KUKWE JA TÖTIKARA 35
¿Ño ni raba kukwe kwin den nuaindre jai?
Ni jökrä ie kukweta diandre nuaindre jai. Kukwe dianta nuaindre jai ye ererebätä bä kabre kukwe ta nemen bare nibätä aune kukwe dianta nuaindre jai ye ererebätä ja ketata nemen Jehovabe. Ñodre, nikwe nünandi medente, nikwe ja ngübadi ño, nikwe ja mäkäite o ñakare ye tä töibikadre nie. Nikwe kukwe kwin diain nuaindre jai ngwane, nikwe nünain kä jutobiti aune kä mikai juto Jehovabätä.
1. ¿Ño Biblia raba mä dimike kukwe kwin den nuaindre jai?
Mä jämi kukwe den nuaindre jai känenkri mä ja di kärä Jehovai. Niara töita ño kukwe yebätä ye mäkwe känä Bibliabätä (mäkwe ñäkä Proverbios 2:3-6 yebätä). Ruäre Jehovata kukwe keteitibätä kukwe mike gare metre ta, ye erere ngwane mäkwe mikadre täte ye bäri kwin.
Akwa kukwe keteitibätä Biblia ñaka kukwe mike gare metre ta ngwane, ¿dreta nemen bare? Ye erere ngwane, “ji medenbiti mäkwe nändre” ye ererebiti Jehovakwe mä jie ngwain (Isaías 48:17). Kukwe tä Bibliabätä yebiti mä jie ngwain kwe. Kukwe keteitibätä ja ruin ño Jehovai aune töita ño, ye kukwe ja jie ngwankäre Bibliabätä tä ni dimike mike nüke gare jai. Nita ñäke Bibliabätä ngwane, kukwe ja jie ngwankäre ye tä kwen nie. Jehová töita ño ye nita mike gare jai, ye tä ni dimike kukwe kwin den nuaindre jai.
2. ¿Kukwe dian jämi nuaindre jai ye känenkri dre nuaindre?
“Ni töbätä abokän tä töbiketari kwin ja käne” nieta Bibliakwe (Proverbios 14:15). Ne tä mike gare, ni jämi kukwe den nuaindre jai känenkri nikwe töbikadre kwin. Dre nuaindre yebätä nita töbike ngwane, ngwandretari jai: “¿Kukwe ja jie ngwankäre Bibliabätä meden tä blite kukwe nebätä? ¿Tikwe ne nuaindi ngwane ti töi tädi jäme? ¿Ti kukwe diain nuaindre jai ye matai ño ni madabätä? Aune bäri ütiäte, ¿kä mikai juto kwe Jehovabätä?” (Deuteronomio 32:29).
Dre kwin aune dre käme ye Ngöböta niekä nie. Lei kwe aune kukwe ja jie ngwankäre kwe ye gare kwin nie aune ni töita kwatibe mikabätä täte ngwane, conciencia nikwe tä nemen kwin. Mä kwin nunie, mä käme nunie nieta nemen kaibe ni töite nie ye meden kädekata conciencia (Romanos 2:14,15). Ni töita tötikani kwin ngwane, tä ni dimike kukwe kwin den nuaindre jai.
JA TÖTIKE BÄRI NGUSETA
Kukwe dianta nuaindre jai ngwane, Biblia aune ni töi tä kukwe ütiäte nuainne ye ani mike gare bäri jai.
3. Ja tuenmetre jie ngwandre Biblia ie
Kukweta nemen diandre nuaindre jai nie ngwane, ¿kukwe ja jie ngwankäre Bibliabätä tä ni jie ngwen ño? VIDEO mikadre ñärärä, biti kukwe ne kädriedre jabe:
-
¿Regalo meden ütiäte biani Jehovakwe nie?
-
¿Ñobätä Jehovata ni tuenmetre kukwe den nuaindre akwle jai?
-
¿Kukwe kwin diandre nuaindre jai yekäre Ngöbökwe dre biani nie?
Kukwe ja jie ngwankäre Bibliabätä keteiti mikakäre gare jai, ñäkädre Efesios 5:15, 16 yebätä aune mäkwe blita, dre nuaindre ne kwe ñaka kä gadrete ngwarbe aune...
-
käre ñäkädre Bibliabätä.
-
ja ngwandre kwin ni mukobe, ni rünere o monsore.
-
käre kwandre gätäbätä.
4. Mä ja töi tötika kukwe kwin diankäre nuaindre jai
Kukwe keteiti känti Biblia tä kukwe mike gare metre ta ngwane, raba nemen nuäre kukwe kwin diankäre nuaindre jai. Akwa kukwe mika ñan gare metre ta ngwane, ¿dre raba nemen bare? VIDEO mikadre ñärärä, biti kukwe ne kädriedre jabe:
-
Turi video te erere, ¿meri ne käkwe dre nunie ja töi tötikakäre aune kukwe tuin kwin Jehovai ye diankäre nuaindre jai?
¿Ñobätä nikwe ñaka ni mada tuadremetre kukwe den nuaindre jai ja kräke? Ñäkädre Hebreos 5:14 yebätä aune kukwe ne kädriedre jabe:
-
Nikwe ni mada tuadremetre kukwe den nuaindre jai ja kräke ye rabadre bäri kwin, ¿akwa ñobätä kukwe kwin ye ni itire itire tädre juto diankäre nuaindre jai?
-
¿Dre raba ni dimike ja töi tötike aune kukwe kwin den nuaindre jai?
Ni töi ye mapa kwrere. Nändre medene ta ye jiebiti tä ni jie ngwen.
5. Ni mada töi ye mikadre ütiäte jai
Ni ñan ja erebe yebätä nita kukwe jene jene den nuaindre jai. Aisete, ¿nita ni mada töi mike ütiäte jai ye ni raba bämike ño? Ani bämike kukwe ketebubiti.
Kena: Meri testiko tä dän pantalone kite jabätä kukwe ñokwä nuainkäre ye käkwe ja kwitadre konkrekasion känti dän pantalone kitata jabätä ñan tuin kwin yete.
Ñäkädre Romanos 15:1 aune 1 Corintios 10:23, 24 yebätä aune kukwe ne kädriedre jabe:
-
Bersikulo ne tä niere erere, ¿meri testiko ne raba dre den nuaindre jai? Nan mä, kukwe nuainta mäkwe ye ñan mä töi nike, akwa tä ni mada töi nike ngwane, ¿mäkwe dre nuaindre?
Ketebu: Dö ñadre chi ye Biblia ñaka ñäkäire gare ni brare testiko iti ie. Akwa yebiti ta, ja töi mikadre kwe ñan dö ñain. Bati, niara nübaidre kä ngwen juto jabätä konkrekasion ben aune yete ni testiko mada tuadre kwe dö ñain.
Ñäkädre Eclesiastés 7:16 aune Romanos 14:1, 10 yebätä aune kukwe ne kädriedre jabe:
-
Bersikulo ne tä niere erere, ¿ni brare testiko ne raba dre den nuaindre jai? Nan mä, ni madata kukwe nuainne ye tä mä töi nike ngwane, ¿mäkwe dre nuaindre?
¿Mä raba dre nuainne kukwe kwin diankäre nuaindre jai?
1. Mäkwe dre nuaindre yekäre mä ja di kärä Jehovai (Santiago 1:5).
2. Mäkwe kukwe känä Bibliabätä aune täräkwatabätä, kukwe ja jie ngwankäre mikakäre gare jai. Arato mäkwe blita ni niena ünä ja üairebiti yebe.
3. ¿Mä kukwe diain nuaindre jai ye mä töi mikai jäme? Matai ño ni madabätä yebätä mäkwe töbika.
NITRE RUÄRE TÄ KUKWE NE NIERE: “Mä tö dre nuain ye erere mä raba nuainne. Ni madata töbike ño ye ñan ai ütiäte”.
-
Ja ruin ño Ngöböi aune nitre madai, ¿ye ñobätä ni rabadre mike ütiäte jai?
¿DRE NIBI GARE MÄI?
Jehová töita ño kukwe keteitibätä ye nita mike gare jai aune nita kukwe den nuaindre jai ye käkwe ni mada dimikai o ñakare ye nita mike gare jai ngwane, nita kukwe kwin den nuaindre jai.
Ngwankäreta törö
-
¿Ño mä raba kukwe den nuaindre jai ne kwe matadre kwin Jehovabätä?
-
¿Mä raba dre nuainne ja töi tötikakäre?
-
¿Mäta ni mada töi mike ütiäte jai ye mä raba bämike ño?
KUKWE MIKE GARE BÄRI JAI
¿Ño mä raba kukwe den nuaindre jai abokän raba mä mike ja mäke bäri kwin Ngöböbe?
“Kukwe diandre nuaindre jai yebiti Jehová mikadre ütiäte” (Ni Mikaka Mokre, 15 abril 2011)
Jehovata mäträre ño nibätä ye mike gare jai.
Dre käkwe ni iti dimikani kukwe ñan nuäre den nuaindre jai ye mike gare jai.
Kukwe keteitibätä Jehová ñan kukwe mike gare metre ta ngwane, ño ni raba kä mike jutobätä ye mike gare jai.
“¿Dre nuaindre ye käre Bibliakwe mikadre gare metre ta?” (Ni Mikaka Mokre, 1 diciembre 2003)
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
