REIREI 35

Arora ni Karaoi Motinnano Aika Raraoi

KAMAIUA

Ti bane n toa ma ara motinnano aika ti kakaraoi. A bati mai iai aika korakora rotakira iai ao ara iraorao ma Iehova. N te katoto, ti bae n iaiangoia bwa ti na maeka ia, tera ara kareketianti, ke ti na karekea buura ke ti na aki. Ngkana ti karaoi motinnano aika raraoi, ti kona ni kukurei ni maiura ao ni kakukureia naba Iehova.

1. Ko na kangaa ni buokaki man te Baibara ni karaoi motinnano aika raraoi?

Imwaini karaoan am motinnano, tataroa ana ibuobuoki Iehova ao ukeuke man te Baibara n noria bwa tera ana iango iai. (Wareka Taeka N Rabakau 2:3-6.) N tabetai, e kona n rangi n teretere ana tua Iehova ibukin te bwai teuana. Rineia bwa ko na ongeaba iai, bwa bon anne te motinnano ae te kabanea n tamaroa.

Ma tera arom ngkana e aki rangi ni mataata ana tua te Baibara ibukin te bae ko na karaoia? E na bon teimatoa ni kaiririko Iehova “n te kawai ae ko riai n nakonako iai.” (Itaia 48:17) N te aro raa? Iai booto n reirei aika kona ni kairiko. Ana boto n reirei te Baibara boni koaua aika kaotii ana iango ma ana namakin te Atua. Ti aki toki n reiakina ana namakin te Atua ibukin te bwai teuana, mani warekan te rongorongo teuana n te Baibara. Ngkana ti a ataa ana namakin Iehova, ti a kona ni karaoi motinnano aika a na kakukureia.

2. Baikara bwaai aika ko riai n iaiangoi imwaini karaoan am motinnano?

E kangai te Baibara: “E iaiangoa raoi nakonakona te aomata ae ataibwai.” (Taeka N Rabakau 14:15) Nanon aei bwa imwain ae ti karaoa ara motinnano teuana, ti riai moa n iangoia bwa e nga ae ti na rineia. Ngkana ko iaiangoi am rinerine, titirakiniko aei: ‘Baikara ana boto n reirei te Baibara aika kaineti ma aei? E nga ae N na rineia ae e na rau iai au iango? E na tera rotakia iai tabemwaang? Ae kakawaki riki, e na kukurei iai Iehova?’—Te Tua-Kaua 32:29.

Iai riain Iehova n tuangira bwa tera ae raoiroi ao ae buakaka. Ngkana ti ota n ana tua nako ma ana boto n reirei, ao ni kananomatoaira ni kakairi iai, ti a karekea iai mataniwin nanora ae raoiroi. Te mataniwinnano bon te namakin ae mena i nanora ae tuangira te bae eti ao ae kairua. (I-Rom 2:14, 15) E na buokira ni karaoi motinnano aika raraoi te mataniwinnano ae kataneiaaki.

REIAKINA AE BATI RIKI

Noria bwa a kangaa ana boto n reirei te Baibara ao mataniwin nanora, ni buokira ni karaoan ara motinnano.

3. Kariaia kairakim n te Baibara

A kangaa ana boto n reirei te Baibara ni kairira ni karaoan ara motinnano? Kaota te TAAMNEI, ao maroroakin titiraki aikai.

TAAMNEI: Kariaia Kairam n Ana Boto n Reirei te Baibara (5:54)

Tera te bwaintangira ae rianako ae e anganira Iehova?
E aera Iehova ngkai e anganira inaomatara ni karaoa ae ti kani karaoia?
Tera ae e a tia ni katauraoia ibukini buokara ni kabongana raoi inaomatara anne?

Wareka I-Ebeto 5:15, n nora iai teuana ana boto n reirei te Baibara. Ao maroroakinna bwa ko na kangaa ‘ni kabongana raoi am tai’ ibukini . . .

warekan te Baibara.
kanakoraoan riki aroarom ngkai te buu ngkoe, te karo, ke te nati.
kaakaeani bobotaki n te ekaretia.

4. Kataneia mataniwin nanom bwa ko na kakaraoi motinnano aika raraoi

E kona ni bebete karaoan te motinnano ae eti, ngkana iai ana tua te Baibara ae teretere raoi iai. Ma tera arom ngkana akea? Kaota te TAAMNEI, ao maroroakina te titiraki aei.

TAAMNEI: “Kateimatoa Raoiroini Mataniwin Nanom” (5:13)

N aron ae oti n te taamnei, baikara bwaai ake e karaoi te tari te aine aei, ni kataneia iai mataniwin nanona, ao ni karaoa te motinnano ae e kukurei iai Iehova?

Bukin tera bwa ti aki riai n tuangia tabemwaang bwa a na karaoi motinnano aika ti bon riai ni karaoi? Wareka Ebera 5:14, ao maroroakin titiraki aikai:

E ngae ngke e taraa ni bebete riki tuangakia tabemwaang bwa a na karaoi motinnano ibukira, e aera bwa ti riai ni boni karaoi?
Tera te bwai ae tauraoi ae kona ni buokiko ni kataneia mataniwin nanom ao ni karaoi motinnano aika raraoi?

N aron te mwabe, e buokira naba mataniwin nanora n rinea te kawai ae ti na toua ni maiura

5. Karinei mataniwin nanoia tabemwaang

A kakaokoro aomata nako ngaia are a kakaokoro naba aia motinnano. Ti na kangaa ni kaota karineani mataniwin nanoia tabemwaang? Iangoi baika riki aika uoua aikai:

Te moan: E mwaing temanna te tari te aine ae kani kakabonganai bwaai ni kabotonnaine, nakon te ekaretia ae a bati taari aine iai aika rotaki mataniwin nanoia ni kabonganaani baikanne.

Wareka I-Rom 15:1 ao 1 I-Korinto 10:23, 24, ao maroroakin titiraki aikai:

Ni kaineti ma kiibu aikai, tera ae e kona ni motinnanoia te tari te aine arei? Tera ae ko na karaoia ngkana ko mena i rarikin te aomata ae e rawa mataniwin nanona ni karaoa te bwai teuana, ae e boraoi ma mataniwin nanom?

Te kauoua: Te tari te mwaane ae e ataia bwa e aki kabuakakaaki n te Baibara nimakin te kamanging n te aro ae riai, ma e motinnanoia bwa e na aki nimma. E a kaoaki nakon te botaki teuana ao e a noriia taari n nima te kamanging.

Wareka Te Minita 7:16 ao I-Rom 14:1, 10, ao maroroakin titiraki aikai:

Ni kaineti ma kiibu aikai, tera ae e kona ni motinnanoia te tari te mwaane arei? Tera ae ko na karaoia ngkana ko nora temanna ni karaoa te bae e aki boraoi ma mataniwin nanom?

Ko na kangaa ni karaoi motinnano aika raraoi?

1. Butiia Iehova bwa e na buokiko ni bairea te bae ko na karaoia.—Iakobo 1:5.

2. Ukeuke n te Baibara ao baika katauraoaki aika aanaki man te Baibara, n nori iai booto n reirei. Ko kona naba ni karekea buokam irouia Kristian aika ikawai n te onimaki.

3. Iangoa aron rotakini mataniwin nanom ao mataniwin nanoia tabemwaang n am motinnano.

A TAKU TABEMAN: “Ko inaomata ni karaoa ane ko taku. Tai tabe ma aia iango tabemwaang.”

E aera bwa ti riai n iaiangoa ana namakin te Atua, ao aomata naba tabemwaang?

KAKIMOTOTOANA

A na raraoi ara motinnano ngkana ti ataia bwa tera ana namakin Iehova ibukin te bwai teuana, ao ngkana ti iaiangoia naba bwa a na buokaki ke a na karawawataaki iai tabemwaang.

Kauring

Ko na kangaa ni karaoi motinnano aika kakukureia Iehova?
Ko na kangaa ni kataneia mataniwin nanom?
Ko na kangaa ni kaota karineani mataniwin nanoia tabemwaang?

E bane te reirei aei n:

Kataia

Iaiangoa am motinnano teuana ae i aoni kawaim ni karaoia. Maiuakin aanga aika tenua ake n te bwaoki ae “ Ko na Kangaa ni Karaoi Motinnano Aika Raraoi?”

Tabeua riki:

Your other goal