THUTO 35
Se Kwa ti Nga Shalula Cha Ka Lulwama
Ku na zwithu zwa ta ka fanila ku shalula mu buchilo. Bukhwinya gwedu na Jehova gu nga amiwa kwazo ne bunji gwe zwithu zwa ti no shalula. Ha ti fanisa, ti ngana ti ka shalula pa ti no gala, kuti ti nga zwichidza chini, kene kuti a towo ngina mu ndobolo. Ha ti shalula cha ka lulwama, towo be ne buchilo gu no shathisa kakale towo shathisa Jehova.
1. U nga shingisa Baibili chini ku shalula cha ka lulwama?
U sathu u ka shalula chingwe, tembezela ne ku lingisisa Baibili ku bona kuti Jehova u no linga chini khani iyeyo. (Bala Zwiani 2:3-6.) Mu mamo angwe, Jehova u no ti pa nlayo wa ta ka fanila ku u tobela. Ha kwa ka jalo, ha u nga shalula ku tobela nlayo uwe, nowo be wa thama zwibuyanana dumbu.
Ngono, ini cha u nga thama ha Baibili i si nga pe nlayo mu na cha wa ka fanila thama? Jehova “unomutungamilila mu zila yamakafanila yenda” mu ili. (Izaya 48:17) U nowo thama ejalo chini? Ku ngana ku kabe kuna milayontewo i nga ku batsha. Milayontewo i zila ye Ndzimu ya a no ti lakidza mikumbulo ne mazwiwo awe nayo. Kanjinji ha ti bala mbiko ingwe mu Baibili, to zwidiya ne se kwa Ndzimu a no zwiwa ne kwe khani ingwe. Ha ti hwisisa kuti Jehova u no zwiwa chini, ti nga shalula ku thama chi no nshathisa.
2. Wa ka fanila ku kumbulilani, u sathu u ka shalula chingwe?
Baibili ikati: “Ntjenjedu unolinga kwaanoyenda.” (Zwiani 14:15) Ku no dwa kuti, ta ka fanila ku zwipa chibaka ku kumbula ne kwe cha ti nowo shalula. Ha u lingisisa kuti ini cha u nga shalula, zwibuzwe: ‘I milayontewo ipi ye Baibili ya ndi nga shingisa? Mu na zwa ndi no shalula, ini chi nowo ndi shathisa? Cha ndi no shalula chowo ama bangwe chini? Pezhugwi kwa ikoko, a chowo shathisa Jehova?’—Ditironomi 32:29.
Jehova u na fanilo ye ku ti budza kuti ini cha ka lulwama kene chi sa ka lulwama. Ha ti zwidiya milayo ne milayontewo iye, ti be ti zwimisila ku i tobela, to be ne chikumbuludzi cha ka lulwama. Chikumbuludzi kene hana, i mazwiwo a no thama kuti, ti khone ku bona cha ka lulwama kene chi sa ka lulwama. (Baroma 2:14, 15) Chikumbuludzi cha ka lulwamisiwa ne Baibili chowo ti batsha ku shalula cha ka lulwama.
ZWIDIYE KWA KA NGINILILA
Lingisisa kwazo se kwa milayontewo ye Baibili ne chikumbuludzi zwi ti batsha kwazo mu ku shalula kwedu.
3. Shingisa Baibili ku ku lakidza zila
Milayontewo ye Baibili i nga ti batsha chini ha ti shalula ku thama chingwe? Zana VIDIYO, mu be mu lebesana ne kwe buzo dzi no tobela.
-
Ku sungunuka ku zwishalulila ko dwani?
-
Ini Jehova a ka thama kuti ti sungunuke ku zwishalulila?
-
Ini cha a ka ti pa, kuti ti khone ku shingisa ku sungunuka kwedu ne zila ya ka lulwama ku pindisa?
Ku bona chilakidzilo che nlayontewo we Baibili, bala Baefeso 5:15, 16. Mu be mu lebesana ne se kwa u nga “shingisa zubuyanana tjibaka tjimwe ne tjimwe” ku . . .
-
bala Baibili zwibaka zose.
-
be nlume kene nkadzi u mu ndobolo u butuka, nzwadzi, kene ngwana u butuka.
-
be po ku zwidiyo zwe gubungano.
4. Chikumbuludzi chicho, a chi ku batshe ku shalula zwibuyanana
Ku nga lingika ku sa ka ti simila ku shalula cha ka lulwama, ha Baibili i pa nlayo mu khani iyeyo. Ngono ti nga thamani ha ku sina nlayo wa ka jalo? Zana VIDIYO, mu be mu lebesana ne kwe buzo i no tobela.
-
Mu vidiyo, azwadzi wa ka thamani ku lulwamisa chikumbuludzi chiche, ne ku shalula chi nowo shathisa Jehova?
Ini ti sa ka fanila ku kumbila bangwe ku ti shalulila? Bala Bahebera 5:14, mu be mu lebesana ne kwe buzo dzi no tobela:
-
Ne ku nga lingika ku sa ka sima ku kumbila bangwe kuti ba ti shalulile, ini cha ta ka fanila ku khona thubukanya?
-
Ini cha ti nacho chi nga thama kuti u be ne chikumbuludzi chibuyanana, ne ku shalula zwibuyanana?
Koga se mmapa, chikumbuludzi chedu cho ti batsha ku shalula zila ya ti nga tola mu buchilo
5. Teta kene amuchila zwikumbuludzi zwe bangwe
Bathu banjinji ba no shalula zwithu zwi si nga fanane. Ti nga lakidza chini kuti to teta zwikumbuludzi zwe bangwe? Bona zwimo zwibili:
Chimo 1: Azwadzi u no da makeup, u no fulukila ku gubungano li na boazwadzi banjinji ba si nga toleke zwibuyanana ha be bona nthu a ka zwiboma makeup.
Bala Baroma 15:1 ne 1 Bakorinta 10:23, 24, mu be mu lebesana ne kwe buzo dzi no tobela:
-
Ku yenda ne ndimana idzedzi, azwadzi iwoyo u ngana a ka shalulani? Ini cha u nga thama ha u na nngwe u na chikumbuludzi chi si nga ndumilile ku thama chingwe chi no dumiligwa ne chikumbuludzi chicho?
Chimo 2: Nzwalani u no ziba kuti Baibili ha i to lambana ne ku ngwa busukwa, ngono ha a to ngwa busukwa. Bangwe bazwalani ba no nkumbila kuti a zhe a wo ja zojiwa zwe madekwana nabo, ngono u no bona bangwe babo be ngwa busukwa.
Bala Nreri 7:16 ne Baroma 14:1, 10, mu be mu lebesana ne kwe buzo dzi no tobela:
-
Ku yenda ne ndimana idzedzi, nzwalani iwoyo u ngana a ka shalulani? Ini cha u nga thama ha u bona nngwe e thama chingwe chi si nga dumiligwe ne chikumbuludzi chicho?
I zwithu zwipi zwi nga ku batsha ku shalula cha ka lulwama?
1. Kumbila Jehova ku ku batsha ku shalula cha u nga thama.—Jakuba 1:5.
2. Shakisisa mu Baibili ne mu tshambiso dza ka teiwa mu Baibili ku bona milayontewo ya u nga shingisa. Kakale u nga kumbila batsho mu Bakirisiti bangwe ba no thembeka.
3. Lingisisa kuti cha u no shalula chowo ama chini chikumbuludzi chicho ne che bangwe.
BATHU BANGWE BA KATI: “U na fanilo ye ku thama chingwe ne chingwe cha u no shaka. Kuti bangwe ba no kumbulani ha te khani.”
-
Ini ta ka fanila ku kumbulila kuti Ndzimu, ne bangwe ba nowo zwiwa chini?
CHA WA ZWIDIYA
Ha ti lingisisa kuti Jehova u no zwiwa chini ne kwe cha ti no shaka shalula, ne kuti mishingo yedu i nga ama bangwe chini, towo shalula cha ka lulwama.
U Nga Tini?
-
U nga shalula chi no shathisa Jehova chini?
-
U nga lulwamisa chini chikumbuludzi chicho?
-
U nga lakidza chini kuti no teta zwikumbuludzi zwe bangwe?
SHAKISISA
U nga shalula chini chi nga simisa bukhwinya gugo ne Ndzimu?
“Shalula Chi no Thama Kuti u Kudze Ndzimu” (Thungamakole, April 15, 2011)
Zwidiye kwa ka nginilila ne kwe se kwa Jehova e ti kumbuludza.
Bona kuti ini cha ka batsha nngwe nlume ku shalula chingwe nenguba kwa ka be kwa ka sima.
Jehova u no Thembesa Chingwe ne Chingwe Cha ka Lulwama (5:46)
Zwidiye se kwa ti nga shathisa Jehova nenguba a sa ti pa ndayilo ya ka tambunuka.
“A u no Sheta Ndayilo ye Baibili Nako Dzose?” (Thungamakole, December 1, 2003)
Kakale u Nga Shathila ku Bona
BUZO DZI NO BUZWIWA KANJINJI
Course ye ku Zwidiya Baibili i no Piwa ne Bafakazi ba Jehova Ndi Ipi?
U shingisa ndongoloso ye mahala ye ku zwidiya i no piwa ne Bafakazi ba Jehova, u nga shingisa Baibili ingwe ne ingwe. Sungunuka ku laletsa be nsha uwo kene bakhwinya babo.
