LESN 35

Wa Kyan Elp Wi Fi Mek Op Wi Main Fi Du Di Rait Ting Dem?

PLIE

Aal a wi afi mek op wi main bout wa wi a-go du. An bies pan wa wi du, it kyan mek wi an Jeuova mash op ar mek wi an im ton buonifai fren. Som a di sitn dem we wi afi mek op wi main bout a laik wich paat wi a-go liv, ou wi a-go mek a livin, ar ef wi a-go marid ar wi naa go marid. Wen wi du di rait ting dem, wi a-go api an Jeuova a-go api wid wi tu.

1. Ou yu kyan yuuz di Baibl fi elp yu mek op yu main fi du di rait ting dem?

Bifuo yu mek op yu main fi du notn, yu fi prie tu Jeuova fi im elp yu an yu fi luk iina di Baibl fi si ou im fiil bout it. (Riid Pravorbz 2:3-6.) Som a di taim Jeuova mek wi si klier klier wa im waahn wi fi du. An ef wi du wa im waahn wi fi du, a di bes ting dat.

Bot, wa ef it no so klier iina di Baibl wa im waahn yu fi du? Jeuova a-go stil “shuo yu di rait wie fi go.” (Aizaiya 48:17) Ou im a-go du dat? Yu av tingz we iina di Baibl we yu kyan riizn pan we mek wi si ou Jeuova fiil bout tingz an wa im tingk bout dem. Muos a di taim a wen wi riid bout sitn iina di Baibl wi get fi nuo ou Jeuova fiil bout it. Wen wi get fi nuo ou im fiil bout it, den wi kyan du di ting dem we a-go mek im api.

2. Wa an wa yu fi tingk bout bifuo yu mek op yu main fi du sitn?

Di Baibl tel wi se: “Di wan we av sens tingk bout wa dem a-go du bifuo dem dwi’it.” (Pravorbz 14:15) Dis a-go miin se bifuo wi mek op wi main fi du notn, wi fi tingk bout it fos. Aks yuself dem kwestiyan ya wen yu a mek op yu main fi du sitn: ‘Wa a som a di ting dem we iina di Baibl we mi kyan riizn pan fi si ou Jeuova fiil bout it? Ef mi mek op mi main fi du sitn insted-a sitn els, mi a-go fiil aarait wid di wan we mi pik? Ef mi du dis, it a-go mek tingz aad fi nobadi els?’ An di bigis kwestiyan wi fi aks wiself a dis: ‘It a-go mek Jeuova api?’—Dyuutaranami 32:29.

Jeuova av di rait fi tel wi wa gud an wa bad. Wen wi get fi nuo im laa dem an ou im fiil bout tingz, an wi mek op wi main fi du wa im waahn wi fi du no mata wa, den wi a-go av wan gud kanchens. Di kanchens a wan fiilin we wi av we mek wi nuo ef sitn rait ar rang. (Ruoman 2:14, 15) Wen wi yuuz wi kanchens, it a-go elp wi fi du wa rait.

LORN SOM MUO

Luk pan som sitn we iina di Baibl we wi kyan riizn pan an ou wi kanchens kyan elp wi wen wi afi mek op wi main fi du sitn.

3. Yuuz di Baibl fi nuo wa fi du

Ou di sitn dem we wi kyan riizn pan iina di Baibl kyan elp wi wen wi afi mek op wi main bout wa fi du? Plie di VIDIYO, an den wi a-go taak bout di neks kwestiyan dem.

VIDIYO: Riizn Pan Di Sitn Dem We Yu Lorn Iina Di Baibl Fi Nuo Wa Fi Du (5:54)

Wa a wan nais prezent we Jeuova gi wi?
Wa mek Jeuova gi wi da prezent ya?
Wa Jeuova gi wi fi elp wi fi yuuz da prezent ya iina di bes wie?

Fi si sopm we wi kyan riizn pan iina di Baibl, riid Ifiijan 5:15, 16. Den taak bout ou yu kyan ‘yuuz evri chaans yu get fi du sopm gud’ fi . . .

riid di Baibl aafn.
ton wan beta ozban ar waif, wan beta mada ar faada, ar wan beta son ar daata.
go a wi kanggrigieshan miitn dem.

4. Yuuz yu kanchens fi du di rait ting dem

Wen yu kyan si klier klier wa di Baibl se bout sitn, it iiziya fi nuo di rait ting we yu fi du. Bot wa ef it no so klier? Plie di VIDIYO, an den wi a-go taak bout di neks kwestiyan.

VIDIYO: “Mek Shuor Se Wa Yu A Du Naa Bada Yu Kanchens” (5:13)

Iina di vidiyo, wa di sista did du fi mek shuor se wa shi plan fi du wuda mek Jeuova api?

Wen wi afi mek op wi main bout sitn we wi afi du, wa mek wi no fi aks ada piipl fi tel wi wa fi du? Riid Iibruu 5:14, an den wi a-go taak bout dem kwestiyan ya:

Aalduo it mait-a iizi fi aks ada piipl fi tel wi wa fi du, wa wi fi kyan du fi wiself?
Wa de de we kyan elp yu fi yuuz yu kanchens fi du wa rait?

Jos laik ou wan map mek wi nuo we fi go, a siem so di kanchens elp wi fi nuo wa fi du iina laif

5. No du tingz fi bada ada piipl kanchens

A no evribadi a-go mek op dem main fi du di siem ting dem. Ou wi kyan shuo se wi rispek we ada piipl kanchens lou dem fi du? Luk pan tuu tingz we mait-a apm:

Di fos wan: Wan sista mait-a laik fi wier miekop bot shi muuv ga’a wan kanggrigieshan we nof a di sista dem we di de no laik wen yu wier miekop.

Riid Ruoman 15:1 an 1 Korintiyan 10:23, 24, an den wi a-go taak bout dem kwestiyan ya:

Bies pan wa dem vors ya se, wa di sista mait-a mek op ar main fi du? An wa yu wuda du ef yu de roun sumadi we fi dem kanchens no lou dem fi du sitn we fi yu kanchens lou yu fi du?

Di sekan wan: Bies pan wa di Baibl se, wan breda mait-a nuo se notn no rang fi jringk likl lika, bot im mait-a stil mek op im main fi no jringk it. Som breda invait im fi go a wan likl paati an im si dem a jringk lika.

Riid Iikliiziyastiiz 7:16 an Ruoman 14:1, 10, an den wi a-go taak bout dem kwestiyan ya:

Bies pan dem vors ya, wa wan breda mait-a mek op im main fi du? Wa yu wuda du ef yu si sumadi a du sitn we fi yu kanchens no lou yu fi du?

Si som sitn ya we kyan elp yu fi mek op yu main fi du di rait ting dem

1. Aks Jeuova fi elp yu fi nuo wa fi du.—Jiemz 1:5.

2. Sorch aad iina di Baibl an iina di buk an pamplet dem fi fain tingz we mek wi si ou Jeuova fiil bout tingz an wa im tingk bout dem. Ar yu kyan go taak tu som breda ar sista we go chuu sitn laik wa yu a diil wid.

3. Tingk bout wa yu mek op yu main fi du an ef it a-go bada fi yu kanchens ar sumadi els kanchens.

SUMADI MAIT-A SE: “Yu kyan du wa yu waahn fi du; yu no afi bizniz bout nobadi els.”

Wa mek wi fi kier bout ou Gad fiil bout wa wi mek op wi main fi du an ou ada piipl fiil bout it tu?

DIS A WA YU FI MEMBA

Tingz a-go wok out gud wen wi tingk bout ou Jeuova fiil bout wa wi mek op wi main fi du bifuo wi dwi’it an ef it a-go elp ar bada ada piipl.

Wa yu did lorn iina da lesn ya?

Ou yu kyan mek shuor se wa yu mek op yu main fi du a-go mek Jeuova api?
Wa yu kyan du fi mek shuor se yu av wan gud kanchens wen yu du sitn?
Wa yu kyan du fi shuo se yu kier bout ou ada piipl fiil bout sopm?

Rait dong di diet wen yu don da lesn ya:

Du Dis

Tingk bout sitn we yu suun afi mek op yu main fi du an den du wa it se fi du iina di paat we niem: “ Si Som Sitn Ya We Kyan Elp Yu Fi Mek Op Yu Main Fi Du Di Rait Ting Dem.”

Sitn Els We Yu Fi Du:

Sitn Els We Yu Fi Du