana 14:15). Nala a tilen na, osusua yi na wò nòng ntsigen zing, nfi o ne na o tare fas nge dzam té a ne bòben nge tegè. Siligi fe wòmen akia minsili di: ‘Meting ya Bibel mefé me tii ai é dzam di? Nge me nòng ntsigen hi, ye man mot wòm ya nnem a yi tòbò amieng? Akia afé ntsigen hi wa yi namba é bot bevòk? Ye ntsigen té wa fû Yéhova nnem?ʼ (Deutérònòm 32:29).

Yéhova nnye a tuene yem dzé ya é ne abé ngeki mbeng asu daan. Nge bia yègè na bia yem mebéndé ai meting moé bi baala fe mò, bia yi komoro man mot waan ya nnem asu yi na a yem é mam me ne abé ai é ma me ne mbeng (Romani 2:14, 15). Ai nala té, man mot waan ya nnem a yi bi vòli na bi nòng abeng mintsigen.

TUENE FAG

Bi tam yen nfi ya tin memvéndé ya Bibel ai ésié man mot waan ya nnem a bò éyòng bia yi na bia nòng ntsigen zing.

3. Dzogè na Bibel nnye a lere wò zen

Akia afé tin memvéndé é ne bi vòli na bi nòng abeng mintsigen? Bebege VIDÉO, ai yalen minsili mi tsaa mi:

VIDÉO: Yebege na minyegelen ya Bibel mi tòngʼlò énying dzoé (5:54)

Dzé é ne fili ntòben?
Amu dzé Yéhova a nga ve bot fili ntòben?
Dzé Yéhova a nga ve bia asu yi na bi yem belen ai fili ntòben dzaan?

Langʼa Éfésis 5:15, 16. Bifus bi bi bele tin memvéndé é ne na: “bia yeane yem belen ai abog daan”. Nde o ne belen tin mvéndé té ya asu yi na: . . .

o lang Bibel mban?
o lot abog ai é mot mina ai nyè mi ne nlugen, ai benyò bòn, ngeki bebondé boé?
o tòbò a bikoen ya akonda?

4. Yegele man mot ya nnem woé asu yi na o kare nòng mimbembe mintsigen

A ne ébugubu ya nòng mbembe ntsigen éyòng Bibel a ve mvéndé zing. Ve éyòng a seki nala bi ne bò ya? Bebege VIDÉO, ai yalen minsili mi tsaa mi:

VIDÉO: “Baala mbembe man mot ya nnem” (5:13)

Emma a nga bò dzé asu yi na a yegele man mot woé ya nnem, ai asu yi na a nòng ntsigen o ne mbeng a mis me Yéhova?

Asu dzé bia yeane ki dzogè na bot befe be nòng mintsigen afola daan? Langʼa Hébréa 5:14 ai yalen minsili mi tsaa mi:

Tò ane a ne ébugubu na o sili é bot bevòk é dzam be ne bò nge mbò be tele étié dzoé, dzé wò yeane yem yen ai wòmen?
Éye bi ne dzam bò mindzengʼen avé asu yi na bi yem komoro man mot waan ya nnem mbol yi na bi nòng mimbembe mintsigen?

Ane carte, man mot waan ya nnem a vòli bia na bi nòng mimbembe mintsigen

5. Nòngʼò ngab ai man mot ya nnem é bot bevòk

Bia bese bia nòng ki mintsigen akia deda. Nde, akia afé bi ne lere na bia nòng ngab ai man mot ya nnem é bot bevòk asu yi na te bia bò bò ékòli obak? Bia zu yen memvulna mebè:

Étié 1: Kal dzaan zing a ding mbòt pantalon éyòng a bò bisié bié ai éyòng a ne ai bemvoé boé. Mbòt woé té wa ndegele babenyang boé ya mkpamen akonda dié.

Langʼa Romani 15:1 ai 1 Kòrinti 10:23, 24, ai yalen minsili mi tsaa mi:

Nge a dzogè na bifus ya Bibel bi tòngʼlò nyè, ntsigen mbé a yi yeane nòng? Nge wò toben amos zing ai é mot a wog é mam wò bò ndzug, tò ane man mot ya nnem woé a boala ki wò na wò bò abé, wò yi nòng ntsigen mbé?

Étié 2: Tò ane Bibel a kili ki nnyuen meyòk, madzang zing a nòng ya ntsigen na a nyu ki fe meyòk. Éyòng té ba banda nyè ngogè zing, a nga yen babedzang bezing be nyaa meyòk.

Langʼa Ékklésiast 7:16 ai Romani 14:1, 10, ai yalen minsili mi tsaa mi:

Nge a dzogè na bifus bi Bibel bi tòngʼlò nyè, madzang té a ne dzam bò ya? Nge amos zing wò yen ane mot a bò é dzom man mot ya nnem woé a yebe ki, wò yi bò ya?

Asu yi na o nòng mbembe ntsigen

1. Dzaage Yéhova na a lere wò zen (Yakòbus 1:5).

2. Bò mindzengʼen a Bibel ai a bekalara baan asu yi na o yem é tin memvéndé ya bebe étié dzoé. O ne fe dzam sili é babedzang be ne éwolo mfaa ya nsisim mvòlen.

3. Tsogo é dzam ntsigen wò nòng wò yi bò asu doé ai asu é bot bevòk.

ABUI BOT DA DZO NA: “Ma bisi ki é dzam é bot bevòk ba yi tsog. Mot ose a yeane bò é dzam a yi?”

Asu dzé a ne ai nfi na bi fas akia ya Zamba a yen mam, bi tsog fe é dzom é bot bevòk ba yi woren?

OBALBAS

Mbol yi na o nòng abeng mintsigen, da sili na o tuene yem akia ya Yéhova a yen mam, o fasa fe é dzom (mbeng nge abé) é bot bevòk ba yi woren ai mimbòen mié.