AYEGHLE 35

Aval bi ne ñong mbemba minkighan

A WOKH A NKOBE

Bia besese bia ñong minkighan. Abuiñ minkighane mi ye été mi ne bira name éning dèè ye angom dèè ya Jehôva. Éfônan, bia yiène ñong nkighan wa daghe é vôm bia ye tobe, aval bia ye dzale mekômgha nfa mono nge ki faa nge bia ye lughan. Éyong bia ñong mbemba minkighan, bi ne bele éning é ne mevakh ye ve Jehôva n’nem mbeng.

1. Aval avé ô ne belane Bible naa a vole wa naa ô ñong mbemba minkighan ?

Kaa naa ô ñong nkighan ézing, yaghlane Jehôva naa a vole wa, éyong té wa ye tugha fas é dzam Bible a dzô nfa dzam té. (A lang Minkana 2:3-6.) Biyong bizing Jehôva a wôla ve metsing ébe mam m’ézing. Nge é ne aval té, a top naa wa bo mewokh ébe metsing meté é ne é dzam da dang mbeng ô ne bo.

Ve nge a bo ki naa, atsing ézing ya Bible déé se ki nfa nkighan wa kômô ñong, za dzam wa ye bo ? Amben éyong té, Jehôva a ye tsini naa a lere wa « é zen wa yiène wulu » (Esaïe 48:17) Aval avé ? Metsin metsing m’ézing me ne wô lere zen. Amu naa, metsin metsing me ya Bible me ne be bebela ba lere mesimane Nzame ye é mam a wôran. Éde, biyong bizing bia yem é dzam Nzame a wôrane nfa adzô ézing éyong bia lang Bible. Éyong bi yem-hang é dzam Jehôva a wôran, bi ntoo ñong minkighane mia ve ñe n’nem mbeng.

2. Za mam bia yiène fas kaa naa bi ñong nkighan ézing ?

Bible a dzô naa : « É môt a ne nkee a tugha daghe é vôm a tele mebo. » (Minkana 14:15) Dzam té da yili naa, bia yiène tugha fas kaa naa bi ñong nkighan ézing. Nté wa ke wa fas, silighe wamièn naa : ‘Za metsin metsing ma daghe nkighan ma kômô ñong ? Za nkighan wa ye ve naa me bele mvoa ya nsisim ? Aval avé nkighane wom wa ye name é bôt bevoo ? Ve nsili wa dang éban ô ne naa : Ye nkighane wom wa ye ve Jehôva n’nem mbeng ?’—Deutéronome 32:29.

Jehôva éñe a yiène bia dzô é mam me ne mbeng ye éma me ne abé. Éyong bia yeghe metsing ya metsin metsing mèñ ye kang me, bia yeghle é dzidzi wèè. É dzidzi wèè éñe a vole bia naa bi yem é mam me ne abé ya éma me ne mbeng. (Beromain 2:14, 15) A yeghle é dzidzi wèè da ye bia ve naa bi ñong mbemba minkighan.

A TUGHA FAS

N’yeghan aval metsin metsing me ya Bible ya é dzidzi wèè ba vole bia éyong bia kômô ñong mbemba minkighan.

3. Lighe naa Bible a lere wô zen

Aval avé metsin metsing me ya Bible me ne bia vole éyong bia kômô ñong mbemba minkighan ? Daghane ÉNGENGENG, éyong té mia lèè minlang mia daghe minsili mia zu mi :

ÉNGENGENG : Laissez-vous guider par les principes de la Bible nge ki Que los principios bíblicos nos guíen siempre (5:54)

Dzé é ne fili ya top mam ?
Amu dzé Jehôva a nga ve bia fili naa bi top mam ?
Za dzam Nzame a nga ve bia é ne bia vole naa bi ñong mbemba minkighan ?

Naa ô yen éfônane ye tsin atsing ézing, a lang Beéphésien 5:15, 16. Éyong té mia lèè minlang naa ô yen aval ô ne yem belan é tam duè naa . . .

ô lang Bible môs ôse.
ô bo mbemba n’nôm, ngal, mbyèñ, nge ki moan.
ô tobe bisulan bi ye ékôan.

4. Yaghle é dzidzi wiè naa ô ñong mbemba minkighan

Éyong Bible a ve atsing nfa dzam ézing bia kômô bo, é ne bia ébubu ya ñong nkighan wa yiène. Ve, za dzam bi ne bo éyong atsing déé se ki ? Daghane ÉNGENGENG, éyong té mia lèè minlang mia daghe nsili wa zu wi :

ÉNGENGENG : « Baghlane é dzidzi a ne nfuban » (5:13)

Éngengeng di été, za mam kal dzaa a nga bo naa a yeghle é dzidzi wèñ ya ñong nkighan wa ve Jehôva n’nem mbeng ?

Amu dzé biaa yiène ki sili é bôt bevoo naa be ñong minkighan akal dèè ? A lang Behébreu 5:14, éyong té mia lèè minlang mia daghe minsili mia zu mi :

Amben é ne ébubu naa bi sili é bôt bevoo naa be ñong minkighan akal dèè, amu dzé kada môt a yiène yem é dzam é ne abé ?
Za bivol bi ne bia vole naa bi yeghle é dzidzi wèè ye naa bi ñong mbemba minkighan ?

Aval ane mapa nge ki carte, é dzidzi wèè a vole bia naa bi ñong mbemba minkighan akal éning dèè

5. Kanghe é dzidzi é bôt bevoo

Amu kada môt a ne aval dèñ, biaa ñong ki minkighan mivoo. Aval avé bi ne lere naa bia kang é dzidzi é bôt bevoo ? N’yeneghan bitèñ bibèñ :

Étèñ 1 : Kal dzaa ézing a dzing a bo aval ñangha da sili naa a du meyang asu, a ke nféféñ ékôan aval mboane té wa ndeghle é bôt bevoo éyong ba yen de.

A lang Beromain 15:1 ya 1 Becorinthien 10:23, 24, éyong té mia lèè minlang mia daghe minsili mia zu mi :

Éyong a fas bifus bité, za dzam kal dzaa a ne kigh naa a bo ? Nge é dzidzi wiè a likh naa ô bo dzam ézing a too naa é dzidzi môt nfe a tep naa a bo de, za dzam wa ye bo ?

Étèñ 2 : Moadzang a yem naa Bible aa kili ki naa môt a ñu meyokh ya menéé, ve a top naa aa ñu ki me. Ba luè ñe ésesang ézing éyong té a yen é bôt bevoo bé ñu meyokh.

A lang Ecclesiaste 7:16 ya Beromain 14:1, 10, éyong té mia lèè minlang mia daghe minsile mia zu mi :

Éyong a fas bifus bité, za dzam é moadzang wèè a ne top naa a bo ? Za dzam wa ye bo nge wa yen naa môt ézing a bo é dzam é dzidzi wiè aa yebe ki ?

Za mam wa yiène bo naa ô ñong mbemba minkighan ?

1. Silighe Jehôva naa a vole wa naa ô yem é dzam wa ye bo.—Jacques 1:5.

2. Boghe mindzeng a Bible ya mebakh été naa ô yen metsin metsing ma daghe nkighan wa kômô ñong. Ô ne fe ke sili avole ébe bekristen be ne biwôlô nfa ya nsisim.

3. Fasghe aval nkighane wiè wa ye name é dzidzi wiè ya éñi é bôt bevoo.

NGE MÔR ÉZING A DZÔ WÔ NAA : « Ô ne bo é dzam wa kômô kaa naa wa bis é dzam é bôt bevoo ba simane ye wôran ? »

Amu dzé bia yiène bis é dzam Nzame ya é bôt bevoo ba wôran ?

AKIGHE BES

Bi ne ñong mbemba minkighan éyong bia tare dzeng naa bi yem é dzam Jehôva a wôrane ye simane ya fe éyong bia dzeng naa bi yem nge minkighane miè mia ye vole nge ki a ndeghle é bôt bevoo.