LISHOMO 35

Tulota kumya dashi wamushi wambone?

OMBA

Kula munu anaumya wamushi. Wamushi watumya unkuulula kuvanavo vyakumilila vyambone au vyakunyata, na unkuulula kwambukisha umbodi wetu namu Yeova. Kwampano, tunkuulula kwamuwa kwashi kwatulota kuka ndanama, lidengo shani lyatulota kukola, ikava kenga tunalomba au mene. Tukaumya wamushi wambone tunavanavo shingumi shalipuwilo na tunampuwangidya Yeova.

1. Ibibiliya ilota kukupwashela dashi kumya wamushi wambone?

Ukanava kumya wamushi, shwali kumwe Yeova ujugwa lipwashalelo badae lambela maoni lake mu Ibibiliya kwaupande wa shinu asho. (Shomya Mikong’o 2:3-6.) Myanda vinji, Yeova anatwaulila wetu nyamani shivaikidile tutende. Ikava davo, shinava shambone kwodedya ashilá shatwaulila Yeova.

Ambi mu Ibibiliya likanapagwa lilamulo litwaulila nyamani shakutenda tulota kutenda dashi? Manya kenga Yeova ‘anakulangudya indila ivaikidile wode.’ (Ishaiya 48:17) Ulota kwodedya dashi? Unaulula kupata lilamulo líkabadilika lilota kukulangalalela. Malamulo ákabadilika lamu Ibibiliya ni umwiu utupundisha mwashi Yeova mwakumbukilila na mwaligwidya. Kwaumwiu wetu tunamanya maoni a Nnungu kwaupande wa shinu shoeshoe muwakati watushomya Ibibiliya. Tukamanya mwashi mwaligwidya Yeova, tunkuulula kumya wamushi umpuwangidya nae.

2. Ikuvaikidile ukumbukile vinu shani ukanava kumya wamushi?

Ibibiliya inkushidoni: ‘Wading’ano anakumbukila shana hakanava kutenda shinu.’ (Mikong’o 14:15) Ashi mana ake tukanava kumya wamushi, ituvaikidile tukumbukile shana vinu shani vilateka. Paulambela nyamani shakutenda, lyudye doni: ‘Malamulo shani ákabadilika lamu Ibibiliya lalota kutumika mu shinu ashi? Wamushi au unangupa amani mumakumbukililo? Wamushi wangu ulota kuvambukisha dashi vanu vanji? Kupunda vinu uti wamushi wangu unanneka Yeova na lipuwilo?’—Kumbukumbu 32:29.

Yeova ankuvanavo aki yakutwaulila shambone na shakunyata. Tukamanya shana malamulo na malamulo ákabadilika lamwe Yeova tunava tayali kumwigwilila, na makumbukililo letu a muntima lanava lambone. Makumbukililo a muntima ni dimongo divele nkati mwetu ditupwashela kumanya wambone na wakunyata. (Valoma 2:14, 15) Tukadyavalakedya makumbukililo letu a muntima lanatupwashela kumya wamushi wambone.

LAMBELA KUMANYA VYOE

Manya makumbukililo a muntima na malamulo ákabadilika lamu Ibibiliya mwashi mwalota kutupwashalela kumya wamushi wambone.

3. Leka Ibibiliya ikulangalalele

Malamulo ákabadilika lamu Ibibiliya lalota kutupwashela dashi kumya wamushi? Lola VIDEO, na badae mwambangile mwaa vyakudya vya mwina.

VIDEO: Leka malamulo ákabadilika la mu Ibibiliya lakulangalalele (5:54)

Yeova atupele shawadi shani yapagweka?
Mwaa shani Yeova anditupa ulu wakwamuwa?
Yeova atupele nyamani pakulota kutupwashela kumya wamushi wambone?

Pakulota wone mpano wa malamulo ákabadilika lamu Ibibiliya, shomya Vaepeshu 5:15, 16. Badae mwambangile mwaa mwashi “mwakutumilila wakati wauvenavo” pakulota . . .

kushomya Ibibiliya kula liduva.
kuva ntwamunu, ndyamunu, jujumunu, na mwana wambone.
kupagwa pa mikutano vya pashipinga.

4. Dyavalakedya makumbukililo lako a muntima kumya wamushi wambone

Likapagwa lilamulo livalanga mwashi mwakutandela shinu, hainakamadyanga kumya wamushi wambone. Kanji napanelo likanapagwa lilamulo livalanga mwakutandela shinu asho? Lola VIDEO, na badae mwambangile mwaa shakudya sha mwina.

VIDEO: “Dyavalakedya makumbukililo a muntima” (5:13)

Numbumunu wa mu video atandile nyamani pakulota kudyavalakedya makumbukililo lake a muntima na kumya wamushi umpuwangidya Yeova?

Mwaa shani haivaikidile kuvajugwa vanu vanji pakulota vaumye wamushi palyutu lyetu? Shomya Vabalaniya 5:14, na badae mwambangile mwaa vyakudya vya mwina:

Kuvajugwa vanu vanji pakulota vaumye wamushi palyutu lyetu shinkuulula kuva shinu shíkakamadyanga, kanji kula munu ivaikidile avenavo lyululilo lyakupambula nyamani?
Vinu shani vilota kutupwashela kudyavalakedya makumbukililo letu a muntima na kumya wamushi wambone?

Makumbukililo a muntima ni kenga mapa lanatupwashela kumya wamushi mushingumi

5. Ishimu makumbukililo a muntima a vanu vanji

Wamushi wetu unkuulula kuvilingananga na wamushi wa vanu vanji. Napanelo tulota kulodya dashi kenga tunkwishimu makumbukililo a muntima a vanu vanji? Manya vinu vivili vyaatika vilota kukupwashela:

Mpano 1: Numbumunu inannagwela kupakala makiagem ankwamila ku shipinga shavaumbele valumbumunu voe vanalikuvala vakamwona munu apakele makiagem.

Shomya Valoma 15:1 na 1 Vakolintu 10:23, 24, na badae mwambangile mwaa vyakudya vya mwina:

Kulingana na maandiko ala, numbumunu aju ankuulula kwamuwa kutenda nyamani? Wako ulota kwamuwa kutenda nyamani ukava na munu ona kenga ni shinu shakunyata kutenda shinu shikubali makumbukililo lako la muntima?

Mpano 2: Nung’unumunu andimanya kenga Ibibiliya inkuvalanga hashinava shinu shakunyata kukumbila ugwalwa na kulilaledya, kanji nae andyamuwa mene kukumbila ugwalwa. Nae vaninnalika pakulota akalye ku ing’ande ya nung’unumunu, akawike ako andívona vanung’unumunu vanji vakumbila ugwalwa.

Shomya Nkúvalanga 7:16 na Valoma 14:1, 10, na badae mwambangile mwaa vyakudya vya mwina:

Kulingana na mishitali avi, nung’unumunu amuwa kutenda nyamani? Wako ulota kutenda nyamani uve na munu atenda vinu vyakunyata víkakubali makumbukililo lako a muntima?

Tutende nyamani pakulota tumye wamushi wambone?

1. Shwali kumwe Yeova ujugwa lipwashalelo pakulota umye wamushi wambone.—Tiyagu 1:5.

2. Lambela kumanya mu Ibibiliya na mu mabuku letu pakulota upate malamulo ákabadilika pakulota uvikile mmitendo. Namomo tangola na Vaklistu vapitidile matatisho kenga lako.

3. Kumbukila wamushi wako ulota kwambukisha dashi makumbukililo lako a muntima na a vanu vanji.

VANU VANJI VANKUSHIDONI: “Ninkuvanavo aki yakutenda shinu shoeshoe shingunagwela, bila kujali maoni a vanu vanji.”

Mwaa shani ituvaikidile tukumbukile maoni a Nnungu na a vanu vanji?

KWAUNGWIPI

Pakulota tumye wamushi wambone, ituvaikidile tumanye mwakumbukilila Yeova kwaupande wa shinu asho na wamushi wetu ulota kuvambukisha dashi vanu vanji.