KAPITE 35

E Fefeʼaki Le Toʼo o Ni Tonu e Mālilie?

PLAY

E tou toʼo fuli ni tonu. Ti ko ʼiki a tonu, sakinake pe le filifili o sokita āvaga, se gaʼoi pe ko se gāneʼa nofo, e mafai ke iai ni ona fua ki lotātou maʼuli. E mafai ki tonu alā e tou toʼo ke fakafeofi pe ke fakamamaʼo tātou meia Seova. Kāpau e tou toʼo ni tonu e mālilie, e tou fiafia loa ti e toe fiafia ai mo Seova kia tātou.

1. E tokoi fefeʼaki mai le Tosi-Tapu ke tou toʼo ni tonu e mālilie?

I muʼa o le toʼo o se tonu, kole le takitaki a Seova ti mo ke fakaʼaogaʼi le Tosi-Tapu ke ke iloa ai pe koleā lana manatu. (Lau Taagapati 2:3-6.) E mafai ke ke maʼua i ai se lao leia e totonu. Ko ia ti ko le tonu loa leia e mālie ke ke ʼaga o toʼo ko lau fakalogo ki le lao lenā.

Kae fefeʼaki loa mo kāpau e leʼese fakasā fakaʼagatonu mai i le Tosi-Tapu le neʼa leia e tonu ke ke fai? E takitaki loa a koe e Seova “i le ala leia e tonu ke ke mulimuli ai.” (Esaia 48:17) Talie e ke maʼua i le Tosi-Tapu ni pelesepeto e mafai ke tokoi atu. Ko le pelesepeto, ko se māʼoki maʼuiga leia e fakasā mai pe koleā le manatu a le Atua ti koleā e logoʼi e ia. I tosi fuli alā e tuʼu i le Tosi-Tapu, e tou maʼua ai ana manatu o uiga mo anoʼaga kesekese. Ti ka tou iloa lana manatu, ti e mafai ai ke tou toʼo ni tonu e mālilie kiate ia.

2. Koleā e tonu ke tou fakakaukau ki ai i muʼa o le toʼo o se tonu?

E pati i le Tosi-Tapu: “E tokaga le tagata poto ki ona lakaaga.” (Taagapati 14:15) Ko lona fakaʼuiga, i muʼa leia o le toʼo o se tonu, e maʼuiga ke ke fakakaukau. E tonu ke ke fai a vesili anei ke ke iloa ai pe koā a fua ki le tonu leia ka ke ʼaga loa o toʼo: ‘Koā a pelesepeto e mafai ke fakaʼogaʼi ki le anoʼaga lenā? Kāpau e kau filifili le tonu lenā, e tokamālie loa ko ia laku fakakaukau? Koleā loa ka logoʼi e lātou ake alā ki le tonu ka kau fai? E fiafia loa ko ia a Seova ki le tonu lenā?’—Tetelonome 32:29.

E fakasā e Seova le neʼa leia e mālie mo le neʼa leia e veli. Kāpau e tou ako ke tou iloa ana lao mo ana pelesepeto ti mo fakaʼapaʼapa ki ai ti e tou akoʼi ai loa lotātou leʼoloto ki le neʼa leia e mālie mo le neʼa leia e veli. (Loma 2:14, 15) Ko se leʼoloto leia na akoʼi ki le fai o le neʼa leia e mālie, e tokoi mai loa ke tou toʼo ni tonu e mālilie.

MANATU LOLOTO

Ta tioʼi le maʼuiga o pelesepeto e tuʼu i le Tosi-Tapu ti mo le gaʼoi o le leʼoloto mokā tonu ke toʼo se tonu.

3. Tou toʼo le Tosi-Tapu ke takitakiʼia tātou

E mafai fefeʼaki ki pelesepeto o le Tosi-Tapu lana tokoi mai ke tou toʼo ai ni tonu e mālilie? Tioʼi le GĀ ʼATA, ti fai a vesili e soa atu ki ai.

GĀ ʼATA: Tuku Ke Takitaki a Koe e Le Tosi-Tapu (5:54)

Koleā le loto faifaitalisa?
Koleā na soli e Seova le loto faifaitalisa ki kakai fuli?
Koleā na soli mai e Seova ke tokoi ai ki le fakaʼaogaʼi fakamālielie o le loto faifaitalisa?

Lau Efeso 5:15, 16. E maʼua i vaega anā le pelesepeto leinei o le Tosi-Tapu: “Kotou totogi le temi, talie kua veveli a aso.” E ke fakaʼaogaʼi fefeʼaki loa le pelesepeto lenā mo kāpau . . .

e ke lau tuʼumaʼu le Tosi-Tapu?
e ke soli lou temi ki lou āvaga, mo au fānau ti mo ou mātuʼa?
e ke kau ki fono o le kokelekasio?

4. Akoʼi lou leʼoloto ke ke toʼo ai ni tonu e mālilie

I le agamasani, e faigaofie le toʼo o se tonu mo kāpau e soli fakaʼagatonu mai e le Tosi-Tapu se fakatotonu. Kae fefeʼaki loa mo kāpau e se iai se fakatotonu? Tioʼi le GĀ ʼATA, ti fai le vesili e soa atu ki ai.

GĀ ʼATA: “Kotou Taupau Se Leʼoloto e Mālie” (5:13)

Koleā na fai e Emma ke akoʼi ai lona leʼoloto ti mo toʼo se tonu e mālie kia Seova?

Koleā e leʼese tonu ai ke tou vesili ki ni ʼiki pe ko le tonu fea leia e tonu ke tou toʼo? Lau Epeleo 5:14, ti fai a vesili anei:

Logo ai e faigaofie le vesili ki ʼiki pe koleā loa lalātou manatu, kae koleā e tonu ke tou fakatiotio mo matala ki ai?
Koā neʼa gaʼoi e tokoi mai loa ki le akoʼi o lotātou leʼoloto ke mafai ai le toʼo o ni tonu e mālilie?

O fai pe se mape, e tokoi mai lotātou leʼoloto ki le toʼo o ni tonu e mālilie

5. Ke ke ʼaga o tokagaʼi le leʼoloto o lātou ake alā

E leʼese tatau a tonu alā e tou toʼo fuli. E fefeʼaki lau fakasā e ke ʼaga o tokagaʼi le leʼoloto o lātou ake alā? Ta tioʼi a faifaitaki e lua:

Faifaitaki 1: Ko se tuagaʼane e mālieʼia e ia le tui o vāvaʼe loloa mokā fai ana kauga pe ka fakatasi mo ona kauneʼa. Kae ko lana faʼasiga faiteuteu lenā e leʼese mālieʼia e tuagaʼane o lona kokelekasio foʼou.

Lau Loma 15:1 mo 1 Kolinito 10:23, 24, ti fai a vesili anei:

Kāpau e mulimuli le tuagaʼane lenā ki vaega anei, koleā loa ka fakatotonu e ia ke fai? Kāpau e iai se tasi e manatu e leʼaise mālie le fai o se neʼa kae leʼaise sosa ki ai lou leʼoloto, koleā loa ka ke ʼaga o fai?

Faifaitaki 2: Logo ai e leʼese tapuʼi i le Tosi-Tapu le inu kava, kae na fakatotonu e se taina ke ʼaua se toe inu kava. Lolotoga o se fakatasi na fakaafe aia ki ai, e tio aia ki ʼiki fetaina e inu olātou gā ipu kava.

Lau Ekelesiasi 7:16 mo Loma 14:1, 10, ti fai a vesili anei:

Kāpau e mulimuli le taina lenā ki vaega anei, e fefeʼaki loa lana aga? Kāpau i se aso e ke tio ki se tasi e fai e ia se neʼa leia e tapuʼi e lou leʼoloto, koleā loa ka ke ʼaga o fai?

Ke ke toʼo se tonu leia e mālie

1. Faikole kia Seova ke ʼaga aia o takitaki a koe.—Sakopo 1:5.

2. Fai ni afa i le Tosi-Tapu ti mo atātou a tosi ke ke iloa ai le pelesepeto leia e anotasi mo le anoʼaga e ke tau mo ia. E toe mafai ke ke kole tokoi ki ni Kilisiteano ku atuʼatu i le potu fakalaumālie.