ANG OJÉJE 35

Jaabwọ Kahị ka Bwu Cheje Ọnyịịla

Ahị wuu kaa cheje u-uhye nya ang lụmẹ-lụmẹ. Iru nya eje ọchịchị ịwẹ ka jẹ́-ẹ guhi bala igu oriri nyahị bala iJihova. Jaabwọ wẹẹ, ahị ka baba nyọka cheje u-uhye nya ẹga ọlẹ kahị ka kụ, abwọlẹ kahị ka bwu yé okpoko, lee kori kahị ka ye ahụ lee ọ-rwọrụ. Kori kahị cheje ọnyịịla, ahị kaa chị ọkẹkẹnị bala ọ-họ ẹla kpụ iJihova ịpyọ.

1. Ányị ịBayịbụụ à tị́ ka jẹ́-ẹ dang ụbwọ nyọka cheje ọnyịịla?

Ene á ka cheje, raabwọ ká iJihova ka dang ụbwọ bala ọ-kụ ẹhị yẹ ịBayịbụụ nyọka jẹ́ jaabwọ ká iJihova yẹ ẹla ọọwa. (Wa Etu 2:3-6.) Ụka ọhẹ, iJihova kaa da ehile kpụrụrụ u-uhye nya ịngịhyẹ. Kori kọ lịnyị aalẹ, ihi nya ehile ọọwa ojuju à ri eje ọchịchị ọlẹ kọ há gụ wuu lẹ.

Kori ká ịBayịbụụ á tị da ehile ọhẹ kpụrụrụ u-uhye nya ang ọlẹ á ka họ ka bẹẹ? IJihova ka ‘kpang ụgbẹyị ọnyịịla ọlẹ ká ka bwu.’ (Ayịsaya 48:17) Ányị ọ tị́ ka bwu họ ịnyị? Itiwe nya ehile ji ịlẹ kị ka jẹ́-ẹ mẹ ụgbẹyị jẹ́ng. Itiwe nya ehile ịla ịBayịbụụ ri ẹlịlẹhị ịkpọnchị ịlẹ kị kaa dahị ụbwọ nyọka jẹ́ irya nya iJihova. Ụka lụmẹ-lụmẹ ahị kaa jẹ́ irya ọlẹ ká Ohe la u-uhye nya ẹla ụka kahị wa oja ọhẹ bwu ịBayịbụụ. Ụka kahị jẹ́ irya nya iJihova lẹ, ahị ka jẹ́-ẹ cheje ọlẹ kọ ka kpọọ ịpyọ lẹlẹ.

2. Ẹlịyẹ a tị́ ka kụ ẹhị yẹ ene á ka cheje?

ỊBayịbụụ yẹkẹẹ: “Ọngọ jẹ ẹla . . . kaa kụ irya ju ọgụ ẹpẹtẹ ọlẹ kọ ka hu.” (Etu 14:15) Ọọwa ri, ene kahị ka cheje, ahị baba nyọka kụ ẹhị rige-rige yẹ ẹla ịdatị-datị ịlẹ kahị wẹẹ ka chụ bwu. Jaabwọ ká wẹẹ kụ ẹhị yẹ ọnyọnyọọnyị, tọ ịlọng wo: ‘Itiwe nya ehile nya ịBayịbụụ oyina m tị́ ka jẹ́-ẹ kpa họ ụkụrwọ? Oyina bwu ẹpwụ nyaa à tị́ ka ya okpunyi nya ọkịlẹtụ ham? Ányị eje ọchịchị nyam à tị́ ka gu angịkịla? Ọgụgụụgụ, ọ ka du ká iJihova ka chị ọkẹkẹnị?’—Ehile Ọmada 32:29.

IJihova la ọngịrị nyọka dahị ehile u-uhye nya ang ọnyịịla bala ang ọtịpyọ. Ụka kahị jẹ́ ehile nyamwụ bala itiwe nyaa yẹẹyẹẹ, kahị cheje nyọka baa jẹ, ahị wẹẹ mẹ ang jẹ irya oleje nyahị. Irya oleje kaa dahị ụbwọ nyọka jẹ́ ang ọnyịịla datị hi ang ọtịpyọ. (Ala iRom 2:14, 15) Irya oleje ọnyịịla ka dahị ụbwọ nyọka cheje ọlam.

JẸ́ GỤ ỌỌWA

Jẹ́ ang gụ ọọwa u-uhye nya abwọlẹ ká itiwe nya ehile ịlẹpwụ nya ịBayịbụụ bala irya oleje kaa dahị ụbwọ nyọka cheje.

3. Ya iwe da ká ịBayịbụụ a kpang ụgbẹyị

Ányị itiwe nya ehile ịlẹpwụ nya ịBayịbụụ à tị́ ka jẹ́-ẹ kpahị ụgbẹyị ụka kahị ja cheje? Yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.

IFIM: Itiwe nya Ehile Ịlẹpwụ nya ỊBayịbụụ a Kpang Ụgbẹyị (5:54)

Āhị oyina iJihova à tị́ ya hahị?
Ịyẹ tị́ du ká iJihova ya iwe hahị nyọka cheje ha ịlọhị?
Ịyẹ ọ tị́ ya hahị nyọka dahị ụbwọ cheje ọnyịịla?

Nyọka yẹ ọ-chụ pwokwita nya itiwe nya ehile ọlẹpwụ nya ịBayịbụụ, wa Ala Efesọsị 5:15, 16, kanụ ya ẹla u-uhye nya abwọlẹ ká ka bwu ‘kpa ụka nyang họ akụrwọ ịnyịịla’ ịlẹ:

ịBayịbụụ ọwawa ụka myị́ ụka.
o-ri ahụ, ọrụ, ịnịna, adịda, lee ọnyị ọnyịịla.
ọjịra-jịra ọkaka.

4. Mẹjẹ irya oleje nyang nyọka cheje ọnyịịla

Ụka ká ịBayịbụụ-ụ́ da ehile kpụrụrụ u-uhye nya ịngịhyẹ, ọ kaa chịkpẹẹ nyọka cheje. Ma kori ká ehile á tị ji u-uhye nyamwụ ka bẹẹ? Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.

IFIM: “Kịnyaa La ọ-Ka La Irya Oleje Ọnyịịla” (5:13)

Ẹ-ẹpwụ nya ifim ọwẹ, ẹta ẹdịyẹ oyina ọọnahị ọnyang ọwẹ à tị́ hu nyọka mẹ ang jẹ irya oleje nyamwụ bala ọ-ka cheje ọlẹ kọ ka kpụ iJihova ịpyọ?

Ịyẹ tị́ du kahị ka byi angịkịla nyị cheje hahị ka? Wa Ala iHiburu 5:14, kanụ ya ẹla u-uhye nya ịtọ ẹla ịlẹ:

Ịlẹhị lẹ, ọ ka chịhị kpẹẹ gụ nyọka byi angịkịla nyị cheje hahị, ma ịyẹ ahị tị́ baba nyọka jẹ́-ẹ gu ene hi awụlẹ lịlọhị?
Ang abwọ iyina à tị́ ji ịlẹ kị ka jẹ́-ẹ dang ụbwọ nyọka mẹ ang jẹ irya oleje nyang bala ọ-ka cheje ọnyịịla?

Jaabwọ ká ọngịnyị kaa yẹ ịmapụ nyọka jẹ́ ẹga, irya oleje nyahị kaa kpahị ụgbẹyị ọ-ọhịhị

5. Ju ihi nya irya oleje nya angịkịla

Angịnyị ịdatị-datị kaa cheje ịdatị-datị. Ányị ahị tị́ ka bwu ju ihi nya irya oleje nya angịkịla. Kụ ẹhị yẹ iwe-ahụrụ imiiye ịlẹ wẹẹ:

Iwe-ahụrụ 1: Ọọnahị ọnyang ọlẹ ká ịkpangkeke ọwụ́wụ kaa há yẹẹyẹẹ, mwụ́ rụ ka ọjịra-jịra ọkịla ọlẹ ká ịkpangkeke ọwụ́wụ kaa há aanahị anyang ịkịla ịlụwa ka.

Wa Ala iRom 15:1 bala 1 Ala ịKọrịntị 10:23, 24, kanụ ya ẹla u-uhye nya ịtọ ẹla ịlẹ:

Bwula ẹla ọlẹ ká ụpwụ ịgọgọ ịwẹ ya, ẹlịyẹ ọọnahị ọnyang ọwẹ à tị́ ka cheje nyọka họ myị́? Ịyẹ a tị́ ka họ kori ká juwa bala ọngọlẹ ká irya oleje nyamwụ pwa ju ịngịhyẹ ọlẹ ká ịnyang ahụ ya iwe hang nyọka họ?

Iwe-ahụrụ 2: Ọọnahị ọlẹng ọhẹ jẹ́ nyori ịBayịbụụ-ụ́ pwa ẹla nya ere ọ-nwà meme labwọ ka, ma ọ chụ nyọka cheji ba hi ere ọnwànwa gbanggbang. Ọọwa lẹ, ị tị wụrwọọ ka ọtụguru ọhẹ ọlẹ kọ yẹ aanahị kị juwa nwà ere lẹlẹ.

Wa Ọngọlirya 7:16 bala Ala iRom 14:1, 10, kanụ ya ẹla u-uhye nya ịtọ ẹla ịlẹ:

Bwula ẹla ọlẹ ká ụpwụ ịgọgọ ịwẹ ya, ẹlịyẹ ọọnahị ọlẹng ọwẹ à tị́ ka cheje nyọka họ myị́? Ịyẹ a tị́ ka họ kori ká yẹ ọngọkịla kọ juwa họ ang ọlẹ ká irya oleje nyang ahụ á myị ọnụ ju ka?

Ịyẹ a tị́ ka họ nyọka jẹ́-ẹ cheje ọnyịịla?

1. Bịlẹ iJihova kọ dang ụbwọ nyọka cheje.—IJemsi 1:5.

2. Mwahị nya itiwe nya ehile ka ẹpwụ nya ịBayịbụụ bala apwụ ị-da ịBayịbụụ wụlẹ nyahị. À ka jẹ́-ẹ ya ẹla bala Angịnyị nya ịKịrayịsị ịgbẹgbịlẹ ịnyịnyị.