AKANKAMU 35

Penkera nu najanatai tusar wari itiurkatniuitiaj?

ANTUKTIN, IISTIN

Penkera nu najanattsar kakartiniaitji. Penkera nu najankurkia penker pujuttaji nuya Jehová amikri ajastatji. Ii jeesha tuimpia atata nui enentaimtainti, tura itiurkaria kuitcha wainkiattaj tusha enentaimpramniaitji, nuatkatjai turutskesha nuatkashtajai tusha enentaimsamniaitji. Penkera nu najankurkia warasar pujuttaji nuya Jehovasha waramtiksattaji.

1. Penkera nu najanatniun warinma Yuusa chichame yainmakminiaitiaj?

Warinsha najantsuk Jehová seata. Jehovasha warintiawak tusam ni chichame unuimiatrata (Nekatai̱n Jintinkiartin [Proverbios] 2:3-6 aujsata). Jehová wari najanatniuitiaj nunasha turamminiaitji. Wari najanatniuitiam nuna turameakuinkia umirkata.

Tura aintsan Yuusa chichamen wari turatniuitiaj nu atsakuisha itiurkatniuit? Jehovaka penker wekasatniun jintintramattawai (Yus Kanta [Salmo] 32:8). Itiurkan jintintramat? Yuusa chichame unuitiameana nu yainmaktatui. Yuusa chichamen Jehová warintia enentaimia nu nekaamniaitji. Yuusa chichamen yaunchuk nankaamasma aujsar nuka nekaattaji. Jehová itiur enentaimia nu nekaarkia ni wakeramu najanattaji.

2. Warinkish turataj takurkia warinma enentaimsatniuitiaj?

“Enentaimniuka itiurak wekaj tusa iiniaiti” Yuus papii tawai (Proverbios 14:15 TNM). Wari turattsa wakeraj nuka najantsuk emka penker enentaimpratniuitji. Junisam enentaimsata: Ju turatniun Yuusa chichame warintiawa? Juna turakun shiir enentaimsatjash? Wi turamun chikichcha shiir enentaimsartimpiash? Nekaska Jehovan waramtiksatjash? (Muisais Ujakma [Deuteronomio] 32:29).

Warimpia yajauchit tura warimpia penkerait nunaka Jehová turamniuitji. Yuus tana nu nekaarkia umirkattaji, nuya esetar enentaimin atatji. Tuit yajauchia tura tuit penkera nuka nekaamamniaitji (Rúmanam 2:14, 15). Iik penkera nu nekaarkia penkera nu najanattaji.

PENKER NEKAATAI

Yuusa chichamejai penker enentaimsar penkera nu najanamnia nekaatai.

3. Yuusa chichame tana nu umirkata

Ii turattsa wakeramun Yuusa chichame itiur yainmaj? VIDEO iisrum juna aujmattsatarum:

VIDEO: Yuusa chichame jintinkrateana nuka tuke yainmaji (5:54)

Yuus warinia turawarat tusa ankan iniaitiamsaitiaj?
Jehová urukamtai ninki turawarat tusa ankan iniaitiamsaitiaj?
Ninki wakerusar najanainiaksha penkeran najanawarat tusa Yuus warinia amasuitiaj?

Penker jintinkratma nekaataj tusarum Ipisiunam [Efesios] 5:15, 16 aujsatarum. Tsawan wasurkaij tusar wari itiurkatniuitiaj nu aujmattsatarum.

Yuusa chichame tuke aujsatin.
Nuatnaikiamunam penker iniakmamsatin tura uchisha penker artin.
Iruntramunam wetin.

4. Amek nekaamam penkera nu turata

Wari turatniuitiaj nu Yuusa chichamen akuinkia umiktin yupichuch atatui. Wari turatniuitiaj nu atsakuisha itiurkatniuitiaj? VIDEO iisrum juna aujmattsatarum:

VIDEO: “Penker enentaimsarum wekasatarum” (5:13)

Nuwa penkera nuna najanattsa warinia tura?

Warinia turatniuitiaj nu turuttia chikich aents urukamtai tichatniuitiaj? Israernum [Hebreos] 5:14 aujsarum juna aujmattsatarum:

Warinia turattaj tusar aniastinkia yupichuchiti tumaitkiusha urukamtai iik nekaamatniuitiaj?
Wari najanatniuitiaj nu nekaamattsar iiniu unuimiatratin najanamusha tua ainia?

Mapajai itiur wetiniait nu nekatainti. Yuussha aintsan wari turatniuitiaj nu nekaamatniun amasuitji.

5. Chikich najanainia nusha arantukta

Metekcha asar metekratka najanchatainti. Chikich najanainiamu arantakrikia wari turattaj? Itiurkatniuitiaj nu jimiar nekaatai.

Ju turunamniaiti: Nuwa testigo de Jehová yapi yakartasa wakerin, chikich irutkamunam wenti tura nu irutkamunmaya nuwa testigo de Jehová ainia yakamartinian nakitin arainti.

Rúmanam 15:1 tura Jiripiusnum [Filipenses] 2:4 aujsarum juna aujmattsatarum:

Aujsajnia nui enentaimsam nu nuwa testigo de Jehová warinia turamniait? Amesha wari itiurkainmek?

Ju chikichcha turunamniaiti: Testigo de Jehová Yuus papiinium awarin nukap umarchatniuiti tana nuna neka ainti. Penkesha umarchatjai tu enentaimiainti. Chikich tsawantin nampernum wee nui chikich testigo de Jehová awartiun umuinian wainminiaiti.

Nekatai̱n Jintinkiartin [Proverbios] 3:7 tura Rúmanam 14:1, 12 aujsarum juna aujmattsatarum:

Aujsamna nui enentaimsam testigo de Jehová wariniak turamniuya? Amesha wari itiurkainmek?

Penkera nu turattsam wari itiurkatniuitiam?

1. Warinsha najanataj takumka Jehová seata (Sántiak 1:5).

2. Yuusa chichamen nuya Yuusna papii najankamu ainia nui wari najanattsa wakeram nuna yainmakmin eakta. Tura Yuusna ti neka ainiana nusha yainkiatarum titia.