LÉSON 35
Kouman pran bon désizyon ?
Nou tout nou divèt pran désizyon. Sèrten annan yé pouvé chanjé nou lavi nèt é aji asou nou lanmityé ké Jéova. Parèkzanp, pitèt nou ké divèt désidé ki koté nou ké rété, ki travay nou ké fè é si nou ké maryé ouben si nou pa ké maryé. Lò nou ka pran bon désizyon, nou gen tchò kontan é nou ka fè Jéova plézi.
1. Kouman Labib-a pouvé idé ou pran bon désizyon ?
Anvan ou pran roun désizyon, priyè Jéova pou doumandé li idé ou épi gadé annan Labib-a pou wè sa i ka pansé asou sa (li Proverbes 2:3-6). Annan sèrten sitiasyon, Jéova ka bay roun lòrd ki prési. Lò a sa, pi bon désizyon pou pran, a obéyi sa lòrd-a.
Mé si annan Labib-a i pa gen roun lòrd ki prési ki ka di ou sa ou gen pou fè ? Menm annan sa sitiasyon-an Jéova ké gidé ou ‘asou chimen koté ou divèt maché’ (Isaïe 48:17). Mé kouman i ké fè sa ? Labib-a gen prensip ki pouvé idé ou. Prensip biblik-ya, a vérité-ya annan Labib-a ki pi enpòrtan é ki ka ansényé nou sa Jéova ka pansé ké sa i ka rousanti. Souvan, nou ka anprann sa Bondjé ka rousanti lò nou ka li istwè annan Labib-a. Lò nou ka konprann sa Jéova ka rousanti, nou pouvé pran désizyon ki ka fè li plézi.
2. Asou ki bagaj ou divèt réfléchi anvan ou pran roun désizyon ?
Labib-a ka di : « Roun moun ki ka fè atansyon ka panga koté i ka mété so pyé » (Proverbes 14:15). Sa lé di ki anvan nou pran roun désizyon, nou divèt pran tan réfléchi asou diféran chwa nou gen. Toupannan ou ka réfléchi asou sa diféran chwa-ya, doumandé ou kò : « Ki prensip annan Labib-a ka alé ké sa sitiasyon-an ? Ès sa désizyon-an pa ké troumanté mo lèspri ? Kouman désizyon-an mo ké pran ké aji asou ròt-ya ? É pi enpòrtan-an, ès sa désizyon-an ké fè tchò Jéova kontan ? » (Deutéronome 32:29).
Jéova gen drwa désidé sa ki bon ké sa ki mové. Lò nou byen konnèt lalwa ké prensip Jéova é ki nou ka désidé swiv yé, nou ka fòrmé nou konsyans. Konsyans-a, a roun bagaj nou ka rousanti ofon di nou ki ka pèrmèt nou savé sa ki bon ké sa ki mové (Romains 2:14, 15). Roun konsyans ki byen fòrmé ké idé nou pran bon désizyon.
ANNOU FOUYÉ ANNAN LABIB-A
Annou wè kouman prensip-ya ki annan Labib-a ké nou konsyans ka idé nou pran bon désizyon.
3. Lésé Labib-a gidé ou
Kouman prensip-ya ki annan Labib-a ka gidé nou lò nou gen désizyon pou pran ? Gadé VIDÉYO-a, épi kozé asou sa késyon-yan :
-
A kisa ki libèrté di chwazi-a ?
-
Poukisa Jéova bay nou libèrté di chwazi ?
-
Kisa Jéova bay nou pou idé nou pran pi bon désizyon-yan ?
Li Éphésiens 5:15, 16. Sa vèrsé-ya ka palé di sa prensip-a : « Fè tousa zòt pouvé pou zòt byen itilizé zòt tan. » Kouman ou pouvé itilizé sa prensip-a pou...
-
li Labib-a touléjou ?
-
divini roun pi bon mari, roun pi bon madanm, roun pi bon papa, roun pi bon manman ouben roun pi bon timoun ?
-
alé annan réinyon-yan ké asanblé-a ?
4. Fòrmé ou konsyans pou pran bon désizyon
Lò Labib-a ka bay roun konsèy ki klè kou dlo ròch, sa pouvé pi fasil pou pran bon désizyon-an. Mé si Labib-a pa ka bay roun lòrd ki klè, kisa ou ké fè ? Gadé VIDÉYO-a, épi kozé asou sa késyon-an :
-
Annan sa vidéyo-a, kisa sò-a fè pou fòrmé so konsyans é pou pran roun désizyon ki ka fè Jéova plézi ?
Poukisa nou pa divèt doumandé ròt moun pran désizyon a nou plas ? Li Hébreux 5:14, épi kozé asou sa késyon-yan :
-
Sa pouvé parèt pi fasil doumandé ròt moun pran désizyon a nou plas. Mé kisa chak moun divèt « anprann fè » ?
-
Ki zouti nou gen pou idé nou fòrmé nou konsyans é pou pran bon désizyon ?
Kou roun kart, nou konsyans ka idé nou chwazi ki chimen nou divèt pran annan nou lavi.
5. Rèspèkté konsyans ròt-ya
Kou tout moun pa parèy, ében nou pa ka pran menm désizyon-yan. Kouman nou pouvé montré ki nou ka rèspèkté konsyans ròt-ya ? Annou wè dé sitiasyon :
Sitiasyon 1 : Roun sò kontan poté pantalon annan so lavi touléjou ouben lò i ka kontré ké zanmi. Mé sò-ya di so nouvo asanblé pa kontan wè li poté pantalon.
Li Romains 15:1 ké 1 Corinthiens 10:23, 24, épi kozé asou sa késyon-yan :
-
Dapré sa vèrsé-ya, kisa sò-a ké pitèt désidé fè ? Imajiné ou ké roun moun, é so konsyans pa ka pèrmèt li fè roun bagaj mé oupa konsyans ka pèrmèt ou fè sa, kisa ou ké fè ?
Sitiasyon 2 : Roun frè savé ki Labib-a pa ka entèrdi nou bwè alkòl, mé i désidé pa bwè pyès alkòl. Épi yé ka envité l’ annan roun ti lafèt ké frè ké sò, é i ka wè plizyèr annan yé bwè alkòl.
Li Ecclésiaste 7:16 ké Romains 14:1, 10, épi kozé asou sa késyon-yan :
-
Dapré sa vèrsé-ya, kisa frè-a ké désidé fè pitèt ? Imajiné ou ké roun moun ki ka fè roun bagaj ou konsyans pa ka pèrmèt ou fè, kisa ou ké fè ?
Kisa ou divèt fè pou pran bon désizyon ?
1. Priyè Jéova pou doumandé l’ sa ou divèt fè (Jacques 1:5).
2. Chaché annan Labib-a é annan nou piblikasyon-yan pou trapé prensip-ya ki ka alé ké sa sitiasyon-an. Palé osi ké frè ké sò ki gen èspéryans.
3. Réfléchi asou kouman désizyon ou ké pran ké aji asou oupa konsyans é asou konsyans ròt-ya.
I GEN MOUN KA DI : « A mo lavi, mo ka fè sa mo lé. Mo pa mélé ké sa ròt moun-yan ka pansé ! »
-
Poukisa anvan nou pran roun désizyon nou divèt réfléchi asou sa Jéova ka rousanti é osi asou sa ròt-ya ka rousanti ?
SA NOU WÈ
Pou pran bon désizyon, nou divèt savé sa Jéova ka pansé asou sa sitiasyon-an é réfléchi asou kouman sa nou ké fè ké idé ròt-ya ouben fè yé lanpenn.
Kisa ou anprann
-
Kouman ou pouvé pran désizyon ki ka fè Jéova plézi ?
-
Kouman ou pouvé fòrmé ou konsyans ?
-
Kouman ou pouvé montré ou ka rèspèkté konsyans ròt-ya ?
SA OU POUVÉ TRAPÉ OSI
Kouman ou pouvé pran désizyon ki ké fè ou lanmityé ké Bondjé vin pi fò ?
« Prenons des décisions qui honorent Dieu » (La Tour de Garde, 15 avril 2011)
Anprann plis bagaj asou kouman Jéova ka bay nou konsèy.
Gadé kisa ki idé roun jenn wonm pran roun désizyon ki rèd.
Kisa nou divèt fè lò Jéova pa ka bay roun lòrd prési annan Labib-a ?
« Vous faut-il un commandement pour tout ? » (La Tour de Garde, 1é désanm 2003)
