ƝAAKWƐLƐI 35
Pələi gwa pɛli gu kɛ mɛniɠaa həɠə la ɉu a nɛlɛɛ
Gu tɛi-tɛi kəlee gwa kɛ gu kɛ mɛniɠaa həɠəi ɉu. Mɛniɠaa tii da pɛli di kɛ a vilɛnŋaa húlulɔ mɛni ɓa, kóló mɛni, awala kɛtii gu yii pɛlɛ mɛni. Mɛniɠaa tii da pɛli di lɛlɛ guɔ awala kɛtii di ɲɔnwɔ guɔ. Da pɛli nwɔnɔ di gu maalɛɠɛ Zehova ɓa awala kɛtii di gu maakwea ma. Gwa mɛni lɛlɛɛɠaa həɠə ɉu, yili kaa pai kwəinɛɛ tɛɛ gu pɔ ə lɛɛ yili a pɛli ə Zehova kwəinɛɛ.
1. Biblə a pɛli kpɔnmaa tɛɛ ləi ə́ pɔ yɛ́ pɛli ə́ kɛ mɛniɠaa həɠəi ɉu a nɛlɛɛ ?
Ya kɛi pai mɛni ta həɠəi ɉu, gbea Zehova hwɛli ə kpɔnmaa tɛɛ ə́ pɔ ə lɛɛ ə́ Biblə hupili yɛ́ pɛli gaai pələi a giliŋahiɛ la yɛ vilɛn na mɛni tii ɓa (Hanwon 2:3-6 ɓo). Mɛni taɠaa hu, yii maanɛɛ gu gɛ Zehova a nɛ guɔ a Biblə ŋɔ tɔn da yii ɉu kponoɔ. Yili akɛtii mɛni lɛlɛɛ kpɔ gwa pɛli gu ɉəɠə ɉu, ya ɓaa gu dɔn tii pɔ tuwɔɓo.
Akɛ kea a mɛni ta yii Biblə ŋɔ tɔn da ho hwilɛn ni ma a ɉuponoɔ, lə ɓə maanɛɛ ə́ gɛ ? Zehova kaa pai ə́ tənəndɔɔi a ‘ bələi maanɛɛ ə́ ɉon na ’ (Esai 48:17). Gaa pai gɛ pələ kɛi ləi ? Biblə ŋɔ tɔn-nwooɠaa da pɛli di kɛ laa diɛ ə́ tənəndɔɔ. Biblə ŋɔ tɔn-nwooɠaa kaa a teɲaɠaai da Yálá kiliŋahiɛ pələ lɛ. Kɛlɛ-kɛlɛ hu, gwa pɛli gu Yálá kiliŋahiɛ pələ kɔlɔn yɛ hwilɛn na mɛni ta ɓa, ɓɛlowai gwa pɔlɔkiliinŋaa ta ɓo la Biblə hu. Gwa kɛ a Zehova kiliŋahiɛ pələ kɔlɔnŋaa, yili kaa pai gɛi gu gu kɛ mɛni həɠə ɉu yii a gwəinɛɛ.
2. Ya kɛi pa ə́ kɛ mɛni ta həɠəi ɉu, mɛni ləkɛɛɠaa ɓə toloo maanɛɛ ə́ gbea ə́ kiliŋahiɛ ma ?
Biblə kaa kɛi ma : “ Nui a mɛni hu kpɛ, a hiɛ a gili ” (Hanwon 14:15). Yili mukulaa ɓaa, gɛɛ gu ho mɛni ta həɠə ɉu gwa gbea nii hee gu gu kiliŋahiɛ mɛni tii ɓa. Ɓɛlowai ya kɛ ə́ kiliŋahiɛi la mɛni tii ɓa, gɛɛmaalənŋaa ŋɛi kɛ ə́ kpɔɔ ɓa : Biblə ŋɔ tɔn-nwoo ləkɛɛ ɓə vilɛnŋaa mɛnii ŋɛi ɓa ? Mɛnii ŋɛi gáá pai ɉəɠəi ɉu, lə ɓə gaa pai gɛi máá ? Lə ɓə gaa pai gɛi nu takpɛliɠaa diɛ ? Gɛɛmaalən yii kpɔ maamɛni wala-walaa, ya ka : Mɛnii ŋɛi gáá pai ɉəɠəi ɉu, gaa pai Zehova kwəinɛɛ ? (Dɔ́n ɉɛɓɛ 32:29).
Maalaa kaa Zehova yəi ə mo guɔ yɛ ma yii ɓə nɛlɛɛ ə lɛɛ yii ɓə ɲɔnwɔɔ. Gwa ŋɔ tɔn da ŋɔ tɔn-nwooɠaa kɔlɔn gbɔ a nɛlɛɛ ə lɛɛ guɔ di pɔ tuwɔɓo yili kaa pai gɛi gu gu kwəikili hutɔɔ. Gu kwəikili kaa a gu wɔ kiliŋahiɛ yii a mo guɔ yɛ ma, yii ɓə ɉaŋaa awala kɛtii yii ɓə ɲɔnwɔɔ (Romə 2:14, 15). Gwa gu kwəikili hutɔɔ a nɛlɛɛ a kpɔnmaa tɛɛ gu pɔ gu gu kɛ mɛniɠaa həɠə ɉu a nɛlɛɛ.
Ə́ WƆ MƐNIKƆLƆNŊAA TA PƐLƐ MA
Gaa kpɔnmaa yii Biblə ŋɔ tɔn-nwooɠaa a pɛli dɛɛ gu pɔ ə lɛɛ kpɔnmaa yii gu kwəikili a pɛli dɛɛ gu pɔ gwa kɛ bɔ gu mɛni ta həɠə ɉu.
3. Biblə lɛɛ laa ə ə́ tənəndɔɔ
Biblə ŋɔ tɔn-nwooɠaa da pɛli gu tənəndɔɔ ləi gwa kɛi gu kɛ mɛni ta həɠə ɉu ? VIDIO kaa ə lɛɛ ka lono kɛ gɛɛmaalənŋaa ŋɛi mɛi.
-
Lə ɓə Zehova a gu lɛɛ laa guɔ gɛ ?
-
Lə mɛni ɓa Zehova a gu lɛɛ laa guɔ gu kɛ mɛniɠaa həɠə ɉu gu kpɔɔ ɓa ?
-
Lə ɓə Zehova aa dɛɛ gu pɔ yii a kpɔnmaa tɛɛ gu pɔ guɔ gu kɛ mɛniɠaa həɠə ɉu a nɛlɛɛ ?
Ya kɛ bɔ ə́ kɔɔmaa ta kaa yɛ hwilɛn na Biblə ŋɔ tɔn-nwooɠaa diɛ, Efɛsə 5:15, 16 ɓo ɉɛɓɛ yili ninɛ hu, ə lɛɛ ə́ gaa ‘ lowai yii gaa ə́ yəi, pələi ya pɛli ɉon ɉii la yii yaan hó ɉukala ’…
-
ə gɛ yɛ́ pɛli Biblə ɓoi holo kəlee.
-
yɛ pɛli kɛi a nɛa namu lɛlɛɛ, hilɛtai kɛ nɛa lɛlɛɛ, longaamun nɛlɛɛ ə lɛɛ lokolo yii duwɔ pələ lɛlɛɛ.
-
yɛ pɛli lii ɲaakpɔnŋaa ɓa holo kəlee.
4. Ə́ kwəikili hutɔɔ yɛ́ pɛli ə́ kɛ mɛniɠaa həɠəi ɉu a nɛlɛɛ
Biblə ŋɔ tɔn a kɛ a vilɛnŋaa mɛni ta ɓa, yii maanɛɛ gu ɉəɠə ɉu gɛ laa a nɛɛ. Kəlaa akɛ kea a mɛni yii Biblə ŋɔ tɔn ta hwa hwilɛn ma yaan ? VIDIO kaa ə lɛɛ ka lono kɛ gɛɛmaalənŋaa ŋɛi mɛi.
-
Vidio hu mɛni ləkɛɛɠaa ɓə gu nan non nɛɛnu ə gɛ yɛ pɛli gwəikili hutɔɔ ə lɛɛ yɛ pɛli mɛni ta həɠəi ɉu yii a Zehova kwəinɛɛ ?
Mɛniɠaa maanɛɛ guɔ kpinii gu ɉəɠə ɉu, lə mɛni ɓa maahonɛɛli gu ho nu takpɛliɠaa maaləngɛ di mo guɔ yii maanɛɛ gu gɛ ? Hebreu 5:14 ɓo ɉɛɓɛ yili ninɛ hu, ə lɛɛ ka lono kɛ gɛɛmaalənŋaa ŋɛi mɛi :
-
Ə ma kɛ gɛ laa a pɛli ə nɛɛ gu mo nuta ɓa ə mo guɔ yii maanɛɛ gu gɛ ɓɛlowai gwa kɛi pa mɛni ta həɠəi la ɉu, lə ɓə maanɛɛ guɔ kpinii gu pɛli gulɔ nowai kɛi.
-
Lə ɓə pai kpɔnmaa tɛɛ ə́ pɔ yɛ́ pɛli ə́ kwəikil hutɔɔ yii yaan ə́i kɛ mɛniɠaa həɠə ɉu a nɛlɛɛ ?
Yɛ pələi lɔ nu a pɛli ə ɲɛi hee la carte ta hu yɛ pɛli gaai pələ yii maanɛɛ ə ɉon na, gu kwəikili a pɛli kpɔnmaa tɛɛ gu pɔ guɔ pɛli ɉəɠəi ɉu pələi gu kaa pai gu wɔ yɛnɛɛ tənəndɔɔ la
5. Nu takpɛliɠaa kwəikili maawiɛ
Gu kɛ mɛniɠaai gwa kɛ ɉəɠəi ɉu, a kɛ a gulaa gee mu. Yii gu ɓəlaa kwəikili a hwaa ma di gɛ gwa pɛli nɛi ləi guɔ ma gwa yili maawiɛ ? Gu kɔɔmaa hweelɛ kaa :
Gɔɔmaa 1 : Nan non nɛɛnu yii bɛlɛngweaa pu wɛli kaa ma da məlaa da kɛ di kee ɓa, aa pa kalangbɔn ninɛ ta hu ɓɛi yili wɛli ho laa nan nonnii nɛaa tamaa diɛ.
Romə 15:1 da Korɛntə dɔlɔɔ 10:23, 24 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Nan non nɛɛnu tii a giliŋahiɛ vɛlisɛɛɠaa ŋɛi diɛ, lə mɛni ɓə kiɛ gaa pai gɛi ? Mɛnii ə́ kwəikili a hwaa ma ə́ gɛ, ka nuta ka kɛ ka kee ɓa yii gwəikili hwa hwaa ma ho mɛni tɔnɔi tii kɛ, lə ɓə ə́ kaa pai gɛi ?
Gɔɔmaa 2 : Nan non hulɔnu ta ə ɉukɔlɔn yɛ ma Biblə hwa tɔn dɔɔ lɔɔ kpelɛɛ ɓa a kɛi gbələ yɛ bɛli ɉu. Kɛlɛɛ nwɛi aa ɉəɠə ɉu yɛ ma ho pai lɔɔ kpələi. Daa dəli pə́lə́ kɛɛ naa ta ɓɛi lɔɔ kaa laa, ku nan nonnii diɛ gbələ.
Kilimaamun 7:16 da Romə 14:1, 10 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Nan non ɉulɔnu tii a giliŋahiɛ vɛlisɛɛɠaa ŋɛi diɛ, lə ɓə kiɛ gaa pai gɛi ? Lə ɓə ə́ kaa pai gɛi ya nuta kaa yɛ mɛni ta kɛ yii ə́ kwəikili hwa hwaa ma ə́ gɛ ?
Ya kɛ bɔ ə́i kɛ mɛniɠaa həɠə ɉu a nɛlɛɛ, mɛni ləkɛɛɠaa ɓə ya pɛli gɛi ?
1. Mo Zehova ɓa ə́ kpɔnmaa tɛɛ ə́ pɔ yii maanɛɛ ə́ gɛ ə́ ɉəɠə ɉu (Ɉakə 1:5).
2. Biblə hupili da gu wɔ kalan ɉɛɓɛɠaa, Biblə ŋɔ tɔn-nwooɠaa vilɛnŋaa mɛni tii ɓa yɛ́ pɛli gɔlɔn ɉii. Ku nan nonnii daa kɛnɛ di wɔ Yálá mɛni hu, ya pɛli nwɔnɔ ə́ di maaləngɛ.
3. Mɛnii ə́ kaa pai ɉəɠəi ɉu yii gaa pai gɛi ə́ kwəikili ɓa da nu takpɛliɠaa kwəikili, ə́ kiliŋahiɛ ma.
NUTAƓAA DA KƐ KƐI MA : “ Gbɛɛ ɓə maakpaan gaa məlaa kiliŋahiɛ pələ ɓa ? Mɛnii a nɛɛ nu ɓa, ya kɛ bɔ ya gɛ ! ”
-
Lə mɛni ɓa maanɛɛ guɔ gu kili lɛɛ Yálá kiliŋahiɛ pələ hu ə ma kɛ nu takpɛliɠaa ?
YII GU GALAN
Gwa gu kɛ mɛniɠaa həɠə ɉu a nɛlɛɛ mɛni ta hu a ɓɛlowai gwa kɛ a Zehova kiliŋahiɛ pələ kɔlɔnŋaa la yɛ hwilɛn na mɛnii tii ɓa ə lɛɛ gu gu kiliŋahiɛ yii gu túwɔ́ pələ kaa pai gɛi nu takpɛliɠaa diɛ mɛnii tii hu.
Nɛɛ ə́ kili pɔ
-
Ya pɛli ə́ kɛ mɛniɠaa həɠəi ləi ɉu a nɛlɛɛ yɛ́ Zehova kwəinɛɛ ?
-
Ya pɛli ə́ kwəikili hutɔɔ ləi ?
-
Mɛnii ə ɓəlaa kwəikili a hwaa ma di gɛ, ya nɛ ləi yɛ́ ma ya yili maawiɛ ?
MƐNI TAKPƐLIƓAA
Ya pɛli ə́ kɛ mɛniɠaa həɠəi ləi ɉu a nɛlɛɛ yii a ka Yálá ka wɔ ɓəlannaa huwala-wala ?
“ Ə́ kɛ mɛniɠaa həɠə ɉu diɛi da Yálá maawiɛ ” (La Tour de Garde, 15 avril 2011)
Pələi Zehova a gu liɛwoo kɛ la, ə́ wɔ mɛnikɔlɔnŋaan ta pɛlɛ ma yɛ hwilɛn na yili ɓa.
Gaa mɛniɠaa kpɔnmaa tɛɛ hulɔnu ta pɔ yɛ pɛli gbən dee mɛni wala-wala ta hu.
Mɛniɠaa kpɔ nɛlɛɛ, Zehova yaa tɔnɔ gbən lɔ ɓə a pɛli ɉee gbaŋaa kpɔ tin-tin. Ə́ wɔ mɛnikɔlɔnŋaa ta pɛlɛ ma yɛ hwilɛn na yii ya pɛli gɛi ɓɛlowai Zehova hwa mo la guɔ a ɉu kponoɔ Nawoo hu yii maanɛɛ gu gɛ mɛni ta hu.
