35 NU GÈ NÒ

Bé Eo É Láá Nè Lé Béèlàfùl Naa

BÌLÀ

Dénè bẹ̀ì ólò nè béèlàfùl. Gã́bug béèlàfùlí ólò ié nu ea náaí ló nè bẹẹ gbaa ló kilma ló Jìhóvà. Dì belí nu dòòmà bá, è ólò nè béèlàfùl ea kil ló kiẽ́e eé tõo, bé eé láá naa ié kpègè ge tõòma dùm, be èé ílí va àbèè èé íá dóm. Nyíè beele nè Jìhóvà é ẹ́ẹ tṍó e neè lé béèlàfùl.

1. Mósĩ́ deè ní e Kpá Káí é láá nvèè bá nè ni kọ ó nè lé béèlàfùl e?

Besĩ́ ò kálá nè béèlàfùl, bàn nvèè bá lọl bá Jìhóvà, vaá ò bugi togó boo gbò nú ea di mm̀ Kpá Káí kọbé ò nyímá bé e Bàrì ẹb naa. (Bugi Próvẹẹ̀b 2:3-6.) Sìgà tṍó Jìhóvà ólò aa deè kọ́ nú eé náa. Tṍó ea meà naa vó, kà lé nu gè naa dú gè gbàntṍ ló log Bàrì.

Sõò, be Kpá Káí náa aa deè kọ́ lèlà nú eo é náaà? Jìhóvà é kilsĩ́ ge tulè ni ‘boo èèlè ea bọ́ló kọ ó tení.’ (Àìzáíà 48:17) Mósĩ́ deè e? À íe gbò nòòkúu ea é láá lelé ni dee bá. Gbò nòòkúu ea di mm̀ Kpá Káí dú gbò kà kà bel ea tẹ́lẹ bàlà kẽ bé e Bàrì bugi togó vaá ẹ̀b nu naa. Gã́bug tṍó, è ólò nyimá bé e Bàrì ẹb nu naa tṍó e bugì nòòtẽ́ ea di mm̀ Kpá Káí. Tṍó e nyímà bé e Jìhóvà ẹb nu naa, àé nveè bá nèi kọ é nè béèlàfùl ea léémáe.

2. Gbò éé ní ea bọ́ló kọ ó bugi togó boo besĩ́ ò kálá nè béèlàfùl e?

Kpá Káí kọ́ọ̀: “Neǹ nyìmànù ólò bugi togó boo kọ̀láá kà nú ea gbĩ́ gè naa.” (Próvẹẹ̀b 14:15) Níí tõó dọ̀ kọọ̀ besĩ́ è kálá nè béèlàfùl, àé bọ́ló kọ é tú tṍó bùgmà togó boo. Tṍó eo gé bugi togó boo gbò nú eo é náa, bĩiná o bá kọọ̀: ‘Mókà gbò nòòkúu ea di mm̀ Kpá Káí ní em é láá siimá tóm ẽ́? Mókà ea di gbàà ní ea é ném dĩ̀ìnè ló bùlà be m̀ náa ẽ́? Mósĩ́ deè ní e nà béèlàfùl é tọ́á ló dõòna gbò e? Ní ea bọọ lọ̀l vaá à lee, é kọọ̀ nà béèlàfùl é ẹ́ẹ̀lẹ̀ nyíè Jìhóvà?’—Dìtolónomì 32:29.

À lela ló Jìhóvà ge kọ́ nú ea dú lé nè nú ea dú pọ́lọ́ nèi. Tṍó e palàge nyimá gbò a log nè a nòòkúu vaá beeláfùl ge gbàntṍ ló, è gé búmá bẹẹ kpóó bug. Bẹẹ kpóó bug dú nu ea dìí m ea ólò naa kọ é nyimá nu ea dú lé nè pọ́lọ́. (Róm̀ 2:14, 15) Kpóó bug e ni búmá é nveè bá nèi kọ é nè lé béèlàfùl.

KPÁÁ NÓ BỌ̀Ọ̀VẸ̀

Nyimá bé e gbò nòòkúu ea di mm̀ Kpá Káí nè bẹẹ kpóó bug é láá nvèè bá nèi kọ é nè lé béèlàfùl naa.

3. Sọ̀tọ́ deè kọọ̀ Kpá Káí á lelé ni dee bá

Mósĩ́ deè ní e gbò nòòkúu ea di mm̀ Kpá Káí é láá leléi dee bá tṍó e gé ne béèlàfùl e? Bìlà VÍDIÒÍ, vaá ò gbóó aalai gbò bíb ea nyoone.

VÍDIÒ: Nè Béèlàfùl Dẹ̀ẹ̀a Boo Gbò Nòòkúu Ea Di Mm̀ Kpá Káí (5:54)

Mókà dõ̀ònù e ka di ló ní e Jìhóvà néi ẽ́?
Éé ní ea náa vaá Jìhóvà à nèi dì pọ́ì ge sààmà nú eé náa ẽ́?
Éé ní e Jìhóvà néi ea nveè bá nèi kọ é láá tú bẹẹ dì pọ́ì ge sààmà nu siimá tóm mm̀ kà lé sĩ́deè e?

Kọbé ò mon ene kà nòòkúu ea di mm̀ Kpá Káí, bugi Ẹ́fẹsọ̀s 5:15, 16, vaá ò gbóó loai bel boo bé eo é láá ‘tú o tṍó siimá tóm leevè’ naa, dì belí gè . . .

olòó bugi Kpá Káí.
dú lé dóm àbèè lé va, lé tẹ̀ àbèè lé kà, lé nvín págbálà, àbèè lé nvín pábia.
sí nònù.

4. Bumá o kpóó bug kọbé ò láá nè lé béèlàfùl

Tṍó e Kpá Káí aa deè kọ́ nú eé naa kilma ló ene íb dìtõ̀ò, à ólò valí gè nè lé béèlàfùl. Sõò be náa aa deè kọ́ nú eé náaà? Bìlà VÍDIÒÍ, vaá ò gbóó aalai bíb ea nyoone.

VÍDIÒ: “Olòó Ié Õ̀òa Bug” (5:13)

Mm̀ vídiòá, gbò éé ní e vígà pábiaá beè naa mm̀ ge bumá a kpóó bug, nè ge nè béèlàfùl ea ẹ́ẹ̀lẹ̀ nyíè Jìhóvà ẹ?

Éé ní ea náa vaá náa bọ́ló kọ é kọ́ nè dõòna gbò kọ bàá nè béèlàfùl nèi ẽ́? Bugi Híbrù 5:14, vaá ò gbóó aalai gbò bíbví:

Náa kal ló béè kọọ̀ à ólò bọọgẹ̀ valí gè bĩiná dõòna gbò kọ bàá nè béèlàfùl nèi, éé ní ea bọ́ló kọ é nyimá ẽ́?
Éé ní ea é láá nvèè bá nèi kọ é bumá bẹẹ kpóó bug kọbé è láá nè lé béèlàfùl e?

Dì belí máàp, bẹẹ kpóó bug ólò nvèè bá nèi kọ é nyimá ló nu gè naa

5. Nvèè ka ló kpóó bug dõòna gbò

Gbò nen ólò nè kele-kele íb béèlàfùl. Mósĩ́ deè ní eé láá zogè kọ è nveenìè ka ló kpóó bug dõòna gbò e? Bugi togó boo pálàa kà dìtõ̀òí:

Túá kà: Ene kà vígà pábia ea ólò bọọgẹ̀ leemáe gè tẽeá nu kil dõòna kà bõ̀ònatõ̀ò e náa ólò leemá gbò vígà pábia e bà di kĩá tṍó e nen tẽ́éá nu naa vó.

Bugi Róm̀ 15:1 nè 1 Kọ́rìnt 10:23, 24, vaá ò gbóó aalai gbò bíbví:

Dẹ̀ẹ̀a boo gbò dọ̀ Kpá Káíí, éé ní e vígà pábiaá é láá beeláfùl gè naa ẽ́? Éé ní e olo é náa be ò di kpàn nen ea kpóó bug náa sọ́ẹ tọ́ deè kọ á naa sìgà nú e ńlóò kpóó bug sọtọ́ deè kọ ó naa ẽ́?

Ní ea égè bàà kà: Ene kà vígà págbálà nyímá kọọ̀ Kpá Káí náa kọ́ é gá ṍ míí ea é láá tení dẽè nen, sõò à sa kọ náa gé ṍè. Bà kólíe siimá kẽè sẹ̀lẹ̀nù vaá gbẹá kiẽ́e à gbóó mòn pá vígà e bà gé ṍ míí ea é láá tení dẽè nen.

Bugi Ẹ̀klìzíástìs 7:16 nè Róm̀ 14:1, 10, vaá ò gbóó aalai gbò bíbví:

Dẹ̀ẹ̀a boo gbò dọ̀ Kpá Káíí, éé ní e vígà págbálàá é láá beeláfùl gè naa ẽ́? Éé ní e olo é náa be ò mon dõòna nen ea gé náa nú eo kpóó bug náa sọ́ ni tọ́ deè kọ ó naa ẽ́?

Gbò éé ní ea é nveè bá nè ni kọ ó nè lé béèlàfùl e?

1. Bàn Jìhóvà kọ á nvèè bá nè ni kọ ó láá nè lé béèlàfùl.—Jém̀z 1:5.

2. Gbĩ́tẽ́ ló nu lọl mm̀ Kpá Káí nè gbò kpá ea dẹẹ̀a boo Kpá Káí kọbé ò láá mòn gbò nòòkúu eo é síímá tóm. Òó láá zọ̀ nàgé pá vígà e ba ni téní bá gã́bug nu loá bel boo.