AJUMTALÁB 35
Jantʼiniʼ ki takuy ki tʼajaʼ jawaʼ tekedh
Patal kwaʼal ki takuy jantʼoj neʼets ki tʼajaʼ. Yan kʼal jawaʼ i tákuyal ki tʼajaʼ tu tólmiyal ti ejatal ani abal ku utey más kʼal a Jehová. Jun i tʼiplab, walám kwaʼal ki takuy juʼtáj ti neʼets tu kʼwajíl, jantʼoj neʼets ki tʼojnaʼ o max neʼets ku tomkin. Max ki takuy ki tʼajaʼ jawaʼ tekedh, neʼets ki atsʼaʼ kulbél ani neʼets ki kulbédhaʼ a Jehová.
1. ¿Jantʼiniʼ ti neʼets ti tólmiy an Biblia abal ka tʼajaʼ jawaʼ tekedh?
Okʼxidh ka takuy ka tʼajaʼ jantʼoj, ka konchij a Jehová abal ti tólmiy. Jayej, ka tsápnanchij ka aliy ti Biblia jantʼoj in tsálpayal a Jehová tin kwéntaj nixéʼ (ka ajiy Proverbios 2:3-6). Junchikíl, neʼets ka elaʼ i abatnaxtaláb axi in olnál jantʼoj in aychal a Jehová abal ka tʼajaʼ. Jawaʼ in tomnál ka tʼajaʼ játs ka belkaʼ.
Pero, ¿jantʼoj neʼets ka tʼajaʼ max yab ka elaʼ jun i abatnaxtaláb axi ti ólchij jantʼoj kwaʼal ka tʼajaʼ? A Jehová etsʼey neʼets ti ólchij al «jawaʼ tam bel in tomnál kit kʼalej» (Isaías 48:17). ¿Jantʼiniʼ? Jajáʼ tu pidhál i tsalpadh kaw abal ki tsalpay jantʼoj in tomnál ki tʼajaʼ. An tsalpadh kaw axi ti Biblia pel i exobchixtaláb axi tu tólmiyal ki exlaʼ jantʼoj in tsálpayal ani in atsʼál a Jehová. Axéʼchik xi exobchixtaláb i lej elál tam i ajiyal jun i tʼilab axi ti Biblia. Tam ki exlaʼ jawaʼ in tsálpayal a Jehová, nixéʼ tu tólmiyal abal ki tʼajaʼ jawaʼ tekedh.
2. ¿Jantʼoj in tomnál ka tʼajaʼ ti kwéntaj tam neʼets ka tʼajaʼ jantʼoj?
An Biblia in ulál abal «an atikláb axi tsalpadh in lej tʼajál ti kwéntaj jantʼoj neʼets kin tʼajaʼ» (Proverbios 14:15). Jawaʼ in léʼ kin uluw axéʼ xi kaw, játs abal okʼxidh ki takuy jantʼoj neʼets ki tʼajaʼ, kwaʼal ku kublen abal ki tsalpay max waʼats pil jantʼoj axi i éjtowal ki tʼajaʼ. Tam kit kʼwajiy ka tsalpay kʼal patal jawaʼ a éjtowal ka tʼajaʼ, ka konowiy ta baʼ: «¿Jantʼoj tam tsalpadh kaw axi ti Biblia in éjtowal ti kin tólmiy? ¿Jantʼiniʼ neʼets ku atsʼaʼ max ku tʼajaʼ axéʼ? ¿Jantʼiniʼ neʼets kin atsʼaʼ axi kʼeʼatchik kʼal jawaʼ ku takuy ku tʼajaʼ? Ani jawaʼ más exbadh, ¿jantʼiniʼ neʼets kin atsʼaʼ a Jehová?» (Deuteronomio 32:29).
A Dios in tomnál tu ku uchaʼ jantʼoj kwaʼal ki tʼajaʼ ani jantʼoj imbáj. Tam i éxbayal alwaʼ an abatnaxtaláb ani an tsalpadh kaw axi ti Biblia ani tam i tsápnanchal ki belkaʼ, neʼets i exóbchal i tsalápil jantʼiniʼ ka tʼojon tekedh. I tsalápil, ejtíl max tu tawnál abal tu ku uchaʼ jantʼoj játs axi in tomnál ki tʼajaʼ ani jantʼoj imbáj (Romanos 2:14, 15). Max i kwaʼal alwaʼ exóbchidh i tsalápil, neʼets ki tʼajaʼ jawaʼ tekedh.
ABAL KA EXÓBNAʼ MÁS
Ka exóbnaʼ jaleʼ ti lej exbadh ka eyendhaʼ an tsalpadh kaw axi ti Biblia ani a tsalápil, okʼxidh ka takuy jantʼoj neʼets ka tʼajaʼ.
3. Ka jilaʼ abal an Biblia ti exóbchij
¿Jantʼini tu tólmiyal an tsalpadh kaw axi ti Biblia tam neʼets ki takuy jantʼoj ki tʼajaʼ? Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jantʼoj tam tsʼejwalixtaláb lej alabél tu pidhámal a Jehová?
-
¿Jaleʼ tu jilchámal a Jehová ki takuy ti kwetémtal jawaʼ neʼets ki tʼajaʼ?
-
¿Jantʼoj tu pidhámal a Jehová abal ki takuy ki tʼajaʼ jawaʼ tekedh?
Ka ajiychik Efesios 5:15, 16 abal ka tsuʼuwchik jun i tsalpadh kaw axi ti Biblia, talbél ka tsálpaychik jantʼiniʼ a éjtowal «ka eyendhaʼ alwaʼ an kʼij» abal...
-
... ka ajiychik chudhél an Biblia.
-
... ka putuw kʼal a uchbíl ti tomkidh inik, ti tomkidh uxum o ti tsakamláb.
-
... kit kʼalej ti tamkuntaláb.
4. Ka exóbchij a tsalápil, abal ti tólmiy ka tʼajaʼ jawaʼ tekedh
Tam an Biblia tu bijchal jawaʼ kwaʼal ki tʼajaʼ, yab kʼibat ki takuy ki tʼajaʼ jawaʼ tekedh. Pero, ¿jantʼoj neʼets ki tʼajaʼ max yab waʼats jun i abatnaxtaláb? Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jantʼoj in tʼajaʼ an epchal axi ban video, abal kin exóbchij in tsalápil ani kin takuy kin kulbédhaʼ a Jehová?
¿Jaleʼ ti yab in tomnál ki konchij axi kʼeʼat abal tu ku uchaʼ jantʼoj kwaʼal ki tʼajaʼ? Ka ajiychik Hebreos 5:14 ani ka tsálpaychik kʼal axéʼ:
-
Walám junchikíl ki léʼnaʼ ki konchij axi kʼeʼat tu ku uchaʼ jantʼoj ki tʼajaʼ. Pero, ¿jaleʼ in tomnál ki exlaʼ ti kwetémtal jawaʼ játs axi tekedh?
-
¿Jantʼoj tam tolmixtaláb i kwaʼal abal ki exóbchij i tsalápil ani ki exlaʼ jantʼoj ki tʼajaʼ?
I tsalápil pel ejtíl jun i mapa, axi tu tólmiyal ki exlaʼ jantʼoj ki tʼajaʼ kʼal i ejatal.
5. Ka tʼajaʼ ti kwéntaj jawaʼ in tsálpayal axi kʼeʼat
Kom lej pilits i ey, yab junat jawaʼ i tákuyal ki tʼajaʼ. ¿Jantʼiniʼ neʼets ki tejwamédhaʼ abal i kʼakʼnál jawaʼ in tsálpayal axi kʼeʼat? Ki tsuʼuw tsab i tʼiplab.
Kʼaʼál tʼiplab: Jun i epchal axi in kulbetnál ka mukun, u kʼalel kʼal kʼeʼat i tamkuntaláb. Tanáʼ, an epchal mimláb yab in kulbetnál ka mukun.
Ka ajiychik Romanos 15:1 ani 1 Corintios 10:23, 24 ani ka tsálpaychik kʼal axéʼ:
-
Tam kin tʼajaʼ ti kwéntaj axéʼ xi tsalpadh kaw, ¿jantʼoj walám kin takuy kin tʼajaʼ an epchal? ¿Jantʼoj neʼets ka tʼajaʼ max a tsalápil ti jílchal ka tʼajaʼ jantʼoj axi kʼeʼat i epchal in tsálpayal abal yab tekedh?
Tsabchíl tʼiplab: Jun i epchal in exlál abal an Biblia yab tu kʼanchal ki utsʼaʼ wéʼ i utsʼnél axi u wíledhax. Pero jajáʼ in tákuyal yab kin utsʼaʼ nibal wéʼ. Jun a kʼicháj, u kaniyáb kʼal an epchalchik ka kʼijidhbéj ani in tsuʼtal abal talchik in utsʼál i utsʼnél axi u wíledhax.
Ka ajiychik Eclesiastés 7:16 ani Romanos 14:1, 10 ani ka tsálpaychik kʼal axéʼ:
-
Kʼal jawaʼ in ulal axéʼ xi versículos, ¿jantʼoj walám awil kin takuy kin tʼajaʼ an epchal? Ani ¿jantʼoj neʼets ka tʼajaʼ tatáʼ max ka tsuʼuw abal jun i epchal kʼwajat in tʼajál jantʼoj axi tatáʼ a tsálpayal abal yab tekedh?
¿Jantʼoj kwaʼal ka tʼajaʼ abal ka exlaʼ jantʼoj neʼets ka takuy?
1. Ka konchij a Jehová abal ti tólmiy ka exlaʼ jantʼoj ka tʼajaʼ (Santiago 1:5).
2. Ka aliy i olchixtaláb ban Biblia ani ban publicaciones abal ka exlaʼ jawaʼ tam tsalpadh kaw in éjtowal ti tólmiy. Jayej, a éjtowal ka konchij ti tólmiy an epchalchik axi etsʼey in aliyal ka tólmiyat kʼal a Jehová.
3. Ka tsalpay jantʼoj neʼets ka watʼey kʼal jawaʼ ka takuy ka tʼajaʼ ani max neʼets kin odhnaʼ axi kʼeʼat.
JAWAʼ TALCHIK IN TSÁLPAYAL: «Yab ka tʼajaʼ ti kwéntaj jawaʼ in ulal axi kʼeʼat. Ka tʼajaʼ jawaʼ ka léʼnaʼ».
-
¿Jaleʼ ti lej exbadh ki tʼajaʼ ti kwéntaj jawaʼ in tsálpayal a Dios ani axi kʼeʼat?
JAWAʼ I EXOBNÁMAL
I tʼajál jawaʼ tekedh tam i tʼajál ti kwéntaj jawaʼ in tsálpayal a Dios. Jayej, tam ki tsalpay max neʼets ki tólmiy o ki odhnaʼ axi kʼeʼat, kʼal jawaʼ neʼets ki tʼajaʼ.
Ki tʼilaʼ jawaʼ i exóbnaʼ
-
¿Jantʼoj neʼets ti tólmiy ka takuy ka tʼajaʼ jawaʼ a Jehová in kulbetnál?
-
¿Jantʼoj a éjtowal ka tʼajaʼ abal ka exóbchij a tsalápil?
-
¿Jantʼiniʼ a éjtowal ka tejwamédhaʼ abal a tʼajál ti kwéntaj jawaʼ in tsálpayal axi kʼeʼat?
KA EXÓBNAʼ JANTʼOJ ÍT
¿Jantʼiniʼ a éjtowal ka takuy ka tʼajaʼ jawaʼ tekedh abal kit utey más kʼal a Dios?
«Ki takuy ki tʼajaʼ jantʼoj axi kin puwénchij a Dios» (La Atalaya, 15 de abril de 2011)
Ka tsuʼuw jantʼiniʼ tu exóbchal a Jehová.
Ka tsuʼuw kʼal jantʼoj ti tólmiyat jun i inik abal kin exlaʼ jantʼoj kin tʼajaʼ.
A Jehová tu uchál abal neʼets tu ku pidhaʼ yan i alwataláb (5:51)
Ka tsuʼuw jantʼiniʼ a éjtowal ka kulbédhaʼ a Jehová tam ka takuy ka tʼajaʼ jantʼoj, bélits max yab tu pidhámal jun i abatnaxtaláb.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
