ƐLĀ Ō NWU ƆMƐ 35
Ɛgɛ Nɛ A Géē Ya Ōmiya Olɔhi A
Ɛjɛɛji alɔ lɛ ōmiya ō ya. Ɛyinɛhi ku ōmiya nyā lɔfu lɛ abɔ kwu alɔ mla ɛma ku alɔ mla Ujehofa lɔɔlɔhi gla. Ocabɔ, alɔ lɔfu ya ōmiya ku ɛga nɛ alɔ géē lā, ɛgɛ nɛ alɔ géē lɛ ije nɛ alɔ cɛgbá nu a amāŋ ɔdaŋ ku alɔ géē lɛ ɔba amāŋ ɔnyā. Eko duuma nɛ alɔ ya ōmiya olɔhi, alɔ lɔfu lɛ eeye ipu oyeeyi ku alɔ klla ya ɔdā nōo he Ujehofa ɔtu.
1. Ɛgɛnyá nɛ a géē bi Ubáyíbu le yuklɔ kóō ta uwɔ abɔ ya ōmiya olɔhi a?
Gbɔbu ɛɛ ku a ya ōmiya duuma, gbɔɔkɔ lɛ Ujehofa kóō ta uwɔ abɔ. Jila Ubáyíbu má, ku a má ɛgɛ nɛ Ujehofa leyi má ɛlā a. (Jé Aíita 2:3-6.) Ipu āhɔ̄ ōhī, Ujehofa gē je ɔ́da nōo teyi peee. Ɔdaŋ kóō lɛ a, ōmiya olɔhi fiyɛ duu nɛ a géē ya a wɛ ō yɛce ɔ́da ku Ujehofa a.
Ɔdaŋ ka ɔ́da amāŋ íne duuma ipu Ubáyíbu i ka peee ɔdā nɛ a cika ō ya ŋ bɛɛ? Ujehofa klla géē ma ‘ɔwɛ nɛ a géē yɛ a fu gā uwɔ.’ (Ayisáya 48:17) Ɛgɛnyá? Ó lɔfu lɛ ukɔ́ ōhī nōo géē gbo uwɔ. Aukɔ́ ku Ubáyíbu wɛ ɔkwɛyi nōo gē mafu lɛ alɔ ɔdā nōo wɛ ɔtu ku Ɔwɔico mla ɛgɛ nɛ ɔtu gē ya ɔ lɛ a. Igbalɛwa, alɔ gē nwu ɛgɛ nɛ ɔtu gē ya Ɔwɔico lɛ lɛyikwu ɛlā eko duuma nɛ alɔ jé ɔ̄kā ŋma ipu Ubáyíbu. Eko duuma nɛ alɔ jé ɛgɛ nɛ ɔtu gē ya Ujehofa lɛ, alɔ lɔfu ya ōmiya nōo he ɔ ɔtu.
2. Ɔdi nɛ a cika ō gbɛla lɛyikwu ɔ gbɔbu ku a ya ōmiya a?
Ubáyíbu kahinii: “Ɔ̄cɛ olohílípū ā leyī yɛ ikpó nēé gē fu ā.” (Aíita 14:15) Ɛnyā yɔ i mafu lɛ alɔ ka, gbɔbu ɛɛ ku alɔ ya ōmiya, alɔ cika ō lɛ eko taajɛ ku alɔ gbɛla tu ɔdā nɛ alɔ gáā ya a. Abɔ a yɔ i leyi yɛ ɛjɛɛji ɛlā a eyeeye a, da iyi uwɔ ɔka kahinii: ‘Ukɔ́ ku Ubáyíbu nyá tɛɛma kwu ɛlā nyā a? Ɛnyá ŋma ipu ōmiya ɛyɛɛyɛyi nyā gáā je ɛbɔ ku ɔtu gā um a? Ɛgɛnyá nɛ ōmiya ku um gáā lɛ abɔ kwu ācɛ ɔhá a? Ofiyɛ duu a, ó géē cɛ lɛ Ujehofa gweeye?’—Oblatūkíne 32:29.
Ujehofa lɛ íkwu ō da alɔ ɔdā nōo wɛ ɔdā olɔhi mla ɔdobɔbi. Eko duuma nɛ alɔ lɛ aíne mla aukɔ́ ku Ujehofa jé lɔɔlɔhi klla le miya ō yɛce ɔ, alɔ yɔ i nwu ɔtu ku alɔ jé. Ɔtu ku alɔ wɛ ɔdā nōo gē da alɔ ɔdaŋ ka odee wɛ ɔdobɔbi amāŋ ɔdā olɔhi. (Ācɛ Uróm 2:14, 15) Ɔtu nōo le nwu jé géē ta alɔ abɔ ya ōmiya olɔhi.
JÉ GƆBU
Nwu ɛgɛ nɛ aukɔ́ ku Ubáyíbu mla ɔtu ku alɔ géē ta alɔ abɔ ya ōmiya a.
3. Cɛ ka Ubáyíbu kóō gbo uwɔ
Ɛgɛnyá nɛ aukɔ́ ku Ubáyíbu géē gbo alɔ eko nɛ alɔ yɔ i ya ōmiya a? Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ɛnɛɛnɛ ɛhi nyá nɛ Ujehofa je lɛ alɔ a?
-
Ɔdiya nɛ Ujehofa jɛga ɔɔma lɛ alɔ ō miya ɔdā nɛ alɔ dɔka abɔyi alɔ a?
-
Ɔdi nɛ ó kē jɛ lɛ alɔ nōo géē ta alɔ abɔ ya ōmiya ɔwɛ olɔhi fiyɛ duu a?
O ya ɛɛ ku a má ocabɔ ku ukɔ́ ku Ubáyíbu, jé Ācɛ Ɛ́fēsɔsi 5:15, 16. Cɛɛ ku aa kɔka lɛyikwu ɛgɛ nɛ a géē ‘bi ɛga nɛ a lɛ a’ le . . .
-
jé Ubáyíbu ojigogo.
-
piya ɔba amāŋ ɔnyā, adā mla ɛ́nɛ́ amāŋ ɔyi olɔhi a.
-
nyɔ gā ōjila ku ujɔ a.
4. Lɛ ɔtu ku uwɔ nwu jé ku a ya ōmiya olɔhi
Ɔdaŋ kóō lɛ íne ku Ubáyíbu nōo tɛɛma kwu ɛlā a kpaakpa, ō ya ōmiya olɔhi i gáā lɔnɔ ŋ. Amáŋ, ɔdaŋ ka íne duuma i kē yɔ nōo tɛɛma kwu ɛlā a kpaakpa ŋ bɛɛ? Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ipu uvidio a, ɔwɛ nyá nɛ ɔyinɛ nɔnya a yɛce o ya ɛɛ kóō lɛ ɔtu ku nu nwu jé klla ya ōmiya nōo he Ujehofa ɔtu a?
Ɔdiya nɛ alɔ i cika ō da ācɛ ɔhá kéē ya ōmiya nɛ alɔ cika ō ya abɔyi alɔ ŋ ma? Jé Ācɛ Uhíbru 5:14, cɛɛ ku aa kɔka lɛyikwu aɔka nōo ba nyā:
-
Naana nɛ ō da ācɛ ɔhá kéē ya ōmiya lɛ alɔ wɛ ɔdā nōo tɔɔtɛ a, ɔdi nɛ alɔ cika ō jé abɔyi alɔ a?
-
Ɔdi yɔ nōo lɔfu ta uwɔ abɔ ku a lɛ ɔtu ku uwɔ nwu jé klla ya ōmiya olɔhi a?
Lɛbɛɛka umaapu a, ɔtu ku alɔ gē ta alɔ abɔ miya ɛga nɛ alɔ géē nyɔ ipu oyeeyi a
5. Lɛ ojilima ce ɔtu ku ācɛ ɔhá
Ācɛ ɛyɛɛyɛyi géē ya ōmiya ɛyɛɛyɛyi. Ɛgɛnyá nɛ alɔ lɔfu mafu ojilima lɛ ɔdā nɛ ɔtu ku ācɛ ɔhá je ō ya a? Leyi yɛ āhɔ̄ ɛpa nyā:
Āhɔ̄ 1: Ɔyinɛ nɔnya éyi nōo gē dɔka ō ya ifa nɛɛnɛhi wa i le ta ujɔ ɛga nōó gē junwalu lɛ ayinɛ nɔnya nōo ba abɔɔ a, ɔdaŋ kéē má ācɛ nōo lɛ ifa ya nɛɛnɛhi.
Jé Ācɛ Uróm 15:1 mla 1 Ācɛ Ukɔ́rīnti 10:23, 24, cɛɛ ku aa kɔka lɛyikwu aɔka nōo ba nyā:
-
Ŋma ɛlā nɛ aɔgba nyā ka a, ɔdi nɛ ɔyinɛ nɔnya a lɔfu miya ō ya a? Ɔdi nɛ a gáā ya ɔdaŋ ku a yɔ mla ɔcɛ nɛ ɔtu ku nu i cɛ mla ɔdā nɛ ɔtu ku uwɔ jɛga gā uwɔ ō ya a ŋ ma?
Āhɔ̄ 2: Ɔyinɛ nɔnyilɔ éyi jé ka Ubáyíbu i ka ku ejé olɔfu ō gwa wɛ ɔdobɔbi ŋ, amáŋ ó le miya ka anuɔ i gáā gwa ejé olɔfu ŋ. É lɛ ɔ higwu wa ɔnu ucɛ ō lé, ɛga nɛ ó má ayinɛ nɔnyilɔ ɔhá yɔ i gwa ejé olɔfu.
Jé Ɔ̄cokóītá 7:16 mla Ācɛ Uróm 14:1, 10, cɛɛ ku aa kɔka lɛyikwu aɔka nōo ba nyā:
-
Ŋma ɛlā nɛ aɔgba nyā ka a, ɔdi nɛ ɔyinɛ nɔnyilɔ ɔɔma lɔfu miya ō ya a? Ɔdi nɛ a gáā ya ɔdaŋ ku a má ɔcɛ ɔhá yɔ i ya ɔdā nɛ ɔtu ku uwɔ da uwɔ kóō wɛ ɔdā okpaakpa ŋ?
Aɔwɛ nyá gē cɛ lɛ ɔcɛ ya ōmiya olɔhi a?
1. Ba Ujehofa kóō ta uwɔ abɔ miya ɔdā nɛ a cika ō ya.—Ujɛ́mīsi 1:5.
2. Jila ɛlā má ŋma ipu Ubáyíbu mla aɔkpá néē ta ŋma ipu Ubáyíbu ku a má aukɔ́ nɛ a géē bi le yuklɔ a. A lɔfu kɛla mla Ācɛ O Yɛce Ukraist nōo jikoko ipu ɛlā ku Ɔwɔico.
3. Leyi yɛ ɛgɛ nɛ ōmiya a géē lɛ abɔ kwu ɔtu ku uwɔ mla aku ācɛ ɔhá a.
ĀCƐ ŌHĪ GĒ KA: “A lɛ íkwu ō ya ɔdā duuma nɛ a dɔka. Ɔdā nɛ ācɛ ɔhá gbɛla a i cɛgbá ŋ.”
-
Ɔdiya nɛ alɔ cika ō lɛ ɛlá wu ɛgɛ nɛ ɔtu gē ya Ɔwɔico mla ācɛ ɔhá a?
ƆDI NƐ A NWU A?
Alɔ géē ya ōmiya olɔhi eko duuma nɛ alɔ jé ɛgɛ nɛ ɔtu gē ya Ujehofa lɛyikwu ɛlā a mla eko duuma nɛ alɔ leyi yɛ ɔ ɔdaŋ ka ōmiya ku alɔ géē ta ācɛ ɔhá abɔ amāŋ ó géē ya uwa agbe.
Aɔka ō tu alɔ ɛlá kwu ɔdā nɛ alɔ nwu
-
Ɛgɛnyá nɛ a géē ya ōmiya nōo géē he Ujehofa ɔtu a?
-
Ɛgɛnyá nɛ a géē nwu ɔtu ku uwɔ jé a?
-
Ɛgɛnyá nɛ a géē mafu ojilima lɛ ɔdā nɛ ɔtu ku ācɛ ɔhá da uwa kéē ya a?
JILA ƐLĀ NYĀ MÁ TŌŌTƆ̄Ɔ̄
Ɛgɛnyá nɛ a géē ya ōmiya nōo géē lɔfu tu ɛma ku uwɔ mla Ɔwɔico iyē a?
“Make Decisions That Honor God” (The Watchtower, April 15, 2011)
Nwu ɛlā tɔ̄ɔ̄tōō lɛyikwu ɛgɛ nɛ Ujehofa gē ta alɔ ukɔ́ a.
Nwu ɔdā nōo ta adā éyi abɔ ya ōmiya nōo lɔnɔ a.
Nwu ɛgɛ nɛ a géē ya ɔdā nōo he Ujehofa ɔtu, ɔdaŋ ka íne duuma i kóō yɔ nōo kɛla lɛyikwu ɛlā a kpaakpa ŋ.
“Do You Always Need a Bible Command?” (The Watchtower, December 1, 2003)
