NǓKPLƆNKPLƆN 35
Lee A Sixu Wá Gbeta Ðagbe lɛ Kɔn Gbɔn É
Mǐ mɛ bǐ wɛ ɖó na nɔ wá gbeta lɛ kɔn. Gbeta e kɔn mǐ nɔ wá lɛ é gegě tíìn bo sixu wà ɖagbe alǒ nyanya nú mǐ kpo kancica e mǐ ɖó xá Jehovah é kpo. Ði kpɔ́ndéwú ɔ, é sixu byɔ ɖɔ mǐ ni wá gbeta elɔ lɛ kɔn: Fí e mǐ na nɔ é, lee mǐ na mɔ akwɛ e sín hudo mǐ ɖó é gbɔn é, abǐ mǐ na wlí alɔ alǒ gbɔ. Enyi mǐ wá gbeta ɖagbe lɛ kɔn ɔ, mǐ sixu ɖó gbɛzán e ɖó awǎjijɛ é ɖé bo lɛ́ hɛn xomɛ hun Jehovah.
1. Nɛ̌ a ka sixu zán Biblu dó wá gbeta ɖagbe lɛ kɔn gbɔn?
Cobonu a na wá gbeta ɖé kɔn hǔn, xoɖɛ bo byɔ alɔdó Jehovah, bo lɛ́ gbéjé Biblu kpɔ́n bá dó tuùn linlin e é nɔ ɖó dó xó ɔ wu é. (Xà Nǔnywɛxó 2:3-6.) Ðò ninɔmɛ ɖé lɛ mɛ ɔ, sɛ́n Jehovah tɔn e ɖò wɛn é ɖé nɔ tíìn. Enyi é wá jɛ mɔ̌ ɔ, gbeta ɖagbe hugǎn e kɔn a sixu wá é wɛ nyí ɖɔ a ni setónú nú sɛn enɛ.
Amɔ̌, enyi sɛ́n ɖebǔ ma ɖò Biblu mɛ bo ɖɔ nǔ e a na wà é nyi wɛn ǎ ɔ ka ló? Jehovah na kpò ɖò ali xlɛ́ we wɛ “ɖò ali e a [ɖó na] mlɛ́ ɔ jí.” (Ezayíi 48:17) Gbɔn nɛ̌ é? Nǔgbododó lɛ sixu xlɛ́ ali we. Nǔgbododó Biblu tɔn lɛ nɔ ɖè linlin Mawu tɔn lɛ kpo lee nǔ nɔ cí n’i é kpo xlɛ́. Hwɛhwɛ ɔ, enyi mǐ xà tan ɖé ɖò Biblu mɛ ɔ, é nɔ kplɔ́n nǔ mǐ dó lee nǔ nɔ cí nú Jehovah dó xó ɖé wu é wu. Enyi mǐ tuùn lee nǔ nɔ cí nú Jehovah é ɔ, enɛ na zɔ́n bɔ mǐ na wá gbeta e na hɛn xomɛ hun i lɛ é kɔn.
2. Etɛ lɛ a ka ɖó na gbéjé kpɔ́n cobo na wá gbeta ɖé kɔn?
Biblu ɖɔ: “Mɛ e ayi tɔn . . . ɖò te ɔ nɔ lin tamɛ cobo nɔ wà nǔ.” (Nǔnywɛxó 14:15) Enɛ xlɛ́ ɖɔ cobonu mǐ na wá gbeta ɖé kɔn ɔ, mǐ ɖó na zán hwenu dó lin tamɛ dó ali e hun nú mǐ lɛ é jí. Ee a na ɖò ali e hun nú we lɛ é ɖokpo ɖokpo gbéjé kpɔ́n wɛ é ɔ, kanbyɔ hwiɖée ɖɔ: ‘Nǔgbododó Biblu tɔn tɛ lɛ ka tɔ́n ɖò fí? Gbeta tɛ ka na zɔ́n bɔ un na ɖó fífá ayi mɛ tɔn? Etɛ lɛ gbeta ce ka na wà dó mɛ ɖevo lɛ wu? Taji bǐ ɔ, é ka na hɛn xomɛ hun Jehovah à?’—Sɛ́nflínmɛ 32:29.
Jehovah ɖó acɛ bo na ɖɔ nǔ e nyí nǔ ɖagbe é kpo nǔ e nyí nǔ nyanya é kpo nú mǐ. Enyi mǐ kplɔ́n bo tuùn sɛ́n tɔn lɛ kpo nǔgbododó tɔn lɛ kpo ganji, lobo kánɖeji bo na xwedó ye hǔn, azɔ̌ kplɔ́n ayixa mǐtɔn wɛ mǐ ɖè nɛ. Ayixa mǐtɔn wɛ nyí nǔ e nɔ ɖɔ nú mǐ ɖɔ nǔɖe nyí nǔ ɖagbe alǒ nǔ nyanya é. (Hlɔmanu lɛ 2:14, 15) Ayixa e è kplɔ́n ganji é ɖé na d’alɔ mǐ bɔ mǐ na wá gbeta ɖagbe lɛ kɔn.
BA DÒ NÚ NǓ D’EJI
Kplɔ́n lee nǔgbododó Biblu tɔn lɛ kpo ayixa mǐtɔn kpo nɔ d’alɔ mǐ bɔ mǐ nɔ wá gbeta ɖagbe lɛ kɔn gbɔn é.
3. Biblu ni nɔ xlɛ́ ali we
Nɛ̌ nǔgbododó Biblu tɔn lɛ ka sixu xlɛ́ ali mǐ hwenu e mǐ ɖò gbeta lɛ kɔn wá wɛ é gbɔn? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
-
Etɛ ka nyí mɛɖesúsíninɔ?
-
Etɛwu Jehovah ka na mǐ mɛɖesúsíninɔ?
-
Etɛ lɛ é ka na mǐ bo na dó d’alɔ mǐ bonu mǐ na nɔ wá gbeta ɖagbe lɛ kɔn?
Bo na dó mɔ nǔgbododó Biblu tɔn ɖé sín kpɔ́ndéwú hǔn, xà Efɛzinu lɛ 5:15, 16. Enɛ gudo hǔn, mi ɖɔ xó ɖó kpɔ́ dó lee a sixu “hwlɛndó hwenu lɛ, bo wà nǔ” ɖò ali elɔ lɛ nu gbɔn é jí:
-
Biblu xixa ɖò gbesisɔmɛ.
-
Tintɛnkpɔn bo na huzu asú ɖagbe, asì ɖagbe, mɛjitɔ́ ɖagbe, alǒ vǐ ɖagbe ɖé.
-
Kplé agun tɔn lɛ yiyi.
4. Kplɔ́n ayixa towe bo na dó sixu nɔ wá gbeta ɖagbe lɛ kɔn
Enyi sɛ́n Biblu tɔn e zawě é ɖé tíìn ɖò ninɔmɛ ɖé mɛ ɔ, gbeta e sɔgbe é kɔn wíwá sixu bɔwǔ. Bɔ enyi sɛ́n mɔ̌hun ɖě ma ɖè ǎ ɔ ka ló? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
-
Ðò video ɔ mɛ ɔ, afɔ tɛ lɛ nɔví nyɔnu ɔ ka ɖè bo kplɔ́n ayixa tɔn, lobo lɛ́ wá gbeta e nyɔ́ Jehovah nukúnmɛ é ɖé kɔn?
Etɛwu mǐ ma ka ɖó na nɔ kan gbeta e kɔn mǐɖesunɔ ɖó na wá lɛ é byɔ mɛ ɖevo lɛ ǎ? Xà Eblée lɛ 5:14, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
É sixu bɔwǔ ɖɔ mǐ ni kan gbeta e kɔn mǐ na wá lɛ é byɔ mɛ ɖevo lɛ có, etɛ mǐɖesunɔ ka ɖó na tɛ́n kpɔ́n bo tuùn?
-
Etɛ lɛ ka ɖè bo sixu d’alɔ we bɔ a na kplɔ́n ayixa towe, bo na nɔ wá gbeta ɖagbe lɛ kɔn?
Ayixa mǐtɔn cí ɖiɖe tò tɔn ɖé ɖɔhun, bo nɔ d’alɔ mǐ bɔ mǐ nɔ wá gbeta fí e mǐ na yì ɖò gbɛ̀ mɛ é tɔn kɔn
5. Ðǒ sísí nú ayixa mɛ ɖevo lɛ Tɔn
Gbeta vovo kɔn wɛ mɛ ɖokpo ɖokpo nɔ wá. Nɛ̌ mǐ ka sixu ɖó sísí nú ayixa mɛ ɖevo lɛ tɔn gbɔn? Lin tamɛ dó ninɔmɛ we elɔ lɛ wu:
Ninɔmɛ 1: Nɔví nyɔnu e yí wǎn nú nǔ sísá dó nukúnmɛ é ɖé sɛ̀ tɛn yì agun ɖé mɛ. Nɔví nyɔnu e ɖò agun enɛ mɛ lɛ é gegě tíìn, bɔ enyi ye mɔ bonu mɛ ɖevo lɛ sá nǔ dó nukúnmɛ ɔ, é nɔ ɖó akpɔ nú ye.
Xà Hlɔmanu lɛ 15:1 kpo 1 Kɔlɛntinu lɛ 10:23, 24 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Sɔgbe xá wemafɔ enɛ lɛ ɔ, gbeta tɛ kɔn nɔví nyɔnu enɛ ka sixu wá? Enyi a ɖò kpɔ́ xá mɛɖé bɔ ayixa tɔn ma yí gbè n’i bonu é na wà nǔ e ayixa hwɛ tɔn yí gbè nú we bɔ a nɔ wà lɛ é ǎ ɔ, etɛ a ka na wà?
Ninɔmɛ 2: Nɔví sunnu ɖé tuùn ɖɔ Biblu kún gbɛ́ ahan syɛnsyɛn nunu ó, amɔ̌, é wá gbeta ɔ kɔn ɖɔ emi kún na nɔ nu ó. È ylɔ́ ɛ wá nǔwiwa mɛkplékpɔ́mɛ tɔn ɖé domɛ, bɔ ɖò finɛ ɔ, é mɔ nɔví gegě bɔ ye ɖò ahan syɛnsyɛn nu wɛ.
Xà Nǔnywɛtɔ́xó 7:16 kpo Hlɔmanu lɛ 14:1, 10 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Sɔgbe xá wemafɔ enɛ lɛ ɔ, gbeta tɛ kɔn nɔví sunnu enɛ ka sixu wá? Enyi a mɔ mɛɖé bɔ é ɖò nǔ e ayixa towe ma yí gbè na ǎ é ɖé wà wɛ ɔ, etɛ a ka na wà?
Afɔ tɛ lɛ è ka nɔ ɖè, b’ɛ nɔ zɔ́n bɔ è nɔ wá gbeta ɖagbe lɛ kɔn?
1. Byɔ̌ Jehovah ɖɔ é ni d’alɔ we bonu a na wá gbeta nǔ e a na wà é tɔn kɔn.—Jaki 1:5.
2. Ba dò nú nǔ ɖò Biblu kpo wema jinjɔn Biblu jí lɛ kpo mɛ, bá dó mɔ nǔgbododó e ɖɔ xó dó ninɔmɛ ɔ jí lɛ é. A sixu lɛ́ ɖɔ xó xá Klisanwun e ko mɔ nǔ kpɔ́n lɛ é.
3. Lin tamɛ dó nǔ e gbeta e kɔn a na wá é na wà nú ayixa towe kpo ayixa mɛ ɖevo lɛ tɔn kpo é jí.
MƐÐÉ LƐ ÐƆ: “A ɖó acɛ bo na wà nǔ ɖebǔ e jló we é. Lee nǔ cí nú mɛ ɖevo lɛ é ɖò taji ǎ.”
-
Etɛwu lee nǔ cí nú Mawu kpo mɛ ɖevo lɛ kpo é ka ɖó na ɖu ayi mɛ nú mǐ?
ETƐ LƐ A KA KPLƆ́N?
Enyi mǐ ba dò nú lee nǔ cí nú Jehovah dó ninɔmɛ ɖé wu é, bɔ enɛ gudo ɔ, mǐ lin tamɛ kpɔ́n ɖɔ nǔwiwa mǐtɔn lɛ na d’alɔ mɛ ɖevo lɛ alǒ wà nǔ dó ye wu wɛ à jí ɔ, mǐ na wá gbeta ɖagbe lɛ kɔ.
Vɔ̌gbɔnji
-
Nɛ̌ a ka sixu wá gbeta e na nyɔ́ Jehovah nukúnmɛ lɛ é kɔn gbɔn?
-
Nɛ̌ a ka sixu kplɔ́n ayixa towe gbɔn?
-
Nɛ̌ a ka sixu ɖó sísí nú ayixa mɛ ɖevo lɛ tɔn gbɔn?
KÍJÉ
Nɛ̌ a ka sixu wá gbeta ɖěɖee na hɛn kancica e ɖò hwi kpo Mawu kpo tɛntin é lidǒ lɛ é kɔn gbɔn?
“Wǎ Gbeta E Nɔ Wlí Yɛ̌yi nú Mawu lɛ É Kɔn” (Atɔxwɛ [Gungbe], 15 avril 2011)
Kplɔ́n nǔ dó lee Jehovah nɔ ɖè wě xá mǐ gbɔn é wu d’eji.
Kplɔ́n nǔ dó nǔ ɖěɖee d’alɔ nya ɖé bɔ é wá gbeta e vɛwǔ é ɖé kɔn gbɔn é wu.
Kplɔ́n nǔ dó lee a sixu hɛn xomɛ hun Jehovah hwenu e é ma na sɛ́n e ɖò wɛn é ɖé dó ninɔmɛ ɖé wu ǎ gbɔn é wu d’eji.
“A ka Ðó Hudo Sɛ́n Biblu Tɔn ɖé Tɔn Hwebǐnu Wɛ À?” (Atɔxwɛ [Gungbe], 1er décembre 2003)
Xóta élɔ́ lɛ́ lɔ sixú jɛjí nú we
NǓ E MƐ LƐ́ NƆ YÁ WǓ KANBYƆ́ LƐ́ É
Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kpó Biblu kplɔ́nkplɔ́n vɔ̌nu sín tuto e Kúnnuɖetɔ́ Jehovah tɔn lɛ́ nɔ xwlé mɛ é kpó ɔ, a sixú zán lǐlɛ́dógbeɖévomɛ Biblu tɔn ɖěbǔ. A vo bó ná ylɔ́ xwédo towe blěbú alǒ xɔ́ntɔn towe lɛ́ ɖěbǔ bɔ yě ná gɔ́ nú we.
