DAW 35
Kaja Ai Dawdan Lam Jahkrat Lu Na Lam
Anhte yawng dawdan lam jahkrat ra ai. Dawdan lam ni gaw, Yehowa hte anhte a hku hkau lam hpe akyu shabyin ya lu ai. Ga shadawn, gara kaw nga na, tinang hkum tinang gara hku madi shadaw na, dinghku de na, n de na ngu ai hpe dawdan ra ai. Kaja ai dawdan lam ni jahkrat yang, anhte mung ngwi pyaw ai prat lu la nna, Yehowa hpe mung myit shapyaw ya lu ai.
1. Kaja ai dawdan lam ni jahkrat lu hkra Chyum Laika hpe gara hku akyu jashawn lu ai kun?
Garai n dawdan shi yang, karum shingtau lu na matu Yehowa kaw akyu hpyi u. Masa lam hte seng nna shi gara hku mu mada ai hpe chye na matu, Chyum Laika hta tam sawk sagawn u. (Ga Shagawp 2:3-6 hpe hti u.) Masa lam nkau mi hta, Yehowa gaw dingtawk lam matsun ni jaw da ai. Dai lam matsun hpe hkan sa yang, kaja ai dawdan lam ni jahkrat lu na re.
Raitim, hpa galaw na hte seng nna Chyum Laika hta dingtawk lam matsun ni n nga yang gara hku kun? Dai shaloi, “nang mai hkan ai lam hta” matut hkawm sa lu hkra Yehowa lam matsun ya na re. (Esaia 48:17) Gara hku na kun? Nang hpe lam matsun ya lu ai npawt tara ni nga ai. Chyum Laika npawt tara ni gaw, Karai a myit mang lam ni hte hkamsha lam ni hpe madun ya ai. Law malawng hku nna, Chyum Laika hta lawm ai labau langai hpe hti ai shaloi, masa lam hte seng nna Karai Kasang gara hku hkamsha ai hpe chye lu ai. Yehowa a hkamsha lam hpe chye ai nga yang, shi hpe myit shapyaw ya lu ai dawdan lam ni jahkrat lu na re.
2. Garai n dawdan shi yang gara lam ni hpe myit ging ai kun?
Hpaji rawng ai wa gaw, “tinang sa wa ai lam gawn yu nga ai” ngu Chyum Laika hta tsun da ai. (Ga Shagawp 14:15) Dai gaw garai n dawdan shi yang, anhte a lata ai lam ni hte seng nna aten la nna myit ging ai ngu ai hpe tsun mayu ai re. Lam langai hte seng nna dawdan na nga yang, tinang hkum tinang ndai hku san u: ‘Gara Chyum Laika npawt tara hpe hkan sa na kun? Gara dawdan lam gaw ngai hpe myit simsa shangun na kun? Nye a dawdan lam gaw kaga ni hpe gara hku hkra machyi shangun na kun? Ahkyak htum gaw, nye a dawdan lam gaw Yehowa hpe myit shapyaw ya lu na kun?’—Tara Jahprang 32:29.
Kaja ai, n kaja ai hpe tsun na ahkang Yehowa hta nga ai. Shi a tara ni, npawt tara ni hpe atsawm chye hkra galaw nna, dai hpe hkan sa lu hkra dawdan ai nga yang, tinang a myit nsam hpe shaman ya nga ai re. Myit nsam ngu ai gaw, jaw ai shut ai hpe chye shangun ai myit hpe tsun ai re. (Roma 2:14, 15) Shaman da ai myit nsam gaw, kaja ai dawdan lam ni jahkrat lu hkra karum ya na re.
Kahtap Hkaja
Chyum Laika npawt tara ni hte anhte a myit nsam gaw, dawdan lam ni jahkrat lu hkra gara hku karum ya ai hpe hkaja yu ga.
3. Nang hpe lam matsun ya na matu Chyum Laika hpe ahkang jaw u
Dawdan lam ni jahkrat ai shaloi, Chyum Laika npawt tara ni gaw nang hpe gara hku lam matsun ya lu ai kun? VIDEO hpe hpaw, dai hpang ndai ga san ni hpe bawngban u.
-
Wanglu wanglang lata lu ai ahkang ngu ai gaw hpa rai kun?
-
Dai hpe Yehowa hpa majaw jaw da ai kun?
-
Kaja htum dawdan lu hkra shi anhte hpe gara lam ni jaw da ai kun?
Chyum Laika npawt tara hte seng ai ga shadawn langai hpe chye na matu, Ehpesu 5:15, 16 hpe hti u. Dai hpang, lawu na masa lam ni hta “ahkying aten” hpe gara hku akyu jashawn lu ai hpe bawngban u:
-
Chyum Laika ayan hti na matu
-
Kaja ai ningrum ningtau, kanu kawa, kasha byin na matu
-
Nawku zuphpawng ni lung na matu
4. Kaja ai dawdan lam ni jahkrat lu na matu myit nsam hpe shaman ya u
Masa lam langai hte seng nna Chyum Laika hta dingtawk lam matsun da ai nga yang, jaw ai hpe lata na matu loi ai. Raitim, n nga yang gaw gara hku kun? VIDEO hpe hpaw, dai hpang ndai ga san hpe bawngban u.
-
Ndai video hta, nauna gaw shi a myit nsam hpe shaman na matu, Yehowa hpe myit shapyaw ya lu ai dawdan lam jahkrat lu na matu, gara lam ni hpe galaw wa ai kun?
Tinang dawdan ra na lam ni hpe, kaga ni dawdan ya na matu hpa majaw n hpyi shawn ging ai kun? Hebre 5:14 hpe hti nna, ndai ga san ni hpe bawngban u:
-
Tinang a malai dawdan ya na matu kaga ni hpe karum hpyi ai gaw loi tim, tinang hkum tinang ginhka lu hkra gara lam gaw karum ya lu ai kun?
-
Myit nsam hpe shaman na matu, kaja ai dawdan lam ni jahkrat lu na matu, gara lam ni gaw nang hpe karum ya lu ai kun?
Lamu ga sumla zawn myit nsam mung, anhte a prat hpe lam matsun ya lu
5. Kaga ni a myit nsam hpe myit tau ya u
Masha amyu myu hta dawdan lam amyu myu nga ai. Kaga ni a myit nsam hpe myit tau ya ai lam gara hku madun mai ai kun? Masa lam lahkawng hpe myit yu ga:
Masa Lam 1: Mik-kap grai chya ai nauna langai gaw, dai zawn chya ai hpe mu yang, myit hta shanut shanat byin ai nauna law law nga ai nawku hpung langai de htawt mat ai ngu saga.
Roma 15:1 hte 1 Korinhtu 10:23, 24 hpe hti nna, ndai ga san ni hpe bawngban u:
-
Ndai Chyum daw hku nga yang, nauna gaw gara hku dawdan ging ai kun? Na a myit nsam gaw hkraw tim, dai zawn shakya ai hpe n ra ai marai langai nga yang gara hku galaw na?
Masa Lam 2: Tsa chyaru ramdaw lu ai hpe Chyum Laika hta n hkum pat da ai lam hpunau langai chye tim, n lu na matu dawdan kau ai. Hpunau ni tsa chyaru lu ai hpe mu lu na kanawn mazum poi langai de, shi saw shaga hkrum ai ngu saga.
Hpaji 7:16 hte Roma 14:1, 10 hpe hti nna, ndai ga san ni hpe bawngban u:
-
Ndai Chyum daw hku nga yang, hpunau gaw gara hku dawdan ging ai kun? Na a myit nsam n hkraw ai hpe, marai langai galaw nga ai nga yang gara hku galaw na kun?
Kaja ai hku dawdan lu hkra gara lam ni gaw karum ya lu ai kun?
1. Hpa galaw na hte seng nna dawdan lu hkra Yehowa kaw karum hpyi u.—Yaku 1:5.
2. Hkan sa mai na npawt tara ni hpe mu tam hkra, Chyum Laika hte Chyum Laika hpe madung tawn ai laili laika ni hta tam sawk sagawn u. Mahkrum madup nga ai Hkristan ni kaw mung hpaji hpyi u.
3. Tinang a dawdan lam gaw, tinang hte kaga ni a myit nsam hpe gara hku hkra machyi na hpe myit yu u.
Nkau Mi Tsun Ai: “Nang galaw mayu ai hpa hpe raitim galaw mai ai. Kadai hpe mung myit n tau ya ra ai.”
-
Karai Kasang hte kaga ni a hkamsha lam ni hpe anhte hpa majaw myit tau ya ging ai kun?
Kadun Dawk
Lam langai hte seng nna Yehowa gara hku hkamsha ai hpe anhte chye yang, anhte a galaw ai lam ni gaw, kaga ni hpe karum ya lu ai (sh) hkra machyi hkra galaw lu ai ngu ai hpe myit yang, kaja ai dawdan lam ni jahkrat lu na re.
Bai Maram
-
Yehowa hpe myit shapyaw ya lu ai dawdan lam ni hpe gara hku jahkrat lu na kun?
-
Na a myit nsam hpe gara hku shaman ya mai na kun?
-
Kaga ni a myit nsam hpe myit tau ya ai lam gara hku madun mai na kun?
Sawk Sagawn
Karai Kasang hte hku hkau lam ngang kang shangun ai dawdan lam ni hpe nang gara hku jahkrat lu na kun?
“Karai Kasang Hpe Shagrau Lu Ai Dawdan Lam Ni Jahkrat U” (Sin Langchyi, April 15, 2011)
Yehowa jaw ai lam matsun ni hpe grau chye na hkra galaw u.
Yak ai dawdan lam langai hpe jahkrat lu hkra, la langai hpe hpa gaw karum ya wa ai hpe yu yu u.
Kaja Ai Lam Yawng Hpe Yehowa Chyu Sha Pahkam Hkam Ya Lu (5:46)
Lam langai hte seng nna dingtawk lam matsun da ai lam n nga yang, Yehowa myit pyaw hkra gara hku galaw lu na hte seng nna hti yu u.
“Chyum Laika Tara Ayan Ra Ai Kun” (Sin Langchyi, December 1, 2003)
You May Also Like
SAN CHYE AI GA SAN NI
Yehowa Sakse Ni Saw Shaga Ai Chyum Laika Hkaja Lamang Ngu Ai Gaw Hpa Rai Kun?
Manu jahpu n jaw ra ai Chyum Laika hkaja ai lamang hpe Yehowa Sakse ni saw shaga ai shaloi, gara Chyum Laika hpe raitim, nang mai lang ai. Na nta masha ni, manang ni, kadai hpe raitim, saw shaga mai ai.
