ZAJ KAWM 35
Yuav Ua Li Cas Peb Thiaj Li Paub Txiav Txim Siab Kom Zoo?
Peb txhua leej txhua tus yeej niaj hnub xav thiab txiav txim siab seb peb yuav ua dab tsi. Muaj tej thaud, peb yuav tau txiav txim siab seb peb yuav nyob qhov twg los sis yuav khwv li cas los yug peb tsev neeg los sis yuav yuav txij nkawm los tsis yuav. Yog peb txiav txim siab tau zoo ces peb yuav muaj kev kaj siab thiab peb yuav ua rau Yehauvas zoo siab.
1. Phau Vajlugkub yuav pab kom koj paub txiav txim siab tau zoo li cas?
Thaum koj yuav txiav txim siab ua ib yam dab tsi, nco ntsoov thov Yehauvas pab koj thiab tshawb nrhiav hauv phau Vajlugkub seb Yehauvas xav li cas. (Nyeem Pajlug 2:3-6.) Yog Yehauvas twb qhia meej lawm tias peb yuav tsum ua li cas ces zoo rau peb ua li ntawd.
Tiam sis yog phau Vajlugkub tsis qhia tsi ntsees txog qhov uas koj yuav ua ntawd los tsis txhob txhawj. Yehauvas yeej yuav pab ‘koj taug txoj kev uas tsim nyog taug.’ (Yaxayas 48:17) Muaj tej hauv paus ntsiab lus hauv phau Vajlugkub uas thaum peb nyeem peb yuav pom Yehauvas txoj kev xav. Thaum peb paub tias Yehauvas xav li cas ces peb thiaj yuav paub ua kom haum nws siab.
2. Koj yuav tau ua zoo xav txog dab tsi ua ntej koj txiav txim siab ua ib yam twg?
Phau Vajlugkub hais tias: “Cov neeg ntse ua tib zoo xav lawv mam li ua.” (Pajlug 14:15) Yog li ntawd, ua ntej koj yuav txiav txim siab ua ib yam dab tsi, ua zoo xav seb Vajtswv xav li cas txog qhov ntawd tso. Thiab xav seb tej koj yuav ua ntawd puas yuav ua rau koj nyuaj siab, lwm tus ho yuav xav li cas txog qhov uas koj ua ntawd, thiab qhov tseem ceeb tshaj plaws yog puas yuav ua rau Yehauvas zoo siab.—2 Kevcai 32:29.
Yehauvas tib leeg xwb thiaj li yog tus paub thiab muaj cai hais tau tias qhov twg zoo qhov twg phem. Yog li ntawd, thaum peb paub nws tej kev cai thiab nws txoj kev xav thiab xav ua kom haum nws siab ces thaum ntawd thiaj li yog peb paub qhov zoo qhov phem tiag. (Loos 2:14, 15) Thaum peb paub li ntawd lawm ces peb thiaj li yuav paub txiav txim siab zoo.
KAWM NTXIV
Kawm seb thaum peb paub Vajtswv txoj kev xav thiab paub qhov zoo qhov phem lawm, yuav pab kom peb paub txiav txim siab tau zoo li cas.
3. Cia Vajtswv Txoj Lus coj koj txoj hau kev
Phau Vajlugkub tej hauv paus ntsiab lus yuav pab kom koj paub txiav txim siab zoo li cas? Saib zaj YEEB YAJ KIAB thiab tham txog cov lus no:
-
Txoj kev ywj pheej uas Yehauvas muab rau peb yog dab tsi?
-
Vim li cas Yehauvas thiaj cia peb txiav txim siab rau peb tus kheej?
-
Yehauvas muab dab tsi los pab peb kom peb thiaj txawj txiav txim siab tias qhov twg zoo tshaj rau peb?
Nyeem Efexus 5:15, 16. Tham seb ob nqe no yuav pab kom koj paub siv koj “lub sijhawm kom muaj nqis” li cas . . .
-
los nyeem phau Vajlugkub txhua hnub.
-
koj thiaj ua tau ib tug txij nkawm zoo, ua tau ib leej niam leej txiv zoo, los sis ua tau ib tug tub los sis tus ntxhais zoo.
-
koj thiaj mus koom tau tej kev sib txoos tsis tu ncua.
4. Xyaum kom koj paub xav li Yehauvas xav
Thaum phau Vajlugkub qhia meej tias peb yuav tsum ua li cas ces yuav yooj yim rau peb. Tiam sis peb yuav ua li cas yog phau Vajlugkub ho tsis qhia tsi ntsees rau ib qho twg? Saib zaj YEEB YAJ KIAB thiab tham txog lo lus no:
-
Nyob hauv zaj yeeb yaj kiab no, tus muam ua dab tsi nws thiaj paub txiav txim siab seb nws yuav ua li cas?
Vim li cas peb yuav tsum tsis txhob hais kom lwm tus pab txiav txim siab rau peb? Nyeem Henplais 5:14 thiab tham txog ob lo lus no:
-
Yog lwm tus pab txiav txim siab rau peb ces yeej yuav yooj yim dua tiam sis vim li cas peb yuav tsum paub txiav txim siab rau peb tus kheej?
-
Puas muaj dab tsi uas yuav pab kom peb paub qhov zoo qhov phem thiab txawj txiav txim siab kom zoo?
Zoo ib yam li lub twj qhia kev rau peb, peb lub siab uas paub qhov zoo qhov phem yuav pab kom peb paub ua peb lub neej
5. Saib taus lwm tus txoj kev xav
Peb ib leeg xav txawv ntawm ib leeg. Ces yog lwm tus tsis xav li peb xav los peb yuav tsum saib taus lawv. Cia peb tham txog ob tug qauv:
Tus qauv 1: Muaj ib tug muam nyiam zas plaub hau tiam sis cov kwv tij nkauj muam hauv nws lub koom txoos tshiab tsis nyiam zas plaub hau.
Nyeem Loos 15:1 thiab 1 Kauleethaus 10:23, 24 ces tham txog ob lo lus no:
-
Raws li ob nqe Vajlugkub no, koj xav tus muam no yuav ua li cas? Yog muaj lwm tus tsis nyiam tej uas koj ua, txawm hais tias tej koj ua tsis txhaum Vajtswv txoj cai los, koj yuav ua li cas?
Tus qauv 2: Muaj ib tug kwv tij yeej paub tias haus me me cawv tsis txhaum Vajtswv txoj cai, tiam sis nws txiav txim siab tias nws yuav tsis haus cawv. Thaum muaj neeg caw nws mus noj ib pluag mov, nws pom muaj ib co kwv tij haus dej haus cawv.
Nyeem Tej Lus Qhia 7:16 thiab Loos 14:1, 10 ces tham txog ob lo lus no:
-
Raws li ob nqe Vajlugkub no, koj xav tus kwv tij no yuav ua li cas? Yog koj pom ib tug ua ib yam uas koj lub siab tsis kheev koj ua, tiam sis qhov nws ua ntawd tsis txhaum Vajtswv txoj cai, koj yuav ua li cas?
Yuav ua li cas koj thiaj txiav txim siab tau zoo?
1. Thov Yehauvas pab kom koj paub txiav txim siab zoo.—Yakaunpaus 1:5.
2. Mus tshawb nrhiav hauv phau Vajlugkub thiab tej ntaub ntawv Vajlugkub seb puas muaj tej ntsiab lus uas yuav pab tau koj. Los sis mus nrog ib tug kwv tij nkauj muam uas paub tab tham.
3. Xav seb qhov uas koj txiav txim siab yuav ua ntawd, koj lub siab puas kheev koj ua thiab puas yuav ua rau lwm tus nyuaj siab.
IB TXHIA HAIS TIAS: “Koj xav ua li cas los nyob ntawm koj xwb, txawm lwm tus yuav xav li cas los xij peem lawv.”
-
Vim li cas peb yuav tsum xav seb Vajtswv xav li cas txog tej uas peb ua thiab xav seb lwm tus ho yuav xav li cas?
KOJ KAWM TAU DAB TSI
Peb yuav tsum paub tias Yehauvas xav li cas txog tej uas peb ua thiab tej uas peb ua ntawd yuav pab tau los sis yuav rhuav tau lwm tus, peb thiaj yuav paub txiav txim siab zoo.
Rov Tham Dua
-
Yuav ua li cas koj thiaj paub ua kom haum Yehauvas siab?
-
Yuav ua li cas koj thiaj paub qhov zoo qhov phem?
-
Yuav ua li cas koj thiaj saib taus lwm tus yog lawv tsis xav li koj xav?
TSHAWB NTXIV
Yuav ua li cas tej uas koj txiav txim siab ua thiaj yuav txhawb tau koj txoj kev sib raug zoo nrog Vajtswv?
“Txiav Txim Siab Kom Zoo, Vajtswv Thiaj Tau Koob Meej” (Phau Tsom Faj lub 4 Hlis tim 15 xyoo 2011)
Kawm seb Yehauvas pab tswv yim li cas rau peb.
Saib seb dab tsi ho pab tau ib tug txiv neej txiav txim siab los teev tiam Yehauvas
Yehauvas Cog Lus Tias Nws Yuav Muab Txhua Yam Zoo Rau Peb (5:46)
Thaum phau Vajlugkub tsis qhia tsi ntsees rau ib qho twg, koj yuav ua li cas koj thiaj paub ua kom haum Yehauvas siab?
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
