LEKSION 35
Nu Kunnasi Ka Makangngua tu Makasta ira nga Desision
Mawag tam ngamin i maddesision. Dakal i efekto nittam na desisiottam ira anna ta pakikkofuttam kani Jehova. Angngariganna, maddesision ittam nu sitaw i paddianattam, nu kunnasi tam suportan i pakawagattam, onu nu mangatawa onu makitawa ittam. Nu makasta i desisiottam ira, magayayya ittam anna si Jehova.
1. Kunnasi naka moffunan na Biblia nga makangngua tu makasta ira nga desision?
Nigem maddesision, ipakimallo mu nga uffunan naka ni Jehova anna innammu ta Biblia nu anni i pagimammana meyannung tatun. (Bibbigan i Proverbio 2:3-6.) Egga ira i espesipiko nga bilin ni Jehova. Pammakapianammu nu tuttulammu yatun.
Kunnasi nu awan tu espesipiko nga nakagi ta Biblia nu anni i kuattam? Igiya naka lagapa ni Jehova “ta dalan nga mawag tu lakarammu.” (Isaias 48:17) Kunnasi? Egga ira i prinsipio na Biblia nga makoffun nikaw. Masingan tatun i appana-panono anna mataga-tageno na Dios. Egga ira i rekord ta Biblia nga mangipasingan nu anni i pagimamma ni Jehova ta tadday nga gannug. Nu malippawa tam i mataga-tageno ni Jehova, makangngua ittam tu desision ira nga makapagayayya nisa.
2. Anni ira i mawag nga ikonsideram nigem maddesision?
Kagian na Biblia: “Pannonopan tu mapia na masirib i kada dakkuana.” (Proverbio 14:15) Nige tam maddesision, mawag tu pannonopattam tu mapia nu anni i piliattam. Iyavu mu ta baggim: ‘Anni ira nga prinsipio na Biblia i makoffun? Memammo kari i nono ku nu yaw i piliakku? Anni i efekto natun ta tanakuan? Magayayya kari si Jehova taw nga desisiokku?’—Deuteronomio 32:29.
Egga i kepangngattan ni Jehova nga ikagi nittam nu anni i mapia anna marake. Nu ammu tam i dorob anna prinsipiona ira anna ikagumattam nga tuttulan yatun, masanay tam i konsensia tam. I konsensia tam i makkagi nu fustu onu mali i kukukuattam. (Roma 2:14, 15) Nu nasanay tu mapia i konsensia tam, makangngua ittam tu makasta ira nga desision.
GIGIAMMUAN I ARU PAGA
Gigiammuan paga nu kunnasi ittam moffunan na prinsipio ira na Biblia anna na konsensia tam ta paddesision.
3. Mappegiya ta Biblia
Kunnasi ittam megiya na prinsipio ira na Biblia ta paddesisiottam? Girawan i VIDEO, anna paguvovugan i tumunug ira nga pakkiavu.
-
Anni i lallaguray?
-
Ngatta niddan ittam ni Jehova tu pakawayya nga maddesision?
-
Anni i niyawa ni Jehova nga manguffun nittam tapenu makangngua tu makasta ira nga desision?
Bibbigan i Efeso 5:15, 16, NW, tapenu masingan i tadday nga prinsipio na Biblia. Kabalinna, paguvovugan nu kunnasim ‘usan ta kapianan i tiempom’ tapenu . . .
-
regular nga mabbibbig tu Biblia.
-
mabbalin tu mas mapia nga atawa, magana, onu ana.
-
magatende ta study ira.
4. Sanayan i konsensiam nga magangngua tu makasta ira nga desision
Nu egga i espesipiko nga bilin na Biblia ta tadday nga gannug, mas mabi para nittam nga makangngua tu fustu nga desision. Ngem kunnasi nu awan tu espesipiko nga bilin? Girawan i VIDEO, anna paguvovugan i tumunug nga pakkiavu.
-
Ta video, anni i kingngua na sister tapenu sanayan i konsensiana anna makangngua tu desision nga mamagayayya kani Jehova?
Ngatta sittam lagapa i magangngua tu desision para ta baggi tam, ari tu tanakuan? Bibbigan i Hebreo 5:14, anna paguvovugan yaw ira nga pakkiavu:
-
Gittana mas mabi nga iyavu ta karuan nu anni i desision nga kuattam, ngem anni nakuan i kuattam?
-
Anni i makoffun nikaw nga sanayan i konsensiam anna makangngua tu makasta ira nga desision?
Kagitta na mapa, igiya ittam na konsensia tam ta pagangngua tu desision ta pattoletam
5. Irespeto i konsensia na tanakuan
Nadduruma i desision na kada tadday. Kunnasi tam mepasingan nga irespeto tam i konsensia na tanakuan? Innan i dua nga situasion:
Ollu nga situasion: Tadday nga sister nga mahilig mam-makeup i nagali ta kongregasion nu sitaw aru nga sister tari i ikalussoda i makasingan tu naka-makeup.
Bibbigan i Roma 15:1 anna 1 Corinto 10:23, 24, anna paguvovugan yaw ira nga pakkiavu:
-
Base taw ira nga teksto, anni i mawag nga kuan na sister? Anni i kuammu nu kavulu mu i tadday nga ari makaya na konsensiana nga kuan i gannug nga makaya na konsensiam?
Mekadua nga situasion: Ammu na tadday nga brother nga ari igamma na Biblia i paginum tu binarayang, ngem pinilina nga ari vuluvuga minum. Nembitan yayya ta tadday nga okasion anna nasinganna nga mininum i brother ira tu binarayang.
Bibbigan i Eclesiastes 7:16 anna Roma 14:1, 10, anna paguvovugan yaw ira nga pakkiavu:
-
Base taw ira nga teksto, anni i mawag nga kuan na brother? Anni i kuammu nu egga i masingammu nga magangngua tu gannug nga ari ipamavulun na konsensiam?
Anni ira i kuammu tapenu makangngua ka tu makasta ira nga desision?
1. Ikiddom kani Jehova nga uffunan naka nga maddesision.—Santiago 1:5.
2. Mar-research ka ta Biblia anna ta nebase-Biblia ira nga publikasion tu prinsipio ira nga makoffun. Awayyam gapa mappoffun ta ekspiriensadu ira nga Cristiano.
3. Nonopan i efekto na desisiommu ta konsensiam anna ta konsensia na tanakuan.
I KAGIAN NA KARUAN: “Kuammu nu anni i kayà mu nga kuan. Ariammu ngana nonopan nu anni i kagian na tanakuan.”
-
Ngatta mawag nga ikonsidera tam i matageno na Dios, anna na tanakuan?
ANNI I NAGIGIAMMUM?
Makangngua ittam tu makasta ira nga desision nu ikonsidera tam i pagimamma ni Jehova, anna i efekto na desisiottam ta tanakuan.
Review
-
Kunnasi ka makangngua tu desision nga mamagayayya kani Jehova?
-
Kunnasim sanayan i konsensiam?
-
Kunnasim merespeto i konsensia na tanakuan?
I AWAYYAM PAGA KUAN
Kunnasi ka makangngua tu desision ira nga mamalladda ta pakikkofummu ta Dios?
“Magangngua tu Desision ira nga Mangidayaw ta Dios” (Passifusifutan, Abril 15, 2011)
Gigiammuan paga nu kunnasi ittam tabarangngan ni Jehova.
Girawan nu anni i nakoffun ta tadday nga lalaki nga magangngua tu mariga nga desision.
Gigiammuan paga nu kunnasim mapagayayya si Jehova maski nu awan tu espesipiko nga bilinna ta tadday nga gannug.
“Kawagammu Kari Kanayun i Espesipiko nga Bilin na Biblia?” (Passifusifutan, Disiembre 1, 2003)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
