LISYOON 35

Wii khene mer kuute ëntxlise mache?

FOERXPIILE

Meyer al mise ëntxlise mache. Etliche khene eene kroose unerxiit mache in unser leepe un aach mit unser fraayntxaft mit Yeehoowa. Tsum payxpiil: mer mise ëntxlise woo woone, wii kelt fertiine fer uns soriche un ep mer hayrate wole orer net. Wën mer kuute ëntxlise mache, tan wërt unser leepe frooer un mer kefale Yeehoowa.

1. Wii khan ti Piipel uns helfe kuute ëntxlise mache?

Eeps tuu een ëntxlus machst, peet un ferlangt tas Yeehoowa tich heleft un kuk was ti Piipel iwich tiise sache saat. (Lees Xpriiche 2:3-6.) Als mool saat Yeehoowa kenau was mer mache sole. Tan, tas peste woos tuu mache khanst is aan nëme was tee saat.

Awer, wën ti Piipel net kenau saat was tuu mache solst? Yeehoowa ‘wërt tich toch lenke ufm weech woos tuu keen solst’. (Isaiias 48:17) Wii soo? Ti Piipel hot inlërnunge woo tich helfe khene. Tiise inlërnunge sin woerheete fon te Piipel woo uns in lërne iwich was Yeehoowa tenkt un xpiirt. Ti meyerst tsayt kriin mer raus was Yeehoowa tenkt iwich eene sache wën mer een piiplix kexicht leese. Wën mer ferxteen wii Yeehoowa sich xpiirt, tan khene mer kuute ëntxlise mache.

2. Was sole mer mache eep mer etwas ëntxlise?

Ti Piipel saat: “Weer kluuch is, tenkt kuut traan eep eyer yeete xrit kept.” (Xpriiche 14:15) Tas petayt tas eep mer een ëntxlus mache, mise mer kuut tenke iwich ales was too mit tsu tuun hot. Froo tich: ‘Was fer piiplixe inlërnunge tiine tsu tiise situatsyoon? Wii xpiire ich mich wën ich tiise ëntxlus mache? Khan mayn ëntxlus anere petrefe? Un tas haupste, meecht tas Yeehoowa fraye?’ — Teuteronoomyum 32:29.

Yeehoowa hot tas recht fer uns saan was richtich un was ferkheert is. Wën mer kuut sayn kesetse un inlërnunge khëne un wole tas aan wëne, tan wërt unser kewise kuut in kelërnt. Ti kewise is ti apiliteet woo mer hon fer siin ep etwas richtich orer ferkheert is. (Romaaner 2:14, 15) Een kuut in kelërnt kewise heleft uns kuute ëntxlise mache.

LËRN MEE

Kuk wii ti piiplixe inlërnunge un unser kewise uns helfe kuute ëntxlise mache.

3. Los ti Piipel tich lenke

Wii khene ti piiplixe inlërnunge uns lenke wën mer ëntxlise mache mise? Kukt te WIITEO. Noochte xprecht iwich tiise frooche:

WIITEO: Los tas ti piiplixe printsiipye tayn leepe lenke (5:54)

Was is te fray wile?
Warom hot Yeehoowa uns fray wile kep?
Was hot Yeehoowa uns kep fer uns helfe kuute ëntxlise mache?

Fer een payxpiil fon een piiplix inlërnung siin, leest Ëfeser 5:15, 16. Noochte xprecht iwich wiis tuu tayn tsayt penutse khanst “in te pest aat wiis meechlich is” fer . . .

ti Piipel reekelmeesich leese.
een peser man, fater un soon, orer een peser fraa, mama un tochter wëre.
uf ti fersamlunge in ti kemaynt keen.

4. Lërn tayn kewise in

Wën ti Piipel een kenau oryentiirung kept iwich een sache, is es laycht wise was mache. Awer, un wën ti Piipel net kenau saat was mache? Kukt te WIITEO. Noochte xprecht iwich tiise frooch:

WIITEO: ‘Tuu een kuut kewise hale’ (5:13)

Im wiiteo, was hot een xwester kemacht fer sayn kewise in lërne fer een ëntxlus mache woo Yeehoowa kefalt?

Warom sole mer net ferlange tas anere een ëntxlus uf unser plats mache sole? Leest Hepreeyer 5:14. Noochte xprecht iwich tiise frooche:

Ferlange tas anere ëntxlise uf unser plats mache, khan laychter sin, awer “ti unerxiit tswixich was” mus yeete eene wise?
Soo wii mer im wiiteo kesiin hon, was khan helfe tayn kewise in lërne un kuute ëntxlise mache?

Soo wii een lantkhaart, unser kewise heleft uns wise woo mer sole hin keen ins leepe

5. Respektiirt ti anere iire kewise

Ti mënxe sin net ekaal, soo sin iire ëntxlise net ti selwiche. Wii khene mer tsayche tas mer ti anere sayn kewise respektiire? Kuk tswaay payxpiile:

Payxpiil 1: Een xwester woo seer kërn motërn moote in halt un sich fërpt, fangt aan in een aner kemaynt keen, woo fiil xwestere tas net mit kuute aue aan siin.

Leest Romaaner 15:1 un 1 Korinter 10:23, 24. Noochte xprecht iwich tiise frooche:

Soo wiis in tiise wërse tsaycht, was khent tiise xwester mache? Was teest tuu mache wëns tuu mit yemant pist woo tenkt tas etwas ferkheert is, awer woo tayn kewise aan nëmt?

Payxpiil 2: Eene pruuter weest tas ti Piipel saat tas net ferkheert is mit moos alkohool ketrenk trinke, awer eyer ëntxlist net trinke. Tee wërt in kelaat pay een pruuter nacht ese keen. Tat siit eyer anere trinke.

Leest Eklesyastes 7:16 un Romaaner 14:1, 10. Noochte xprecht iwich tiise frooche:

Soo wii tiise wërse tsayche, was khënt te pruuter mache? Was teest tuu mache wëns tuu mit yemant pist woo etwas macht woo tayn kewise net aan nëmt?

Wii kuute ëntxlise mache?

1. Ferlang fer Yeehoowa tich helfe ëntxlise was mache. — Tyako 1:5.

2. Uner suuch ti Piipel un ti piiplixe puplikatsyoone fer oryentiirunge fine woo too mit se tuun hon. Tuu khanst aach hilef ferlange fer rayfe kriste.